Të rrëmbyer nga ankthi i një jete të trazuar, Xheki, Veronika, Ralf, Viktoria dhe Hulio, bëjnë të vetmen gjë që duket se i jep vërtet kuptim kësaj zhurme të pafund. Dashurojnë. Të lumtur, të fyer, të tradhtuar e të rigjetur ata mbërthehen pas njëri-tjetrit për të mos u zhdukur në terr. Një dramë urbane, një komedi e zezë, e cila bërtet qartë e shkoqur: Më mbaj! Një rrëfim i rrëmbyer mbi pesë personazhe të cilët gjenden në caqet e ekzistencës së tyre, shprehur me vërtetësinë dhe ashpërsinë e jetës së përditshme. Një histori e mrekullueshme dhe rraskapitëse mbi dashurinë, e shkruar shkoqur dhe e thënë fort me fjalën, me trupin, ngjyrat dhe tingujt e disa krijuesve skenikë të jashtëzakonshëm. Me një gjuhë skenike të kthjellët, sfiduese e të shpenguar vjen në skenë ajo që prekim me dorë çdo ditë. Me regji të Kled Kapexhiut, nën aktrimin e Marin Orhanasit, Indrit Çobanit, Eglantina Cenos, Ervin Bejlerit dhe Ina Gjoncit, me skenografi të Genc Shkodranit, kostumografi të Gerta Oparakut, muzikën e Delar Turkut, pjesa do të ngjitet sërish këtë fundjavë në skenën e Teatrit Kombëtar.

Sipas regjisorit, vepra është zgjedhur jo për titullin e saj, i cili është parathënie e gjuhës së folur, por për ngjarjen që ngjit në skenë dhe mundësinë që u jep krijuesve për ta rrëfyer atë nëpërmjet një akti artistik, i cili sfidon aftësitë e të gjithëve ne. Nuk duhet të mbetemi pre e etikës së përditshme për të thënë ato që nuk mund të thuhen veçse me emrat që kanë. Kjo shfaqje nuk provokon me fjalën. Dëshiron thjesht të tregojë një histori ndoshta të dëgjuar më parë, por që nuk e ka pasur mundësinë të ngjitet në skenë me një tekst të shkruar me kaq mjeshtri dhe e thënë kaq thjeshtë. Premiera e parë e kësaj pjese ka qenë në Teatrin Broadway të Gerald Schoenfeld, më 11 prill 2011.

Ndërsa më 14 tetor 2011, pjesa shfaqi premierën e saj në Theaterworks, në Hartford, Connecticut. “Wall Street Journal” shkruante se “Ajo çfarë e bën ‘Kapelen’ më shumë se një farsë të shkathët është se subjekti real i z. Guirgis, shndërrohet në relativizëm moral. Ralfi, edhe pse esëll, personazh pa asnjë të metë, i cili në vend të alkoolit pi vetëm pije proteinike dhe predikon ungjillin e të Alkoolizuarve Anonimë, bën atë çfarë do. Xheki nga ana tjetër, duhet të mbajë nën kontroll impulset e tij vetëshkatërruese, por të paktën ai është i vetëdijshëm së qëllimi i të qenët esëll, nuk është të bëhet akoma më eficent në shfrytëzimin e njerëzve. Mos lejoni që titulli idiot t’ju pengojë.

Nëse nuk shkoni, do të humbisni një nga dramat e reja më të bukura që kanë ardhur në Broadway prej kohësh”. Ndërsa “New York Times” shkruante se “drama së cilës nuk guxohet t’i thuhet emri, ka shumë për të treguar.

Komedia e re, vibruese dhe çuditërisht serioze e Stephen Adly Guirgis, u shfaq mbrëmjen e së hënës në teatrin ‘Gerald Schoenfeld’, me një titull që nuk mund të shtypet në shumicën e gazetave apo të përmendet në rrjetet televizive”. Pjesa u prit mirë në premierën që pati një javë më parë në skenën e Teatrit Kombëtar. Kjo është një vepër për pasionin, i cili na shtyn të veprojmë, të gjejmë kush jemi dhe na tregon se për kë jemi të gatshëm të luftojmë.

Sipas faqes zyrtare të ””Shakespeare””s Globe Theatre”” pas prezantimit në skenën e Teatrit Kombëtar, më datë 10 Qershor do të jetë qyteti i Prishtinës që do të presë një nga trupat më të njohura në botë, që do të sjellë në skenë tragjedinë e Shekspirit.

“Globe Teater Shekspir” nga Londra, një nga teatrot më të mëdhenj të botës, më 23 prill shpalli turneun e tij më ambicioz me rastin e 450 vjetorit të lindjes së Shekspirit. Një turne të jashtëzakonshëm në mbarë globin, pritet të realizohet në një periudhë dy vjeçare me tragjedinë e tij të famshme “Hamlet”. Një aventurë krejtësisht e paparë teatrore e “Hamletit”, i cili do të vizitojë 205 vende, ku do të shfaqet kryevepra e gjeniut të teatrit botëror. Por ky tur botëror i cili zhvillohet në kuadër të 450 vjetorit të lindjes së Shekspirit, e vendos Shqipërinë në listën e shteteve që “Globe Teater Shekspir” ka menduar të jetë prezent në skenën teatrore dhe shënon një moment të veçantë për teatrin shqiptar. Faqja zyrtare e këtij teatri tregon se një nga kryeqendrat që do kenë fatin të ndjekin “Hamlet” nga “Globe Teater” do jetë dhe Tirana.

Sipas kalendarit të shpallur në faqen zyrtare të “Globe Teater” para pak kohësh vepra “Hamlet” do të shfaqet në Teatrin Kombëtar në Tiranë më datë 7 Qershor. E ndërsa ardhja e kësaj trupe të njohur në botë është bërë e ditur se do të jetë në skenën e Teatrit Kombëtar në muajin qershor, pas nuk mbeten dhe Kosova apo dhe Mali i Zi. Po sipas faqes zyrtare të “Globe Teater Shekspir” pas prezantimit që është menduar të jetë në skenën e Teatrit Kombëtar, më datë 10 Qershor do të jetë qyteti i Prishtinës që do të presë një nga trupat më të njohura në botë, që do të sjellë në skenë tragjedinë e Shekspirit, për të vazhduar turin botëror edhe në Malin e Zi.

Por pjesë e turit botëror është dhe qyteti i Shkupit, ku aktorët e njohur britanikë do të ndalen më datë 5 qershor, dy ditë para se të mbërrijnë në Tiranë. Para dy vitesh në kuadrin e lojërave Olimpike që u mbajtën në Londër, “Globe Teater” i Shekspirit organizoi për herë të parë në këtë teatër Festivalin Botëror të Shekspirit me të gjitha veprat e gjeniut. Ku një nga 37 trupat pjesëmarrëse në këtë festival botëror ishte dhe trupa e Teatrit tonë Kombëtar me veprën “Henri VI /pjesa e dytë”.
“Hamleti”, e cila është përzgjedhur nga “Globe Teater” për të qenë pjesë e turit botëror, njihet si tragjedia e një princi të rrënuar me pavendosmëri dhe hakmarrje, por që do të flasë me publikun në kultura dhe sistemeve të ndryshme politike. Për këtë shfaqje janë angazhuar 16 aktorë. / KultPlus