Këshilli kundër Etheve Hemorragjike vlerësoi se masat që janë duke u ndërmarrë për EHCC kanë ndikuar që deri tash, përkundër një numri të konsideruar të thumbimeve të rriqrave, të ketë vetëm tre raste pozitive të kësaj sëmundjeje, prej të cilave dy raste e kanë kaluar sëmundjen pa probleme, derisa rasti i tretë është në përmirësim e sipër dhe nën përkujdesjen mjekësore të stafit të Klinikës Infektive të QKUK-së.

Nën kryesimin e ministrit të Shëndetësisë, Ferid Agani, u mbajt sot takimi i Këshillit Ndërministror për parandalimin dhe luftimin e Etheve Hemorragjike Krime Kongo.

Në këtë takim është raportuar për situatën epidemiologjike në vend, sa i përket EHCC dhe masave që janë duke u zbatuar në komunat më të ekspozuara nga rastet e thumbimit të rriqrave.

Deri tash, janë regjistruar 1639 thumbime, shumica në komunën e Malishevës, në laboratorët e IKSHP-së janë testuar 47 rasteve të dyshuara, prej të cilave vetëm tri kanë rezultuar pozitive.

Në Këshill u tha se në bashkëpunim midis IKSHP-së dhe Komunës së Malishevës, të gjitha zonat e kësaj komune dhe të gjitha shkollat janë mbuluar me aktivitete edukative dhe vetëdijesimi, për mbrojtje nga sëmundja.

Ndërkaq, Ministria e Bujqësisë dhe Zhvillimit Rural ka bërë dezinfektimin e fshatrave më karakteristike për EHCC, ndërkohë që po vazhdon dezinfektimi edhe nga kompania e kontraktuar midis Komunës së Malishevës dhe kompanisë së kontraktuar prej tyre për këtë qëllim.

Përveç dezinsketimit të hapësirave të hapura, ku në proces të dezinfektimit janë edhe disa fshatra të kësaj komune dhe oborreve, dezinfektimi dhe dezinfektimi do të vazhdojë edhe nëpër stalla, me qëllim të zvogëlimit të rrezikut të infeksionit.

Megjithëse, nuk ka pasur asnjë rast të vdekjeje gjatë këtij viti me EHCC, Këshilli Ndërministror ka kërkuar që aktivitetet të intensifikohen edhe më tej në terren, ndërsa qytetarëve u është bërë thirrje që t’i zbatojnë masat e kujdesit, duke bashkëpunuar me autoritetet lokale dhe qendrore dhe duke ndihmuar në eliminimin e rrezikut përmes pastrimit të oborreve, kujdesit gjatë punës në fusha e ara dhe lajmërimit te mjeku në rastet e para që thumbohen nga rriqrat.

Kandidatët për deputet në Parlamentin e Kosovës nga lista zgjedhore PDK-së në Prizren u takuan më stafin e Universitetit “Ukshin Hoti” në Prizren me ç’rast profesorëve dhe stafit drejtues u ofruan alternativa të shumta për një cilësi më të lartë në arsimin fillor, të mesëm dhe të lartë.

Luljeta Veselaj-Gutaj para kolegëve të saj të Universitetit u zotua se përpos të arriturave të shumta që ka ky institucion arsimor, ajo do të jetë zë edhe më i fuqishëm në parlament rreth të arriturave të radhës në këtë institucion mjaft të rëndësishëm.

“Qeveria e Hashim Thaçit e realizoi premtimin e dhënë që do të hapte një universitet në Prizren dhe këtë e realizoi menjëherë pas fitores së saj në zgjedhjet e kaluara, premtoi se do të ketë rritje të pagave edhe këtë e realizoi si dhe premtoi objekt modern për studentët dhe stafin punues, edhe atë e bëri”, tha ajo duke shtuar se pretimet e dhëna të kryeministrit Thaçi duhet t’i besoni se ai e dëshmoi veten si njeri i mbajtjes së premtimeve.

Edita Tahiri tha se kryeministri Thaçi pati vizione dhe misione të shumta të cilat sipas saj janë realizuar në përpikëri.

“Kryeministri Thaçi është njeri vizionar dhe misionet e parapara të tij kohë më parë hap pas hapi i realizoi pasi duke u nisur nga çlirimi i vendit, shpallja e pavarësisë, dialogu me Serbinë që komunat serbe të veriut t’i kthente nën administrim të Kosovës dhe sot qytetarët shqiptarë të lëvizin në atë pjesë të vendit, tha Tahiri.

Irfan Fusha kandidat i radhës nga PDK-ja, tha se për dy arsye vendosi që t’i hynte kësaj gare.

“Arsyeja e parë ishte plani për zhvillim ekonomik që unë i përkas kësaj fushe dhe e dytë fondi për punësim që përsëri më përket mua dhe kolegëve të tjerë të biznesit. Unë në kompaninë time “ABI center” kamë të punësuar një numër të madh të punëtorëve që ndoshta edhe nuk janë të nevojshëm të gjithë, por për t’iu dalë në ndihmë qytetarëve kam vendosur që t’i lë në punë dhe ta zhvilloj biznesin tim me aq mundësi sa kam”, tha ai, duke shtuar se “Misioni i Ri “ është platforma më e mirë për këto dy arsyet e tij.

Në fund të takimit të gjithë kandidatët kërkuan nga profesorët universitarë që ta votojnë PDK-në me numat 58 dhe kandidatët që ata i kanë më për zemër. /PrizrenPress.com/

Kryetarja e Komisionit Qendror të Zgjedhjeve, Valdete Daka priti në një takim kryetarin e shoqatës së të verbërve dhe me të parë të dobësuar të Kosovës, Bujar Kadriu i cili shoqërohej nga drejtori i qendrës për ofrimin e shërbimeve për këtë shoqatë, Daut Tishuki.

Në këtë takim u diskutua për mundësitë që Komisioni Qendror i Zgjedhjeve ka ofruar që edhe kjo kategori e qytetarëve të Kosovës me të drejtë vote të mund të votojnë në Zgjedhjet e Parakohshme për Kuvendin e Republikës së Kosovës.
Komisioni Qendror i Zgjedhjeve është ndër institucionet e rralla në botë që personave të verbër dhe me të parë të dobësuar u mundëson të votojnë në mënyrë të pavarur dhe të ruajnë fshehtësinë e votës së tyre, përmes Shabllonëve në shkrimin e Brail-it.

Pas takimit, në një konferencë për media, Kryetarja e KQZ-së, Daka u shpreh se kjo është një e arritur pasi edhe një kategori e caktuar e shoqërisë sonë i mundësohet të votojë dhe të mos kufizohet nga një e drejtë kushtetuese. “Kjo është një e arritur e jashtëzakonshme e Komisionit Qendror të Zgjedhjeve dhe është një imazh i mirë për KQZ-në dhe Kosovën, me të cilën të drejtat e qytetarëve me aftësi të kufizuara respektohen dhe u jepet mundësi e barabartë sikurse të gjithë qytetarëve të tjerë”, tha kryetarja Daka, e cila shtoi se KQZ edhe në zgjedhjet e kaluara ka përmbushur këtë obligim.

Ndërsa, kryetari i Shoqatës së të verbërve të Kosovës dhe me të parë të dobësuar, Bujar Kadriu, fillimisht shprehu mirënjohje të thellë për KQZ-në, që ka krijuar mundësi të barabarta për të gjithë qytetarët me të drejtë vote, për votim të pavarur. “KQZ-ja duhet të jetë shembull për shtetet në rajon se si duhet të organizohen zgjedhjet dhe të krijohen mundësi të barabarta për të gjithë grupet e qytetarëve në Kosovë, në veçanti për personat me aftësi të kufizuar, në këtë rast për persona të verbër dhe me të parë të dobësuar”, tha Kadriu.

Në anën tjetër, Daut Tishuki bëri të ditur se në çdo Qendër Votimi, do të ketë nga dy shabllonë të tillë, si dhe në shkrimin Brail dhe në audio do të jetë edhe Lista e kandidatëve të subjekteve politike. /PrizrenPress.com/

Kandidatët për deputet të PDK-së në Prizren kanë mbajtur një takim me strukturat e nëndegëve nga Nënkalaja deri në ‘Tusus’.

Në këtë tubim elektoral kanë marrë pjesë pothuaj se të gjithë kandidatët për Kuvend të Kosovës, Naser Berisha, Nait Hasani, Nezir Çoçaj, Zahrije Jusufi, Eidta Tahiri, Luljeta Veselaj- Gutaj, Munir Basha, Irfan Fusha.

I pranishëm në këtë takim ishte edhe Enver Hoxhaj. Kryetari Prizrenit, Ramadan Muja tha se qytetarët e Prizrenit më shumë se kurrë duhet të jenë të mobilizuar dhe të votojnë në radhë të parë për kandidatët e Prizrenit, “sepse vetëm prizrenasit nesër do ta ngrinin zërin në Parlamentin e Kosovës”.

Ai gjithashtu ka kërkuar që së pari të votohet numri 58 numri i PDK-së, ndërsa në anën e djathtë ka kërkuar që të votohet nr 1 e pastaj me radhë, po duke mos harruar kandidatët e Prizrenit.

Ramadan Muja duke folur për PDK-në ka theksuar se ‘Prizreni e ka obligim që të votojë për PDK-në, sepse Universiteti i Prizrenit është vepër e PDK-së”.

Ndërsa Edita Tahiri, duke folur për misionin e PDK-së ka potencuar se Thaçi është i vetmi lider politik në Kosovë që mund të marrë vendime të mëdha , sepse ka vizion dhe qëndrim, prandaj kemi arsye edhe ta kërkojmë votën tuaj për numrin 58.
Ndërsa Munir Basha, ka theksuar se ne si parti konservatore i jemi bashkuar PDK-së sepse është parti e sukseseve.

Në vazhdim kanë shkëputur pjesë nga programi zgjedhor i Misionit të ri të gjithë kandidatët e pranishëm si Zahrije Jusufi, Luljeta Veselaj, Irfan Fusha, Nait Hasani, Munir Basha, Nezir Çoçaj dhe Naser Berisha.

Me këtë rast duhet të veçojmë kandidatin e kësaj zone Naser Berisha, i cili gjatë gjithë kohës sa ka shpalosur disa nga pikët e programit zgjedhor është duartrokitur në shenjë përkrahje dhe mbështetje. Kjo përkrahje për Naser Berishën e ka burimin edhe për faktin se ai gjatë kësaj jave me aktivitetin e tij ka arritur që t’i marrë nga radhët e subjekteve tjera mbi 200 aktivistë të partive tjera, të cilët në këtë tubim u prezantuan si të arritura të PDK-së në këtë fushatë.
Edhe Enver Hoxha ka kërkuar që më 8 qershor në mënyrë sa më masovike të dalin në zgjedhje dhe të votojnë për Misionin e së ardhmes së të gjithë qytetarëve të Kosovës./prizrenpress.com/

Nisma për Kosovë dhe Bashkimi Demokratik vazhduan fushatën elektorale edhe në lagjën “Kurillë” të Prizrenit.
Kandidati për deputet Zafir Berisha,falenderoi banorët e ‘Kurillës’ për mbështetjen që i kanë dhënë në proceset politike.
” Ndihem krenar kur gjendem në mesin tuaj, edhe më krenar ndihem kur këtu në këtë lagje sa herë që vijmë takojmë bashkëluftëtarët të cilët asnjë herë nuk janë lëkundur nga përpjekjet tona të përbashkëta për ndryshimet pozitive në interes të qytetarëve të Kosovës”, tha Berisha.

“Qytetarët e Prizrenit kanë mundësinë historike që me 8 qershor të votojnë për ndryshime, ndryshime që është dashur të ndodhin edhe në zgjedhje lokale por për fat të keq nuk kanë ndodhur, sepse garnitura politike e korruptuar përmes disa liderëve minoritarë arriti ta mbajë në pushtet njëriun i cili është denuar për krim dhe korrupsion ,dhe duke votuar për Nismen më 8 qershorë ne paralajmërojmë që së shpejti ne do të qeverisim edhe me Prizrenin”.

Dr. Sejdulla Hoxha, koordinator i Nismes në Prizren, ndërkaq shpalosi pjesë nga programi zgjedhorë ku u fokusua në zhvillimin e mirëfillt ekonomik të vendit si dhe në përmisimin e gjendjes në shëndetësi, arsim dhe administratë publike.

Koalicioni Nisma-BD ,mbajti takim edhe me banorët e lagjës “Bajram Curri” dhe ata të fshatit Jeshkovë, ku morën mbështetje të fuqishme për zgjedhjet e 8 qershorit…

Kryetari i Partisë Demokratike të Kosovës,Hashim Thaçi bashkë me kandidatët për deputet nga Prizreni ka takuar përfaqësuesit e shoqatave të dala nga lufta dhe shoqatën e të burgosurve politikë në këtë qytet.

“Për të gjitha familjet e dëshmorëve pagat do të dyfishohen në mandatin e ardhshëm, ndërsa do të ketë përkujdesje institucionale për të gjitha kategoritë e luftës”, tha Thaçi

“Për të gjitha familjet e dëshmorëve do të sigurohen banesa në Prizren dhe se këtë premtim do ta mbajmë pasi që Komuna e Prizrenit veç i ka ndarë 80 banesa për familjet e dëshmorëve”.
Thaçi, para përfaqësuesve të shoqatave të dala nga lufta është zotuar se në mandatin e ardhëm do të jetë i përkushtuar për rregullimin e mirëqenies sociale.

“Të gjithë qytetarët do të përfitojnë nga ky mision, ndërsa a subjektet tjera politike sado që po mundohen të na kopjojnë ata nuk do t’ia arrijnë, sepse as që do të mund ta kalojnë pragun zgjedhor, sepse nuk kanë as vizion e as mision të qartë që t’ua afrojnë qytetarëve”.
Ndërkaq Kryetari i Komunës së Prizrenit,Ramadan Muja, pasi u ka bërë thirrje të pranishmëve që të dalin në zgjedhje sa më masovikisht ka kërkuar që të votojnë për nr. 58 dhe për kandidatët e PDK-së nga Prizreni.

” Nëse vazhdojmë të mos i votojmë kandidatët tanë nuk do të jemi të përfaqësuar edhe më tej në institucionet qeveritare, andaj nesër të mos ankohemi pse nuk jemi ne të përfaqësuar”.
Thaçi në këtë takim është shoqëruar nga zëvendëskryetari i PDK-së Kadri Veseli, Hajredin Kuçi, Enver Hoxhaj,kryetari i Prizrenit, Ramadan Muja dhe kandidatët e PDK-së për deputet,Edita Tahiri, Nezir Çoçaj, Naser Berisha, Nait Hasani, Luljeta Veselaj- Gutaj, Zahrije Jusufi, Munir Basha, Irfan Fusha dhe Bahar Selimin./PrizrenPress.com/

Bashkimi Evropian ka shpëndarë sot në Kosovë dhjetëra vazhgues afatshkurtër, të cilët do të monitorojnë zgjedhjet parlamentare të 8 qershorit.

“Sot, vëzhguesit tanë afatshkurtër janë vendosur në zonat e përgjegjësisë. Ata do të shkojnë në të gjithë Kosovën, në të gjitha komunat. Do të takojnë zyrtarë lokalë zgjedhorë, partitë lokale politike, do të ndjekin ndonjë tubim parazgjedhor, do të takojnë anëtarët e shoqërisë civile, vëzhguesit e brendshëm, si dhe përfaqësuesit e mediave”, ka thënë zëdhënësja e misionit vëzhgues të zgjedhjeve nga BE-ja, Sarah Crozier.

Zëvendësshefi i ekipit vëzhgues, Marian Gabriel, ka konfirmuar po ashtu se vëzhguesit do të vendosen në të gjitha zonat, përfshirë edhe veriun.