Kryetarja e Komisionit Qendror të Zgjedhjeve (KQZ), Valdete Daka, ka vlerësuar se 8 qershori është opsion i pamundur për të organizuar zgjedhje parlamentare të mira dhe me cilësi të lartë brenda 30 ditëve.

“Nuk ka kohë të mjaftueshme për t’i organizuar zgjedhjet më 8 qershor, sepse do t’i kemi në dispozicion vetëm 30 ditë. Do të jetë një kohë shumë e shkurtër. Pra, nëse vendoset që zgjedhjet parlamentare të mbahen më 8 qershor, KQZ-ja është para një sfidë të madhe. Prandaj 8 qershori po më duket si opsion i pamundur”, ka thënë Daka për “Epokën e re”.

Shefja e KQZ-së ka thënë se do të jetë proces shumë i vështirë organizimi i zgjedhjeve parlamentare brenda 30 ditëve, duke pasur parasysh faktin se në veri të vendit do të mbahen për herë të parë këto zgjedhje. “Të organizosh zgjedhje parlamentare për 32-33 ditë është shumë e vështirë, plus duke pasur parasysh se për herë të parë do të kemi zgjedhje parlamentare edhe në veri të vendit.

Të gjithë janë në dijeni se me çfarë sfidash jemi ballafaquar në zgjedhjet lokale në këtë pjesë. Madje, në veri, ende çështjet e zgjedhjeve lokale kanë mbetur pezull e leje më të shkohet me zgjedhje parlamentare”, është shprehur Daka, duke shtuar se organizimi i zgjedhjeve brenda një periudhe të shkurtër kohore do ta vë në pikëpyetje cilësinë e këtyre zgjedhjeve dhe plotësimin e të gjitha kërkesave ligjore.

Sido që të jetë, Daka ka thënë se KQZ-ja e ka obligim ligjor dhe do t’i organizojë zgjedhjet parlamentare kurdo që ato vendoset të mbahen. “Megjithatë, KQZ-ja e ka obligim ligjor t’i organizojë zgjedhjet kurdo që ato kërkohen, sepse nuk mund t’u ikë përgjegjësive të saj ligjore. Prandaj, nëse zgjedhjet mbahen më 8 qershor, do t’i organizojmë, por çfarë cilësie do të ofrohet dhe sa do të arrijmë t’i përmbushim të gjitha kërkesat, mbetet të shihet. Për 30 ditë të organizosh zgjedhje parlamentare, pak po më duket si mision i pamundur”, ka vlerësuar Daka.

Sipas saj, në rast se Kuvendi nuk do të shpërndahet më 5 maj, atëherë 8 qershori do të mund të hedhet poshtë si opsion për mbajtjen e zgjedhjeve. Ajo ka thënë se do të ishte mirë që përfaqësuesit e institucioneve dhe liderët politikë t’i kenë parasysh dhe t’i marrin në konsideratë kërkesat e KQZ-së.

Bashkim Smakaj ka konfirmuar të premten se organizata që drejton nuk mbikëqyret nga Kuvendi i Kosovës.

Shefi i Agjencisë Kosovare të Inteligjencës ka injoruar ftesën e Komisionit Parlamentar për të raportuar për skandalet në organizatën që drejton, përfshirë arrestimin e zyrtarit të lartë, Isuf Lumi, i zbuluar se diplomën e shkollës së mesme e ka fals.

Smakaj nuk e ka njoftuar fare Komisionin për këtë, duke i lënë anëtarët të presin për disa minuta dhe të shpërndahen pa dëgjuar versionin e Smakajt për diplomën e Lumit.

Nënkryetari i Komisionit, Fadil Demaku, e ka quajtur të papërgjegjshëm, joinstitucional dhe veprim joligjor mosardhjen e Smakajt për të raportuar. Komisioni i ka bërë një ftesë të dytë për të martën/koha ditore/

Veç edhe javën e ardhshme pritet të ketë jetëgjatësi legjislatura aktuale, e pesta prej pasluftës. Vullnetshëm pritet të shpërndahet, për t’u hapur rrugë zgjedhjeve të parakohshme nacionale.

Subjektet kryesore parlamentare po i mëshojnë datës 8 qershor, si më e mundshmja për organizim të zgjedhjeve. Kjo datë është propozuar nga kryeministri Hashim Thaçi dhe për të ka marrë mbështetjen edhe të subjekteve kryesore në opozitë, të cilat duan largimin e tij sa më shpejt.

Por ka një drojë – jo e gjithë trupa e deputetëve të subjekteve në pushtet e duan ndërprerjen e mandatit tash, e për pasojë mund edhe të mos votojnë pro shpërndarjes së Kuvendit../koha ditore/

Kreu i Partisë Demokratike të Kosovës Hashim Thaçi, shumë shpejt do të gjendet para një sfide të madhe në partinë që drejton. Zgjedhjet e paralajmëruara për 8 qershor kanë nxehur debatet e brendshme në këtë parti dhe të gjitha janë të orientuara te përbërja e listës prej 120 kandidatëve për deputetë në legjislaturën e ardhshme të Kuvendit të Kosovës.

Thaçit do t`i duhet që për të pasur një listë cilësore, t`i heqë nga kreu i saj, ose edhe nga e gjithë lista, disa prej personave që kanë ardhur nga krahu i luftës dhe ish-struktura e shërbimit sekret SHIK, gjë që ka zgjuar reagime brenda partisë.

Synimet, që në listë të ketë personalitete jashtë PDK-së, pritet që të mos kalojnë lehtë.
“Krejt varet nga marrëveshja që do të ketë kryetari me zëvendëskryetarin”, i ka thënë gazetës në kushte anonimiteti një zyrtar i lartë i PDK-së.

Gazeta Tribuna merr vesh se pikërisht disa nga bashkëpunëtorët e kreut të PDK-së po kërkojnë nga ky i fundit që ta përdorë autoritetin e tij dhe t’i “pastrojë” disa emra që sot janë deputetë dhe të njëjtët të mos gjinden në listën e ardhshme të zgjedhjeve./tribuna/

Zëvendëskryeministri i Kosovës Behgjet Pacolli dhe njëherësh president i Aleancës Kosova e Re, ka mohuar akuzat e kryeparlamentarit Jakup Krasniqi.
Ai tha se nëse i ka thënë Krasniqi ato akuza, ai sigurisht ka qenë në gjendje të dehur, ose i luajtur mendsh, ose po thotë gënjeshtra.

“Nëse ai e ka thënë atë, nëse e ka shkru, për mu ai ose ka qenë i dehur, ose është aq i prisht në shpirt ose është një gënjeshtar, prandaj këto tre mundësi janë, ose është i luajtur prej mendve, unë nuk i kam dërgu askënd, ai le të mirret vesh me atë njeri kush ka qenë”, tha Pacolli në emisionin “Argument Plus” në RTV 21.

Ai tha se është turp për Jakup Krasniqin, i cili tha se jeton në një shtëpi shumë milionëshe, dhe se sipas tij, me pagën që ai merr, ai nuk mund të ketë bërë këtë pasuri.

Ai tha se Krasniqi, i ka marrë diku paratë, pasi në politikë kur ka hyr ka qenë i varfër.

“Sot z.Krasniqi ka një shtëpi multimilionëshe, dhe me nëse kalkulohet ajo pagë e cila, u jipet sot institucionarëve, të Kosovës kalkulohet shumë shpejt”, tha Pacolli.

Ai tha se do të pres kohën juridike dhe se nëse, nuk i kërkon falje Krasniqi, ai tha se do të padisë të parin e Kuvendit.

Lideri i Aleancës për Ardhmërinë e Kosovës Ramush Haradinaj, në 14 vjetorin e themelimit të kësaj partie thotë se kanë përgatitur një program zhvillimor për vendin.

I pari i AAK-së ka premtuar se në katër vjetët e para të qeverisjes së AAK-së do të hapeshin 200 mijë vende pune.
Ndërkohë, Haradinaj ka ripërsëritur premtimin e tij për pagën mesatare prej 1000 euro.

Ai tha se programin ekonomik të AAK’së e kanë quajtur drejtim i ri, për shkak të specifikave dhe mundësive të zhvillimit.

Ai poashtu ka folur edhe për koalicionin e mundshëm qeverisës. Haradinaj nuk ka përjashtuar askënd për bashkëqeversije.

“Të gjithë ata që mendojnë një qeverisje të re për vendin ashtu sikur e mendojmë ne, ne do të bashkohemi me ta. Shpresoj që të gjithë do ta kuptojnë që ky vend ka nevojë për një ndryshim të madh dhe shpresoj që këtë ta kuptoj e tërë opozita kosovare”, ka thënë Haradinaj./Zëri/