Politikani Naim Maloku, i cili së fundi aderoi në AKR, duke komentuar zhvillimet e fundit rreth seancës konstituive të Kuvendit, thotë se Vetëvendosje i ka borxh PDK’së për mbështetjen që ia ka dhënë në zgjedhjen e Kryetarit të Prishtinës, Shpend Ahmetit.

“Po të kishte vetëm pak moral politik ky subjekt së paku do të duhej të mbështeste kandidaturën e PDK’së për Kryetar të Kuvendit”, ka thënë Maloku për Kosova Sot.

Sa i përket seancës konstituive, Naim Maloku ka deklaruar se heshtja e ndërkombëtarëve karshi zgjedhjes së Isa Mustafës është një detektim i shkeljeve serioze që janë bërë me lojërat politike në seancën e 17 korrikut, prandaj, sipas tij, pritet me të drejtë anulimi i kësaj seance nga Gjykata Kushtetuese.

Ai beson në futjen e figurave të reja për Kryetar Kuvendi nga të dyja blloqet, fillimisht nga PDK‘ja si parti fituese e zgjedhjeve.

“Në rast të dështimit të sigurimit të votave, për të mos bllokuar procesin me shkuarje në zgjedhje të reja, do të ketë interpretim të atillë që Kushtetuesja t’i japë të drejtë edhe bllokut të koalicionit paszgjedhor të subjekteve politike të opozitës që të propozojnë dhe të kërkojnë votat për kandidatin e tyre për kryeparlamentar”.

“Në këtë variant të ri, Isa Mustafa nuk do të duhej ta kishte më të drejtën e kandidimit, pasi është evidentuar si pjesë e bllokut politik që ka bërë shkelje kushtetuese e procedurale për inate politike”.

“Ndërkombëtarët janë duke pritur se si do të zhvillohet situata tani, në pritje të interpretimit të Gjykatës Kushtetuese. Me siguri Kushtetuesja do të vendosë në konformitet me vendimin për të drejtën e nominimit të Kryeministrit. Fillimisht partia e parë e dalë nga zgjedhjet, e më pastaj koalicioni tjetër, sepse fituesi i zgjedhjeve është PDK’ja dhe dihet se çfarë do të jetë afërsisht interpretimi i tanishëm”.

“Partia e parë do ta ketë të drejtën të propozojë dy kandidatë, njërin për Kryetar Kuvendi dhe tjetrin për Nënkryetar”, ka thënë Maloku për Kosova Sot.

Sipas Malokut, nëse e konteston Gjykata Kushtetuese zgjedhjen e Isa Mustafës, atëherë i njëjti nuk ka të drejtë të rikandidohet.

“Nëse Gjykata Kushtetuese e sjell situatën në pikën zero, Isa Mustafa nuk do të duhej të kandidohej, sepse faktikisht ai është djeg në procedurën e kandidimit dhe përpjekjes për zgjedhje në seancën e 17 korrikut”.

“Ndërkombëtarët e kanë parë që në të dyja blloqet ka qenë një pozicion i padefinuar, se të dyja blloqet i kanë pasur shpresat e mbështetjes vetëm te minoritetet. Edhe po të ishte kandiduar dhe votuar i pari, propozimi i kandidatit të PDK’së, shpresat i kanë pasur te minoritetet, lista ‘Srpska’ e Aleksandër Vuçiqit, njësoj sikur te LDK’ja, për kryeparlamentarin”.

Gjykata Kushtetuese është dashur që ditën e parë të sqarojë dy nene kushtetuese për mënyrën se si rregullohet çështja e mandatarit për të krijuar qeverinë pas zgjedhjeve.

E njëjta gjykatë tash do të duhet të tregojë edhe se cila shumicë ka të drejtë të propozojë kryekuvendarin, shkruan Tribuna.

Njohës të çështjeve politike thonë se kjo praktikë po e bën Kosovën shtet të gjykatës.

Deputetja nga radhët e Lidhjes Demokratike të Kosovës dhe njëra nga hartuest e Kushtetutes, Vjosa Osmani për Indeksonline ka thënë se problemi i zgjedhjes së kryetarit të Kuvendit, nuk mund ta qoj vendin edhe në një palë zgjedhje.

“Kushtetutat në mënyrë taksative parasheh katër rrethana kur vendi shkon në zgjedhje, dhe moszgjedhja e Kryetarit të Kuvendit, nuk është njëra prej tyre. Pra në këjtë rast, edhe në qoftëse kthehet procedura në zero, thjesht përsëritet procedura e Kuvendit dhe nuk do të ketë zgjedhje, por është thjesht përsëritje e procedurës”, tha Osmani.

Osmani mendon se edhe nëse vendoset nga Gjykata Kushteutese që të përsëritet seanca konstituive, atëherë prapë koalicioni LDK-AAK-Nisma, janë të vetmit që i kanë numrat për ta zgjedh kryekuvendarin.

“Pavarësisht kësaj ne do t’i kemi votat dhe PDK nuk do t’i ketë votat. Pra të vetmit që kanë mundësi ta zgjedhin kryetarin e Kuvendit me 61 vota e më shumë janë koalicioni LDK-AAK-Nisma dhe partnerët e tjerë. Kurse PDK është e vetme”, tha ajo.

Megjithatë, ajo mendon se vetëm PDK, bëri shkelje në seancën konstituive të mbajtur me 17 korrik.

“Por ne jemi të bindur që me datën 17 korrik gjithçka ka shkuar në rregull sa i përket veprimeve tona dhe shkeljet e vetme janë shkeljet e Kryesueses nga ana e PDK-së.Prandaj dhe nuk shohin ndonjë nevojë që procedurat të përsëriten sepse është urgjente që institucionet e Kosovës të ndërtohen sa më shpejt dhe presidentja të veproj sa më shpejt sa i përket caktimit të mandatarit të qeverisë”, tha Osmani.

Lidhur me deklarata se PDK po mundohet ta bind Nismën që të largohet nga koalicioni aktual, ajo tha se këto nuk janë të vërteta.

“Ne kemi informata të sigurta që një gjë e tillë nuk është e vërtet. Këto deklarata kanë tentuar që ta destabilizojnë koalicionin mirëpo kanë pas efekt të kundërt dhe vetëm e kanë forcuar edhe më shumë. Dhe çdo tendencë e PDK-së për ta dëmtuar koalicionin, na ka bërë edhe më të fortë”, tha Vjosa Osmani.

Bilall Sherifi nga NISMA për Kosovën thotë se në zgjedhje zakonisht shkohet kur asnjëra palë s’mund t’i krijoj institucionet.

Anëtari i Kryesisë së NISMA tha për RTK-në se në zgjedhje shkohet kur asnjëra palë nuk arrin t’i ketë 61 numra.

“Në zgjedhje shkohet zakonisht kur asnjëra palë nuk arrin t’i bëjë 61 numra, dhe në pamundësi për të krijuar 61 numra dhe në pa gatishmëri për të bisedu shkohet në zgjedhje”, tha Sherifi.