Gjenerali Philip Breedlove, Komandant Suprem i Aleancës për Evropë (SACEUR) të mërkurën do të jetë në Kosovë.
Ai do të vizitojë KFOR-in dhe pritet të mbaj edhe konferencë për media në Aeroportin Ushtarak të Sllatinës të mërkurën më 30 korrik, në ora 16:00.
Deputetja më e vjetër, Flora Brovina nuk e ka vendosur nëse do ta drejtojë sërish seancën e Kuvendit, nëse Gjykata Kushtetuese vendos që të përsëritet seanca konstituive. Brovina thotë se ndihet e fyer nga 82 deputetët që vendosën për zëvendësimin e saj me deputeten e listës Srpska, Millka Vulliq. Nëse vendos ta drejtojë seancën, Brovina thotë se do t’i respektojë sërish rregullat dhe do ta ushtrojë autoritetin e saj.
Deputetja Flora Brovina nuk është shumë e sigurtë nëse do ta drejtojë sërish seancën konstituive nëse Gjykata Kushtetuese vendos që të përsëritet seanca për zgjedhjen e organeve të Kuvendit. Ajo është deputetja më e vjetër dhe i takon ta udhëheq seancën, por thotë se po mendon nëse do ta drejtojë ose jo.
“Të mendoj, të shohim njëherë se si do të rrjedh, sepse aty është bërë një kërkesë e grupit të madh e të shohim sa është e vlefshme sa jo”, tha Brovina për Radio Kosovën.
Brovina tregon arsyen pse heziton ta udhëheq sërish seancën.
“Ndihem shumë e ofenduar nga 82 deputetët dhe vendimi i tyre”, tha ajo.
Deputetët e bllokut LDK-AAK-Nisma të mbështetur edhe nga Vetëvendosje dhe deputetët e pakicave, pas mbylljes së seancës konstituive më 17 korrik, për shkak të mungesës së kuorumit përmes një mocioni e zëvendësuan Brovinën me deputetët e listës Srpska Millka Vulliq. Flora Brovina thotë se kjo e ka lënduar shumë.
“Një lëndim të tillë veç armiku ka mundur të ma bëjë. Edhe kur jam burgosur nuk jam ndjerë më keq”, tha ajo.
Ndërkohë, kreu i AAK-së, Ramush Haradinaj të enjten tha se nëse sërish ka situatë të njëjtë në Kuvend, blloku LDK-AAK-Nisma do të veprojnë njësoj si në seancën e 17 korrikut.
“Në rast se situata e Flora Brovinës, për të cilën kam respekt, përsëritet në etapat tjera, do t’ia gjejmë zgjidhjen”, tha Haradinaj.
Por, Flora Brovina thotë se nëse do ta udhëheq seancën e ardhshme, do ta ushtrojë autoritetin e saj, e jo siç ndodhi në seancën e kaluar, kur as Sekretaria nuk i bindej për pauzë.
Edhe Sekretaria do të jetë e bindur në urdhrat e mia, e jo si herën e kaluar, të më anashkalojë dhe mos të më dëgjojë kur të jap pauzë të bëhet pauzë, por të qëndrojë aty”, tha Brovina.
Deputetja e PDK-së, Flora Brovina edhe në mandatin e kaluar e kishte udhëhequr seancën konstituive dhe thotë se nuk i mungon përvoja në këtë drejtim. Ajo thekson se asnjëherë nuk ka qenë e njëanshme, por e ka mbrojtur Kushtetutën dhe Rregulloren e punës, nga ata që sipas saj, e kishin shkelur Rregulloren kur e kishin bërë rendin e ditës.
Deputeti i LDK-së, Arben Gashi, nuk e konsideron si opsion shkuarjen e vendit në zgjedhje të reja, ngase sipas tij, mbart me vete një potencial të madh për konflikt dhe përplasje mes grupeve.
E për t’i ikur ngjarjeve të dhunshme ai pret që vendimi i Gjykatës Kushtetuese t’i hap rrugë formimit sa më të shpejt të institucioneve të Kosovës.
“Së pari, duhet ta presim vendimin final të Gjykatës Kushtetuese dhe mbi bazën këtij vendimi pastaj të merren vendimet e duhura. Mendoj se zgjedhjet e reja nuk janë zgjidhje sepse ka potencial jashtëzakonisht të madh për konflikt dhe përplasje mes grupeve. Potencialisht do të kishim një grup potencial dhune që është PDK dhe këto palët tjerat pastaj normalisht që do të reagonin me elemente të forcës dhe kjo mendoj se do të ishte shumë e rrezikshme për vendin”, ka thënë Gashi për Politiko.net.
Ai ka thënë se në situatën në të cilën jemi zgjidhja më e mirë është zgjidhja kushtetuese dhe juridike dhe formimi sa më shpejt i institucioneve.
Ndryshe, sa i përket negociatave të koalicionit LDK-AAK-Nisma me Vetëvendosje!-n, Gashi thotë se kjo e fundit duhet të shihet si partner strategjik nga partia e tij, por jo me çdo kusht.
“E konsideroj partner strategjik po duhet parë edhe sjelljen dhe koston politike. Unë gjithmonë e kam konsideruar Vetëvendosjen partner strategjik, edhe në kohën kur të gjithë e konsideronin si armik. Por, duhet të jemi të kujdesshëm me ambiciet politike dhe mënyrën sesi sillet Vetëvendosja dhe të tjerët”, është shprehur Gashi.
Janë certifikuar 32 kandidatë të cilët e kanë dhënë provimin e jurisprudencës në afatin e qershorit të këtij viti.
Me këtë rast, ministri në largim i Drejtësisë, Hajredin Kuçi tha se provimi i Jurisprudencës është shumë i rëndësishëm për sistemin e drejtësisë në Kosovë dhe se kandidatët që kanë dhënë këtë provim i kanë hapur dyert vetës që të jenë pjesë e sistemit të drejtësisë, sistem në të cilin bëjnë pjesë gjykatat, prokuroritë, avokatura etj.
“Provimi i Jurisprudencës është një punë e cila ju detyron të merreni vetëm me drejtësi. Kjo nënkupton që duhet të merreni me gjyqësi, prokurori, avokati si dhe çështje tjera që do ti ndihmonin drejtësisë në Kosovë. Ju ftojë që njohurit e reja, zhvillimet e reja në drejtësi t’i përcillni dhe t’i implementoni ato. Bashkëngjitja e njerëzve në këtë sistem, besoj që do të jetë një sukses edhe më i madh për të ardhëm e sistemit tonë të drejtësisë”, tha Kuçi.
Për rëndësinë e provimit të Jurisprudencës, ka folur edhe Kryetari i Gjykatës Supreme, njëherësh Kryetar i Komisionit për dhënien e Provimit të Jurisprudencës, Fejzullah Hasani.
Sipas Hasanit, dhënia e provimit të Jurisprudencës ofron kandidatët një hap me afër inkuadrimit në sistemin gjyqësor të Kosovës.
Luljeta Telalli, shtetasja shqiptare që u arrestua para 10-të ditëve në vendkalimin kufitar Qafë Thënë thotë për “Lajm” se ka 10-të ditë që shkojnë dhe paraqiten tek policia e Strugës për çdo ditë në ora 10-të, ndërsa policët tallen me to. Policja kufitare që duhet të dëshmojë nuk shkon në Gjykatë, ndërsa Ambasada e Shqipërisë hesht.
Policia e Maqedonisë sillet me shtetaset e Shqipërisë në mënyrë kafshërore, ndërsa Ambasada e Shqipërisë në Shkup hesht.
Luljeta dhe Viola Telalli ka 10-të ditë që kanë mbet në Strugë dhe po të mos ishin qytetarët struganë që I kanë ofruar vend për fjetje dhe ushqim, nënë e bijë do të mbeteshin në mes të katër rrugëve.
“Ne jemi qytetare të thjeshta që vetëm donim të vinim deri në Shkup për të marrë vizë tek Ambasada e Holandës, ndërsa këta në trajtojnë si lavire”, thotë në një bisedë telefonike për “Lajm”, Luljeta Telalli.
Ajo sqaron se ka 10-të ditë që shkojnë dhe paraqiten tek policia e Strugës për çdo ditë në ora 10-të, ndërsa policja që duhet të dëshmojë në gjykatë për ngjarjen e që ndodhi më 15 korrik në ora 02 -2 e 30 e natës, nuk shkon për të dhënë dëshmi.
“Kemi kërkuar ndihmë nga Ambasada e Shqipërisë, por ata nuk na kanë ofruar asnjë lloj ndihme. Është paraqitur im shoq nga Shqipëria, është paraqitur dhëndri nga Holanda, por asgjë. Sot ia kanë hapur telefonin djalit tim dhe i kanë thënë se na kanë ofruar ndihmë për të shkuar tek Qendra e migracionit në Shkup, por gjoja ne nuk kemi pranuar. Nuk është e vërtetë, ne askush, përveç qytetarëve të Strugës nuk na ka ofruar ndihmë”, thotë ajo. Luljeta sqaron se policia është sjellë në mënyrë kafshërore me atë dhe bijën e saj dhe jo vetëm që i kanë dhunuar fizikisht, por edhe psiqikisht, i kanë sharë dhe ofenduar me fjalë të rënda, njëjtë sikur ato të jenë kriminele, e jo qytetare të thjeshta që vetëm kanë dash të vijnë në Shkup.
Luljeta dhe Viola Telalli më 15 korrik në ora 02 të natës me autobusin e linjës kanë dash të hyjnë në Maqedoni. Pasi kanë kaluar doganën shqiptare, në vendkalimin kufitar Qafë Thanë, ata janë ndalur në doganën maqedonase, ku dhe i kanë thënë që të kthehen mbrapsht.
Ajo për “Lajm” tregon me hollësi gjithçka që ka ndodhur atë natë. “Në doganën e Maqedonisë, polici I mblodhi të gjitha pasaportat. Kur i sollën mungonte pasaporta e vajzës sime, Violës. I thanë që Viola të paraqitet atje. Viola shkoi dhe meqë u vonua, dola edhe unë nga autobusi dhe shkova atje. Ata thanë se Viola duhet të kthehet mbrapsht. I thamë pse, ne kemi biletë kthyese, kemi dhe aplikimin që kemi bërë të ambasada e Holandës dhe na janë paraqitur në telefon që në ora 9 të shkojmë atje. Jo thanë ata, duhet të keni me vete edhe thirrjen që ju ka bërë ambasada. Pastaj policja mori pasaportën time dhe e futi në sistem dhe më tha po ju qenkeni nënë e bijë. Po i thashë unë, ç’të keqe ka që një nënë të shoqëroj vajzën e saj. Epo mirë tha ajo, vajza do të shkojë, ti do të kthehesh mbrapsht. Unë i thash jo, si mundet një nënë të mbetet në mes të natës këtu dhe ia tërhoqa pasaportën time. Në momentin që e tërhoqa pasaportën u rrëzua kompjuteri. Unë i thash më falni, por pas kësaj erdhën dy policë dhe na tërhoqën zvarrë dhe na çuan në një dhomë ku dhe e mbyllën derën. Vajza ime i telefonoi të atit dhe i tregoi se çfarë ka ndodh. Në ato moment, policja ia merr telefonin vajzës sime dhe e kap për fyti dhe duke e tërhequr zvarrë e dërgon atë në një dhomë të errët, ku ia vë prangat dhe e rreh me shqelma e grushte. Pastaj erdhën edhe dy policë të tjerë meshkuj, të cilët më kanë marrë mua zvarrë dhe më kanë dërguar tek dhoma ku ishte ime bijë. Njëri prej tyre më kanë qëlluar në fytyrë me shuplakë”, rrëfen ajo.
Të nesërmen në mëngjes ata i kanë nxjerrë para gjykatësit hetues, ku si përkthyes ka qenë njëri nga policët që i ka dhunuar ata. “Unë nuk e di se çfarë ka thënë dhe shkruar ai”, thotë Luljeta, duke shtuar se më pas ata I kanë thënë se duhet ti çojnë në burgun e Ohrit. “Unë kundërshtova, I thash pse duhet të na çoni në burg, kur ne jo vetëm që nuk kemi bërë asgjë, por jemi dhunuar. Meqë kishim edhe plagë të dhunës fizike që kishin ushtruar policët ndaj nesh, të cilat vëreheshin mirë, ata pastaj vendosën që të mos na çojnë në burg, por të na lënë në mes të rrugëve të Strugës. Na thanë se për çdo ditë në ora 10-të duhet të paraqiteni në polici. Ne shkojmë për çdo ditë në polici, ndërsa policët tallen me ne”, thotë ajo e irrituar. Tani më u mbushën plot 10-të ditë që nënë e bijë kanë mbet në Strugë dhe presin policen e kufirit që të japë dëshmi në gjykatë.
Luljeta thotë se policia është për ti mbrojtur qytetarët dhe jo për ti keqtrajtuar dhe ofenduar ata. “Kur ishim tek gjykatësi hetues unë dëgjova një police që po fliste shqip në telefon dhe i thash pse silleni kështu me ne, ne nuk kemi bërë asgjë, e ajo më tha: Shumë mirë ua bëjnë juve nënave shqiptare kur i shoqëroni vajzat për të bërë prostitucion”, thotë ajo.
Sipas Ministrisë së Punëve të Brendshme dy shtetaset shqiptare me inicialet L.T, 44 vjeç dhe V.T, 27 vjeç kanë përfunduar me kallëzim penal, pasi kanë fyer dhe fizikisht kanë tentuar të sulmojnë policët, por edhe kanë shtyrë dhunshëm pajisjet në sportelet kufitare. Sipas MPB-së, dy shtetaseve u është thënë se nuk kanë para të mjaftueshme për të qëndruar në Maqedoni dhe se nuk kanë dhënë të dhëna të hollësishme për qëllimin e udhëtimit të tyre.
Luljeta dhe Viola Telalli asnjëherë nuk kanë qëndruar gjatë në Maqedoni, përveç udhëtimeve transite që kanë pas.
Sot mania e fotove “selfie” ka pushtuar botën, ku çdo grupmoshë ka në celularin e tij ose të postuar në rrjetet e shumta sociale nga një të tillë.
Një “selfie” nga Mbretëresha Elizabeth II, tashmë ka marrë me mijëra klikime, pasi ajo është realizuar nga dy vajza, të cilat ishin në kohën dhe vendin e duhur.
Gjithçka nuk ka qënë një rastësi, ndonëse mretëresha e ndodhur para kameras, vetëm ka buzëqeshur. Mbretëresha Elizabeth II është përfshirë në një “selfie” të një lojtareje australiane të hokejit. Jayde Taylor bëri një “selfie” me shoqen e saj Brooke Peris, në qendrën e hokejit në Glasgou, ndërsa pas tyre gjendej mbretëresha britanike.
“Aaaahhh, fotografia e mbretëreshës na bombardoi “selfien”, ka shkruar Jayde në rrjetet sociale.
DokuFest ka shpallur sot programin e plotë të filmave që do të shfaqen në festivalin e vitit 2014, i cili do të mbahet nga data 16-24 gusht në Prizren, Kosovë. Të zgjedhura nga një numër rekord i 2.400 aplikimeve, festivali do të prezantoj 237 filma nga 56 vende në 6 programe garuese dhe një numër të programeve speciale të kuruara.
DokuFest hapet me EVERYDAY REBELLION dhe mbyllet me shfaqjen e 20 FEET FROM STARDOM.
SHBA është shteti në fokus këtë vit dhe do të prezantohet me 30 filma, përfshirë shfaqjen e disa dokumentarëve klasik si Harlan County USA nga Barbara Kopple, Hoop Dreams nga Steve James dheHearts and Minds nga Peter Davis. Një numër i filmëbërësve, producentëve dhe profesionistëve të filmit pritet të jenë të pranishëm në festival, në mesin e tyre kameramani Richard Pierce dhe Lynzee Klingman që është njëri ndër editorët e Hearts and Minds, Christian Frei, regjisor i filmit Sleepless in New York, Marilyn Ness, producent i 1971 dhe E-TEAM si dhe shumë të tjerë, nga rajoni dhe nga jashtë.
Festivali do t’i bëjë homazh filmëbërësit austriak Michael Glawogger i cili vdiq në fillim të këtij viti, duke shfaqur tre filmat nga triologjia e tij e Globalizmit. Një shiqim gjithpërfshirës në skenën e filmit eksperimental austriak do të prezantohet përmes programit special Austrian Experiments. Filma për muzikë, teknologji dhe konfliktet e fundit në Lindjen e Mesme, çështjet e mjedisit dhe të drejtat e njeriut janë poashtu pjesë e programit.
“Këtë vit DokuFest është plot me filma të cilët na tregojnë që asnjë art tjetër nuk është në gjendje të na bëjë të qajmë, të na gëzojë, të na dërgoj në vende horror dhe të na bëjë të çohemi dhe të dëshirojmë ta ndryshojmë botën në të cilën jetojmë, të gjitha në të njejtën kohë.”, tha Veton Nurkollari, Drejtori Artistik i DokuFest. “Nga filmëbërës në ngritje e deri te mjeshtërit e filmit kemi kënaqësinë të prezantojmë një përzgjedhje të shquar të filmave në këtë edicion”.
Sipas organizatorëve kategoritë e festivalit janë ndarë në: gara e dokumentarëve të Ballkanit, ajo ndërkombëtare, e dokumentarëve të mjedisit, për të drejtat e njeriut, e filmave të shkurtër, dhe ajo ndërkombëtare. Ndërkaq janë përfshirë edhe një numër i kategorive në kuadër të programit special. /PrizrenPress.com/
Festivali nis me datë 27 gusht ndërsa deri më 6 shtator në festival shfaqen 55 projekte filmike nga e mbarë bota. Janë 20 filma në konkurencën ndërkombëtare, prej të cilëve vetëm një është premierë ndërkombëtare ndërsa pjesa tjetër shfaqen për herë të parë.
Lars Von Trier sjell versionin e dytë të zgjatur të “Nymphomaniac”, dhe sivjet nuk është në garë për shpërblimet më prestigjioze të festivalit.
Do të hapet me filmin “Birdman” të regjisorit Alejandro Gonzalez Inarritu edicioni i 71-të i festivalit më të vjetër në botë të filmit, atij të Venecias. Festivali nis me datë 27 gusht ndërsa deri më 6 shtator në festival shfaqen 55 projekte filmike nga e mbarë bota.
Janë 20 filma në konkurencën ndërkombëtare, prej të cilëve vetëm një është premierë ndërkombëtare ndërsa pjesa tjetër shfaqen për herë të parë. Lars Von Trier sjell versionin e dytë të zgjatur të “Nymphomaniac”, dhe sivjet nuk është në garë për shpërblimet më prestigjioze të festivalit. Kjo është lista e filmave në garën kryesore:
“Three Hearts” (Benoit Jacquot)
“Le Rancon De Glory” (Xavier Beauvois)
“Le dernier coup de marteau” (Alix Delaporte)
“Loin des hommes” (David Oelhoffen)
“Birdman” (Alejandro Gonzalez Inarritu)
“99 Homes” (Ramin Bahrani)
“The Good Kill” (Andrew Niccol)
“Manglehorn” (David Gordon Green)
“Pasolini” (Abel Ferrera)
“Il giovane favoloso” (Mario Martone)
“Anime nere” (Francesco Munzi)
“Hungry Hearts” (Saverio Costanzo)
“The Cut” (Fatih Akin)
“A Pigeon Sat On A Branch Reflecting On Existence” (Roy Andersson)
“The Look Of Silence” (Joshua Oppenheimer)
“The Postman’s White Nights” (Andrej Konchalovsky)
“Fires On The Plain” (Shinya Tsukamoto)
“Red Amnesia” (Wang Xioshuai)
“Tales” (Rakhshan Bani-Eternad)
“Sivas” (Kaan Mujdeci)
Juria e festivalit sivjet vjen me emrat Ann Hui, aktorja izraelite Moran Atias, aktori suedez Pernilla August, shkrimtari David Chase, Roberto Minervini dhe Alin Tasciyan.
Festivalin do ta mbyllë filmi “The Golden Era” nga regjisori Ann Hui. Vitin e kaluar, në Venedik u shfaqën filmat “Gravity” dhe “Philomena”, të cilët më pas patën sukses në çmimet Oscar. / KultPlus.com
Zhvillohet Konferenca Shkencore me temë “Gjendja e eposit në pesë vende ballkanike” me pjesëmarrjen e 70 studiuesve nga Ballkani, Evropa, Amerika, Azia dhe Afrika.
Shqipëria dhe Kosova rikthejnë dhe një herë vëmendjen te Eposi i Kreshnikëve. Një Konferencë Ndërkombëtare do të zhvillohet më 8 foto per eposin e kreshnikevegusht në Prishtinë nga Instituti Albanologjik i Prishtinës dhe Qendra Albanologjike e Tiranës. Vetëm një vit më parë projekti për të aplikuar në UNESCO me dosjen e Eposit të Kreshnikëve ishte kthyer në një “mollë sherri” mes ministrive të dy vendeve, meqenëse nisma fillimisht kishte qenë e Kosovës. Por siç duket përplasjet janë sheshuar dhe tashmë dy institucionet albanologjike po bashkëpunojnë për të organizuar një konferencë shkencore me temë “Gjendja e eposit në pesë vendet ballkanike, Shqipëri, Kosovë, Maqedoni, Serbi, Mal i Zi”.
Tezat e studiuesve do të ketë një rëndësi të madhe për studimet në fushën e eposit të kreshnikëve në gjithë Ballkanin, posaçërisht për eposin shqiptar. Këngët dhe tregimet në prozë, të mbledhura në pesë vende të Ballkanit: Shqipëri, Kosovë, Maqedoni, Serbi, Mal i Zi, do të jenë objekt kryesor i shqyrtimit, por do të trajtohen edhe probleme të tjera të epikës gojore. Sipas organizatorit të kësaj konference prof. Dr. Zymer Neziri, ndonëse deri më sot janë shënuar rreth gjysmë milioni vargje të këngëve e të motërzimeve, për mbledhësit e Eposit të Kreshnikëve, sidomos në qendrat e mëdha studimore në Tiranë e në Prishtinë vatrat e gjalla të këtij lloji të rrallë të këngëve ende paraqesin interes të veçantë. “Kjo u dëshmua gjatë realizimit të projektit “Gjendja e tashme e Eposit të Kreshnikëve në pesë vende të Ballkanit: Shqipëri, Kosovë, Maqedoni, Serbi, Mal i Zi” një projekt që është realizuar në periudhën kohore 2012-2014, kur nga ekipi E5 me bashkëpunëtorët e jashtëm u evidentuan dhe u mblodhën deri më tash rreth 7 vëllime, poezi dhe prozë”, – ka thënë Neziri, shkruan Mapo.
Një diskutim të veçantë do të zërë dhe eposi shqiptar. Tezat për diskutim për eposin shqiptar do të jenë zanafilla, autoktonia, funksioni etnik sipas simboleve mitologjike-përrallore; temat dhe motivet e konfliktit shqiptar-sllav; pastaj vlerat autentike të eposit etj; “Muji dhe Halili-sinonim i qëndresës kufitare; konteksti ballkanik: përkime dhe ndikime të ndërsjella me epikat gojore kroate, boshnjake, serbe, maqedonase, bullgare, greke; këngëtarët dygjuhësorë (bilingualë); teoria e Perry-Lordit, si një nga bazat për studimin e eposit; interpretimi i këngëve epike. Përgjithësisht në qendër të diskutimeve do të jetë gjendja e këngëve të kreshnikëve për gjithë rajonin e Ballkanit.
Konferenca do të fokusohet në historikun, gjendjen dhe zhvillimet e tjera që kanë të bëjnë me këngëve kreshnike. Edhe sot në trevat shqiptare janë trashëguar këngët e kreshnikëve. Siç bëhet e ditur në këtë konferencë, pritet të marrin pjesë 70 studiues që merren me eposin ballkanik, por edhe studiues të njohur të shkencës së albanologjisë. Ata vijnë nga qendrat studimore të Ballkanit, si dhe studiues nga Evropa, Amerika, Azia, Afrika, ku pjesëmarrës do të jenë edhe emra të njohur si Minna Skafte Jensen (Danimarkë), Karl Reichl (Gjermani), Robert Elsie (Kanada), Kazihuko Jamamoto (Japoni), Nicola Scaldaferri (Itali), Mirsad Kuniq (Bosnjë) etj.
Studiuesi Neziri është iniciues i projektit për përgatitjen e dosjes që “Eposi i Kreshnikëve” të futet në mbrojtje nga UNESCO. Për këtë ishte krijuar një komision i përbashkët në mënyrë që ky projekt të ishte një iniciativë e përbashkët e Kosovës dhe Shqipërisë. Por dy vendet punuan paralelisht dhe kjo u bë shkak edhe i përplasjeve mes Ministrisë së Kulturës së Kosovës dhe Shqipërisë. Asokohe Neziraj kërkoi të ndalej projekti, duke “akuzuar” njërin nga anëtarët e komisionit të përbashkët të projektit, akademikun Vasil Toles se po punonte në mënyrë të pavarur me një projekt paralel. Projekti i përbashkët për përgatitjen e dosjes së Eposit të Kreshnikëve për në UNESCO dështoi për shkak të mosmarrëveshjeve, ndaj dy vendet iniciuan një vit më parë një tjetër projekt- Konferencën Ndërkombëtare “Eposi i Kreshnikëve në pesë vende të Ballkanit: gjendja e sotme”.
Krimi brenda familjes trondit Korçën. Një 50-vjeçar, i kthyer vetëm tri ditë më parë nga Greqia ku kishte emigruar prej vitesh, ka ekzekutuar me breshëri automatiku bashkëshorten 40-vjeçare dhe djalin 1 vjeç. I përfshirë nga një gjendje e thellë depresive, kryefamiljari Edmond Fiqi ka vrarë më pas dhe veten, në derën e banesës ku jetonte prej disa vitesh familja e tij. Vrasja e trefishtë ka ndodhur mbrëmë në një banesë në hyrje të qytetit juglindor, në vendin ku dikur ka qenë antena e madhe e Radio Tiranës.
Ngjarja e rëndë ka alarmuar policinë, e cila menjëherë ka shkuar në vendngjarje dhe ka nisur hetimet. Burime zyrtare nga Drejtoria e Policisë së Qarkut të Korçës bënë me dije, se pas kryerjes së veprimeve hetimore, dyshohet se gjithçka ka ndodhur për motive xhelozie. Sipas hetuesve të çështjes, emigranti Edmond Fiqi, banor i komunitetit rom, ka qëlluar për vdekje gruan e tij, Albina Fiqi, me origjinë nga Shijaku, pasi dyshonte për atësinë e fëmijës.
VRASJA E TREFISHTE
Dyshimi se gruaja e kishte tradhtuar dhe se kishte një fëmijë me dikë tjetër, ka çuar deri në marrëzi Edmond Fiqin nga Korça. Mësohet se 40-vjeçari, prej shumë kohësh kishte emigruar në Greqi dhe se prej 4 vitesh ai nuk kishte ardhur në vendlindje. Sipas burimeve policore, Fiqi është kthyer nga vendi fqinj tri ditë më parë. Ai është tronditur kur ka gjetur të shoqen me djalin 1 vjeç. I tronditur, Edmond Fiqi i ka kërkuar shpjegime bashkëshortes së tij, Albinës. Hetuesit e çështjes pohuan se çifti është konfliktuar ashpër në lidhje me atësinë e fëmijës. Xhelozia i ka errur sytë Edmond Fiqit, i cili ka vendosur të hakmerret me gruan e tij.
Mbrëmë, rreth orës 20:30, 40-vjeçari ka hyrë i armatosur me automatik në banesën e tij. Ai ka hyrë në dhomë dhe ka zbrazur 15 plumba mbi krevatin ku po flinte bashkëshortja, Albina, me fëmijën 1 vjeç. Për pasojë këta të fundit kanë mbetur të vdekur në vend. Më pas emigranti ka vrarë dhe veten në derë të shtëpisë. Krismat e armës kanë alarmuar banorët e tjerë të komunitetit rom, të cilët kanë sinjalizuar policinë.