Një aksident rëndë trafiku ka ndodhur sot në aksin rrugor Shtërpcë – Brezovicë. Në një foto të siguruar nga Indeksonline vërehet që vetura është shumë e dëmtuar dhe poashtu mësohet se ka disa persona të lënduar.
Ende nuk dihen detaje të tjera rreth aksidentit e as gjendja shëndetësore e të lënduarve.
Manifestimi tradicional Epopeja e UÇK-së, ka filluar sot me parakalimin e pjesëtarëve të FSK-së në kazermën “Adem Jashari” në Prishtinë, ku kanë qenë të pranishëm përfaqësuesit më të lartë të Republikës së Kosovës.
Përfaqësuesi i familjes së komandantit legjendar Adem Jashari, Bekim Jashari, pasi ka falënderuar të pranishmit, ka thënë se Kosova ka pasur ushtri që nga viti 1997. Ai ka uruar të gjithë qytetarët për shndërrimin e FK-së në Forca të Armatosura të Kosovës (FAK).
“Të dashur vëllezër dhe motra, të nderuara institucione të Kosovës, të dashur dhe shumë të respektuar Ushtria e Kosovës që për ne keni qenë ushtri që nga viti 1997, më 28 nëntor që nga dalja e Ushtrisë Çlirimtare të Kosovës. Urime emri i ri, e mbajtshi me shëndet, e trashëgofshi, e mbajtshi me krenari. Lavdi e përjetshme e të gjithë atyre që ranë për lirinë tonë që ne sot e gëzojmë. Urime festa”, ka thënë Jashari, shkruan Epoka e re.
Ndërkaq, presidentja Atifete Jahjaga, ka deklaruar se më 5, 6 dhe 7 mars qytetarët e Kosovës përkujtojmë dhe nderojmë sakrificën sublime të gjithë atyre, që dhanë jetën për shtetin, për lirinë dhe për paqen.
“Ne nuk kemi më kohë për të humbur, sepse shteti dhe shoqëria jonë ka nevojë për përmbylljen e të gjitha reformave që janë nisur. Vendit tonë duhet t’i krijojmë një e ardhme të qëndrueshme, një Kosovë stabile që do të mbetet rrëfim suksesi i përbashkët i yni dhe i bashkësisë ndërkombëtare dhe një vlerë e shtuar për aleatët tanë strategjikë. Ky ishte amaneti i të gjithë brezave që sakrifikuan për të sotmen tonë dhe këtë amanet ia kemi borxh Kosovës, që ta përmbushin për të ardhmen tonë”, është shprehur Jahjaga.
Kryesia e Akademisë së Shkencave dhe të Arteve e Kosovës (ASHAK) i ndoqi me vëmendje prononcimet e Akademisë së Shkencave të Shqipërisë (ASHSH) lidhur me debatin midis dy anëtarëve të ASHAK-ut, Rexhep Qosjes dhe Hivzi Islamit.
“Në të dy prononcimet udhëheqja e ASHSH-së pa asnjë shkas u implikua drejtpërsëdrejti në këtë debat midis individësh, duke marrë anën e atij që pa të drejtë dhe në vazhdimësi e denoncon Akademinë tonë. Pikënisja e debatit qëndronte tek kritikat ndaj ASHAK-ut që i paska pranuar J. B. Titon dhe S. Hasanin anëtarë dhe nuk i paska hequr deri sot nga lista e anëtarësisë.
Shërbimi profesional i Akademisë, në bazë të procesverbaleve të kohës, i dha shpjegimet përkatëse për opinion, duke saktësuar se heqja nga lista e kujtdo që është pranuar njëherë në Akademi është e kundërligjshme dhe në kundërshtim me të gjitha parimet e akademive të botës. Në kohën kur janë pranuar gjithashtu Tito dhe Hasani anëtarë të ASHAK-ut, R. Qosja ka qenë anëtar funksional i Akademisë dhe i të gjitha forumeve të saj.
Akademia e Shkencave dhe e Arteve e Kosovës është institucion me 36 anëtarë aktivë dhe një plotësisht pasiv (R. Qosja), i cili nuk merr pjesë në asnjë aktivitet dhe nuk vjen në institucion tash e shumë vjet. ASHAK i ka organet e veta të ligjshme: Kuvendin, Kryesinë, Seksionet dhe trupat e tjerë, përmes të cilave zhvillon veprimtarinë e saj. Në këto suaza, secili anëtar ka mundësi të shprehë të gjitha shqetësimet e tij dhe të kërkojë mbështetje për propozimet dhe idetë konkrete. Mbi këto nivele dhe themele Akademia si institucion e zhvillon edhe bashkëpunimin me institucionet e tjera, brenda Republikës së Kosovës dhe jashtë saj, përfshirë edhe bashkëpunimin me ASHSH-në mbi bazë të Marrëveshjes së bashkëpunimit dhe protokolleve për zbatimin e saj, që nënshkruhen çdo dy vjet.
Ndërhyrja dhe rreshtimi i njëanshëm i udhëheqjes se ASHSH-së, mbi bazë të preferencave ideologjike, siç është bashkimi me një grup personash jashtë Akademisë, le të kuptohet se ASHSH-ja në raportet e saj me ASHAK-un, dëshiron të niset nga marrëdhëniet e saj me individë që ajo apo kreu i saj parapëlqen dhe jo nga raportet me institucionin, me të cilin ka marrëveshje bashkëpunimi. Seleksionimi i tillë i njëanshëm dhe ndërhyrja paternaliste mund të ketë implikime serioze në bashkëpunimin midis dy institucioneve.
Pavarësisht nga rrethanat, në këtë bashkëpunim ASHAK-u asnjëherë nuk është nisur nga parime të tilla, por ka bërë çmos që çdo gjë në marrëdhëniet midis dy institucioneve të rrjedhë në rrafsh institucional, pa ndërhyrë asnjëherë dhe për asnjë gjë në raportet dhe çështjet brenda ASHSH-së. Kjo ishte dhe baza e shëndoshë që ka siguruar bashkëpunimin afatgjatë dhe e ka bërë të mundshëm realizimin e një varg aktivitetesh të përbashkëta, gjë që për ASHAK-un gjithnjë ka qenë prioritet absolut.
Gjatë bashkëpunimit shumëvjeçar, ASHAK është përpjekur që me çdo kusht t’i realizonte të gjitha pikat e Protokollit, ndërsa nga ana e ASHSH-së në vitet e fundit ka pasur mjaft ngecje, me arsyetim se Akademia është në proces të reformimit, nuk i ka më institutet dhe qendrat studimore brenda saj etj., që nuk dukeshin krejtësisht të qëndrueshme.
Kryesia e ASHAK-ut thekson edhe njëherë se dëshiron fuqishëm që bashkëpunimin ta çojë përpara dhe ta ngrejë në shkallë edhe më të lartë, gjithnjë në kuadër të marrëveshjeve institucionale për bashkëpunim reciprok.
Raportet e individëve të ASHSH-së me individë a grupe joformale, kudo që të jenë, janë çështje të tyre, por në raportet me ASHAK-un është e nevojshme të evitohen sjelljet emocionale, mësimet ideologjike etj. ndaj Akademisë sonë dhe udhëheqjes së saj, mbi bazë të superioritetit të rremë dhe përgjithësisht të sjelljeve paternaliste, të cilat e rrezikojnë seriozisht raportin e bashkëpunimit, për çka ASHAK-u nuk mund të mbajë përgjegjësi”, thuhet në letër, e cila është nënshkruar nga nënkryetari Akademik Pajazit Nushi. /rtk/
Kryetari i Kuvendit të Kosovës, Jakup Krasniqi, në një prononcim për Telegrafin ka deklaruar se qëllimi i formimit të formacionit të ri politik “Nisma për Kosovën” nuk ka qenë dëmtimi i Partisë Demokratike të Kosovës, por ofrimi i një alternative të re në skenën politike kosovare, e cila sipas tij, ka qenë e nevojshme për shkak të degradimit të institucioneve shtetërore nga udhëheqja e deritanishme.
Ish sekretari i PDK-së vlerëson se koha ideale për mbajtjen e zgjedhjeve është muaji qershor, edhe pse sipas tij, këtë nuk mund ta vendos Nisma, por subjektet e mëdha politike në vend.
“Mendoj që muaji qershor është kohë e përshtatshme për mbajtjen e procesit zgjedhor, kjo për shkak edhe të kushteve klimatike të përshtatshme. ‘Nisma Për Kosovën’ ka hyrë në garën politike për të ofruar alternativë dhe program cilësor qeverisës, duke treguar kështu gatishmëri për ndërtimin dhe instalimin e shtetit të së drejtës në politikë, ekonomi, drejtësi. Qëllimi ynë kryesor që ligji të veprojë njëjtë mbi të gjithë qytetarët, dhe jo kjo të bëhet në mënyrë selektive”, ka thënë Krasniqi për Telegrafin.
Ndryshe, të premten është bërë i njohur subjekti i ri politik i paralajmëruar nga ish-anëtarët e Kryesisë së Partisë Demokratike të Kosovës, Fatmir Limaj dhe Jakup Krasniqi.
“Nisma për Kosovën” është partia më e re politike, e cila u zyrtarizua të premten. Subjekti i ri politik do të udhëhiqet nga Fatmir Limaj, ndërsa kryetar të Organit Kombëtar të kësaj partie, Këshilli themelues zgjodhi kryeparlamentarin Jakup Krasniqi.
Ministria e Mjedisit dhe Planifikimit Hapësinor (MMPH), ka njoftuar se në baze të Vendimit të Ministrit Dardan Gashi, nr.42/2014, për rrënimin e të gjitha objekteve pa leje ndërtimore, jashtë Planit Rregullues të fshatit turistik ”Prevallë”, të cilat gjenden brenda zonës së mbrojtur të parkut kombëtar “Sharri”, do të ketë rrënime të reja.
Inspektorati i Ministrisë së Mjedisit dhe Planifikimit Hapësinor të mërkurën ka shpërndarë 45 aktvendime me të cilat urdhërohen, pronarët e objekteve të ndërtuara brenda hapësirës së Parkut Kombëtar “Sharr”, që në afat prej 15 ditësh, të bëjnë rrënimin e objekteve të ndërtuar pa leje ndërtimi.
“Njëherit me këtë Aktvendim të MMPH-së pronarët e këtyre ndërtimeve, urdhërohen që të bëjnë pastrimin e sipërfaqes prej mbeturinave nga demolimi i objekteve si dhe rikthimi i sipërfaqes së degraduar konform peizazhit”, është thënë në njoftimin e MMPH-së.
Po ashtu në rast të mos rrënimit të tyre nga ana e pronarëve përkatës të këtyre ndërtimeve pa leje, me këtë aktvendim, bëhet e qartë se MMPH do të rrënoj objektet në fjalë, ndërsa shpenzimet do t’i bartin pronarët e objekteve pa leje ndërtimi, thuhet ne njoftimin e MMPH-së
Iniciativa Qytetare Për Malishevën me pajtim me strukturat e saj ka marr vendim për shkrirjen e aktivitetit të IQM-së dhe vazhdimin e punës me Nismën për Kosovën.
Ky vendim është marrë të mërkurën në orët e paradites.
“Duke konsideruar se është krijuar një frymë e re me njerëz të merituar në udhëheqje një shpresë e re për qytetaret e Kosovës si dhe në pajtim me deklaratën programore, strukturat e IQM-së erdhën deri te ky vendim në bashkim- shkrirje në kuadër të strukturave të Nismës për Kosovën”, thuhet në komunikatë.
Ministri i Forcës së Sigurisë së Kosovës, Agim Çeku, një ditë pas marrjes së vendimit për shndërrimin e FSK-së në Forcën e Armatosur të Kosovës, thotë se nga 5 mijëpjesëtarë që do të ketë kjo Forcë, do të jenë edhe 2 mijë e 500 vende të reja pune.
3 mijëpjesëtarë do të jenë rezervë, të quajtura si Garda Kombëtare, e cila si mision të parë ka sigurinë e brendshme, por nuk do të ketë shërbim të obligueshëm ushtarak.
Në një intervistë për RTK1, Çeku thotë se trajnimet intensive për pjesëtarët vullnetarë do të zgjasin tre muaj, dhe kjo Gardë do të ketë shtrirje në çdo komunë në pesë qendra rajonale.
Ai thotë se do të angazhohen për të caktuar njerëzit e duhur në pozita të caktuara deri në fillimin zyrtarë edhe të FAK-ut dhe Ministrisë së Mbrojtjes, dhe ndryshimet kushtetuese pritet të zgjasin deri në vitin 2016.
Ekzistojnë kapacitetet fillestare për ushtri deklaron ministri Çeku,duke shtuar se prej Trupave Mbrojtëse të Kosovës janë bërë përgatitjet, dhe janë forcuar me FSK-në.
Kryeparlamentari, Jakup Krasniqi, e konsideron vendim të drejtë ikjen e tij nga Partia Demokratike e Kosovës, për të cilën thotë se është uzurpuar nga njerëz mashtrues.
Krasniqi, njeriu i dytë në partinë më të re, “Nisma për Kosovën”, në intervistën dhënë “Zërit” thotë se po ikën nga partia e cila është shndërruar në trampolinë për interesa personale, kurse nuk i bie pishman kur kryeministri Thaçi e quan autokrat.
“Gjithçka që kam thënë e kam matur shtatë herë dhe e kam prerë një herë”, tha Krasniqi, sipas të cilit PDK-ja funksionon me logjikën e mashtruesve. “Shpeshherë aty thëllëzës ia ndërruan vetë me të turrecin”, thotë Krasniqi.
Sipas të cilit, nuk ka politikan në këtë parti që ka investuar më pa hile se ai
Abdullah Zejnullahu, që ka marrë më së shumti vota në Senat, rezulton se ka publikuar punim shkencor në një revistë që ka status të njëjtë me atë ku kishte publikuar edhe ish-rektori, Ibrahim Gashi, e të cilat konsiderohen të rreme, shkruan sot “Koha Ditore”.
Zejnullahu ka thënë që vendimin se në cilën revistë të botohej punimi e kishte marrë bashkautori e jo ai vetë. Ka thënë po ashtu se ky punim nuk ndikon në ngritjen e tij akademike.
Revista “International Journal of Scientific & Engineering Research”, konsiderohet false, njësoj sikurse ajo ku kishte publikuar ish-rektori Gashi, ku si pasojë ai edhe u detyrua të dorëhiqej nga posti.
“Kjo revistë (International Journal of Scientific & Engineering Research v.j.) thotë që ka impakt faktor 1.4., por është false. Keni kujdes nga kjo revistë”, thuhet në uebfaqen www, që e jep indeksin e revistave me qasje të hapur dhe identifikon ato që janë false.
Me vendim të Qeverisë, Forca e Sigurisë e Kosovës është shndërruar në Forcat e Armatosura të Kosovës, ndërsa Ministria për Forcën e Sigurisë të Kosovës do të shndërrohet në Ministri të Mbrojtjes të Kosovës, shkruan sot “Koha Ditore”.
Ndërtimi i FAK-ut që do t’i ketë gjithsej 5 mijë ushtarë aktivë dhe 3 mijë rezervistë do të bëhet në tri faza. Operacionalizimi i plotë do të ndodhë pas vitit 2019.
Ushtrisë së Kosovës do t ‘i nevojitet një buxhet vjetor prej 65 milionë eurosh
Kryeministri ka thënë se kjo do të garantojë marrjen e përgjegjësive për sigurinë e Kosovës, vazhdimin e integrimit euroatlantik të strukturave të sigurisë të Republikës së Kosovës, dhe sigurimin e paqes dhe stabilitetit në Kosovë dhe rajon.