Tri partitë që kanë nënshkruar marrëveshjen për të bashkëqeverisur, Lidhja Demokratike e Kosovës, Aleanca për Ardhmërinë e Kosovës dhe Nisma për Kosovën, janë pajtuar parimisht me disa nga kushtet e parashtruara nga ana e Lëvizja Vetëvendosje e Albin Kurtit.

Burime të Gazetës Blic, të afërta me partnerët e koalicionit LDK – AAK – Nisma kanë thënë se në disa prej kushteve Lëvizja Vetëvendosje ka plotësisht të drejtë.

Sipas këtij burimi, partnerët e koalicionit mendojnë se edhe sa i përket bisedimeve me Serbinë, VV ka deri diku të drejtë, për faktin se duhet të ndryshohet qasja e këtyre bisedimeve. Megjithatë, sipas nuk do të ndodhë ndërprerja e bisedimeve.

“Edhe për dy kushtet tjera, sa i përket procesit të privatizimit. Ju e dini se edhe në legjislaturën e kaluar një pjesë e deputetëve të koalicionit kanë qenë të pakënaqur me procesin e privatizimit, andaj ka përputhshmëri të plotë më Lëvizjen vetëvendosje në këto pika”, ka thënë burimi.

Ndërkohë, Gazeta Blic nga burime tjera brenda takimit të fundit ndërmjet Isa Mustafës, Ramush Haradinajt e Fatmir Limajt që u mbajt të premten, ka mësuar se partnerët e koalicionit do të mblidhen edhe njëherë të hënën për të diskutuar për kushtet e vëna nga Lëvizja Vetëvendosje.

“Mund të ndodhë që nesër t’i kthehet përgjigje përfundimtare Lëvizjes Vetëvendosje”, ka thënë burimi i gazetës.

Në një prononcim që i kishte dhënë Gazetës Blic zëdhënësi i VV-së, Erzen Vraniqi ka thënë se ata i kanë tri kushte kryesore: ndërprerja e bisedimeve me Serbinë, ndërprerja e privatizimit të Trepçës dhe PTK-së. Sipas tij, nëse plotësohen këto kushte, dhe nëse ka përputhshmëri edhe në programe, VV nuk e përjashton mundësinë edhe të hyrjes në bashkëqeverisje me këto parti.

Edhe lideri i VV-së, Albin Kurti në një intervistë dhënë për mediet ka thënë se do ta mbështesë qeverinë e re që sic po e quan ai emergjente. Ndërkohë ka shtuar se PDK e Hashim Thacit nuk i ka numrat që ta bëjë qeverinë.

Megjithatë, as partia e Hashim Thaçit nuk po rrinë duarkryq. Siç ka mësuar Gazeta Blic PDK e Hashim Thaçit është duke lobuar intensivisht që vendi të shkoj drejt një qeverie teknike, vetëm e vetëm që të mos ia lë qeverinë ta drejtoj koalicioni LDK- AAK- Nisma.

Gjykata Kushtetuese është ajo e cila pritet ta qartësoj situatën në lidhje me atë se kush ka të drejtë ta bëjë qeverinë, ajo parti apo ai koalicion që e ka shumicën në Kuvend apo ajo parti apo koalicion që ka dalë e para në zgjedhje.

Kryetari i Lidhjes Demokratike të Kosovës, Isa Mustafa, përmes një postimi në facebook ka hedhur poshtë spekulimet se kinse në LDK ka mospajtime për koalicionin e bllokut opozitar.

Kreu i LDK-së duke thënë se Kryesia e dhe degët e LDK-së i kanë dhënë përkrahje marrëveshjes LDK, AAK, NISMA, dhe ka kërkuar nga me mediat që të kenë qasje konstruktive ndaj procesit, siç e ka quajtur ai të rëndësishëm për Kosovën.

Më poshtë lexojeni të plotë postimin e Isa Mustafës në Facebook:

Miq të nderuar,
Kryesia e LDK-se dhe degët e LDK-së e kanë përkrahur marrëveshjen LDK, AAK dhe Nisma. Nuk ka pasur asnjë takim tjetër në të cilin është kundërshtuar kjo marrëveshje. LDK nuk ka Këshill Drejtues, dhe nuk ka pasur asnjë takim tjetër e as “hallakamë”, siç shkruan në Portalin Indeksonline.

Apeloj që këtij procesi, që është shumë I rëndësishëm për Kosovën, t’i ndihmojmë me një qasje objektive dhe konstruktive nga të mediat e shkruara dhe elektronike.

Në kuadër të strategjisë nacionale për luftimin dhe parandalimin e etheve hemorragjike krime kongo (EHKK), organizuar dhe financuar nga Komuna e Malishevës, sot ka filluar edhe spërkatja masive e territorit të Komunës së Malishevës, kundër rriqrave, si bartësit kryesor të virusit të EHKK. Spërkatja masive po bëhet nga ajri, me aeroplan.

Spërkatjen nga ajri është duke kryer kompania “ALA-CO”, ndërsa sipas drejtorit të drejtorisë komunale për mbrojtje dhe shpëtim, Ahmet Morina, spërkatja është ndarë në tri zona, të cilat do kryhen gjatë tri ditëve.

“Sot janë spërkatur fshatrat Llapqevë, Panorc, Rud, Garaqevë, Turjakë, Burim, Gurbardh, një pjesë e Dragobilit, një pjesë e Malishevës, Mirushë, Lubizhdë, Damanek, Bubël, Qupevë, Kijevë dhe Burim (ish Stapanica)”, ka bërë të ditur drejtori Morina.

“Spërkatja ka filluar në orët e hershme të mëngjesit dhe çdo gjë ka shkuar mirë deri më tani. Ne jemi në gatishmëri të plotë në mbrojtje të jetës së qytetarëve të Komunës së Malishevës dhe jemi duke e bërë të pamundurën, në marrjen e masave për parandalimin e infektimit nga EHKK”, tha Morina.

Spërkatja e sotme, është vëzhguar në tërësi nga zyrtarët komunal të Komunës së Malishevës, përkatësisht, nga drejtoria për mbrojtje dhe shpëtim, ku përveç drejtorit Morina, një zyrtar i drejtorisë ka qëndruar në aeroplan gjatë spërkatjes, si dhe në vëzhgim ka qenë edhe drejtori i drejtorisë për shëndetësi, Hajdin Berisha.

Për nesër, është paraparë të spërkaten territoret rreth fshatrave Drenoc, Bubavec, Vërmicë, Llozicë, Balincë, Mleqan, dy Plloqicat, Carrallukë, Shkarashnik, dy Tërpezat, Lladroc, Guncat, Senik dhe Bardh. /PrizrenPress.com/

As pjesëtar e sigurimit fizik dhe ata të Policës së Kosovës nuk kanë arritur që t’i parandalojnë nxënësit të kopjojnë Testin e Maturës. Edhe në pjesën e dytë të mbajtjes së këtij testi është raportuar se pothuajse në çdo qendër ku është mbajtur testit ka pasur kopjime dhe tendenca të tilla.

Madje në një video që është shfaqur nëpër media është parë se si nxënësit kanë injoruar prezencën e sigurimit fizik duke kopjuar gjatë testit. Pavarësisht kësaj, Ministria e Arsimit Shkencës dhe Teknologjisë, vlerëson se organizmi i pjesës së dytë për Testin e Maturës, që është mbajtur të shtunën, ka qenë më i miri i organizuar ndonjëherë.

Edhe pse gjatë ditës është raportuar për kopjime e nxjerrje të testeve jashtë objekteve shkollore, zyrtarët të MASHT, thotë se raportet nga terreni flasin për një mbarëvajtje të mirë.

Zëvendësministri i Arsimit, njëherësh kryetar i Komisionit Qendror Shtetëror të Maturës, Nehat Mustafa, ka thënë se pjesa e dytë e Testit të Maturës Shtetërore, e cila është mbajtur sot, është testi më i mirë i organizuar ndonjëherë./Tribuna/

Deputeti i ardhshëm i LDK-së, Armend Zemaj, përmes një postimi në Facebook, ka demantuar shkrimet e mediave për kinse një takim të LDK-së në të cilin thuhet të ketë qenë edhe ai i pranishëm.

Zemaj thotë të ketë qenë në fshatin e tij Strellc bashkë me bashkëfshatarë, ndërsa ka thënë se në atë takim të përfolur ka mundur të jetë ndonjë Armend Zemaj tjetër.

“Unë në Strellc me bashkëfshatare të mijë. Dikush paska “mbajtë” takim gjoja në Prishtinë me struktura të LDK-së… Nëse janë dy Armend Zemaj se përndryshe ky që jam, mbrëmë në PR s’kam qenë hiq.. Pritni edhe pak se nuk mbetet gja pa u marrë vesh… Strellci i gëzuar me fitoren time si deputet…”, ka komentuar ai në profilin e tij në Facebook, ku ka postuar edhe disa fotografi me bashkëfshatarët e tij.