Analisti politik Faik Krasniqi tha se Gjykata Speciale nuk do ta pastrojë skenën politike nga këta kriminelë e mafiozë të politikës dhe të parapolitikës, të cilët janë shndërruar në kancerin e shtetit dhe gjithë shoqërisë, pasi po bëhen pazare serioze për të shpëtuar lëkura e të mëdhenjve
Mënyra shumë e lehtë, se si u pranua Asociacioni i Komunave me shumicë serbe nga zyrtarët e lartë të shtetit të Kosovës, nga analistët politikë, ekspertë të sundimit të ligjit dhe përfaqësues të opozitës, po shihet me dyshim të madh. Ata shprehen se ky mund jetë një pazar i madh për Gjykatën Speciale, për të shpëtuar zyrtarë të lartë të shtetit.
“Kam mendim se pikërisht ajo është. Nga marrëveshja e Asociacionit dhe e Demarkacionit del se Kosova e humb funksionalitetin si shtet. Në njërën anë i janë dhënë 10 hektarë tokë Malit të Zi, ndërsa në anën tjetër Asociacioni i Komunave Serbe në Kosovë është një autonomi e gjerë për minoritetin serb. Në raportin e gazetës “Die Velt” të Republikës Federale gjermane shkruhet: “Asociacioni në Kosovë po e krijon një autonomi të gjerë, me elemente të shtetit, ku Kosova po shndërrohet në Bosnje e Hercegovinë”, thotë prof. Muhamet Kelmendi.
Sipas tij, ky fakt tregon se Asociacioni në Kosovë ka kompetenca juridike, kushtetuese, administrative, gjyqësore, të rendit dhe sigurisë, përkatësisht kompetencat e shtetit. “Unë mendoj se e gjithë kjo është e përgatitur nga Thaçi. Ai këtë e vërtetoi edhe mbrëmë, kur me paturpësi e mbrojti kapjen e pushtetit dhe faktin se ai dhe vetëm ai është shkatërrimtari i vendit”, tha prof. Kelmendi…/kosova sot/