Një  shtetas I Shqipërisë është arrestuar  në Prizren. Ai dyshohet se ka ndërmjetësuar me një  femër  të mitur  për shërbime seksuale. Policia e Kosovës njofton se arrestimi I tij është bërë  dje në rrugën  “Turgut Ozall”.

“Njësiti policor gjatë kontrollimit të një hoteli në njërën nga dhomat ka gjetur të dyshuarin mashkull shtetas i Shqipërisë dhe viktimën femër  e moshës së mitur. Gjatë intervistimit është vërtetuar se ndërmjetësues për shërbime seksuale ka qenë një i dyshuar,  i cili është identifikuar dhe arrestuar”, njofton Policia e Kosovës.

Me urdhër të prokurorit i dyshuari shtetas i Shqipërisë është dërguar në mbajtje, ndërsa i dyshuarit tjetër është liruar në procedurë të rregullt/PrizrenPress.com/

Një kufomë e njeriut është gjetur  në mes  fshatrave Shajne dhe Xërxë të Komunës së Dragashit.

Policia dhe mjekët e  Institutit të Mjekësisë Ligjore kanë dalë në vendngjarje .

Siç raporton TVPZ  kufoma mund të jetë e të zhdukurit Enver Çengaj, edhe pse ende nuk është bërë identifikimi i saj./PrizrenPress.com/

Pavarësisht situatave që mund të paraqiten, nuk do të ketë rrezik për qarje të bllokut LDK-AAK-Nisma dhe VV. Ky është zotimi që kanë dhënë përfaqësuesit e partive nënshkruese të marrëveshjes për bashkëqeverisje.

Sipas Isa Mustafës, Rexhep Selimit, Donika Kadaj-Bujupit dhe Bilall Sherifit, koalicioni LDK-AAK-Nisma dhe VV-ja çdo ditë e më shumë është duke u konsoliduar dhe do të vazhdojë të jetë i tillë deri në realizimin e marrëveshjes së arritur.

Kryetari i Lidhjes Demokratike të Kosovës (LDK), Isa Mustafa, ka thënë të enjten se koalicioni LDK-AAK-Nisma dhe VV është i vendosur që projektin e tyre ta çojnë përpara.

Në këtë kontekst, ai ka theksuar se thirrjet e disa përfaqësuesve të LDK-së, që ai të jetë kryeministër i vendit, janë vlerësime personale të tyre.

“Idetë janë vlerësime personale. Ne kemi një marrëveshje dhe nuk do ta ndryshojmë atë marrëveshje çdo ditë në bazë të ideve të njerëzve. Kur bëhen marrëveshje, ato bëhen edhe në suaza të kompromiseve”, ka deklaruar Mustafa pas takimit me përfaqësuesit e komuniteteve jo serbe në Kosovë.

Ndërkaq deputeti i Lëvizjes Vetëvendosje! (VV), Rexhep Selimi, ka vlerësuar se nuk ka asnjë rrezik që të prishet ujdia e arritur në mes të bllokut LDK-AAK-Nisma dhe Vetëvendosje!-s ndonëse, sipas tij, shpresat e pushtetit në ikje qëndrojnë pikërisht te ndonjë ‘rrezik’ për përçarje të këtij blloku.

“Normalisht se shpresat e pushtetit në ikje qëndrojnë te ndonjë ‘rrezik’ si, për shembull, mundësia e përçarjes së koalicionit LDK-AAK-Nisma dhe marrëveshjes së tyre me Lëvizjen Vetëvendosje! Këtë edhe e kanë provuar tashmë. Por, jo, nuk ka asnjë rrezik të tillë. Rreziku kryesor qëndron te krerët e PDK-së, të cilët po vazhdojnë të paraqesin ende rrezik potencial për demokracinë dhe shtetin të cilin duan ta mbajnë të kapur. Pra, nuk ka rrezik të përçarjes së subjekteve politike që tashmë e kanë formalizuar shumicën parlamentare me anë të marrëveshjes së nënshkruar më 10 shtator”, ka deklaruar Selimi për “Epokën e re”.

Edhe deputetja e Aleancës për Ardhmërinë e Kosovës (AAK), Donika Kadaj-Bujupi, ka thënë se koalicioni LDK-AAK-Nisma dhe VV çdo ditë e më shumë është duke u konsoliduar.

Në këtë kontekst, ajo ka theksuar se nga 47 deputetë sa ka pasur ky koalicion në fillim, tani i ka 63 sosh.

“Prej arritjes së marrëveshjes koalicioni LDK-AAK-Nisma dhe VV dita-ditës veç se është forcuar si me numra, po ashtu edhe si koncept. Nga numrat fillestarë, prej 47 deputetëve, tani kemi një shumicë absolute shqiptare prej 63 deputetësh dhe e kemi përkrahjen e komunitetit pakicë. Pavarësisht përpjekjeve dhe tendencave që të lansojë informata për përçarje eventuale të koalicionit, ka qenë vetë PDK-ja e cila ka humbur gjatë këtij procesi. Prandaj, blloku LDK-AAK-Nisma-VV veçse është forcuar dhe kështu do të jetë deri në realizimin e marrëveshjes. Dhe e gjithë ky është një iluzion të cilin po e pret kot Partia Demokratike e Kosovës”, ka deklaruar për “Epokën e re”, Kadaj-Bujupi.

Po ashtu, edhe anëtari i kryesisë së Nismës për Kosovën, Bilall Sherifi, ka deklaruar se nuk do të ketë përçarje brenda bllokut LDK-AAK-Nisma dhe VV, sepse ende vazhdojnë arsyet pse është lidhur marrëveshja ndemjet këtyre katër partive politike. “Nuk do të ketë përçarje brenda bllokut LDK-AAK-Nisma dhe VV, sepse arsyet pse është lidhur marrëveshja ndemjet këtyre katër partive politike vazhdojnë të ekzistojnë. Pra, arsyeja është ndryshimi i modelit qeverisës. Prandaj, nuk ka asnjë arsye blloku të qahet. S’ka asnjë arsye të ndryshojnë qëndrimet sepse vendit i duhet ndryshimi dhe padyshim që blloku vetëm sa do të konsolidohet edhe më shumë”, ka thënë për “Epokën e re”, Bilall Sherifi.

Anëtari i Kryesisë së Lidhjes Demokratike të Kosovës (LDK), Sadri Ferati, u ka bërë thirrje liderëve të dy blloqeve politike, të ulen bashkërisht dhe brenda javës ta gjejnë një zgjidhje për tejkalimin e ngërçit politik.

Në ketë intervistë për “Epokën e re”, ai ka deklaruar se të gjithë liderët duhet të heqin dorë prej ambicieve të tyre dhe të tregohen pragmatikë për gjetjen e një zgjidhje, në mënyrë që të mos humbet kohë më tepër.

“Mendoj se të dy blloqet duhet të ulen dhe ta gjejnë rrugën e zgjidhjes dhe të dalin nga kjo krizë. Kosova po humbet kohë të çmueshme. Besoj se mjaft kemi humbur kohë. Tani duhet të gjendet një zgjidhje për të dalë nga ngërçi politik”, ka thënë Ferati.

Deputeti i LDK-së ka bërë me dije se ka ardhur koha që secila palë të flasë me gjuhën reale. “Ato që deri më tani kanë qenë në sipërfaqe, janë tendencat e rezultatit maksimal. Mendoj se po i vjen fundit humbjes së kohës për rezultatin maksimal. Tani secila palë duhet ta shikojë rezultatin real dhe ta trajtojë këtë rezultat, pavarësisht se kujt sa do t’i takojë”, ka deklaruar Ferati, duke shtuar se nuk ka kuptim që subjektet politike deri në fund ta kërkojnë rezultatin maksimal.

“Mbajtja për dy apo tre muaj e situatës, nën tendencat e rezultatit maksimal, ka kuptim, por jo deri në pakufi të mbahet ambicia për rezultat maksimal dhe rezultati askund. Në fund, cili do të jetë ai që do të kërkojë falje? Asnjëri nuk do të kërkojë falje, sepse do të thotë kjo është politikë. Thirrja ime është: mjaft më me ambicie! Tani duhet të bëhemi pragmatikë dhe ta gjejmë zgjidhjen e ngërçit në mënyrë që mos të ketë pasoja për Kosovën”, është shprehur Ferati.

Në këtë kontekst, ai ka thënë se blloku brenda javës duhet të qartësojë nëse mund ta marrë postin e kryetarit të parlamentit. Në të kundërtën, sipas tij, koalicioni LDK-AAK-Nisma dhe VV duhet të heqë dorë prej këtij pretendimi dhe të fokusohet te qeveria.

“Gjithnjë po them se edhe një javë duhet të lihet kohë e të shikohet nëse ekziston ndonjë mundësi që blloku, i cili i ka numrat, ta ketë kryetarin e parlamentit. Nëse e ka këtë mundësi, atëherë duhet ta votojë dhe të vazhdojë tutje, por nëse nuk e ka këtë mundësi, atëherë duhet ta dorëzojë postin e kryeparlamentarit dhe vazhdon më tutje me formimin e qeverisë”, ka thënë Ferati.

Ai i ka kundërshtuar tendencat për rishikim të marrëveshjes së bllokut, duke thënë se individët që po e kërkojnë një gjë të tillë është dashur të flasin me kohë e jo tash. Deputeti i LDK-së, i cili ka qenë ministër në kohën e bashkëqeverisjes me PDK-në, ka vlerësuar se në këtë kohë është i pamundshme një koalicion me këtë subjekt politik, duke shtuar se me herët ndoshta ka mundur të bëhet.

Analistët politikë konsiderojnë se në këtë situatë kur as blloku VLAN dhe as PDK-ja nuk po lëshojnë pe për tejkalimin e situatës, ndërhyrja e ndërkombëtarëve është e domosdoshme.

Ndonëse kjo ndihmë shihet si e nevojshme, ajo do të jetë me qëllimet e BE-së, që në këtë rast mund të jenë vazhdimi i negociatave me Serbinë dhe krijimi i gjykatës speciale për krime lufte.

Paralajmërimet e shefit të zyrës së BE-së në Kosovë, Samuel Zhbogar se faktori ndërkombëtar mund të rekomandojë për situatën në vend, shihen nga analistë si pajtim mes presidentes dhe faktorit ndërkombëtar për të gjetur zgjidhjen, transmeton RTK.

Për Fisnik Korenicën nga Grupi për Studime Politike e Juridike, rekomandimet duhet të vijnë pas seancës së radhës.

“Personalisht mendoj që nuk do të duhej që kjo do të ishte forma se si të gjendet zgjidhja. Por kështu duket që është kërkesa e faktorit ndërkombëtar, por gjithsesi mendoj që as zoti Zhbogar dhe të tjerët nuk janë të interesuar që të ofrojnë ndonjë recent politik se si do të zgjidhet kriza por vetëm se si do të aktivizohen akterët institucional. Dhe, këtu ka dy akterë që mund të involvohen që janë Presidentja dhe Gjykata Kushtetuese”, vlerëson Korenica.

Për Shpend Kursanin, ndërhyrja e ndërkombëtarëve në këtë çështje është e padëshirueshme, meqë ajo mund të jetë për qëllime të Bashkimit Evropian. Këtë Kursani e argumenton me faktin se ndërhyrja mund të ndodh për shkak krijimit të Gjykatës Speciale për Krime Lufte dhe negociatave me Serbinë.

“Do të ndërhyjnë në bazë të dy qëllimeve të bashkësisë ndërkombëtare që janë krijimi i gjykatës speciale për krime lufte dhe negociatave me Serbinë, prandaj, mendoj se është i padrejtë, sepse këto nuk janë prioritete për Kosovën por një program i zhvillimit ekonomik që misioneve diplomatike nuk po i interesojnë”.

Kursani thotë se zgjedhje nuk duhet të ketë, meqë ato përveç që do të prodhojnë rezultat të njëjtë, nuk i konvenojnë asnjë partie politike madje as qytetarëve.