PDK thotë se ajo e ka grupin më të madh parlamentar dhe i takon ta propozojë dhe zgjedhë kryetarin e kuvendit. Blloku opozitar thotë se i takon atij zgjedhja e kryetarit, sepse ka grupin më të madh parlamentar.

Deputetët e tri subjekteve politike, ata të Lidhjes Demokratike të Kosovës (LDK), Aleancës për Ardhmërinë e Kosovës, (AAK) dhe të Nismës për Kosovën, u regjistruan në Kuvendin e Kosovës si një grup parlamentar. Me këtë veprim, deputetët e bllokut opozitar po synojnë që të jenë grupi më i madh parlamentar me 47 deputetë në kuvend, në mënyrë që ta marrin postin e kryetarit të Kuvendit me mbështetjen edhe të lëvizjes Vetëvendosje, e cila përfaqësohet me 16 deputetë.

Kryetari i LDK-së, Isa Mustafa, tha se LDK, AAK dhe Nisma do të prezantohen në kuvend si një Grup dhe se ai vetë do të jetë kryetar i këtij grupi parlamentar.

Mirëpo, ish-shefi i grupit parlamentar të Partisë Demokratike të Kosovës (PDK), Adem Grabovci, thotë se PDK që ka 37 deputetë mbetet grupi më i madh parlamentar, sepse sipas tij, ligjet dhe Kushtetuta e Kosovës nuk njohin koalicione paszgjedhore.

Sidoqoftë, më 17 korrik presidentja e Kosovës Atifete Jahjaga, caktoi seancën konstituuese të Parlamentit të Kosovës. Në këtë seancë pritet të vërtetohet grupi më i madh parlamentar, të cilit i takon edhe propozimi i parë për zgjedhjen e kryetarit të Kuvendit të Kosovës. Mirëpo, analistët qysh në këtë seancë parashohin ngërçin e parë politik rreth të së drejtës për kryetar të kuvendit.

Këto ditë në debate të shumta është përmendur edhe çështja e një qeverie teknike, si një nga idetë e shumta për të evituar siç thuhet ngërçin politik. E gjithë kjo pas ndarjes së spektrit politik kosovar tashmë në dy blloqe.

Imer Mushkolaj tha se krijimi i një qeverie teknike është i mundshëm nëse nuk zgjidhet ngërçi politik.

“Kjo nuk është zgjidhja më e mirë dhe, po qe se ekziston vullneti politik, qeveria do të krijohet pa pasur nevojë për zgjedhje të reja, të cilat nuk do t’i konvenonin askujt në këtë moment përveç PDK-së. Sidoqoftë, çfarëdo qeverie që do të krijohet nuk do të mund ta çojë mandatin deri në fund. Zgjidhja për konstituimin e institucioneve duhet gjetur shpejt, përndryshe kriza do të thellohet dhe qytetarët janë ata që do të pësojnë më se shumti”, thotë Imer Mushkolaj.

Përfaqësuesit ndërkombëtarë në Kosovë që nga shpallja e rezultatit të zgjedhjeve vazhdimisht e përsërisin se prania ndërkombëtare nuk përzihet në formimin e institucioneve. Përfaqësuesi i BE-së në Kosovë, Samuel Zbogar, thotë se u takon partive politike, që pas zgjedhjeve të cilat ishin mirë të organizuara, t’i formojnë vet institucionet e reja. /DW/

Nënkryetari i LDK-së, Haki Rugova ka hedhur poshtë mundësitë që Kosova të shkojë në zgjedhje të reja. Ai ka thënë se koalicioni LDK-AAK-NISMA do ta formojë qeverinë e re para shtatorit.

“ Nuk pres të kerr zgjedhje të reja për arsye se do të funksionojë koaliciononi LDK-AAK-NISMA, i cili ka numrat në Kuvendin e Kosovës”, ka thënë Rugova duke shtuar se akush nuk mund të prishë ujdinë e krijuar ndërmjet këtyre tri partive politike.

Rugova ka thënë se nuk do të paraqesin problem as kushtet të cilat i ka vënë partia e Albin Kurtit.

“Çdo marrëveshje behët ne bazë të kompromiseve dhe ne si LDK nuk mund të punojmë me kushte të kujdo qofshin ato. Ne nuk mund ta kemi lakun ne fyt as prej Vetëvendosjes e as prej askujt. Ne qoftë se ata mendojnë se Kosova nuk duhet tash e tutje të qeveriset nga Hashim Thaçi, atëherë duhet të na përkrahin. Prandaj e presim përkrahjen e Vetëvendosjes”, ka thënë Rugova./Epoka e Re/.

Shefja e politikës së jashtme të Bashkimit Evropian, Catherine Ashton, ka kërkuar nga ekipi i saj në Bruksel që të thërrasë për të premten (sot) një takim midis Kosovës dhe Serbisë për të gjetur një zgjidhje për të gjitha çështjet që lidhen me Urën e Mitrovicës, në përputhje me marrëveshjet e arritura në dialogun e lehtësuar nga BE-ja dhe në frymën e normalizimit të marrëdhënieve.
Pardje, në veri të Mitrovicës ka nisur ndërtimi i sheshit Car Lazar, i cili prek cepin verior të urës qendrore mbi lumin Ibër.

Si kundërpërgjigje, banorët shqiptarë në Lagjen e Boshnjakëve kanë vendosur një cilindër betoni duke e emërtuar atë Sheshi Adem Jashari, të cilit kryetari i Mitrovicës veriore Goran Rakiq ia ka bërë benë se do ta largoj.

E po ashtu dhe një tjetër shesh është ndërtuar mbrëmë i quajtur “UÇK”.

Arben Gashi ka plotësuar sot formularin e regjistrimit të Deputetit në Kuvendin e Kosovës, duke u shënuar në përkatësinë politike si LDK-AAK-Nisma.

Ndonëse ky formular nuk nënkupton regjistrimin e Grupit Parlamentar, por vetëm regjistrimin individual të deputetëve, përfaqësuesit e partive që tashmë kanë arritur Koalicionin Opozitar kanë deklaruar gjatë ditë së sotme e ana ligjore ua mundëson krijimin e grupit të përbashkët parlamentar.
Ndërsa, Isa Mustafa, sipas Marrëveshjes së Koalicionit, do të jetë i propozuari për Kryetar të Kuvendit.

Mirëpo, siç raporton Kosovapress, Deputeti i LDK’së, Arben Gashi, ka thënë se ende nuk kanë vendosur në Këshillin e Përgjithshëm të LDK’së se kush do të jetë Kandidat për Kryeparlamentar.

Kështu, me këtë deklaratë, Arben Gashi nuk e ka konsideruar si fakt të kryer kandidaturën e shefit të tij, Isa Mustafa.

Këshilli i Përgjithshëm i LDK’së pritet të mblidhet nesër, në orën 16:30, ku do të diskutohet Marrëveshja e Koalicionit Opozitar, e cila postin e Kryeministrit ia ka dhënë liderit të AAK’së, Ramush Haradinaj, ndërsa Isa Mustafës ia ka rezervuar postin e Kryeparlamentarit, por që nuk dihet me siguri të plotë nëse do të mund ta marrë atë.

Arben Gashi, i cili ka fituar mandatin e dytë radhazi, ka thënë se ai është regjistruar sipas vendimit të Grupit Parlamentar të LDK’së, i cili është LDK-AAK-Nisma, ndonëse, sipas tij, ai ka opinionet e tij rreth këtij vendimi, por e ka respektuar atë.

Regjistrimi i deputetëve ka filluar dje me deputetët e PDK’së, ka vazhduar sot me deputetët e LDK’së dhe AAK’së, ndërsa nesër do të regjistrohen deputetët e Vetëvendosjes, Nismës për Kosovën dhe të komuniteteve pakicë./politiko.net/

Pas tri orësh, përfundoi takimi mes krerëve të katër partive politike: Isa Mustafa (LDK), Albin Kurti (VV), Ramush Haradinaj (AAK) dhe Fatmir Limaj (Nisma).
Për media nuk u deklaruan Mustafa dhe Limaj, ndërkaq Kurti tha se në takim ishin 12 persona, nga tre prej secilës parti.

“Ky ishte takimi më përmbajtjesor. Kaloi një muaj që është vendosur të mos lejohet qeveria e re e regjimit të vjetër. Para një muaji pakkush ka besuar se partia në pushtet nuk do të ndryshojë dakordimin tonë”, ka thënë Kurti.
Ai ceku se ata janë në fazën e diskutimeve dhe se sot janë diskutuar çështjet e dialogut e privatizimit.

“Ajo çfarë kemi arritur është krijimi i një ekipi të punës që do të përbëhet me nga një anëtar prej katër subjekteve, që deri të dielën do ta arrijnë dakordimin. Pa marrëveshje nuk e japim votën. Gjatë këtyre tre ditëve besoj do ta arrijmë dakordimin për të cilën kemi shprehur gatishmëri. Jemi të gatshëm të marrim pjesë në ekzekutivin e ardhshëm, por jo pa marrëveshje”, ka thënë Kurti.

Ndërkaq, Haradinaj thotë se kjo nuk ishte ditë e lehtë, raporton Telegrafi.
“Mendoj që ka qartësime. Ende është herët të flasim si do të vazhdojmë më tutje. Ekipi i ekspertëve do të punojë që në etapat e ardhshme të ecim më shpejtë. Ne jemi duke qartësuar parimet për programe”, tha ai, duke shtuar se sot nuk kanë biseduar për ndarje të resorëve.
“Me rëndësi është që deri në seancën që do të mbahet sot një javë, të konfirmohet ajo që kemi thënë katër partitë opozitare: jo qeveri e re e regjimit të vjetër”, theksoi Haradinaj.
Ai e ka të vështirë të thotë se a do të kyçet në bashkëqeverisje edhe Lëvizja Vetëvendosje.
“Por, fakti që katër parti politike kanë marrë këtë kohë sot, ka interesim që të arrihet marrëveshja”, tha Haradinaj.

Nisin takimin

Ka nisur takimi në selinë e AAK-së ndërmjet Isa Mustafës, Albin Kurtit, Ramush Haradinajt dhe Fatmir Limajt.

Ashtu siç ka raportuar më herët “Epoka e re”, tre liderët e koalicionit LDK-AAK-NISMA (LAN) dhe ai i Lëvizjes Vetëvendosje! do të diskutojnë për çështjen e zgjidhjes së kryetarit të Kuvendit të Kosovës dhe formimin e qeverisë.

Blloku i partive politike, LDK-AAK-NISMA, duke u mbështetur në marrëveshjen e koalicionit të arritur më 10 qershor, përfundimisht ka vendosur që në Kuvendin e Kosovës të hyjë si një grup i vetëm parlamentar i quajtur “LDK-AAK-NISMA”.

Dymbëdhjetëvjeçari Riad Krasniqi nga Krusha e Madhe  është mbytur në lumin Drini. Familjarët tregojnë se Riadi është mbytur në kohën sa ishte duke u larë me shokë.

Riadi në mesditën e djeshme bashkë me vëllain më të vogël dhe disa shokë tjerë kishte shkuar në lumin Drin për t’u larë, ndërmjet fshatrave Krushë e Vogël dhe Bregdri të Zonës së Hasit.

Familjarët kanë rrëfyer për TV Prizrenin, se Riadi pasi ishte futur në ujë nuk kishte arritur më të dal,për shkak të thellësisë .

Vëllai i vogël bashkë me shokët kishin thirrur disa banorë të Krushës për të shpëtuar Riadin,të cilët kishin arritur të nxjerrin të vdekur.

Trupi i viktimës është dërguar për autopsi në Prishtinë.Në orët e pasdites trupi i të ndjerit i është dorëzuar familjarëve për varrim.

Vendi ku ka humbur jetën ky fëmijë ,në rrjedhën e Drinit, ka disa thellësira të theksuara të cilat janë shkaktuar nga dëmtimi i shtratit të lumit./PrizrenPress.com/

Kryetari i Komunës së Malishevës Ragip Begaj, sot ka inspektuar punimet e fazës së dytë të ndërtimit të rrejtit të ujësjellësit i cili është duke u shtruar për kah lagjja e Lacajve në fshatin Drenoc të Komunës së Malishevës.

Pas inspektimit  Begaj u nda i kënaqur , pasi punimet po shkojnë mirë dhe kërkoi nga punëkryesit që të angazhohen maksimalisht dhe të marrin me përkushtim punën e tyre të cilën janë duke e bërë dhe të përfundoj ashtu brenda afatit të paraparë./PrizrenPress.com/