Blloku i partive politike, LDK, AAK, Nisma si koalicion dhe Vetëvendosje në anën tjetër, por si mbështetëse e tyre kundër qeverisë Thaçi 3, kishin njohuri të hënën në takimin e mbajtur në selinë e AAK-së se Gjykata Kushtetuese me vendimin e saj do t’u njihte të drejtën për të propozuar mandatarin.

Mirëpo, ato dolën edhe me një deklaratë të përbashkët si zotim apo besëlidhje se nuk do ta tradhtojnë njëra-tjetrën dhe se nuk do t’i përgjigjen ftesës së mandatarit të PDK-së Hashim Thaçi për konsulta rreth krijimit të qeverisë.

Por, sa ishte e domosdoshme dhe e nevojshme që liderët e LDK-së, Vetëvendosjes, AAK-së dhe Nisma të lidhin “besën” për të injoruar çdo ftesë të PDK-së, flasin burime të gazetës Tribuna nga këto subjekte politike. Sipas tyre, kishte sinjale nga PDK-ja se në pamundësi që të formojë qeverinë ajo, do të dilte me oferta tejet joshëse për partitë tjera për t’iu bashkuar në koalicion.

“PDK dhe Thaçi kanë dërguar sinjale se mund të heqin dorë madje edhe nga posti i kryeministrit, duke ia ofruar atë LDK-së, kurse për vete do të mbanin postin e kryetarit të Kuvendit si dhe do të prisnin përmbylljen e mandatit të presidentes Jahjaga, për të marrë nën drejtim këtë post nga viti 2016”, kanë thënë këto burime. /Tribuna/

Sot mbushen 24-vjet nga dita e miratimit të Deklaratës Kushtetuese për pavarësinë e Kosovës nga delegatët e Kuvendit të atëhershëm të Kosovës. Miratimi i kësaj deklarate ishte padyshim një akt me rëndësi vendimtare për historinë më të re të Kosovës e të popullit shqiptar.

Ky akt politiko-juridik ishte shprehje e aspiratave të popullit të Kosovës për liri dhe mëvetësi në rrethanat e reja që po krijoheshin asokohe ndër shqiptarët dhe në gjithë rajonin e Ballkanit. Shuarja e autonomisë po shënonte fillimin e serbizimit të Kosovës dhe në të njëjtën kohë paraqiste hyrje në një periudhë tepër të rëndë për shqiptarët të cilët po trajtoheshin, jo vetëm si qytetarë të rendit të dytë, por edhe po u nënshtroheshin torturave sistematike nga regjimi kriminal serb.

Duke qenë të vetëdijshëm për momentin historik para të cilit ndodhej Kosova, delegatët e atëhershëm të Kuvendit të Kosovës, më 2 korrik të vitit 1990, miratuan publikisht (para Kuvendit të Kosovës) Deklaratën Kushtetuese, me të cilën Kosova u shpall njësi e veçantë në kuadër të federatës së atëhershme jugosllave.

Dy muaj pas shpalljes së Deklaratës Kushtetuese, që në popull njihet edhe si Deklarata e Pavarësisë, pra më 7 shtator të vitit 1990, të njëjtët delegatë nxorën aktin më të lartë juridik – Kushtetutën e Republikës së Kosovës dhe me këtë ata edhe formalisht Kosovën e shpallën Republikë.

Por, sikundër pritej edhe në ato momente dramatike, Serbia fill pas shpalljes së Deklaratës Kushtetuese vendosi gjendjen e jashtëzakonshme në Kosovë, duke suprimuar me forcën e tankeve të gjitha institucionet e Kosovës, duke filluar nga Kuvendi e Këshilli Ekzekutiv i tij dhe deri tek të gjitha institucionet e tjera shkencore, arsimore e kulturore.

Presidentja Atifete Jahjaga është e obliguar ta propozojë për kryeministër fillimisht kandidatin që e prezanton PDK-ja, e nëse ai dështon ta formojë Qeverinë, atëherë e ka në dorë të vlerësojë se kandidati i cilit subjekt politik do të mund të merrte shumicën e votave në Kuvend, në mënyrë që ta mandatojë atë. Jahjaga shtrëngohet t’i shmangë zgjedhjet e reja.
Udhëzimet janë publikuar të martën nga Gjykata Kushtetuese.

Jahjaga ia pati adresuar asaj 12 pyetje përkitazi me mandatarin, pasi zgjedhjet e 8 qershorit e kanë nxjerrë PDK-në si parti të parë për kah numri i votave, me rreth 31 për qind, por kanë prodhuar edhe një koalicion paszgjedhor të LDK-së, AAK-së e Nismës, që bashkërisht kanë rreth 10 për qind më shumë vota sesa PDK-ja, shkruan Koha Ditore.

Secila nga këto dy kampe politike pretendonte se, mbështetur në Kushtetutë, u takonte mandatari për të formuar Qeverinë. Kushtetuesja ka dhënë verdiktin se mandatari fillimisht i takon subjektit që ka fituar më së shumti ulëse në Kuvend.

Organet e hetuesisë duket se janë afër gjurmëve të personit i cili në mesnatën mes 14 dhe 15 qershorit, qëlloi për vdekje kandidatin e PDK’së për deputet, Elvis Pista.

Lajmin për Tv Rrokum e ka bërë me dije kryeprokurorja e Prokurorisë Themelore në Gjakovë, Shpresa Bakija, e cila tha se presin që shumë shpejt të kenë rezultat dhe të vijnë deri te identifikimi i vrasësit dhe rasti Pista të zbardhet.

Kryeprokurorja Bakija tha për Rrokum TV se Prokuroria asht tu punuar intensivisht në informacionet e mbledhura dhe se beson që shumë shpejt ka me ardhur te përfundimi i rastit.

Kryeprokurorja nuk ka dhanë detaje rreth dyshimeve të mundshme për motivet që kanë quar deri të vrasja e Pistës, duke thanë se në asnjë pistë s’mundet me dhanë informacione, mbasi po punohet dhe nuk munden me u dëmtuar hetimet.

Ndryshe, kandidati i për deputet në Kuvendin e Kosovës nga radhët e PDK-së, Elvis Pista asht vra mesnatën mes 14 dhe 15 qershorit rreth orës 00:45 në oborrin e restorantit “ JAHA” në Rahovec, duke u qëllua katër herë mbrapa shpine, në një largësi disa metra. Mbrëmjen tragjike, Elvis Pista po festonte ditëlindjen e gruas së tij. I ndjeri përkundër asaj që ishte i dyti ma i votuam në qytetin e tij të Rahovecit, nuk kishte arrit me kaluar pragun për tu bërë deputet i Kuvendit të Kosovës.

”Partia Demokratike nuk e ka si opsion të parë, mundësinë ta çojë vendin edhe në një palë zgjedhje të jashtëzakonshme. Por, nëse sjellja e opozitës vazhdon të jetë barrikaduese, atëherë, ky do të jetë opsioni i dytë”, ka thënë nënkryetari i PDK’së, Hajredin Kuçi.

Kuçi nuk e ka hedhur poshtë as mundësinë e shkuarjes në zgjedhje të jashtëzakonshme, në rast se PDK, nuk arrin të krijojë qeverinë, ndonëse edhe një palë zgjedhje të jashtëzakonshme i sheh si proces të dëmshëm.

Kuçi ka thënë se as PDK nuk ka qëndruar duar kryq, ndonëse në pritje të certifikim të zgjedhjeve, dhe vendimit të Gjykatës Kushtetuese, kanë provuar kontaktet me subjektet politike. Megjithatë ofertat partive politike,do të ia bëjë mandatari i themelimit të Qeverisë.

“Partia Demokratike do të punoj që ta ndërtojë Qeverinë sa më shpejt që është e mundur. PDK nuk do të kontribuoj për mbajtjen e zgjedhjeve të jashtëzakonshme, janë disa arsye. Arsyeja e parë është që jemi të frikësuar që mund të kemi zgjedhje të lira, e demokratike. Arsyeja e dytë është shpenzim i madh buxhetor e tronditje për qytetarin. Po ashtu, është një sinjal i keq për botën demokratike”, ka thënë Kuçi për Rrokum TV.

Ai ka një porosi për subjektet politike, duke thënë se ndërtimi i institucioneve nuk është në vullnetin e tyre. E sjelljen e opozitës ai e sheh si sjellje xhelozie. Megjithatë, Kuçi nuk e ka mohuar mundësinë, që PDK të heq dorë nga pozita e të parit të qeverisë, vetëm të gjejë partnerët për bashkëqeverisje.

Njëri nga gjyqtarët e Kushtetueses nuk është pajtuar me vendimin e sotëm. Gjykatësi Robert Carolan nuk është pajtuar më shumicën e gjykatësve dhe beson se ata kanë vendosur gabimisht për arsyet e mëposhtme:

Sipas Gjykatësit Carolan, neni 84.14 dhe 95.1, për të cilat Presidentja kishe dyshime, janë në përputhje me njëra tjetrën.

Sipas tij, nuk duhet të përzihet ligji për zgjedhjet me kushtetutë pasi që ligji për zgjedhje rregullon zgjedhjet si dhe kush mundet të marrë pjesë në zgjedhje e jo zgjedhjen e kryeministrit, ndërsa kushtetuta e përcakton koalicionin, raporton KTV.

Sipas tij, koalicioni është “një grup i njerëzve, grupeve apo vendeve që janë bashkuar për një qëllim të njëjtë”, pra nuk është e domosdoshme që të jetë koalicion parazgjedhor. Po ashtu ai thotë se edhe kjo kushtetutë sikurse korniza kushtetuese e UNMIK-ut nuk kërkon që koalicioni të jetë i regjistruar ose të ekzistojë para zgjedhjeve.

“Në katër parë zgjedhjet parlamentare paraprake asnjë parti politike nuk e ka fituar shumicën në Kuvend dhe secilën herë në këto katër raste është propozuar kandidati për kryeministër nga koalicioni i krijuar pas zgjedhjeve”, thotë Carolan.

Ai precizon se duhet lexuar mirë Kushtetuta ku thuhet se shumica e deputetëve duhet të votojnë kryeministrin dhe nëse kjo nuk ndodh në dy runde të votimit në Kuvend, atëherë duhet të shpallen zgjedhjet parlamentare.