Ish-ministri i MTPT-së, Fatmir Limaj, ka folur për media pas përfundimit të seancës së Gjykimit, e cila ka nisur nga mëngjesi i ditës së sotme. Limaj krejt këtë proces e ka quajtur me prapavijë politike dhe, sipas tij, këtë do ta dëshmojë me kohë.
“Ju do të shihni që me urdhër politik prokuroria i ka hapur hetimet ndaj meje, me urdhër politik ka bërë ndjekje. Ne i kemi faktet dhe do ta vërtetojmë që kanë qenë urdhra politikë”, ka thënë Limaj.
Ai ka thënë se prokuroria ka abuzuar me ligjin duke zbatuar urdhrat politikë.
“Se kush dha urdhrat politike do ti shihni ne sallën e gjyqit, ne i kemi faktet, dokumentet që e dëshmojnë”, ka thënë ai. /Gazeta Fjala
Avokatët: Aktakuza ndaj Limajt dhe të tjerëve nuk është legjitime
Avokatët mbrojtës në rastin MTPT, kanë deklaruar se kjo aktakuzë nuk është e ligjshme për shkak se përmban termin aktakuzë e konsoliduargjë që nuk e njeh ligji një term të tillë.
Sipas tyre, ligji e njeh termin aktakuzë e zgjeruar apo e ndryshuar dhe kanë thënë se nuk e dinë se cka do të thotë me termin aktakuzë e konsoliduar.
Avokatët kanë shprehur shqetësimin e tyre se si do të vazhdojë ky rast nëse nuk përmirësohet.
Ndërkohë, trupi gjykues ka shkuar në një pauzë për t’u konsoliduar se si do të veprojnë në vazhdim.
Seanca për harmonizimin e datave të gjykimit në rastin e MTPT-së, ku po akuzohet Fatmir Limaj dhe të akuzuarve të tjerë, ka filluar me njoftimin e përfaqësuesve të palës mbrojtëse dhe trupit gjykues.
Këtë të fundit kanë ndryshuar dhe kjo ka bërë që të reagojnë avokatët, duke e quajtur si shkelje esenciale të procedurave gjyqësore.
Fatmir Limaj po përfaqësohet nga avokatët Tahir Recaj dhe Tomë Gashi, e Endrit Shala-me dy avokatët Arianit Koci dhe Granit Vokshi, Nexhat Krasniqi me avokatin Bujar Mavraj, Florent Zuka me dy avokatët Blerim Prestreshi dhe Hekuran Haxhimusa, si dhe Shpetim Kelaku me avokatin Sevdali Zejnullahu.
Kurse, kryetar i trupit gjykues është Maria Tuma, me anëtarët e tjerë Jeniifer Fill dhe Isuf Makolli, dhe stafi mbështetës.
Avokatët mbrojtës në përgjithësi kanë thënë se gjyqtarët dhe trupi gjykues nuk është i njëjtë në raport me seancat e kaluara dhe që sipas tyre paraqet shkelje esenciale.
Maria Tuma ka thënë se për shkak se gjyqtarja e trupit gjykues të seancave të kaluar Anna Adamsa tani ka një pozitë tjetër është dashur të zëvendësohet me një anëtar të ri të trupit gjykues.
Limaj kërkon të lejohen mediat në sallë: Dua të tregoj çfarë ndodhi këto vite
Fatmir Limaj, i akuzuar në MTPT 2, ka kërkuar nga trupi gjykues që të lejohen mediat gjatë seancës gjyqësore të tij dhe tre të akuzuarve tjerë.
“Të lejohen mediat, sepse ka interes publiku të dëgjojë se çfarë ka ndodhur në 6 vitet e kaluara në këtë rast, sepse këtu nuk ka asgjë për të fshehur”, ka thënë Limaj.
Seanca ndaj Fatmir Limaj dhe tre te pandehurve tjerë Nexhat Krasiniqi, Florim Zuka dhe Shpetim Telaku është duke u mbajtur në Pallatin e Drejtësisë në Prishtinë.
Limaj arrin në gjykatë
Ish-ministri i Transportit iu ka përgjigjur ftesës së Gjykatës Themelore të Prishtinës, ku ka filluar seanca përharmonizimin e datave të gjykimit në rastin e MTPT-së.
KosovaPress ka kontaktuar mëngjesin e sotëm me avokatin Tomë Gashi, i cili është në mbrojtje të Fatmir Limajt. Gashi tha se “sot në Gjykatën Themelore në Prishtinë, nuk do të ketë seancë gjyqësore nga Fatmir Limajt dhe të tjerëve në rastin e akuzimit të tyre për të ashtuquajturin ‘rasti i MTPT’. Sot do të ketë vetëm seancë për harmonizimin e datave të gjykimit në mes të prokurorit, avokatëve dhe të akuzuarve”.
Limaj dhe 4 bashkëpunëtorët e tij akuzohen për krim të organizuar, keqpërdorim të detyrës, marrje ryshfeti e keqpërdorim të autorizimeve.
Aktakuzat për Fatmir Limajn ish-ministër i Transportit, Fatmir Limaj, këshilltari i tij, Endrit Shala, shefi i prokurorimit, Nexhat Krasniqi, biznesmeni Florim Zuka dhe truproja e Limajt, Shpëtim Telaku u konsolidua në shtator të këtij viti./KosovaPress/