Kryetari i Komunës së Prizrenit, Shaqir Totaj, ka nënshkruar sot marrëveshje financimi me përfaqësuesin e përhershëm të UNDP-së, Nuno Queiros.
Marrëveshja ka për qëllim promovimin e turizmit të qëndrueshëm dhe zhvillimin ekonomik në Komunën e Prizrenit, me synim të rritjes së numrit të vizitorëve dhe të kapacitetit të sektorit privat për t’u kujdesur për turistët, duke nxitur kështu një ekosistem turistik dinamik dhe të zhvilluar.
Ish-presidenti i Kosovës, Fatmir Sejdiu, ka promovuar librin “Ora e Kosovës- Pavarësia dhe Shtetndërtimi”.
Një libër i cili trajton angazhimin e ish-presidentit Sejdiu në etapa të ndryshme historike si dhe rrugëtimin e Kosovës që nga kohërat e vështira në përpjekjet për liri si dhe gjatë fazës së shtetndërtimit.
Në promovimin e këtij libri morën pjesë personalitete të shquara kombëtare e ndërkombëtare.
“Dokumentimi i këtyre ngjarjeve historike do t’i shërbejë brezave të ardhshëm për informimin dhe vetëdijësimin për rolin e shumë gjeneratave që kanë dhënë kontribut të madh për çështjen kombëtare deri në arritjen e pavarësisë, si kurorë e rrugëtimit historik të popullit të Kosovës”, ka thënë ish-kryeministri Ramush Haradinaj, i cili ishte pjesëmarrës në promovimin e këtij libri
Palestra “Shani Nushi” në Gjakovë vazhdon edhe sot (e mërkurë) të jetë nikoqire e Kupës së Kosovës në basketboll, ku zhvillohen përballjet e fundit të fazës së çerekfinales.
Trepça ka mposhtur i mbrëmë Istogun, kurse Golden Eagle Ylli e ka eliminuar Vëllaznimin, për të siguruar biletat e para drejt gjysmëfinales së kësaj gare.
Ndërsa sot (e mërkurë) do të kemi tri përballje interesante, ku edhe do të vendosen gjysmëfinalistët e fundit të kësaj gare.
Vushtrria do të luajë me New Basket, kurse Peja do të përballet me Bashkimin, ndërsa ndeshja e fundit e sotme do të jetë në mes të Sigal Prishtinës e Proton Cable Prizrenit, raporton “Ksp”.
Orari i ndeshjeve:
14:00 Vushtrria – New Basket
17:00 Peja – Bashkimi
20:00 Sigal Prishtina – Proton Cable Prizreni
Ish-kolegët e Asociacionit “Loyola-Gymnasium” në Prizren, me dhimbje e pikëllim kanë marrë lajmin për vdekjen e ish-kolegut të tyre, prof. Mark Gojanit.
“Me dhembje e pikëllim të thellë e morëm lajmin për ikjen nga kjo botë të ish-kolegut tonë, mësimdhënësit e ish-zëvendësdrejtorit të ditëve të para të Asociacionit “Loyola-Gymnasium”, prof. Mark Gojanit (09.01.1957-13.02.2024). Në mbamendjen e kolektivit tonë, prof. Mark Gojani do të mbetet si koleg shembullor, fjalëpak e modest, por thellësisht i përkushtuar për të përmbushur objektivat në të mirë të edukimit dhe arsimimit, që e pati mision tërëjetësor.”
“Gjeneratat e shumëta të nxënësve tanë do ta kujtojnë për dijen e thellë, sensin pedagogjik dhe kompetencën e lartë profesionale. Ai do të kujtohet nga të gjithë ne edhe për urtinë, shpirtin arsimdashës e atdhedashës, që e dëshmoi edhe në kohërat më të vështira, kur kërkoheshin sakrifica njerëzore për të përmbushur synimet e ëndërruara.
U prehsh në paqen e përjetshme, profesor Mark Gojani! Në kujtimet tona do të jetosh gjithmonë!”
Është miratuar projektligji për ndërtimin e tunelit në rrugën Tetovë-Prizren.
Projektligji kaloi me asnjë votë kundër dhe asnjë abstenim.
“Shqyrtimi i Projektligjit për Ratifikimin e “Marrëveshjes së Bashkëfinancimit për Hartimin e Projektit për Ndërtimin e Tunelit në rrugën Tetovë-Prizren”, është pika e katërt e mbledhjes së 188-të të qeverisë së Kosovës, e cila u miratua.
Presidentja Vjosa Osmani ka shpërndarë një video që shfaq bukuritë e qyteti të dytë më të madh në Kosovë, Prizrenit.
Ajo ka ndarë këtë video të realizuar nga Daut Elezi në prag të festës së Pavarësisë së Kosovës.
Për këtë arsye edhe ia ka bashkëngjitur hashtagun, #Kosova16.
Kryeministri i Kosovës, Albin Kurti në mbledhjen e sotme të Qeverisë foli për 3 vjetorin e fitores së LVV-së në zgjedhjet e 14 shkurtit të 2021.
Kurti tha se 14 shkurti nuk paraqet vetëm përvjetorin e një fitore elektorale, por është moment i përmbysjes më të madhe politike e demokratike në Kosovën e pas luftës
“Është revolucioni elektoral ku ngadhënjeu mirëqeverisja mbi korrupsionin, drejtësia mbi diskriminim dhe interesi i përbashkët e publik mbi atë personal e privat”, tha Kurti.
Kryeministri u shpreh se për këto 3 vite të qeverisjes dëshmuan se mund të qeveriset me duar të pastra.
“Për këto 3 vite dëshmuam se është e mundur të qeveriset me duar të pastra, duke ruajtur e mbrojtur vendin, kushtetutshmërinë e ligjshmërinë dhe paqen e sigurinë”, tha Kurti.
Kurti tha se qeveria në këto tri vite ka investuar më shumë se gjitha qeveritë e kaluara në FSK, duke e bërë një forcë serioze në mbrojtjen e paqes dhe sigurisë së vendit tonë.
“Nuk shënohet vetëm dita e dashurisë ndaj njerëzve të dashur, por shënohet edhe dita e dashurisë dhe përkushtimit ndaj Republikës tonë. 14 shkurti për Kosovën është dita e dashurisë ndaj vlerave dhe interesit të përbashkët”, u shpreh Kurti.
Përveç subvencionimit të lindjeve në Qendrën Kryesore të Mjekësisë Familjare në Rahovec, kjo komunë tashmë mbulon edhe shpenzimet e varrimit.
Kështu bëri të ditur kryetari i kësaj komune, Smajl Latifi, teksa tha se kjo iniciativë bëhet në bashkëpunim me Bashkësinë Islame, ku secila familje përfiton nga 220 euro.
“Ne i subvencionojmë edhe shpenzimet e varrimit. Përmes Bashkësisë Islame, secila familje përfiton nga 220 euro kur ka raste të vdekjes. Ne e respektojmë atë familje që ka humbur anëtarin e vet, ne duam t’i japim fuqi e përparësi”, deklaroi Latifi në tëvë1.
Ndërkaq, sa i përket subvencionimin e lindjeve në Rahovec, Latifi tregoi se në repartin e maternitetit tashmë është shtuar edhe një specialist.
“Që nga viti 2021 ne i subvencionojmë lindjet në Komunën e Rahovecit. Në vitin 2021 subvencionimi ka qenë 200 euro, në vitin 2022, 300 euro, në vitin 2023 kanë qenë 400 euro, ndërsa në këtë vit subvencionimi do të jetë 500 euro. E kemi edhe një lajm të mirë, sepse tani ka ardhur edhe një specialist tjetër me përvojë të gjinekologjisë, përveç Ilir Kadirit, e Fejrzi Kryeziut, tashmë do të jetë edhe Ejup Zeka. Që do të thotë, tani i kemi tre specialistë”, shtoi tutje Latifi.
Me ç’rast, Latifi u bëri thirrje të gjitha qytetareve të Rahovecit të cilat kanë nevojë për këtë shërbim, t’i drejtohen këtij reparti pa asnjë dyshim.
Është arrestuar një person në Malishevë pasi që i njëjti e ka penguar babanë e tij që të bëjë shitjen e një prone (të viktimës) duke dëmtuar pronën.
Poashty dyshohet se ai ka shkaktuar edhe aksident trafiku me veturë, duke e goditur veturën të cilën ishte duke e drejtuar viktima pasi që ishte nisur në drejtim të stacionit policor për ta denoncuar të dyshuarin.
Sipas policisë, viktimës i është ofruar tretman mjekësor, ndërsa i dyshuari pas intervistimit është dërguar në mbajtje.
Sot do të mbahet mbledhja e Qeverisë së Kosovës.
Në rend dite është shqyrtimi i Projektligjit për Ratifikimin e “Marrëveshjes së Bashkëfinancimit për Hartimin e Projektit për Ndërtimin e Tunelit në Rrugën Tetovë – Prizren” (MMPHI).
Po ashtu në rend dite është shqyrtimi i Propozim-vendimit për aprovimin e Ekstrakteve të Procesverbaleve dhe Transkriptet nga mbledhjet: 180 dhe 182 dhe ekstrakteve të procesverbaleve nga mbledhjet: 179, 181, 183 dhe 184 elektronikey korresponduese të Qeverisë së Republikës së Kosovës (ZKM), shqyrtimi i Projektligjit për Ratifikimin e Ratifikimin e Marrëveshjes ndërmjet Republikës së Kosovës dhe Bashkimit Evropian për pjesëmarrjen e Kosovës në Programin e Bashkimit Evropian “Drejtësia” (MD), shqyrtimi i Projektligjit për Gjykatën Administrative (MD).
Po ashtu bëhet shqyrtimi i Propozim-vendimit Përfundimtar për shpronësim për interes publik të pronave të paluajtshme të cilat preken nga realizimi i Projektit: Mbrojtja dhe Menaxhimi i Trashëgimisë Kulturore, Konservimi dhe Investimi në “Lokalitetin Arkeologjik Municipiumi Ulpiana – Justiniana Secunda” pjesë e trashëgimisë në mbrojtje të përhershme (MMPHI) Shqyrtimi i Propozim-vendimit Përfundimtar për shpronësim për interes publik të pronave të paluajtshme të cilat preken nga realizimi i Projektit: Zgjerimi i Rrugës Nacionale N9 KijevëZahaq, Segmenti Kijevë-Dollc (AMPHI), shqyrtimi i Propozim-vendimit Preliminar për shpronësim shtesë për interes publik të pronave të paluajtshme të cilat preken nga realizimi i Projektit: Ndërtimi i Autostradës Prishtinë-Gjilan-Dheu i Bardhë, Segmenti Banullë-Bresallc (MMPH) , shqyrtimi i Kërkesës së Ministrisë së Kulturës, Rinisë dhe Sportit për marrjen në shfrytëzim të pronës në Zonën Kadastrale Gënçar, Komuna Prizren, e menaxhuar nga Agjencia Pyjore e Kosovës (MKRS) dhe shqyrtimi i Propozim-vendimit për dhënien në shfrytëzim të banesës së konfiskuar, me qëllim të ofrimit të strehimit (MD).
Qeveria ka në rend dite edhe këto pika, shqyrtimi i Propozim-vendimit për të kërkuar nga Presidentja e Republikës së Kosovës dhënien e autorizimit Zëvendëskryeministrit të Parë për Integrim Evropian, Zhvillim dhe Dialog, z. Besnik Bislimi, për nënshkrimin e Amendamentimit Nr. 1 të Marrëveshjes Financiare ndërmjet Republikës së Kosovës dhe Bashkimit Evropian për Programin IPA 2020 (ZKM), shqyrtimi i Nismës për lidhjen e Marrëveshjes për Ndihmë të Ndërsjellë Juridike në Çështje Penale ndërmjet Qeverisë së Republikës së Kosovës dhe Qeverisë së Malit të Zi (MD) Shqyrtimi i Nismës për lidhjen e Marrëveshjes për Zbatim të Ndërsjellë të Vendimeve Gjyqësore në Çështjet Penale ndërmjet Qeverisë së Republikës së Kosovës dhe Qeverisë së Malit të Zi (MD), shqyrtimi i Nismës për lidhjen e Marrëveshjes për Ekstradim ndërmjet Qeverisë së Republikës së Kosovës dhe Qeverisë së Malit të Zi (MD), shqyrtimi i Nismës për lidhjen e Memorandumit të Mirëkuptimit për njohje reciproke dhe konvertim të patentë shoferëve ndërmjet Qeverisë së Republikës së Kosovës dhe Emirateve të Bashkuara Arabe (MPB), shqyrtimi i Nismës për lidhjen e Marrëveshjes së Grantit ndërmjet Republikës së Kosovës e përfaqësuar nga Ministria e Financave, Punës dhe Transfereve dhe Bankës Ndërkombëtare për Rindërtim dhe Zhvillim për projekti “Programi-Nxitja dhe Levimi i Mundësive për Siguri të Ujit” (MEFPT) , shqyrtimi i Draftit të Strategjisë të Sistemit Inteligjent të Transportit (SIT) në Kosovë për vitet 2024-2030 (MMPHI), shqyrtimi i Draftit të Koncept-dokumentit për Farërat (MBPZhR).
Qeveria do të informohet mbi zbatimin e Programit Kombëtar për Integrim Evropian gjatë vitit 2023 (ZKM), dhe mbi të arriturat në zbatimin e fazës së dytë të prioriteteve politike të dakorduara ndërmjet Bashkimit Evropian dhe Republikës së Kosovës-Agjendës për Reforma Evropiane.