“Unë kam biseduar edhe më herët me familjen Zejnullahu dhe të gjithë kanë qenë të njoftuar se vrasja e këtyre djemve ka ndodhur si pasojë e rënies në burg të Nait Hasanit , Bislim Zogaj e të tjerëve”, thotë në një intervistë ekskluzive për Bota press, Hasan Zeneli.

Hasan Zeneli, një prej bashkëluftëtarëve të Zahir Pajazitit ka marrë në mbrojtje familjet e dëshmorëve Zahir Pajaziti, Hakif Zejnullahu dhe Edmond Hoxha dhe ka kërkuar përsëri që të zbardhet i gjithë misteri i vrasjes së 1 janarit të vitit 1997 në një pritë të organizuar në afërsi të Vushtrrisë.

Por kjo nuk është hera e parë që Hasan Zeneli kërkon që të zbardhet e vërteta e vrasjes së Zahirit, Hakifit dhe Edmondit.

Hasan Zeneli, në një intervistë të dhënë për gazetën Bota sot, në maj-qershor të vitit 2011 për herë të parë drejtoi gishtin kah disa prej të vetëquajturve komandantë të UÇK-së duke i ftuar ata jo vetëm që të flasin për këtë vrasje por edhe të marrin përgjegjësinë e kësaj vrasje.

Atëbotë, pra më 2011, Hasan Zeneli pat pyetur: Pse Grupi i Llapit kundërshtoi dërgimin e Nahit Hasanit si koordinator për Grupin e Llapit? Kur është mbajtur takimi i parë në mes të Zahir Pajazitit e Nahit Hasanit? Kur është takuar për herë të parë Zahir Pajaziti me Azem Sylën dhe cila ishte porosia e Azem Sylës për Zahirin? Pse Zahiri refuzoi prosoinë e Azem Sylës për të bërë atentat ndaj presidentit Ibrahim Rugova? Pse kur e pyeta Zahirin se si kalove në takim me Azem Sylën, Zahiri më tha: ”Hiqu tij, nuk dua as ta shoh më kurrë!”. Pse nuk u lejua që anëtarë të Grupit të Llapit të jenë edhe Nuredin Ibishi e Faik Pajaziti? Cila ka qenë porosia e Ibrahim Rugovës që i ka dërguar te Grupi i Llapit përmes Rexhep Gjergjit? Pse Azem Syla, Xhavlit Haliti, Ali Ahmeti e Sokol Bashota dëshironin të bëheshin “komandantë” të UÇK-së nga diaspora? Si u vra Zahir Pajaziti vetëm 10 ditë pas arrestimit të Nahit Hasanit? Cilat in formacione ka mundur t’i japë policisë serbe Nahit Hasani i torturuar nga policia serbe? Pse kur u arrestova unë më 27 prill 1997, inspektorët e sigurimit më përmendin vazhdimisht “Abazin”, pseudonimin e Nahit Hasanit? Pse Nahit Hasani viktimë e kreut të dhunshëm të UÇK-së, që kanë emrin e Azem Sylës, Xhavit Haliti, Ali Ahmeti, Sokol Bashota? Pse kërkoj nga Azem Syla që të jap llogari për vrasjen e Zahir Pajazitit, Edmond Hoxhës e Hakif Zejnullahut?

Të gjitha përgjigjet e këtyre pyetjeve i pat dhënë Hasan Zeneli që në vitin 2011.

Por duket se këto pyetje kërkojnë përsëri përgjigje.

Duke u nisur nga deklarimi i fundit i babait të Hakif Zejnullahut i cili e bën përgjegjës Nahit Hasanin e Bislim Zogajn për vrasjen e djalit të tij Hakif Zejnullahut, bashkëluftëtari i Grupti të Llapit, Hasan Zeneli në një intervsitë ekskluzive për Bota press e vlerëson shumë pozitivisht këtë kërkesë të familjes Zejnullahu , sepse kjo familje dhe familja Pajaziti , po ashtu edhe familja Hoxha kanë të drejtë që të kërkojnë sqarim nga i ashtuquajturi kreu i Ushtrisë Çlirimtare të Kosovës për vrasjen e këtyre djemve.

“Unë kam biseduar edhe më herët me familjen Zejnullahu dhe të gjithë kanë qenë të njoftuar se vrasja e këtyre djemve ka ndodhur si pasojë e rënies në burg të Nait Hasanit , Bislim Zogaj e të tjerëve.

Bota press: Z.Hasan a keni biseduar me familjet e Zahirit, Hakifit e Edmondit për këtë vrasje?

H. ZenelI: Kam biseduar, por në veçanti kam biseduar shume me familjen e Zahirit për shkak se edhe atëherë edhe sot e ndjej obligim moral që vrasja e Zahirit të zbardhet definitivisht , për shkakun se në opinion ende ka dilema se Zahiri, Edmondi dhe Hakifi janë vrarë në një pritë të organizuar në bazë të informacioneve që kanë rrjedhë nga disa të burgosur të atëhershëm, konkretisht nga Nahit Hasani e Bislim Zogaj .

Mos të harrojmë Zahiri ishte njëshi i Ushtrisë Çlirimtare të Kosovës dhe mendoj që ja vlen që të angazhohemi më shumë të gjithë së bashku për të qitur në dritë se si ndodhi vrasja e tyre. Flas me përgjegjësi të plotë morale dhe kam të drejtë të flas sepse isha bashkëluftëtar i Zahirit dhe të mirën dhe të keqen e kemi ndarë së bashku . Por sikur te isha vrarë unë në rrethana të tilla , z. Zahiri nuk kishe reshtur kurrë derisa ish ardhur deri te zbulimi i vrasjes time. Prandaj edhe unë nuk do të ndalem kurrë duke kërkuar që të zbardhet misteri i vrasjes së Zahirit, Hakifit e Edmondit.

Bota press; Ju keni biseduar me Nahit Hasanin për këtë vrasje?

H.Zeneli: Po gjatë qëndrimit në burg me Nait Hasanin, kam biseduar rreth këtij problemi shumë të madh dhe Naitit i kam thënë: Nait ndodhi çka ndodhi, është mirë dhe është e rrugës që kur të dalim në liri të shkosh tek familja e Zahirit , Hakifit dhe Edomondit dhe tu kërkosh falje për atë që ka ndodhur dhe njëkohësisht të na kërkosh falje edhe neve shokëve dhe bashkëluftëtarëve të Zahirit dhe të shohim më tutje se çka do të ndodhë rreth rënies sonë që pasoj me vrasjen e tre djemve të tjerë.

Botapress:Kur ja keni bërë me dije këtë dhe ku keni qenë në burg?

H. Zeneli : Ne së bashku kemi qenë në hetuesi në Prishtinë në Burgun e Prishtinës më tepër se 16 muaj në vitin 1997 deri në vitin 1998 kur na transferuan nëpër qelia e burgut famëkeq të Mitrovicës së Sremit ku jemi torturuar në mënyrë çnjerëzore dhe shumë barbare.

Botapress: Çka ka thënë Nait Hasani kur ju i keni thënë që të sqarohet kjo çështje. Cili ka qenë reagimi i tij?

H.Zeneli Reagimi i tij ka qenë sikurse ai nuk e ka dekonspiruar Zahirin. Ai nuk e pranoi se ai është personi që e ka dekonspiruar Zahirin , shokët e tij dhe komplet grupin .

Bota press: Ai nuk pranoi që të shkojë te familja e tij?

H.Zeneli:Jo, nuk pranoi!

Bota press: Megjithatë ai thotë se i kam sqaruar këto gjëra?

H.Zeneli: Jo nuk e ka sqaruar. Ai nuk e di çka thotë sot . Unë i përcjelli intervistat e secilit nga shokët dhe unë nuk e di , nuk jam i njoftuar se ai i ka sqaruar këtë problem shumë madhor për neve. Them këtë shumë madhor sepse unë e njoh frymëmarrjen e Zahirit unë e kam njohftë të menduarit e tij, fuqinë ekzekutive të tij , sepse kam qenë zëvendësi i tij çdo herë , çdo hap deri në ramjen time në burg . Pastaj konsideroj se kjo punë duhet doemos të sqarohet , sepse mua më janë vrarë tre shokët më të mirë, Zahiri, Edmondi Hakifi. Shumqka kemi kaluar me ta. /botapress/

Sekretari Organizativ i AAK’së, Blerim Kuçi, në një intervistë për Express, ka thënë se s’mund të ndryshohet baza e marrëveshjes së arritur mes Isa Mustafës, Ramush Haradinajt e Fatmir Limajt. E baza, sipas tij, është pozita e kryeministrit. Kuçi thotë se Blloku nuk do të lëshojë pe as sa i përket pozitës së kryeparlamentarit, sepse e njëjta pastaj mund të ndodhë edhe me mandatarin e Qeverisë.

Express: Cila është zgjidhja, sipas jush, në krejt këtë bllokadë politike, e cila është krijuar pas zgjedhjeve të 8 qershorit?

B. Kuçi: Më shumë po më duket lojë nervash në përgjithësi mes koalicioneve dhe partive politike dhe lojë nervash edhe me qytetarë. Zgjidhja është shumë normale dhe ai që ka shumicën në Parlament nuk ka kuptim të mos i krijojë institucionet shtetërore. Cila do të jetë zgjidhja, unë, tash për tash nuk e di.

Express: Enver Hasani e ka qartësuar se pozita e Kryetarit të Kuvendit i takon vetëm grupit më të madh parlamentar, në këtë rast, PDK’së. Njëra prej zgjidhjeve që po përmendet është që Blloku të heqë dorë nga pozita e kryeparlamentarit për të formuar pastaj qeverinë?

B. Kuçi: Kjo pyetje është për liderët e Bllokut dhe ata kanë përgjigje edhe për këtë. Qysh po e shoh unë, deklarata e Enver Hasanit është krejtësisht politike. Me këtë deklaratë ai ka treguar animin e tij në drejtim të PDK’së. Deklarata e Enver Hasanit në këtë formë e ka vërtetuar, e ka konfirmuar, e ka argumentuar që ai ka anime politike në raport me këtë rast.

Express: Disa zyrtarë të LDK’së kanë kërkuar ridizajnim të marrëveshjes së Bllokut. Sa është e mundshme një rishikim i kësaj marrëveshje?

B. Kuçi: Ndoshta ka mundësi, por baza e kësaj marrëveshje në qoftë se nuk lëviz. Gjithçka është e mundshme, por me kusht që baza, pra themelet e marrëveshjes të mos ndryshojnë. Sepse gjithçka është e mundshme. Për mua me rëndësi është që PDK’ja në mënyrë definitive të mos e ketë mandatin tjetër, sepse i ka bërë shumë dëme Kosovës. Duke u nisur prej këtij parimi zgjidhjet edhe brenda Bllokut mund të gjenden.

Express: Rrjedhimisht, zyrtarët e LDK’së kanë kërkuar që marrëveshje të preket në themel dhe z. Mustafa të bëhet kryeministër e jo Haradinaj, siç parashihet në marrëveshje?

B. Kuçi: Po e them thuajse nuk ka mundësi, sepse baza e marrëveshjes nuk mund të ndryshohet. Megjithatë, gjithçka është e mundshme duke pasur parasysh rëndësinë e këtij projekti që PDK të shkojë në opozitë. Mirëpo, duhet ta kemi parasysh se baza e marrëveshjes, fundamenti i saj që është pozita e Kryeministrit nuk mund të ndryshohet. Mund të ketë edhe zgjidhje tjera e jo vetëm çështja e Kryeministrit.

Express: Cilat janë zgjidhjet tjera?

B. Kuçi: Zgjidhjet tjera janë, unë po besoj, se liderët veç janë duke biseduar së bashku. Nuk po dua t’i them përmes mediave, por liderët janë të vetëdijshëm për situatën që është në Kosovë. Janë të vetëdijshëm çfarë vlerë është që PDK të shkojë në opozitë dhe e gjejnë zgjidhjen e tyre.

Express: Mirëpo, deri më tash, Blloku ka dëshmuar se më e rëndësishme është pozita e kryeparlamentarit se sa largimi i shpejtë i Thaçit nga Qeveria?

B. Kuçi: Duke e pasur parasysh deklaratat politik të Enver Hasanit, ne edhe nëse e gjejmë një zgjidhje për kryeparlamentarin prapë do të jetë e njëjta situatë për çështjen e mandatimit të mandatarit për Qeveri. Kjo lojë neve na ka shtyrë të dyshojmë që është një pjesë e lojës së z. Hasanit dhe të tjerëve sa i përket çështjes së kryeparlamentarit. Për të dalë nga kjo situatë e kishim gjetur një zgjidhje por kjo lojë do të shkonte edhe më tutje lidhur edhe me mandatarin. Deklarata politike e z. Hasani e ka vërtetuar se kjo është lojë dhe PDK përmes bllokimit të institucioneve, çfarë është edhe Gjykata Kushtetuese do të na fuste në një lojë e cila vërtetë është e dëmshme edhe për këtë proces. Pra, ka mundësi që siç ka ndodhur me kryeparlamentarin, edhe për mandatarin t’ia jap disa herë Thaçit. Duke qenë të vetëdijshëm për këtë çështje ne nuk kemi qenë tolerant as për kryeparlamentarin.

Express: AAK nuk lëvizë prej marrëveshjes sa i përket pozitës së kryeministrit?

B. Kuçi: Nuk lëviz prej marrëveshjes sepse nuk është zgjidhje. Lëshimi pe në raport me Kryeparlamentarin nuk do të thotë se Gjykata Kushtetuese nuk e bën të njëjtën gjë edhe me mandatarin.