Rektorati i Universitetit të Prishtinës (UP) “Hasan Prishtina” mohon që nga zyrat e këtij institucioni të ketë dal ndonjë letër-peticion për të kërkuar mbështetjen e profesorëve për rektorin Ramadan Zejnullahu.
Këshilltari për media i rektorit, Adem Beha ka thënë për “Zërin” se është e pandershme të akuzohet rektori se ka iniciuar këtë peticion që të kërkojë përkrahjen për veten e tij.
“Ky peticion nuk ka dal nga zyrat e Rektoratit. Por, mësimdhënësit e UP-së kanë të drejtë të ndërmarrin iniciativa. Është e drejtë e secilit. Në aspektin ligjor ne nuk kemi të drejtë për diçka të tillë dhe ajo çka bie ndesh me ligjin nuk është pjesë e punës sonë”, ka thënë Beha, duke pohuar se e ka parë këtë tekst dhe se mësimdhënësit e Universitetit të Prishtinës janë ata që sipas tij kanë ndërmarrë këtë iniciativë, që të përkrahin me një peticion rektorin e këtij universiteti Ramadan Zejnullahu, por assesi ta ketë bërë dikush nga Rektorati.