Ish-krerët e MASHT-it të japin llogari për abuzimet shumëmilionëshe
Ish-ministrat, që e udhëhoqën MASHT-in, nga Qeveria e parë në vitin 2003, u fokusuan vetëm në zhvatjen, vjedhjen dhe keqpërdorimin e qindra miliona eurove përmes dhënies puro korruptive të licencave për tekste shkollore vetëm dy shoqërive oligarkike të lidhura me ministrat e MASHT-it dhe më vonë nga viti 2008 edhe blerjen e këtyre teksteve me paratë e buxhetit të shtetit te këta dy oligarkët e licencuar nga vetë ministri i radhës i MASHT-it, duke u furnizuar pa tender publik, por vetëm njëburimor, ndonëse vlera e çdo tenderi vjetor kapte shifrën 8 deri në 9.000.000,00 euro, të cilat tekste ishin ndarë falas të gjithë nxënësve të klasave I – IX. Nga dokumentacioni shihet se tekstet janë blerë nga këto shoqëri oligarkike monopoliste të afërta me ministrat e MASHTI-it, në mënyrë të kundërligjshme, me çmime të fryra, pastaj gjithashtu kanë ndërtuar shkolla me çmime marramendëse të fryra, duke bërë kontrata me shoqëritë e afërta me partitë dhe qeveritarët dhe kështu në vijimësi shumëvjeçare kanë degraduar arsimin në Republikën e Kosovës
Me t’u çliruar nga Serbia të gjithë ishin të mendimit se tani në Kosovë jeta do të frymojë më lirë dhe se të gjithë bashkërisht do të japim çdo gjë që ta ndërtojmë vendin tonë. Dhe për të ecur përpara fillimisht duhej forcuar sistemi i arsimit, që konsiderohet themel i çdo shteti. Por, në Kosovë ndodhi e kundërta, lakmia për pushtet, që nënkupton lakmine dhe babezine për para, zhvatjet me dhe pa tenderë, bëri të veten dhe çdo ministër që e udhëhoqi Ministrinë e Arsimit la pas vete shumë probleme, korrupsion e degradim total. Duhet thënë, në fakt, se MASHT-i asnjëherë nuk ka pasur ndonjë ministër të denjë që ia do të mirën arsimit, këtu duke përjashtuar ministrin aktual Arsim Bajrami, i cili po bën disa përpjekje në ngritje të cilësisë, ndonëse opozita thotë se nuk po shihet ndonjë ndryshim. Është fakt që duhet të merret Prokuroria e Shtetit, sepse shumë ministra në periudhën e pasluftës, që e udhëhoqën MASHT-in, u fokusuan vetëm në zhvatjen, vjedhjen dhe keqpërdorimin e qindra miliona eurove përmes gjoja dhënies së teksteve shkollore falas për nxënësit, duke blerë libra nga kompania oligarkike monopoliste me çmime marramendëse, pastaj duke ndërtuar shkolla me çmime po ashtu marramendëse dhe duke e degraduar arsimin në atë shkallë saqë është i pariparueshëm. Në këtë katrahurë duhet të japin llogari ish- ministrat që e kanë krijuar këtë situatë, duke nisur nga Rexhep Osmani, Agim Veliu, Enver Hoxhaj e Ramë Buja…/Kosova Sot/