Ish-presidenti i Kosovës, Fatmir Sejdiu, as nga Austria nuk ka kursyer kritikat në adresë të qeverisë aktuale në Kosovë.

I ftuar nga ”Akademia Austriake e Paqes” në Austri, në një bisedë për gazetën austriake “nachrichten.at”, Sejdiu ka thënë se janë iluzore pretendimet serbe për Kosovën.

“Kosova nuk është Serbi, Kosova është e Kosovës”, tha Sejdiu, i cili ishte një nga udhëheqësit e shpalljes së pavarësisë në vitin 2008.

Ish-presidenti Sejdiu ka kritikuar edhe qeverinë e Kosovës, duke thënë se kjo qeveri ka humbur shpresat e të rinjve të Kosovës. “Gjeneratat e reja e kanë humbur shpresën”, thotë ai.

“Kjo është arsyeja kryesore për largimin e mijëra kosovarëve gjatë muajve të fundit për në Austri dhe Gjermani. Qeveria duhej të bënte më shumë”, tha ai.

“Do të duhej të investohet më shumë në shpresën e njerëzve”, shprehet Sejdiu.

“Pas zgjedhjeve të vitit 2014, partitë kishin humbur gjashtë muaj për të formuar qeverinë e re. Vendi ka nevojë për reforma urgjente, sidomos në arsim dhe gjyqësor”.

“Gjithashtu marrëdhëniet me ndërkombëtarët duhet të janë edhe më të mira. Ndërsa, po ashtu duhet të punohet më shumë që Kosovën ta njohin të gjitha vendet e Bashkimit Evropian”.

Kur u pyet nëse do të kandidojë sërish për president në zgjedhjet e ardhshme, Sejdiu ka dhënë përgjigje të paqartë.

“Kjo pyetje nuk është aktuale. Për fat të keq, ende në këtë kohë presidenti zgjidhet nga parlamenti”, tha ai. /albinfo.ch/

Fatos Aliu ish-themelues i Lëvizjes Vetëvendosje, i ftuar në emisionin politiko-satirik ‘Rrokum Rroll’ në Televizionin Rrokum ka thanë se situata në Vetëvendosje tashmë është zhgënjyese.

Aliu, i dorëhequr nga Vetëvendosje ka theksua se emri i madh i Vetëvendosjes ka ra poshtë, duke shtuar se dështimet nuk vijnë menjëherë por hap mbas hapi.

Ai ka theksuar se nuk të jeshë demokrat pa qenë njeri.

Sipas tij, asht demagogji kur thuhet se jam Vetëvendosje kur hynë në korniza të tjerëve, duke shtuar se kur hynë ai brenda Kuvendit aty ka rregulla tjera.

Organizata joqeveritare në Serbi, Këshilli Rinor për Arsim, ka tërhequr ftesat për ministrat e Jashtëm të Serbisë, Bosnjës, Kosovës dhe Maqedonisë për një konferencë rajonale, ka njoftuar përmes një mesazhi në “Twitter” kjo organizatë.

Organizatorët pohojnë se kanë tërhequr ftesën për shkak se diplomatit nga Kosova i është bërë një presion i madh për arrestim, por edhe mosshfaqjes së gatishmërisë së shtetit serb për t’i siguruar ardhjen në Beograd. Organizatorët e këtij këshilli thonë se besojnë që institucionet kompetente serbe do të kryejnë me përgjegjësi punë e tyre dhe se do të veprojnë sipas aktakuzave penale të bëra, ndaj Thaçit.

“Që nga momenti kur në media u botua një version zyrtar i rendit të punës, kemi pasur presione të mëdha nga politika dhe kërcënime nga organizata të ndryshme, por dhe individët që konferenca të mos mbahet me praninë e diplomatit të Kosovës”, shkruan në njoftimin e këtij këshilli.

Gjithashtu ftesat u janë anuluar edhe ministrave të punëve të jashtme të Serbisë, Bosnjë e Hercegovinës dhe Maqedonisë.

Ministri i Punëve të Brendshme, Skënder Hyseni, është duke qëndruar për vizitë zyrtare në Bruksel. Ai ka thënë se është e padrejtë që Kosova të vazhdojë të mbetet e izoluar.

Ministri Hyseni është pritur në një takim nga drejtori i Press Klubit të Brukselit (Press Club Brussels-Evrope), Viktor Sidabras, ku më pastaj u është përgjigjur pyetjeve të shumta të gazetarëve dhe diplomatëve të shumtë në këtë prezantim. Në prezantimin e tij dhe reagimin ndaj pyetjeve të të pranishmëve, ministri Hyseni ka folur për situatën aktuale politike dhe të sigurisë në vend, duke u ndalur në veçanti te luftimi i krimit dhe korrupsionit, luftimi i ekstremizmit të dhunshëm dhe bashkëpunimi rajonal dhe ndërkombëtar në fushën e rendit dhe sigurisë.

Temë e veçantë në këtë takim me gazetarë dhe diplomatë ishte edhe liberalizimi i vizave dhe migrimi i parregullt i qytetarëve të Kosovës. Edhe kësaj radhe ministri Hyseni ka vlerësuar se është e padrejtë që Kosova të vazhdojë të mbetet e izoluar nga e drejta e lëvizjes pa viza në zonën Schengen.

Një takim tjetër të gjatë e shumë miqësor dhe përmbajtjesor, ministri Hyseni pati edhe në Parlamentin Evropian, ku u prit nga eurodeputeti Tonino Picula, raportues i PE-së për Bosnjë e Hercegovinën dhe Kosovën.

Ministri Hyseni e ka falënderuar deputetin Picula dhe Parlamentin Evropian për përkrahjen e fuqishme që i jepet pavarësisë së Kosovës, si dhe integrimit të saj në BE. Mirënjohje e veçantë iu shpreh në këtë rast Parlamentit Evropian për përkrahjen që ky institucion i jep Kosovës në procesin e liberalizimit të vizave.