Ministria e Arsimit, Shkencës dhe Teknologjisë (MAShT), ka organizuar me sukses Testin e Arritshmërisë -2014, për rreth 29 mijë nxënës të klasave të nënta.

Testi i Arritshmërisë, i cili organizohet për nxënësit që përfundojnë klasën e nëntë në të gjitha shkollat e vendit, ka për qëllim t’u mundësojë të rinjve të bëjnë përzgjedhjen e drejtimeve të shkollimit të mëtutjeshëm në arsimin e mesëm, gjë që bëhet në bazë të numrit të pikëve që marrin.

Zëvendësministri i Arsimit, Nehat Mustafa, ka vizituar nxënësit gjatë testit në në shkollën “Faik Konica” në Prishtinë, me ç`rast u shpreh se në bazë të informacioneve që kanë marrë nga të gjitha qendrat e testimit, procesi ka shkuar mirë. Ai theksoi se pikët e fituara nga nxënësit në këtë test, janë përcaktuese për shkollimin (orientimin) e tyre të mëtejmë.

“Ne kemi thënë me kohë që kjo është një përgjegjësi më e madhe e vet drejtorive komunale të arsimit, në mënyrë që ata të bisedojnë me mësimdhënësit, të cilët i angazhojnë si administrues. Në këtë mënyrë të kemi rezultate sa më të besueshme dhe vërtetë ato rezultate të jenë përcaktuese që më të mirët të regjistrohen në drejtimet që mund të themi se janë më elitare siç janë: gjimnazet apo shkollat profesionale (si Mjekësia)”, tha Mustafa.

Në vazhdim, Mustafa, tha se Ministria e Arsimit këto teste i shfrytëzon për të bërë analiza që kanë të bëjnë me realizimin e plan-programeve gjatë vitit shkollor që tashmë është në përfundim.

“Gjatë analizave që ne kemi bërë, kemi parë që plan-programi kryesisht është realizuar në të gjitha shkollat e Kosovës. Pastaj, kemi parë që janë zhvilluar njohuritë profesionale të mësimdhënësve të lëmive të ndryshme dhe kemi pothuajse një ngritje të vazhdueshme, sidomos në lëndën e Matematikës, e cila është një nga prioritetet e Qeverisë së Kosovës për të ardhmen”.

Testit të Arritshmërisë iu nënshtruan rreth 29 mijë nxënës që kanë përfunduar klasën e nëntë. Testi, përveçse matë arritjen e nxënësve gjatë shkollimit të ulët, është edhe një lloj vlerësimi që iu bëhet mësimdhënësve dhe shkollave, përkatësisht niveli i cilësisë së arsimit. /PrizrenPress.com/

Gjatë një konference të mbajtur sot në Agjencinë e Statistikës së Kosovës (ASK) u prezantua Vjetari Statistikor i Republikës së Kosovës 2014.

Kryeshefi i ASK-së, Isa Krasniqi tha se informacionet statistikore, të cilat janë të paraqitura në Vjetarin Statistikor, janë produkt i përgatitur në bazë të eksperiencës, bashkëpunimit me shfrytëzuesit dhe gatishmërisë së ASK-së, për t’iu përgjigjur në kohë dhe me cilësi kërkesave të përdoruesve. Ai po ashtu njoftoi se në këtë publikim gjenden të dhëna përmbledhëse statistikore, shënime metodologjike, grafikone, harta dhe analiza mbi gjendjen aktuale për fusha të veçanta të veprimtarive ekonomike, sociale dhe bujqësore në Republikën e Kosovës.

“Përdoruesit e statistikave zyrtare, në këtë botim, do të kenë mundësinë që shumë shpejtë të gjejnë faktet themelore për Kosovën, si dhe të gjejnë të dhëna përmbledhëse dhe krahasuese në fushat e popullsisë, gjeografisë, arsimit, kulturës, kushteve shoqërore, shëndetësisë, drejtësisë, tregut të punës dhe rrogat, të ardhurave dhe konsumit, bujqësisë, pylltarisë, peshkimit, energjisë, hotelerisë, industrisë, ndërtimtarisë, banimit, bizneseve, shkëmbimit të mallrave dhe shërbimeve, transportit dhe komunikimit, tregtisë, llogarive kombëtare, bilancit të pagesave, çmimeve, financave publike, tregjeve financiare, mjedisit, disa të dhënave krahasuese me rajonin dhe më gjerë”, theksoi Krasniqi.

Drejtori i Metodologjisë dhe TI-së në ASK, Ramiz Ulaj, theksoi se me promovimin e Vjetarit Statistikor të Republikës së Kosovës 2014, përveç rëndësisë që ka si botim, bëhet në mënyrë të përmbledhur prezantimi i punës së ASK-së në disa vite dhe po ashtu, ASK del me të dhëna krahasuese sikurse vendet e tjera të Evropës që kanë vjetar statistikor.

Ulaj më tej prezantoi disa pjesë përmbajtjesore të Vjetarit Statistikor. Mes tjerash tha se Republika e Kosovës ka 38 komuna me 1469 vendbanime. Vjetari përmban, tha ai, edhe të dhëna statistikore që lidhen me natalitetin e mortalitetin, gjininë, nivelin e arsimit e të tjera.

Vjetari Statistikor i Republikës së Kosovës 2014 përfaqëson një nga përpjekjet më serioze të ekipit të ASK-së dhe bashkëpunëtorëve të ASK-së, për informim të opinionit publik.

Botimi është i disponueshëm dhe në formë elektronike, duke lehtësuar kështu përdorimin e të dhënave.

Drejtoria për Kulturë, Rini dhe Sport e komunës së Pejës, organizon edicionin e 12 –të, të manifestimit “Takimet Letrare Ndërkombëtare “Azem Shkreli”. Aktivitetet organizohen sot dhe nesër, kurse do të marrin pjesë shumë shkrimtarë nga Kosova dhe jashtë saj.

Në përkujtim të jetës dhe veprës së poetit të njohur Azem Shkreli, sot bëhet hapja e “Takimeve Letrare Ndërkombëtare” Azem Shkreli”, në Universitetin “Haxhi Zeka” të komunës së Pejës, për të pasuar me Orën Letrare, në bibliotekën e qytetit, që mban emrin e poetit Azem Shkreli. Aver Husaj, shef i Kulturës në Kuvendin Komunal të këtij qyteti, thotë për Radio Kosovën se në këtë Orë Letrare marrin pjesë edhe krijues të rinj, nga Kosova dhe jashtë saj.

“ Karakteristikë e këtyre takimeve është se do të ndahet çmimi “Bulzat”, pasiqë është shkarravitja e parë e Azem Shkrelit, kështuqë ne kemi menduar se ia vlen për fillestarët të ndahet ky çmim”, thotë Averi.

Pas orës letrare, thotë Husaj, do të jetë takimi me laureatin e Takimeve Letrare “Azem Shkreli” dhe do të bëhet promovimi i librit të Jusuf Buxhovit “Jeniçeri i fundit” ndërkaq, ditën e dytë – të shtunën do të shfaqet një fragment nga shfaqja “Varri i qyqes” me tekst të Azem Shkrelit dhe regji të Drita Begollit. Ndërkaq, vetë regjisorja Begolli thotë se drama “Varri i qyqes” është shfaqur vetëm njëherë, në teatrin e Pejës.

“ Unë mendoj që qyteti i Pejës, ka merituar që një tekst i tillë, me autor vendas të punohet në atë teatër. Përpos që ishte teksti i Azem Shkrelit, mendoj që shfaqja ëhstë realizuar jashtëzakonisht mirë dhe do të ishte mirë që ta shohin sërish qytetarët e Pejës”, thotë Drita.

Poeti Azem Shkreli, me poezinë e tij shënoi kthesën e parë drejt hapjes dhe modernizimit të poezisë shqipe në periudhën pas luftës së dytë botërore. Ndër përmbledhjet poetike të tij janë “Engjujt e rrugëve”, “E di një fjalë prej guri”, “Lirikë në shi” etj. Azem Shkreli, ka vdekur në vitin 1997.

Nxënësit e klasave të nënta në të gjitha shkollat e vendit iu nënshtruan sot testit të arritshmërisë. Zyrtarë të Ministrisë së Arsimit, gjatë vizitës që bënë nëpër shkolla, thanë se procesi ka shkuar mirë dhe nuk është paraqitur ndonjë problem. Testi ka për qëllim t’u mundësojë të rinjve të orientohen në shkollimin e mëtejshëm.

Testi i arritshmërisë, i cili organizohet për nxënësit që përfundojnë klasën e nëntë në të gjitha shkollat e vendit, ka për qëllim t’u mundësojë të rinjve të bëjnë klasifikimin e profesioneve në bazë të numrit të pikëve që marrin. Gjatë vizitës në shkollën “Faik Konica”, në Prishtinë, zëvendësministri i Arsimit, Nehat Mustafa, tha se informacionet që kanë marrë nga të gjitha qendrat e testimit, tregojnë se procesi ka shkuar mirë. Ai theksoi se pikët e fituara nga nxënësit në këtë test janë përcaktuese për shkollimin e tyre të mëtejmë.

“Ne kemi thënë me kohë që kjo është një përgjegjësi më e madhe e vet drejtorive komunale të arsimit, në mënyrë që ata të bisedojnë me mësimdhënësit të cilët i angazhojnë si administrues, në mënyrë që të kemi rezultate sa më të besueshme dhe vërtetë ato rezultate të jenë përcaktuese që më të mirët të regjistrohen në drejtimet që mund të themi se janë më elitare siç janë Gjimnazet apo shkollat profesionale, si Mjekësia, etj.

Zëvendësministri Mustafa, tha se Ministria e Arsimit këto teste i shfrytëzon sa i përket analizave që kanë të bëjnë me realizimin e plan-programeve.

“Gjatë analizave që ne kemi bërë, kemi parë që plan-programi kryesisht është realizuar në të gjitha shkollat e Kosovës. Pastaj kemi parë që janë zhvilluar njohuritë profesionale të mësimdhënësve të lamive të ndryshme dhe kemi pothuajse një ngritje të vazhdueshme sidomos në lëndën e matematikës, e cila është një nga prioritetet e Qeverisë së Kosovës për të ardhmen.”

Testit të arritshmërisë iu nënshtruan rreth 29 mijë nxënës që kanë përfunduar klasën e nëntë. Testi, përveçse matë arritjen e nxënësve gjatë shkollimit të ulët, është edhe një lloj vlerësimi që u bëhet mësimdhënësve dhe shkollave. Qëllimi kryesor i këtij testi janë pikët e arritura, që tregojnë edhe nivelin e cilësisë së arsimit.