Sekretari i përgjithshëm i OKB-së, Ban Ki-moon ka thënë se ende mbesin disa sfida në zbatimin e plotë të Marrëveshjes së Brukselit ndërmjet Kosovës dhe Serbisë, sidomos për krijimin e Asociacionit të Komunave Serbe.

“I inkurajoj të dyja palët që të vazhdojnë punën e tyre, në besim të ndërsjellë për zbatimin e marrëveshjes dhe që ta krijojnë Asociacionin në vullnet të mirë. Megjithatë, moszgjidhja e problemeve për zbatimin e plotë të marrëveshjes së 19 prillit, nuk duhet të minimizojnë përparimin e bërë që nga fillimi i dialogut”, ka thënë Ban në raportin e tij më të ri për Kosovën, raporton RTK.

Raporti për periudhën 21 janar deri më 15 prill do të prezantohet më 27 maj në New York.

Deputeti i AAK-së, Daut Haradinaj thotë se votimi për krijimin e Ushtrisë së Kosovës është veprim historik. Ai përmes një postimi në Facebook ka shkruar se që nga përfundimi i luftës e deri më sot, shumë burra të këtij vendi e kanë pasur një qëllim të madh – themelimin e ushtrisë së vërtetë të Kosovës.

“Arritja deri te krijimi i Ushtrisë së Kosovës është rruga nëpër të cilën ranë dhe sakrifikuan breza e breza. Po që se sot i themi po themelimit të kësaj ushtrie, do t’i themi po të ardhmes sonë euroatlantike. Me këtë veprim historik, do të jemi në rrugën e drejtë të sigurisë kombëtare, si faktorë stabiliteti jo vetëm në vend, por edhe më gjerë”, ka shkruar ai.

Sipas tij, kjo forcë, e përgatitur mirë, me të gjitha standardet e NATO-s, do të jetë shtyllë e fortë e shtet-formimit, duke demonstruar përherë paanshmëri politike dhe etnike, duke demonstruar aftësi të jashtëzakonshme ushtarake, gjithsesi se rrugën drejt NATO-s nga sot do ta ketë shumë më të lehtë.

“Puna e deritashme ekipore e oficerëve dhe ushtarëve në FSK dhe mbështetja e pakursyer e oficerëve të NATO-s, kanë krijuar kushte të mjaftueshme që kjo forcë të marrë edhe legjitimitetin juridiko-kushtetues tonin. Sot dëshiroj t’i përgëzoj të gjithë ata që, në një formë ose tjetër, punuan për FSK-në dhe në FS K. Oficerët e shumtë të NATO-s janë dhe gjithmonë do të mbeten model i të ardhmes së Forcës së Armatosur të Kosovës (FAK). Andaj, kjo votë e merituar për këtë institucion, po e dëshmon edhe njëherë gatishmërinë tonë të përbashkët për një shtet pro vlerave perëndimore”, ka shkruar Haradinaj në Facebook.

Është forcuar edhe më shumë bashkëpunimi ndërmjet Italisë dhe Kosovës, sa i përket fuqizimit të bashkëpunimit në fushën e mbrojtjes dhe forcës së sigurisë në bazë të vlerave dhe të drejtave fundamentale të qytetarëve.

Kjo u bë e ditur gjatë vizitës së ministres së mbrojtjes të Italisë, Roberta Pinoti, me krerët e shtetit të Kosovës. Madje ministrat Pinoti e Çeku e zyrtarizuan këtë bashkëpunim përmes nënshkrimit të një memorandumi.

Me këtë rast dy ministrat kanë nënshkruar një letër për shprehjen e qëllimit të zbatimit dhe konsolidimit të marrëdhënieve për bashkëpunim në mes të Ministrisë së Mbrojtjes së Italisë dhe Ministrisë së Forcës së Sigurisë së Kosovës

Në fund të takimit, Ministrat kanë shprehë vullnetin për forcimin e marrëdhënieve dhe konsultimeve në mes të ministrave dhe po ashtu të definimit të detajeve specifike të bashkëpunimit për projektet e ardhshme.

Ramush Haradinaj e ka ditur se Gjykata e Hagës po heton për veprimtarinë e tij gjatë luftës para se të bëhej kryeministër i Kosovës. LDK dhe AAK në fund të vitit 2004 vendosën që Haradinajt t’ia besojnë qeverinë me gjithë faktin se e dinin për mundësinë që puna e tij do të mundë të ndërpritej si pasojë e një aktakuze për krime lufte.

Këtë fakt e zbulon Soren Jesen Petersen, ish-shefi i UNMIK-ut në parathënien që e ka shkruar në librin për Haradinajn, i cili do të publikohet sot nga autori, Michael O’Reilly, “Haga e Ramush Haradinajt”. Ky i fundit ka qenë avokati mbrojtës i Haradinajt në Tribunalin e Hagës.

Tre muaj pas emërimit, Haradinaj jep dorëheqje pasi edhe zyrtarisht u bë aktpadi ndaj tij për krime lufte në Gjykatën e Hagës.

“Kur u informova për herë të parë për emërimin e tij si kryeministër i Kosovës pas zgjedhjeve në vjeshtën e vitit 2004, i thashë se isha informuar se ai, ashtu si të tjerë kosovarë, ishte marrë në pyetje nga Gjykata mbi aktivitetet e kryera gjatë luftës dhe se, nëse do të akuzohej apo paditej për këto aktivitete, edhe pse në kohën e emërimit të tij në detyrë kjo dukej një perspektivë krejt e largët, atëherë duhej të jepte menjëherë dorëheqjen e të shkonte në Hagë”, shkruan diplomati danez.

Peterson gjithashtu flet edhe për ish-kryeprokuroren e Hagës, Carla del Ponte, të cilën e quan të papërgjegjshme dhe e cila bënte edhe politikë.

Del Ponte bënte thirrje të mos njihej Kosova se zemërohej Serbia

Diplomati danez thotë se ka pasur raste kur del Ponte ndërhynte në proceset integruese në BE të vendeve të Ballkanit, por më e rënda është se ka bërë thirrje edhe për mosnjohjen e Kosovës nga OKB-ja pasi kjo do t’ia ndërlikonte punën asaj me Serbinë.

“Respekti dhe mbështetja ime për Gjykatën është dobësuar disi me kalimin e kohës, sidomos për shkak të sjelljes së papërgjegjshme të Karla Del Pontes. Qysh në krye të herës, ajo e trajtoi Gjykatën si çifligun e saj, duke injoruar këshillat e kolegëve mbi nevojën dhe mënyrën e zhvillimit të padive dhe aktakuzave për krime lufte. Edhe më shqetësues është fakti se ajo fuste vazhdimisht hundët në proceset politike, si për shembull duke u bërë thirrje shteteve të Bashkimit Evropian të mos fillonin ose të ndërprisnin negociatat për anëtarësim me shtetet e Ballkanit Perëndimor që nuk po “hidhnin vallen me ritmin e saj”, si dhe duke i bërë drejtpërdrejt thirrje Këshillit të Sigurisë së Kombeve të Bashkuara të mos njihte pavarësinë e Kosovës pasi kjo do t’ia ndërlikonte asaj përpjekjet për të arritur bashkëpunimin me autoritetet e Serbisë për dorëzimin e serbëve të akuzuar për krime lufte”, shkruan ndër të tjera Soren Jesen Petersen.

Edhe pse me vetë propozimin e shoqatave të dala nga UÇK kohë më parë është vendosur që “Java e Dëshmorëve” të fillojë më 5 maj dhe të përmbyllet më 12 maj, megjithatë sot në Ditën e Dëshmorëve të Kombit nuk pati asnjë aktivitet përkujtimor të këtyre shoqatave.

Në vitet e kaluara në këtë ditë kombëtare autoritetet lokale dhe shoqatat e dala nga UÇK, zakonisht bënin homazhe dhe nderime për dëshmorët e kombit nga komuna e Rahovecit, mirëpo sot nuk u pa të zhvillohet asgjë e ngjashme,transmeton RahovecPress.

Madje shoqatat e dala nga UÇK, degët në Rahovec nuk kanë paralajmëruar asnjë aktivitet tjetër përkujtimor e kulturor, përveç garave në futboll të vogël që mbahen tradicionalisht në Rahovec dhe Çifllak.

Disa veteranë kanë shprehur indinjatën e tyre lidhur me mosfunksionimin e rregullt të shoqatave të UÇK-së, si dhe me mos përmbushjen e obligimeve ndaj kësaj kategorie.

Më 6 maj bie dita e Shën Gjergjit, kur kremtohet festa e madhe popullore pranverore, që hyn në kategorinë e festave të motmotit, ka origjinë pagane dhe është relikt i ndërrimit të hyjnive dhe demonëve të natyrës në lashtësi.

Sipas kalendarit gregorian, dita e Shëngjergjit bie më 23 prill, por shqiptarët e Kosovës, Maqedonisë Perëndimore dhe të Malit të Zi, si dhe disa popuj të Ballkanit e kremtojnë më 6 maj sipas kalendarit Julian.

Në mitologjinë popullore, Shën Gjergji është një trim i cili gjuan nëpër male, ndërsa në njërën nga legjendat që kanë të bëjnë me të, ai shpëton vajzën e mbretit duke e vrarë kuçedrën.

Si relikt i mitologjisë pagane, çdo vit më 6 maj, në mënyra të ndryshme anembanë Kosovës e të trojeve tjera shqiptare kremtohet festa e Shëngjergjit,shkruan Rahovecpress.

Festën e Shëngjergjit, të cilët e festojnë edhe besimtarët e fesë katolike, ortodokse dhe romët, në vendin tonë e festojnë në mënyra të ndryshme, në Gjilan, Pejë, Opojë, ndërkaq në Rahovec, dita e Shëngjergjit kremtohet në tyrben e Pataqanit, të cilën ditë, ky fshat është vend pelegrinazhi të qytetarëve të të gjitha moshave.

Meqë e nderojnë edhe myslimanët edhe të krishterë (kroatët e quajnë “Jurjevo”), Shëngjergji konsiderohet si festë sinkretike, ku njeriu e falënderon natyrën dhe forcat hyjnore, për faktin që shpëtoi, “doli nga dimri”, dhe nga të njëjtat forca kërkon shëndet dhe mbarësi për anëtarë të familjes në të ardhmen.
Elementet e lashta pagane të kësaj feste i bashkojnë njerëzit të përkatësive të ndryshme etnike dhe ithtarët e besimeve të ndryshme rreth saj.

Veprimtari i çështjes kombëtare, Adem Demaçi, ka thënë se është pro të drejtave të pakicave, por është kundër asaj ta bllokojnë shumicën në Kuvend. Ai ka thënë se Rusia po ua kërkon pakicave ta bllokojnë procesin për themelimin e Forcave të Armatosura të Kosovës (FAK).

“Unë jam për të drejtat e pakicave, pa diskutim, por nuk jam që pakica ta bllokojë shumicën. Një grusht serb ta bllokojë një vendim të një Kuvendi, sepse dikush nga Rusia u ka thënë, ‘shiko, mos lejoni ta bëjnë shqiptarët armatën atje, sepse me armatë ata hyjnë në NATO’.

Ahtisaari ua dha dy mandate këtyre, hyri në Kushtetutë, u përdor ajo punë, e në qoftë se, edhe një herë bëhet një lëshim, atëherë do të bëhen lëshime për çdo gjë. Do të detyrohemi prapë të presim dhe t’jua zgjasim mandatin edhe një herë që ata të munden me vota të na kalojnë ose të mos na kalojnë”, ka deklaruar Demaçi të hënën në akademinë përkujtimore të dëshmorëve të kombit.

Demaçi ka folur edhe për Gjykatën Speciale, duke thënë se vazhdojmë të jemi në një luftë të pabarabartë dhe se me këtë po kërkohet të “heqim dorë nga vetja”.