Në raportin e tij drejtori i Agjencionit për menaxhimin e komplekseve memoriale kishte paraqitur në mënyrë kronologjike se si po bëhej një luftë se kush duhet të menaxhon me tenderët e këtij Agjencioni.

Megjithatë, ky raport nuk u miratua për shkak të mungesës së kuorumit, çka e shtyri kryesuesin e seancës ta ndërpresë seancën.

Këtë fakt, deputetët e kanë vlerësuar se nuk është gjë tjetër veçse aferë korruptive dhe se Kuvendi nuk duhet t’i mbyll sytë kur i sheh aferat korruptive.

Deputeti Nait Hasani, kryetari i Komisioni për Bujqësi, Pylltari dhe Mjedis e Planifikim Hapësinor, tha se raporti nuk duhet miratuar, pasi nuk i plotëson kushtet.

Ndërsa, në emër të PDK-së, Ramiz Lladrovci tha se nuk e votojnë këtë raport, duke theksuar se drejtori i Agjencionit ka bërë akuza në drejtim të Ministrisë së Planifikimit Hapësinor, por që nuk ka mundur t’i argumentojë.

“Ne i kemi dhënë dy herë mundësi që ai të na sjell faktet për konstatimet që ka bërë në raportin e vet. Dhe në atë raport ka konstatuar se Ministria e Ambientit dhe Planifikimit Hapësinor, ka bërë shkelje të caktuar të ligjit, gjë që janë probleme që duhet t’i shqyrtoj prokuroria. Ne tani kemi kërkuar që të na sjell fakte dhe argumente, ndërsa ai nuk ka mundur të sjell fakte dhe argumente, ndërsa Ministria ka sjell fakte që e kundërshtojnë raportin e tij dhe ne si komision dhe GP që jemi kundër këtij raporti”, tha Lladrovci.

Por, shqetësimin e tij rreth gjendjes së krijuar në komplekset memoriale, e ka paraqitur edhe deputeti i Vetëvendosjes, Rexhep Selimi, i cili tha se mbyllja e memorialit në Morinë të Skenderajt 15 vjet pas lufte, në shenjë proteste, është fyese për familjarët e dëshmorëve dhe vlerat e UÇK-së.

Madje, Selimi ka paraqitur me fotografi gjendjen në këtë kompleks memorial ku janë të shkruar emrat e të gjithë dëshmorëve të UÇK-së.

Kritikat ndaj institucioneve të vendit, duke përfshirë edhe deputetët, ka dhënë edhe deputeti i AAK-së, Daut Haradinaj. Ai tha se është turp për ta, që akoma bagëtitë kullosin mbi varrezat e dëshmorëve.

Sipas Haradinajt, gjendja e tillë kjo nuk është justifikim për asnjë deputet. Derisa, tejet shqetësues e ka quajtur raportin e Agjencionit, i cili sipas tij, nuk flet për gjendjen reale të komplekseve memoriale, por për takimet që ka pasur me ministritë.

Në ndërkohë, në debat është kyçur edhe kryesuesi i seancës së Kuvendit, Xhavit Haliti i cili tha se ka dëshmorë në të gjitha komunat dhe ka vlerësuar se është koha e fundit që të kalojnë një ligj, i cili përcakton vendet e varrezave të dëshmorëve në të gjitha komunat dhe mos të jenë të nda ra nëpër fshatra.

Deputeti i LDK-së, Armend Zemaj tha se ata që e kanë lexuar me kujdes raportin, shihet se më shumë është lufta se kush duhet t’i menaxhoj tenderët, sesa te mirëmbajtja apo avancimi i komplekseve memoriale në Kosovë.

Pas diskutimeve Kuvendi nuk arriti ta hedh në votim raportin, për shkak të mungesës së kuorumit. /Telegrafi/

Komisioneri për Zgjerim në Komisionin Evropian, Stefan vjen nesër në Kosovë, pas përfundimit të suksesshëm të bisedimeve për Marrëveshjen e Stabilizim Asociimit (MSA).
Komisionari Fule vjen për të përgëzuar liderët e vendit si dhe për të theksuar nevojën për vazhdimin e dialogut me Beogradin.

Gjatë ditës do të takohet me krerët më të lartë të vendit, e pasdite ai do të vizitojë kryetarët e komunave në veri të Kosovës.

Ai atje thuhet se do të përcjell mesazhin e njëjtë tek të gjithë katër kryetarët e komuna në veri të Mitrovicës, e poashtu do të flasin për mundësitë e projekteve të ardhshme për zhvillim, të financuar nga IPA.

Ndryshe, ai gjatë ditës po qëndron në Beograd.

Të dielën rreth orës 11:38 min, në Shtëpinë e Shëndetit në Malishevë ka ndodhur një tentim vrasje. Sipas hetimeve nga vendi i ngjarjes thuhet se përderisa një qytetar me mbiemër Jonuzaj ishte duke marrë infuzion dhe qëndronte i shtrirë në krevat është qëlluar me armë zjarri nga ish miku i tij me mbiemër Bytyqi.
Pas plagosjes, viktima është dërguar urgjentisht në QKUK në Prishtinë për trajtim dhe për fat mirë jeta e tij nuk është në rrezik thonë mjekët e pyetur nga policia.

Ndërkaq, pas kryerjes së aktit, i dyshuari është paraqitur në stacionin policor së bashku me armën e përdorur në rast.

Policia ka kryer procedurat hetimore në vendin e ngjarjes me ç’rast ka sekuestruar dy gëzhoja dhe dy predha të plumbave.

Pistoleta e përdorur në rast dyshohet të jetë “Ekol Special 99” e kalibrit 7.65 mm me numër serik EU 1341117.

Është informuar prokurori i shtetit i cili ka nënshkruar vendimin për masën e arrestit policor për të dyshuarin.

Bashkimi Demokratik që në hapjen e konkursit për zgjedhjen e drejtorave në komunën e Prizrenit më 14 mars 2014 ka kontestuar këtë konkurs për shkak se ky konkurs përmban në vete shkeljen e ligjit e arsimit para universitar, ku edhe më të papranueshëm këtë konkurs e ka bërë hapja nga një qeverisje e cila udhëhiqet nga një kryetar që në dënimin që ka marrë nga gjykata ndër tjera thuhet se 30 muaj nuk mund të ushtroj detyrat zyrtare publike, rrjedhimisht as nuk mund të caktojë anëtarët e komisionit për zgjedhjen e drejtorëve të shkollave( udhëzimi administrativ nr.8/2014).

Për kundër kësaj shkelje ligjore nga ana e kryetarit, DKASH ka vazhduar me shkeljen e radhës duke emëruar dy komisione koordinuese për intervistimin e kandidatëve për drejtorë, në kundërshtim me nenin 4 të UA 8/2014 sipas të cilit taksativisht duhet të jetë vetëm një komision. Gjithashtu është shkelur edhe neni 5 pika1 i këtij udhëzimi administrativ nga se në afatin ligjor nuk është bërë lista e ngushtë e kandidatëve dhe nuk është përgaditur plani intervistues ( për asnjë shkollë).

Vazhdimi i shkeljeve ligjore nga qeverisja aktuale në Prizren është tepër shqetësuese prandaj ne si forcë politike i bëjmë thirrje publike inspektoratit regjional të arsimit, që të ushtrojë mandatin e vet ligjor, konkretisht të ndërhyjë dhe të verifikojë këtë procedurë jo ligjore, për ndryshe jemi të obliguar si subjekt politik të bëjmë padinë e radhës për shkelësit e ligjit në rast se vazhdohet me këto shkelje ligjore.

Bashkimi Demokratik mendon se anarkia që ka përfshirë për vite të tëra arsimin në komunën e Prizrenit nuk mund të zgjidhet në këtë formë dhe në këtë kohë ku njësitet para-politike të partisë në pushtet kanë nxitur “ intervistuar” një numër të madh të pretedentëve për tu zgjedhur drejtor të shkollave nga të cilët është kërkuar që t’i shërbejnë politikës ditore në prag të zgjedhjeve parlamentare si dhe duke i eliminuar disa drejtorë, ata përpiqen që edhe më tej ta politizojnë arsimin në komunën tonë. Është për të ardhur keq se i dënuari Muja për anëtarë të komisionit ka emëruar një person i cili i ka shërbyer regjimit të Milloshevicit, duke qenë inspektor i arsimit në kohën e masave të dhunshme i cili ka diferencuar bartësit e shkollës shqipe atë botë dhe këtë kënaqësi i dënuari Muja ia ofron edhe tani për t’i dënuar dhe diferencuar njerëzit me po të njëjtën ndjesi dhe përvojë.

Iniciatori i kallëzimit penal kundrejt kryetarit të Dragashit dhe ish kryesuesit të Kuvenit Komunal, në rastin e keqpërdorimit të pronave, i tha në gjykatë se nuk i bashkohet ndjekjes penale.

Selim Jenuzi, kryetari i Dragashit dhe Lulzim Rifaj ish-kryesues i Kuvendit Kommunal, aktualisht konsull në Ambasadën Kosovare në Sofje të Bullgarisë kanë dalë të premten para Gjykatës Themelore të Prizrenit, në vazhdimin e gjykimit për keqpërdorim të detyrës zyrtare.

Dëshminë e tij e vazhdoi ish-drejtori i ndërmarrjes “Sharr Prodhimi” Nijazi Tërshnjaku, i cili kishte dëshmuar edhe në seancën e fundit më 5 prill.

Tërshnjaku, i cili është edhe inicues i kallëzimit penal në këtë rast, në fund të deklaratës së tij, tha se nuk ndjehet i dëmtuar, nuk i bashkohet ndjekjes penale dhe nuk parashtron kërkesë pasuroro-juridike.

Ai gjatë dëshmisë së tij tha se prona prej 22 hektarësh e 326 arësh, deri në momentin e padisë, ka qenë në pronësi të ndërmarrjes “Sharr Prodhimi” në Dragash.

“Bartjen e kësaj prone e ka bërë Komuna, se a ka bazë apo jo, këtë unë nuk e di’’. tha dëshmitari Tërshnjaku.

Aktakuza e Prokurorisë Themelore në Prizren e ngarkon kryetarin e Dragashit, Salim Jenuzin dhe ish-kryesuesin e kuvendit komunal Lulzim Rifajn, aktualisht konsull në Ambasadën Kosovare në Sofje të Bullgarisë, se më 27 gusht 2009, me qëllim të përfitimit të kundërligjshëm të dobisë pasurore për tjetrin, i kanë shkaktuar dëm ndërmarrjes shoqërore “Sharr Prodhimi” në Dragash, e cila është nën menaxhim të Agjencisë Kosovare të Privatizimit (AKP).

Sipas prokurorisë, pas marrëveshjes së tyre paraprake, ata akuzohen se shpërdoruan pozitën e tyre zyrtare, duke tejkaluar kompetencat, në atë mënyrë që i akuzuari i parë në cilësi të kryetarit të Komunës së Dragashit, urdhëroi drejtorin e Urbanizmit dhe Kadastrës që të bartë pronën shoqërore, patundshmërinë në sipërfaqen prej 29,7 hektarësh prej pronarit të ndërmarrjes shoqërore “Sharr Prodhim” në pronë të KK të Dragashit.

Pastaj këtë patundshmëri, i akuzuari Jenuzi ua dha në shfrytëzim pa ndonjë bazë juridike, personave fizikë-blegtorëve.

I akuzuari i dytë, Lulzim Rifaj, si kryesues i Kuvendit Komunal të Dragashit, sipas aktakuzës paraprakisht e vë në rend dite këtë bartje të pronës shoqërore, duke bindur asamblistët që ta votojnë propozimin, edhe pse e dinte se një veprim i tillë është në kundërshtim me ligjet në fuqi, pasi menaxhimi i pronës shoqërore me ligj i përket AKP-së.

Neni pesë i Ligjit për AKP-në, e përcakton këtë agjenci si administratore të ndërmarrjeve publike, pavarësisht nëse ndërmarrjet i janë nënshtruar ose jo transformimit.

Dëshmitari tjetër i seancës që u mbajt të premten, Usmen Baldzi që ka qenë drejtor i Ekonomisë dhe Financave në komunën e Dragashit nga viti 2003 deri në vitin 2007, para trupit gjykues ka thënë “se të gjithë banorët e kësaj komune e dinë se pronare e vërtetë i tokës së kontestuar është Komuna e Dragashit dhe qytetarët e saj”. Madje ai ka vlerësuar se Jenuzi dhe Rifaj kanë vepruar në mënyrë të duhur me bartjen e këtyre 29 mijë hektarëve në pronësi të komunës.

Prokurori, Mehdi Sefa, ka sfiduar këtë dëshmitar me pyetjen se pse “Sharr Prodhimi” menaxhohet nga AKP-ja nëse prona është e komunës, me ç’rast Baldzi tha se kjo paluajtshmëri është regjistruar në mënyrë të gabuar në Kadastër si pronë e ndërmarrjes shoqërore. Paraqitja e Baldzit ka bërë që prokurori të paraqesë vërejtje lidhur me dëshminë e tij.

Ndërkaq përfaqësuesi ligjor i AKP-së, i ftuar në cilësinë e dëshmitarit, Fahridin Purova, ka konfirmuar se menaxhimin e administrimin e aseteve të luajtshme dhe të paluajtshme të ndërmarrjeve shoqërore e bën AKP-ja dhe se në rastin konkret ekziston një kontest civil mes AKP-së dhe Komunës së Dragashit.

Ai ka përkujtuar se AKP-ja ka iniciuar padi civile me kërkesë për anulimin e aktvendimit të KK-së së Dragashit, të datës 27.08.2009, me të cilin 29 mijë hektarë të “Sharr Prodhimit” janë bartur në pronësi të komunës. Purova ka sqaruar se AKP-ja i ka shkruar MAPL-së, i cili organ qeveritar ka kërkuar nga KK-ja e Dragashit që të rishqyrtojë këtë vendim.

Seanca e radhus do tt. Mbahet më 6 qershor, kur Purova do të vazhdojë me dëshminë e tij./Gazeta Jeta ne Kosove/

Partia Konservatore(PK) do të garojë në zgjedhjet nacionale të Kosovës. Kryetari i PK-së, Munir Basha thotë se në këto zgjedhje subjekti i tij politik,do të jetë pjesë e koalicionit parazgjedhor me ndonjërin prej subjekteve të tjera politike.

“PK-ja do të jetë pjesë e zgjedhjeve parlamentare 2014, si pjesë e një koalicioni parazgjedhor”, thotë Basha për “PrizrenPress”.

Partia Konservatore (PK) për herë të parë ka marrë pjesë në zgjedhjet lokale në Prizren. Ky subjekt politik ka arritë që të fitojë një ulëse në Kuvendin Komunal të Prizrenit.

Basha thotë se aktualisht janë duke i zhvilluar bisedimet me të gjitha partitë politike, që në zgjedhjet nacionale të garojnë si pjesë e koalicionit parazgjedhor.

“Aktualisht jemi duke biseduar po thuaj me të gjitha partitë politike për një koalicion të mundshëm parazgjedhor”.

Ai thotë se pavarësisht bisedave, PK-ja ende nuk ka vendosë se cilit subjekt politik t’i bashkohet në zgjedhjet parlamentare.

“Ende nuk kemi vendosur.Jemi në kërkim të opcionit më të arsyeshëm”, thotë Basha./PrizrenPress.com/