Në konfliktin e armatosur mes dy familjeve në Prizren, ku u vra një person dhe nëntë të tjerë ngelën të plagosur, është edhe dy pjesëtar i policisë së Kosovës.

Policia Rajonale e Prizrenit, përmes një njoftimit ka bërë të ditur se rasti ka ndodhur dje rreth orës 16:30 minuta, në rrugën transite, afër restorantit “Korabi”, ku kishte plasur sherri mes dy familjeve: Berisha dhe Avdylaga.

“Një patrullë e cila në ato momente ndodhej me afër vendit të incidentit kritik është nisur në atë drejtim dhe posa ka mbërri në vendin e ngjarjes janë përpjekur për qetësimin e situatës e cila tanimë kishte eskaluar në rrahje ku janë përdorë mjete të ndryshme të forta për shkaktimin e lëndimeve”.

“Ndërkaq më pas janë dëgjuar krisma nga armë të zjarrit të llojeve dhe kalibrave të ndryshëm. Në ndihmë kanë mbërri edhe njësi tjera operative të policisë të cilat e kanë vënë situatën nën kontroll. Në vendin e ngjarjes kanë mbetur të plagosur nga armët e zjarrit nëntë persona. Në mesin e të plagosurve me armë zjarri është edhe një polic. Po ashtu polici tjetër gjatë intervenimit ka thyer këmbën”.

“Pas vënies së situatës nën kontroll të gjithë të plagosurit janë bartur deri në Emergjencën e Spitalit Rajonal në Prizren për ndihmë mjekësore. Siç merret vesh nga autoritetet mjekësore njëri nga të plagosurit ka ndërruar jetë, një tjetër ka pësuar lëndime të rënda trupore ndërsa të tjerët më lehtë”.

“Policia ka gjetur në vendin e ngjarjes dy armë: një pistoletë të llojit TT dhe një pushkë gjahu me disa gëzhoja dhe gjësende tjera që do t’i kalojnë prokurorisë së shtetit në cilësi të provës materiale. Janë sekuestruar tri vetura. Ndërkaq hetues nga Stacioni Policor në Prizren dhe ata rajonal kanë krijuar një grup hetimor për zbardhjen e rrethanave të rastit dhe nxjerrjen e të dyshuarve para drejtësisë. Sipas informatave fillestare dyshohet se motivi i këtij konflikti është për shkak të një prone”.

Koalicioni i shpejtë që lideri i LDK-së Isa Mustafa lidhi me AAK-në dhe partinë Nisma për Kosovën, nuk i ka gëzuar të gjithë në këtë parti politike. Para së gjithash, pakënaqësitë thuhet se ndërlidhen me pozitën që LDK mund të sigurojë në qeverinë eventuale që ky bllok i partive do ta formonte.

Burime nga LDK-ja, kanë thënë në kushte anonimiteti për “Tribuna” se përfshirja e LDK-së në këtë bllok ishte reflektim i drejtpërdrejtë i humbjes së zgjedhjeve dhe një masë preventive për të evituar qarjet e brendshme në këtë parti politike.

“Ishte një përpjekje për të krijuar një atmosferë fitoreje për të zbehur atë të humbjes që mbretëronte natën e 8 qershorit në LDK”, ka thënë ky burim. Sipas tij, gjendja brenda partisë nuk është alarmante, por më shumë dëshpëruese. Nga marrëveshja LDK, AAK dhe Nisma, sipas të njëjtave burime, LDK ka marrë një post të kontestueshëm të kryetarit të Kuvendit si dhe një premtim se në kohën kur presidentes Atifete Jahjaga t’i skadojë mandati kushtetues, këtë post ta mer LDK-ja

Në Komunën e Prizrenit, del se nuk i kanë bërë mirë llogaritë kur kanë nisur projekte. Auditori ka gjetur se në vitin 2013, përgjegjësit e kësaj komune kanë nisur shumë projekte të cilat as tani nuk janë përfunduar në mungesë të parave dhe planifikimit të dobët.

Gjithashtu, është gjetur se dhjetëra mijëra euro janë shpenzuar për blerje të produkteve dhe shërbimeve për familjet e dëshmorëve dhe invalidëve të luftës, por që nuk dihet saktë nëse paratë kanë shkuar për ta.

Ngjashëm edhe ndihmat për raste sociale, auditori thotë se nuk dihet nëse kanë shkuar tek përfituesit për të cilët janë dedikuar.

“Ne një rast kemi vërejtur se ishte paguar shuma prej 14,799€ në emër të furnizimit me dru për familjet e dëshmorëve dhe invalidëve të luftës duke mos bashkangjitur kërkesën dhe regjistrin e përfituesve”, thuhet në raportin e auditorit për komunën e Prizrenit. /Tribuna

(E plotësuar) Një person ka mbetur i vdekur dhe tetë të tjerë janë plagosur në Prizren, si pasojë e një zënke, raporton KTV. Zënka ka ndodhur për shkak të problemeve pronësore mes dy familjeve.

Përleshje e armatosur në Prizren, 7 të plagosur

Një ngjarje e rëndë ka ndodhur në orët e pasdites sot në qytetin e Prizrenit, ku nga shkëmbimi i zjarrit mes dy familjeve, janë plagosur 7 persona, përfshirë edhe një oficer policie.

Sipas drejtorit rajonal të Policisë së Kosovës, Nexhmi Krasniqi, rasti ka ndodhur për çështje pronësore, ndërsa janë të përfshira familjet Abdylaga, nga komuna e Suharekës, që jetojnë në Prizren dhe familja Berisha po nga Prizreni.

Nga familja Abdylaga janë katër të plagosur, ndërsa nga familja Berisha 2 persona , babë e bir.

Gjashtë të plagosurit po trajtohen në spitalin rajonal të Prizrenit, ndërsa, një person për shkak të gjendjes së rëndë është transportuar për në QKUK.

Polici ka marrë plagë në këmbë, por është jashtë rrezikut për jetë, pohon Krasniqi, raporton RTK.

Në këtë ngjarje personat e përfshirë në rast, kanë përdorur, kallashnikov, pistoleta dhe mjete të tjera të forta. Policia dhe prokurori i shtetit kanë ndalë në vendin e ngjarjes dhe po merren më rastin.

Ca lot rrjedhin shpejt mbi fytyrën e Admirit trevjeçar, djalit më të vogël të familjes Morina në Lubishtë të Malishevës. Një bukë e vetme (rreth treqind gramë në tregun e Kosovës), e ndarë në gjashtë pjesë, nuk mjaftoi për një mëngjes të bollshëm për të dhe katër motrat e vëllain e tij. Ai nuk është ngopur, buka s’i ka mjaftuar, e qumështin ka ditë që se ka kërkuar me gojë.

Të zbathur, të sëmurë, në një shtëpi të pambaruar me lagështirë e gjysmë kulm, që e lejon shiun të depërtojë në shtretërit e tyre, gjashtë fëmijë (të moshës 14, 13, 11, 8, 5 dhe 3 vjet) në Lubishtë të Malishevës, po vdesin urie.

Trupat e dy prindërve të tyre, Hafir dhe Hidajete Morina, tashmë janë shndërruar në skeletë. Ata nuk hanë ushqim, ndodh dy ditë e më shumë, duke e kursyer bukën për fëmijët e tyre, që t’ua japin ditëve të tjera kur askush s’ju jep miell pa pagesë.

“Vendosa: nëse nuk do të gjeja një thes miell me iu qu fëmijëve bukë në shtëpi ku më prisnin, të vritem, dhe jo vetëm. U nisa për shtëpi të marrë gruan dhe gjashtë fëmijët dhe të shkojë tek Ura e Fshejtë e të hidhemi. Nuk na duhet më asgjë jeta”, rrëfen Hafiri për “Zëri” përditshmërinë e zhytur në varfëri.

“Pasha këtë ditë të parë të muajit të shenjtë të Ramazanit, ka javë dal me lyp miell s’na jep kush, as do markete të mëdha ”, thotë ai.

Shqetësimi nga pak po ikën nga fytyra e fëmijëve të kësaj familje. Tani një thes miell hyri në shtëpinë e tyre. Por, qumësht nuk ka për vogëlushin. Qumështi është luks për të. Edhe kur dikush iu jep një litër qumësht e që ndodh rrallë, atij nuk i servohet nga e ëma me shijen e tij të plotë: ia përziejnë me ujë, pak sheqer, që t’i bëjë më gjatë!

“Nëse ne hamë sot me fëmijët, nesër fëmijët s’kanë çka hanë. Kështu që ne bukën tonë e ruajmë për ta. Dhe ndodh shkon një ditë e dy që ne nuk ushqehemi me gruan”, thotë Hafiri.

Hafiri ka shitur 34 ari tokë sa kishte gjithsej, për të ndërtuar shtëpinë që nuk u mbarua kurrë, sepse një ari për shpejt e shiti nga 150 euro dhe parat nuk i mjaftuan. Për të ndalur shiun nga gjysmë-kulmi, ata kanë vënë kova në tavan, por bora nuk arrihet të ndalet.

Hafiri i falënderohet Zotit për motin e mirë që ka marrë dimrit, përndryshe druhet se i kishin vdekur fëmijët nga të ftohtit.

Djali i vogël Admiri vuan nga “bruhi”.

“Këtu në Malishevë shkova, se çdo të enjte vjen mjeku. Kur shkova më tha duhet 30 euro. I thash nuk kam, por më hjeku qafe dhe nuk ma bëri djalin synet”, thotë ai duke treguar se tash djali ka pengesa në urinimin ose nuk urinon me ditë të tëra.

Edhe barërat që mjekët e Prishtinës ia kanë rekomanduar për djalin, thotë se nuk ia ka blerë. /Zëri/

Të gjithë ju që dëshironi të ndihmoni Familjen Morina, telefononi në numrin 044 567 636 dhe kontaktoni direkt me zotri Hafir Morinën. Mirëpo për çdo pa qartësi ju mund të kontaktoni edhe në numrat e redaksisë “Zëri”, në 038 222 451, 038 249 071 si dhe në 044 951 515.

Serbët e veriut dhe përfaqësuesit e tyre, në koordinim me autoritetet e Beogradit, kanë hequr një barrikadë dhe kanë rivendosur një tjetër të ashtuquajtur “Park i paqes” mbi urën qendrore mbi lumin Ibër dhe vetë serbët duhet dhe do ta heqin atë barrikadë, vlerësojnë përfaqësuesit politikë të serbëve të veriut dhe njohësit serbë të zhvillimeve politike në Kosovë.

Drejtuesit lartë të institucioneve të Kosovës, rivendosjen e barrikadës së ashtuquajtur “Parku i paqes”, e patën quajtur veprim të turpshëm dhe patën theksuar se do të kërkojnë nga Brukseli që ajo të hiqet ose në të kundërtën, do të ndërmarrin vetë veprime për heqjen e saj.

Aleksandar Jabllanoviq, kryetar i Listës Serbe, duke folur për Radion Evropa e Lirë, rikonfirmon edhe një herë se “Parku i paqes” është vënë mbi urën qendrore mbi lumin Ibër që ndan anën jugore dhe veriore të qytetit të Mitrovicës, në koordinim me autoritetet e Beogradit. Shkak i rivendosjes së barrikadës sipas tij, është mosbesimi i serbëve të veriut ndaj Prishtinës zyrtare.

“Gjithsesi që veprimet, të cilat i bën pala serbe në Kosovë, janë të koordinuara me Beogradin. Ky është një akt, i cili ka rrjedhur nga një gjendje e frikës dhe mosbesimit që vjen ndaj Prishtinës. Në atë moment që ajo frikë dhe mosbesim të zhduken, po ashtu do të zhduket edhe nevoja për ekzistencën e një ‘parku’ të tillë apo çfarëdo barrikade tjetër në veri të Kosovës”,thotë Jabllanoviq.

Rangjel Nojkiq, njohës i zhvillimeve politike në Kosovë, vlerëson se të gjitha tensionet e krijuara me heqjen dhe rivendosjen e barrikadës mbi urën qendrore mbi lumin ibër, do të shmangeshin në rast se do të ekzistonte një komunikimi më korrekt ndërmjet Beogradit dhe Prishtinës.

Nojkiq, gjithashtu, është i bindur se “Parku i paqes” nuk është vendosur pa miratimin e Beogradit zyrtar.

“Nëse kjo është bërë me miratimin e Beogradit, atëherë unë mendoj se kjo nuk është në drejtim të zgjidhjes së problemit. Por, edhe në qoftë se serbët e veriut e kanë bërë këtë pa miratimin e Beogradit, atëherë e kanë vënë Beogradin në pozitë shumë të pakëndshme, për të cilët tash duhet të gjejë zgjidhje dhe të mos përplaset me përfaqësuesit e serbëve të Kosovës. Por, Beogradi tash praktikisht nuk mund të gjejë zgjidhje”, thekson Nojkiq për Radion Evropa e Lirë.

Ndryshe, Jabllanoviq shpreh mendimin se barrikada mbi urën qendrore mbi lumin Ibër dhe gjithë të tjerat duhet të hiqen nga vetë serbët që i kanë vendosur ato. Por, sipas tij, më parë duhet të krijohen kushte për një gjë të tillë.

“Në atë moment kur populli serb në pjesën veriore të Mitrovicës do ta ketë ndjenjën se është i lirë dhe se nuk rrezikohet nga askush, ne vetë do ta heqim çdo barrikadë, përfshirë edhe ‘Parkun e paqes’. Por, çdo heqje e barrikadës apo ‘Parkut të paqes’ në mënyrë të dhunshme, paraqet shkelje të rëndë të vullnetit dhe të drejtës së popullit serb”, deklaron Jabllanoviq.

Por, Nojkiq, nuk e sheh krejt të thjeshtë këtë situatë. Sipas tij, problemin e barrikadave në veri të Kosovës duhet ta zgjidhin vetë ata që e kanë krijuar dhe nuk duhet pritur që Prishtina zyrtare të ndërhyjë për heqjen e barrikadave, për shkak se, siç thotë ai, kjo do të krijonte probleme shtesë.

Nojkiq thotë se, nisur nga kjo, Beogradi duhet të ndërmarrë hapa konkret, në mënyrë që të mos krijohen përplasje dhe konflikte të reja. Por, sipas tij, Beogradi ka probleme edhe me përfaqësuesit e serbëve në veri, për shkak se uniteti i tyre, për të cilin kohët e fundit Beogradi ka folur mjaft, është tejet i brishtë.

“Mendoj se Beogradi dëshiron ta zgjidhë atë problem dhe kjo nuk mohohet. Por, problemi është se Beogradi nuk po di si t’i tejkalojë ndryshimet ndërmjet opsioneve të ndryshme të serbëve në veri. Në veri ka serbë që kanë qenë për zgjedhje dhe që kanë thënë se ato janë zgjidhje. Por, ka edhe të tillë që kanë qenë absolutisht kundër zgjedhjeve”.

“Më pas, kemi atje edhe njerëz që këto zgjedhje i kanë keqpërdorur. Kështu që, atje ka opinione të ndryshme politike dhe problem për Beogradin paraqet fakti që të mos krijojë ndonjë problem të ri ndërmjet serbëve në veri të Kosovës, pavarësisht se po thirret në unitet”, vlerëson Nojkiq.

Ai shton se praktika po tregon se Prishtina dhe Beogradi domosdo duhet të krijojnë komunikim, në mënyrë që të shmangen situatat që prodhojnë konflikt, sikurse ajo që së fundmi ka prodhuar rivendosja e barrikadës mbi urën qendrore mbi lumin Ibër.

Sipas tij, ky hap, ka qenë jo korrekt nga ana e Beogradit në raport me marrëveshjen e Brukselit.

Ish-kryetari i Kuvendit të Kosovës, Jakup Krasniqi ka hedhur poshtë shkrimet e disa mediave, ku është thënë se Krasniqi ndjehet i dëshpëruar pasi që në koalicionin: LDK-AAK- Nisma nuk i është ndarë asnjë post i lartë as në Kuvend e as në Qeveri.

Krasniqi ka thënë për “Zërin” se nuk ka ndryshuar mendje se a i përket marrjes së ndonjë posti të lartë.

“Vazhdoj t’i qëndroj asaj që kam thënë”, është përgjigjur Krasniqi. Ndërsa kohë më parë ai ka deklaruar se nuk është i interesuar të marrë ndonjë postë të lartë në Kuvend apo në Qeveri.

“Të them të drejtë për momentin nuk jam i interesuar të jem pjesë e Ekzekutivit, por do ta diskutojmë brenda Nismës. Personalisht, kam një jetë bukur të gjatë protokollare dhe dua të largohem nga kjo për të qenë më i lirë. As shef i Grupit Parlamentar nuk do të jem, ndoshta më shumë do të jem i përqendruar në Nismë dhe në Kuvend”, pati thënë Krasniqi ditë më parë në një intervistë për gazetën “Zëri”.