Intervistë me veprimtarin e LPK-së, Ibrahim Kelmendi

“Peshqit e mëdhenj” të pasluftës duhet të jenë marioneta të shërbimeve të huaja inteligjente

“Banda e treshes duhet të ketë grabitur rreth 70 % të ndihmave financiare, të grumbulluara për UÇK-në. Secili shtab i zonave do të duhej të dëshmonte sa ndihma ka marrë nga ato mjete. Po të guxonin dhe të bëheshin të sinqertë, do të konkretizohej akoma më shumë ky sabotim. Ta zëmë, vetë i kam pyetur Sylejman Selimin dhe Agim Çekun për kohën që ishin komandantë të Shtabit të Përgjithshëm, nëse dinë diç për qarkullim të mjeteve financiare, respektivisht nëse kanë pasur kompetencë komanduese e kontrolle mbi mjetet financiare të UÇK-së, dhe që të dy janë përgjigjur se nuk u janë dhënë as të holla xhepi sa për të blerë cigare. Shtabet e zonave i kishin në dispozicion, si ndihma, vetëm mjetet financiare që nuk i kishte grabitur banda e treshes (Xhaviti, Azemi e Hashimi), e që ishin ndoshta rreth 30 % të mjeteve të përgjithshme”, ka thënë Kelmendi

Kosova Sot”: Këto ditë u lajmërua nga Holanda se po bëhet gati të themelohet Gjykata Speciale, e cila do të ketë të akuzuar ish-drejtues të UÇK-së. Kanë qarkulluar emra, por zyrtarisht nuk dihet se kush do të akuzohet. A keni ndonjë ide se kush mund të përfundojë në këtë tribunal për krimet e supozuara të luftës?

Ibrahim Kelmendi: Jo, nuk kam, pos atyre që janë përfolur gjatë debateve, kur është votuar në Këshillin Evropian, aty ku është vendosur që të hetohet krimi i supozuar për trafikim me organe, respektivisht e ashtuquajtura “shtëpi e verdhë”. Unë qysh atëherë i kam dhënë intervistë gazetarit gjerman, Erich Ratfelder, për të dëshmuar të kundërtën e atyre akuzave, duke u thirrur në faktin se isha njëri nga administruesit e ndihmave të fondit “Vendlindja thërret” dhe po të kishim “shtëpi të verdhë” si bazë, do të isha i informuar.

“Kosova Sot”: A është e pritshme që kjo gjykatë do të arrijë t’i zbardhë edhe vrasjet politike të pasluftës, që kanë ndodhur në Kosovë, por edhe të gjykojë shumë raste të tjera kriminale të fushave të ndryshme, të cilat lidhen me “peshqit ë mëdhenj” të politikës, e të cilat nuk e pati guximin t’i trajtojë gjyqësori i Kosovës, as në kohën e UNMIK-ut dhe as EULEXi dhe vendorët pas shpalljes së pavarësisë?

Ibrahim Kelmendi: Do të dëshiroja, por jam skeptik, meqë kjo gjykatë është më shumë zhurmim sesa sinqeritet e drejtësi. Përndryshe, nuk do të angazhoheshin edhe Hashim Thaçi, Xhavit Haliti dhe të tjerë që ajo të miratohej nga Kuvendi i Kosovës. Dik Marty, Serbia, Rusia dhe miqtë e tyre e patën arritur qëllimin në Këshill të Evropës. Më shumë nuk duhet të jenë të interesuar. Pra, ata donin që të diskreditohej Aleanca, e cila kishte bombarduar Serbinë, sikur paskësh përkrah kriminelë që kanë bërë tregti edhe me organe të njerëzve. “Peshqit e mëdhenj” të pasluftës duhet të jenë marioneta të shërbimeve të huaja inteligjente dhe nuk besoj se do t’i dënojnë marionetat e tyre.

“Kosova Sot”: Por, mos të harrojmë se një herë u vu në pikëpyetje nga PDKja votimi i Speciales, vitin e kaluar, dhe u desh ndërhyrja ndërkombëtare që të miratohej gjykata. Nga ana tjetër, tash Kuvendi duhet të ratifikojë një marrëveshje me Holandën për punën e Gjykatës dhe ende nuk dihet si do të shkojnë gjërat. Si e komentoni këtë fakt?

Ibrahim Kelmendi: Mund të jetë ashtu, meqë nuk i kam mbajtur mend detajet. E di që disa parlamentarë të PDK-së ishin kundër, meqë ata po i frikoheshin. Z. Hashim Thaçi dhe z. Xhavit Haliti angazhoheshin që t’i bindnin edhe ata deputetë të rebeluar që të votonin pro miratimit. Aktualisht Gjykata është çështje e koptisur. Duhet të ketë ngelur edhe ndonjë aspekt i natyrës organizative, financiare, teknike, do të thosha. Uroj që të hetohen, akuzohen dhe gjykohen vetëm ata që kanë bërë krime, me shpresë se nga gjykata politike, e cila qe imponuar në Këshillin e Evropës, të bëhet gjykatë që do të ndajë drejtësi. Fatkeqësisht, mandatin e ka për të gjykuar vetëm krimet e mundshme të pjesëtarëve të UÇK-së, por jo krimet monstruoze të forcave fashisoide serbe ndaj popullatës shqiptare.

UÇK-në e themeloi LPK-ja

“Kosova Sot”: T’i kthehemi pak themelimit të UÇK-së nga këndvështrimi juaj. Cili ka qenë roli i LPKsë në këtë ngjarje?

Ibrahim Kelmendi: Roli i Lëvizjes (LPK) ka qenë vendimtar. E para, Lëvizja në Kuvendin e saj të katërt, të mbajtur në verë 1993 në Prishtinë (në shtëpinë e bashkëveprimtarit Fatmir Brajshori), ka marrë vendim për të themeluar forcë të armatosur ushtarake, duke e ngarkuar ekipin që duhej të zbatonte vendimin. Meqë Lëvizjen në Kosovë e goditën përndjekje e burgosje të sforcuara të policisë serbe, kompetenca statutare për të zbatuar atë vendim i kaloi Lëvizjes, dega në emigracion (ose “jashtë vendi”, siç e quanim atëherë). Në vitin 1994 Këshilli i Përgjithshëm i Lëvizjes (në emigracion) vendosi formimin e Sektorit për rëndësi të veçantë dhe e ngarkoi me kompetencë Kryesinë ta mbikëqyrë atë sektor. Gjithashtu, Këshilli i Përgjithshëm mori vendim për të formuar fondin “Vendlindja thërret”, që të mblidhnim ndihma për të ndihmuar UÇK-në financiarisht…

“Kryeministri maqedonas, sado që të ketë bërë skandale, ka një pikë respekti dhe dashurie për atdheun e tij, për shtetin e tij, për dallim prej kryeministrit kosovar, të cilit i mungon atdhedashuria tërësisht. Kryeministri i Kosovës është i zhveshur tërësisht nga skrupujt moralë”, tha analisti Nexhmedin Spahiu për “Kosova Sot”

Sado që kriza politike dhe institucionale në Kosovë po vazhdon të thellohet, partnerët e koalicionit qeverisës PDK dhe LDK, për shkak të lakmisë për vazhdimin e kapjes së shtetit, nuk po e marrin kurajën që të japin llogari para qytetarëve të vendit, dhe t’i japin fund kësaj krize, duke pranuar përgjegjësinë e tyre për gabimet e bëra. Ata mund të marrin si shembull, Maqedoninë, ku pas skandaleve dhe protestave të opozitës, kryeministri dha dorëheqje, u krijua Qeveria e përkohshme dhe pritet të mbahen zgjedhjet.

Analistët politikë këtë barrikadim të lidershipit qeverisës të Kosovës, po e cilësojnë si mungesë totale të ndjenjës së përgjegjësisë për shtetndërtim. Përgjegjësia kryesore në këtë rast, sipas njohësve të skenës politike, i bie kryeministrit të vendit Isa Mustafa. Analisti politik, Nexhmedin Spahiu, konsideron se kreu i ekzekutivit nuk ka asnjë ndjenjë përgjegjësie për shtetin, atë përgjegjësi që e ka reflektuar sadopak homologu i tij në Maqedoni. “Kryeministri maqedonas, sado që të ketë bërë skandale, ka një pikë respekti dhe dashurie për atdheun e tij, për shtetin e tij, për dallim prej kryeministrit kosovar, të cilit i mungon atdhedashuria tërësisht. Kryeministri i Kosovës është i zhveshur tërësisht nga skrupujt moralë”, tha Spahiu për “Kosova Sot”.

Me rastin e 10-vjetorit të vdekjes së Presidentit historik të Kosovës, Ibrahim Rugova, do të organizohen disa aktivitete për të shënuar përvjetorin e tij të vdekjes.
Fillimisht, kryesuesit e Degëve të LDK-së, do të bëjnë homazhe pranë varrit Rugova në Velani në orën 09:30. Ndërsa, homazhe duke filluar nga ora 10:00, do të bëj edhe presidentja e Republikës së Kosovës, Atifete Jahjaga.

Për të nderuar Presidentin Rugova dhe për të bërë homazhe pranë varrit të tij, kryetari i LDK-së njëherësh dhe Kryeministër i Republikës së Kosovës, Isa Mustafa, në orën 10:30 me anëtarët e Kryesisë së LDK-së, do të bëj homazhe tek varri i tij, i cili më pas do të vizitojnë familjen Rugova.

Ndërkaq, Lidhja Demokratike e Kosovës, duke filluar nga ora 12:00, në hotelin “Emerald”, organizon akademi përkujtimore për 10-vjetorin e vdekjes së Presidentit të Kosovës, Ibrahim Rugova.

Po ashtu, kryeministri, Isa Mustafa merr pjesë në Ekspozitën dokumentare me fotografi të ish-Presidentit, dr. Ibrahim Rugova, që do të organizohet në Bibliotekën Kombëtare në orën 14:00.

Në orën 18:00, nën patronazhin e presidentes së vendit, Atifete Jahjaga, në Teatrin Kombëtar, organizohet akademi përkujtimore me rastin për Presidentit Ibrahim Rugova.

Ibrahim Rugova vdiq më 21 janar 2006, ndërsa u varros me nderime të larta shtetërore dhe ushtarake.

Në 10 vjetorin e vdekjes së Presidentit Ibrahim Rugova, jemi mësuar të shohim homazhe të shumta tek varri i tij nga liderë partiak e fytyra publike. Mirëpo disa parti refuzojnë të bëjnë homazhe tek varri i ish- presidentit Rugova.

Sekretari i Përgjithshëm i Nismës për Kosovën, Bilall Sherifi ka thënë për televizionin Rrokum se Kryesia e Nismës për Kosovën nuk e sheh të arsyeshme të bëjë homazhe te varri i presidentit historik, Ibrahim Rugova.

Sipas tij, Rugova ka qenë kryetar i LDK-së dhe nuk ka përse ta kujtojmë duke i bërë homazhe. Madje Sherifi thotë se as partitë tjera, pos LDK-së nuk kanë nevojë ta bëjnë një gjë të tillë.

Partia e dytë e opozitës, Aleanca për Ardhmërinë e Kosovës duket se do ta vazhdojë traditën e homazheve në kujtim të Presidentit.

Ndërkaq përkundër insistimit të televizionit Rrokum, askush nga zëdhënësit e Lëvizjes Vetëvendosje nuk kanë pranuar të deklarohen rreth kësaj çështje.

As Kuvendi i Kosovës nuk ka organizuar ndonjë aktivitet në kujtim të veprës së Rugovës, ndoshta duke pasur parasysh se këtë nismë e ka marrë presidentja e vendit Atifete Jahjaga.

Në palosjen e arkave me birra kontribuuan edhe nxënësit e shkollës fillore “Bajram Curri” në Drenoc të Malishevës.

Disa prej tyre madje u fotografuan teksa po i bartnin ato në oborrin e shkollës ku mësojnë, njofton Klan Kosova.

Këtë gjë nuk e mohojnë as vet protagonistët e fotografisë që flasin në prani të drejtorit të shkollës.

E historinë e kësaj fotoje dhe prezencën e pijeve alkoolike në shkollë e shpjegon vet ushtruesi i detyrës së se drejtorit në këtë institucion.

Ai mohon se në këtë institucion arsimor është përdorur apo përdoret alkool nga mësimdhënësit.

Bile Morina thotë se ishin vet nxënësit ata që shprehen dëshirën që ngarkesat me shishe te zbrazëta birre t’i largonin nga shkolla.

E për këtë rast është e njoftuar edhe drejtoria e arsimit ne komunën e Malishevës.

Drejtori, Blerim Thaçi tha se ky rast do të hetohet.

Por, ata që i kanë fëmijët e nipat në këtë shkollë nuk po e shohin tragjike atë që u pa në fotografi.