Oleksandr Usyk shpreson se lufta e tij e padiskutueshme për titullin e botës në peshën e rëndë me Tyson Fury mund të zhvillohet në Arabinë Saudite në shkurt pasi britaniku të jetë rikuperuar nga dëmimet që mori nga dueli me 10 raunde me Francis Ngannou.
Kontratat u nënshkruan në shtator, por data e propozuar e 23 dhjetorit në Riad duket se nuk do të jetë e duhura pasi kampioni i WBC Fury pothuajse humbi ndaj ish-kampionit të UFC Ngannou në një ndeshje më 28 tetor.
Ukrainasi Usyk mban titujt WBA, WBO, IBF dhe IBO. Ai dhe Fury janë të pamposhtur.
Duke folur për “Reuters” nga kampi i tij stërvitor në Valencia, Spanjë, Usyk tha se data duhet të vendoset javën e ardhshme.
“Mund të jetë në shkurt dhe do të doja shumë të ishte në shkurt”, tha ai.
“Isha gati të luftoja në datën 23, por meqenëse Fury mori disa lëndime në ndeshjen e fundit, një nokdown, atëherë me siguri do të shtyhet për vitin e ardhshëm”, vijoi ukrainasi.
Lufta e shumëpritur do të kurorëzonte kampionin e parë të padiskutueshëm që nga Lennox Lewis në vitin 1999 dhe i pari i epokës me katër rripa.
“Unë thjesht do të bëj më shumë punë teknike. Teknikisht, asgjë nuk ndryshon. Kam pak më shumë kohë për disa detyra shtesë, dhe kaq”, tha ai.
“Unë nuk mendoj fare për Tyson Fury… Unë mendoj për veten time, për ekipin tim, për familjen time. Nuk kam nevojë të mendoj për kundërshtarin tim. Unë vetëm duhet të jem me të, të luftoj dhe kaq…”, theksoi Usyk.
Usyk foli për miqtë që luftonin në vijën e parë të luftës me Rusinë, besimin dhe frymëzimin e babait të tij të ndjerë dhe paralajmëroi Fury se do t’i merrte të gjitha këto në ring me vete.
“Gjithçka që bëj sot, arritjet e mia, fitoret e mia, përpjekjet e mia janë të përqendruara për të nderuar vendin tim dhe familjen time”, u shpreh ai.
Usyk luftoi me Anthony Joshua-n në Xhedah në gusht të vitit të kaluar, duke ruajtur titujt e tij në një revansh “Rage on the Red Sea” të ndeshjes në Londër në shtator 2021, ku ai mori rripat e britanikut dhe mbajti me vete edhe shpresat e një kombi atë natë.
“Personi i parë që ishte shembull për mua dhe që doja të ngjaj dhe kopjoja sjelljen e tij, ishte babai im i ndjerë që më tha se mund ta bëja”, tha ai.
“Kur qëndrova në rrethin e yjeve të mëdhenj në Arabinë Saudite, pash qiellin dhe mendova ‘E di që ju më shihni aty ku qëndroj, e di që ju shihni se ku jam dhe çfarë bëj, dhe unë jam falenderues ndaj Zotit dhe juve që më motivuat dhe më sollët këtu’”.
Shembulli i Muhamed Aliu, një hero i fëmijërisë, jep frymëzim të mëtejshëm ndërsa ai kërkon të ndjekë gjurmët e të mëdhenjve.
“Një njeri që luftoi për atë që besonte, luftoi për të drejtat e tij, për të dashurit e tij, për të drejtat e popullit të tij, për besimin e tij. Dhe gjithçka e bëri për njerëzit, për botën”, tha Usyk.
Ukrainasi shpresonte gjithashtu të luante një rol më të madh në zhvillimin e sportit.
Usyk ka bashkëthemeluar “Ready to Fight”, një platformë sociale digjitale për të lidhur boksierët me trajnerët, menaxherët, agjentët, partnerët e sportit, profesionistët e mjekësisë sportive, promovuesit, sponsorët dhe fansat.
Ai tha se ideja erdhi shumë kohë më parë, kur ai kishte probleme për të gjetur partnerë të besueshëm.
“Kjo platformë i jep shumë më tepër mundësi sportistëve dhe shumë më pak mundësi për ata që duan ta mashtrojnë”, tha Usyk.Albanian Post
