Kadri Kryeziu është gjyqtar në Gjykatën Kushtetuese të Kosovës dhe në fushatën e fundit zgjedhore u pa në Prizren në një fushatë të PDK-së.

Para se të shihej në tubimet e fushatës së Partisë Demokratike të Kosovës, Kryeziu ka pasur aktivitet disa vjeçar në Aleancën për Ardhmërinë e Kosovës.

Ka qenë anëtar i kryesisë dhe madje zv.ministër i Tregtisë dhe Industrisë, në kohën kur Bujar Dugolli nga AAK ishte ministër.

Ka qenë në fakt në këtë parti që nga viti 2000 deri në vitin 2009. Ai ka shërbyer edhe në disa poste në Ministrinë e Ambientit në qeverisjen e AAK-së, 2004-2007.

Pas vendimit për masën e përkoheshme të suspendimit që Kushtetuesja mori në rastin e ankesës së PDK-së për seancën konstituive të 17 korrikut, u mor shumë nëpër gojë nëse Kushtetuesja dirixhohet politikisht nga ndonjë grup i caktuar politik. /Indeksonline/

Blloku i partive të koalicionit Lidhja Demokratike e Kosovës, Aleanca për Ardhmërinë e Kosovës dhe Nisma është duke përgatitur draftin final të komenteve, të cilat do t’i deponojë në Gjykatën Kushtetuese, si përgjigje në lidhje me rastin e konstatuar të zgjedhjes së kryetarit të Kuvendit nga Partia Demokratike e Kosovës.

Avni Arifi, këshilltar i parë i liderit të AAK-së, Ramush Haradinaj, ka thënë për Radion Evropa e Lirë se është çështje e dy-tri ditëve të ardhshme kur ekspertët e koalicionit do t’i dorëzojnë komentet e veta te Gjykata Kushtetuese.

“Besoj se në dy-tri ditët e ardhshme ne do t’ia dorëzojmë komentet Gjykatës Kushtetuese. Argumentet tona janë të mjaftueshme, bindëse dhe të shumta që vërtetojnë që zgjedhja e kryetarit të Kuvendit ka qenë konform Kushtetutës, zgjedhje legjitime dhe tërësisht legale”, ka thënë Arifi.

Afati i fundit kur blloku i partive LDK, AAK dhe Nisma duhet t’i përgjigjet Kushtetueses është 4 gushti.
Në anën tjetër, zyrtarë të Partisë Demokratike të Kosovës nuk kanë komentuar zhvillimet rreth Gjykatës Kushtetuese dhe formimit të institucioneve, duke thënë se janë në pritje të përfundimit të procesit.

PDK-ja kishte deponuar në Kushtetuese kërkesën për sqarime në lidhje me zgjedhjen e Isa Mustafës në postin e kryetarit të Kuvendit, duke pretenduar kontestimin e procedurave zgjedhore.

Në bazë të asaj kërkese, Gjykata Kushtetuese më pas kishte pezulluar postin e kryetarit të Kuvendit, si dhe aktivitetet e legjislativit të Kosovës deri në marrjen e vendimit përfundimtar.

Avni Arifi thotë se koalicioni është i interesuar që kjo çështje të mbyllet sa më shpejt, në mënyrë që vendi t’i formojë institucionet.

“Besoj që Gjykata Kushtetuese duhet të japë një përgjigje sa më të shpejtë, sepse ne po shohim një degradim të mëtutjeshëm të institucioneve dhe se ne jemi të alarmuar nga vendimet e qeveritarëve në ikje, ku janë përfshirë në një proces të gjerë të punësimit të familjarëve të tyre, të kuadrove partiake si dhe të transferim të punëtorëve nga stafi politik te shërbyesit civilë”, ka deklaruar Arifi.

Për deponimin e komenteve te Gjykata Kushtetuese, koalicioni LDK, AAK dhe Nisma pretendon të mbështetet edhe në nënshkrimet e shumicës prej 83 tjerë, ku bëjnë pjesë ata të Vetëvendosjes dhe pakicave, të cilët qëndruan në sallë më 17 korrik kur ishte votuar për kryetarin e Kuvendit.

Ndonëse me veprimet e tyre, liderët e partive të koalicionit LDK, AAK dhe Nisma kanë respektuar vendimin e Kushtetueses, në deklarata e tyre nuk e fshehin edhe pakënaqësinë me vendimin për pezullim të postit të kryetarit të Kuvendit.

Ishte vetë Isa Mustafa ai i cili masën e shqiptuar ndaj tij për pezullim e pranoi, por deklaroi, po ashtu, se gjykata nuk do të zgjedhë kryetarin, por votat e deputetëve.

“Gjykata mund të marrë çdo vendim, mirëpo deputetët janë ata që përfundimisht do të vendosin dhe kanë vendosur për këtë çështje”, ka deklaruar Mustafa.

Përveç anës kushtetuese e ligjore që pritet t’i sqarojë Gjykata Kushtetuese, në lidhje me zgjedhjen e kryetarit të Kuvendit, në Kosovë po krijohet edhe një rast i parë i pretendimit të krijimit të qeverisë nga partitë e bllokut që nuk dolën fituese të zgjedhjeve, por që me anë të koalicionit arritën të krijojnë shumicën në parlament.

Analistë dhe vëzhgues të ndryshëm të këtij procesi ndajnë mendime të ndryshme nëse institucionet e dala nga zgjedhjet e 8 qershorit do të arrijnë të funksionalizohen apo vendi do të detyrohet të shkojë në zgjedhje të reja. /rel/

Në Prizren sot edhe një herë janë mbajtur protesta në përkrahje të palestinezëve në Gaza.
Edhe ditë më parë ishin mbajtur protesta të ngjashme.

Këtë të premte, ndër të tjera, në fotografitë që i kanë publikuar disa aktivistë të partisë islamike LISBA, shihen flamuj të Izraelit të bërë me ‘X’.

Në këtë tubim pati edhe lutje fetare për viktimat e sulmeve izraelite. Një ndër pjesëmarrësit e kësaj proteste paqësore ishte ehe qytetari,Ramadan Luma tha se ndjehet i tmerruar me pamjet dhe informacionet që sheh në televizion për gjendjen e palestinezëve të Gazës.
Ai është i revoltuar me shtetet e fuqishme botërore,të cilat lejojnë që për çdo muaj të ramazanit,në Gaza të ndodhin masakra ndaj popullatës së atjeshme civile.

Luma nuk ishte i kënaqur edhe me organizimin e kësaj proteste,por mbi të gjitha tha ai ,edhe ne u munduam të përçojmë mesazhin e solidaritetit me popullin e shumëvuajtur palestinez të Gazës./PrizrenPress.com/

Gazetarët dhe përfaqësuesit e shoqërisë civile vlerësojnë se kryetari i Prizrenit, Ramadan Muja duhet të tregohet më transparent në marrjen e vendimeve për qytetarët. Ata thonë se hapja e mbledhjeve të drejtorëve të Ekzekutivit mund të kuptohet si një fillim i ngritjes së transparencës.

Gazetari i TVPZ dhe RTV21, Nuhi Salihu thotë se hapja e mbledhjeve të drejtorëve të Ekzekutivit të Prizrenit, është vetëm një sinjal i vogël që Komuna ka ndaj qytetarëve.

“Mendoj se është një sinjal i vogël karshi obligimeve që Komuna e Prizrenit ka ndaj qytetarëve për transparencë dhe llogaridhënie”, thotë Salihu për PrizrenPress.

“Ka gjëra edhe më të rëndësishme për të cilat qytetarët duhet të informohen se si shpenzohen në radhë të parë taksat e tyre”.

“Ka shumë projekte të cilat duhet të publikohen se cila ka qenë vlera reale e tyre dhe realisht sa para janë shpenzuar për ato projekte nga pushteti”,shprehet Salihu.

Edhe përfaqësuesi i KDI-së në Prizren, Naim Cahanaj thotë se hapja e mbledhjeve të drejtorëve të Ekzekutivit është një masë e vogël që kryetari Ramadan Muja ka bërë në drejtim të rritjes së transparencës.

“Hapja e mbledhjeve të kryetarit të Komunës së Prizrenit me drejtorët e drejtorive komunal është një masë e vogël në drejtim të rritjes së transparencës në procesin vendimmarrës”,thotë Cahanaj.

“ Terri informativ në vendimet e qeverisë komunale që nga viti 2009 gjerë më sot nuk gjunjëzuan shoqërinë civile dhe mediat, që të kërkojnë në vazhdimësi transparencë më të madhe të vendimmarrjes nga ekzekutivi i Komunës së Prizrenit”.

“Akti i kryetarit që të pranojë hapjen e mbledhjes së bordit të drejtorëve ( jo procesin vendimmarrës) mund të cilësohet si fillim i një procesi në ngritjen e transparencës komunale dhe ndërrimit të qasjes së deritanishme të individëve në pozitat publike”.

“Kjo assesi nuk duhet të ndalet me kaq, madje edhe kur ka transparencë duhet të kërkohet edhe më tej transparenca mbi gjitha qytetarët e Komunës së Prizrenit duhet të informohen për çdo detaje të vendimmarrjes komunale,sepse buxheti i Komunës është i qytetarëve, por jo edhe i pushtetarëve që qeverisin me institucionet lokale”./PrizrenPress.com/

Kryetari i Gjykatës Kushtetuese të Kosvës, Enver Hasani mund të mos përfshihet si Gjyqtar në rastin e vlerësimit të kërkesës së PDK-së, nëse Isa Mustafa është zgjedhur në mënyrë të ligjshme si kryetar i Kuvendit. Kështu kanë bërë të ditur burime të Gazetës Blic.

Sipas këtyre burimeve, janë dy arsye kryesore përse Enver Hasanit i është sugjeruar nga qarqe diplomatike në Prishtinë që të mos marrë pjesë në rastin Mustafa, për shkak të konfliktit të interesit që mund të ketë.

Dy arsye pse Hasani mund të mos jetë pjesë në rastin Mustafa

Rasti i parë mësohet të jetë përfshirja e tij në disa raste të shkeljeve ligjore, për të cilat pat raportuar e përditshmja “Koha Ditore”. Këto raportime rreth Enver Hasanit, i kishte fshehur Kryeprokurori i Shtetit, Ismet Kabashi, gjë që ka bërë që të ngritën dyshime për neutralitetin që mund ta ketë Kryetari i Gjykatës Kushtetuese të Kosovës, në rastin e zgjedhjes së Isa Mustafës Kryetar i Kuvendit të Kosovës.

“Pas publikimit të këtyre fakteve nga një e përditshme kosovare, ku Kryetari i instancës më të lartë Gjyqësore në vend dyshohet se është përfshirë në veprime të paligjshme, qarqet ndërkombëtare me ndikim në Prishtinë i kanë sugjeruar atij që të mos jetë pjesë e panelit për rastin Mustafa, për shkak të interferimeve që mund të ketë në rast. Pra, në një farë forme, Hasanit mund t’i ketë “ndihmuar” dikush nga pushteti që Ismet Kabashi ta fsheh lëndën e tij”, ka thënë ky burim për Gazetën Blic.

Dhe arsyeja e dytë, se përse Enver Hasanit i është sugjeruar të mos jetë pjesë e rastit Mustafa ka të bëjë me Komentarin e publikuar para disa kohësh nga vetë ai.

“Edhe çështja e publikimit të Komentarit mund të shihet si një lloj konflikti interesi. Mirëpo, arsyeja kryesore ka të bëjë siç e thash më lartë me dyshimin e përfshirjes së Hasanit në shkelje ligjore dhe fshehjen e rastit nga ana e Kryeprokurorit të Shtetit”, ka thënë ky burim.

Megjithatë, i njejti ka theksuar se është në dorën e Enver Hasanit se a do të jetë apo jo pjesë e rastit. E sigurtë është që atij i është përcjellur ky mesazh.

Gazeta Blic ka provuar që të bisedojë me Enver Hasanin për këtë temë mirëpo kontakti me të ka qenë i pamundur.

Para pak ditësh Gjykata Kushtetuese e Kosovës mori vendim që ta pezullojë Isa Mustafën në krye të Kuvendit deri në verdiktin përfundimtar, pas kërkesës që e kishte bërë PDK-ja për të vlerësuar ligjshmërinë e zgjedhjes së Kryetarit të ri të Kuvendit.

Çfarë do të bëhet me Kadri Kryeziun?

Përndryshe pos Enver Hasanit, edhe anëtari tjetër i Gjykatës Kushtetuese, Kadri Kryeziu nuk do të marrë pjesë në rastin Mustafa. Kjo është bërë e ditur qysh në njoftimin për vendimin e parë për Rastin Mustafa ku thuhet se Kryeziu nuk do jetë as në këtë lëndë pjesmarrës.

Kryetari i Gjykatës Kushtetuese të Kosovës, Enver Hasani pas raportimit të mediave për pjesëmarrjen e Kadri Kryeziut në fushatën elektorale të PDK-së kishte premtuar se do të ndërmerren masa ndaj Kryeziut, por deri më sot nuk është ndërmarrë as një masë pos faktit që ai s’mori pjesë në vendimin për Pyetjet e Presidentes si dhe tashti në Rastin PDK vs. Kuvendi i Kosovës.

Kryeministri në detyrë, Hashim Thaçi ka kujtuar aksionin e 25 korrikut të vitit 2011, për vënien nën kontroll të pikave kufitare në Jarinjë e Bërnjak.

Thaçi në profilin e tij në Facebook, ka shkruar se 25 korriku 2011 shënon shuarjen e ëndrrës së Serbisë për ndarjen e Kosovës.

“Tre vite më parë, më 25 korrik 2011 u zhvillua aksioni i Njësisë Speciale të Policisë së Kosovës për të vënë nën kontroll pikat kufitare në veri të Kosovës, Jarinjë dhe Bërnjakë. Kjo ditë është ditë e bashkimit territorial të Kosovës”, ka thënë Thaçi, teksa ka përkujtuar edhe rënien e policit Enver Zymberi.

“Në këtë operacion fisnik, ra në krye të detyrës për mbrojtjen e integritetit territorial të Kosovës, heroi ynë Enver Zymberi. Ky operacion i dha fund status quo-së së mbretërimit të paligjshmërisë e pasigurisë në veri dhe nisi procesin e ri-integrimit të asaj pjese të territorit të Republikës së Kosovës.

Enveri u flijua për të vendosur sovranitetin dhe ligjshmërinë në gjithë territorin e Kosovës dhe vepra e tij e lavdishme do të shërbej si simbol frymëzimi për të gjithë ne dhe brezat që do të vijnë”, ka thënë Thaçi.