Zgjedhjet parlamentare nuk duhet të dështojnë, sepse do të zvogëlonin gjasat për integrim të Kosovës në Bashkimin Europian
Kryetarja e Komisionit Qendror të Zgjedhjeve, Valdete Daka, ka thënë se institucioni të cilin e drejtonnuk e di se kur do të mbahen zgjedhjet parlamentare – shkruan Epoka e re.

Ajo ka thënë ase si datë e mundshme është përmendur 8 qershori.

KQZ, sipas saj, është e gatshme t’i organizojë zgjedhjet kurdo që të kërkohet një gjë e tillë.

Ajo iu ka bërë thirrje institucioneve të vendit që KEQZ-së t’i jepen të paktën 40 ditë kohë për t’i organizuar zgjedhjet.

Daka ka thënë se zgjedhjet parlamentare, sipas të gjitha gjasave, do të mbahen me ligjin aktual, pasi nuk ka kohë për ta implementuar ligjin e ri zgjedhor.

/Epoka e re

Janë marrë të gjitha masat që votimi i Gjykatës Speciale të rezultojë i suksesshëm. Thirrja për votë pro ka ardhur edhe nga Shtëpia e Bardhë. Në Kosovë, liderët partiakë, përjashtuar Vetëvendosjen, u kanë kërkuar deputetëve të tyre të jenë prezentë në Seancë
Deputetët janë vënë nën presionin e brendshëm e ndërkombëtar për të përmbushur një detyrë të mërkurën paradite: të votojnë pro themelimit të Gjykatës Speciale me mandat trajtimin e aktakuzave të mundshme për krimet e luftës që pretendohet se i ka kryer UÇK-ja. Madje atyre do t’u mohohet e drejta për debat, para votimit – shkruan Koha Ditore.

Seanca plenare që do të nisë në orën 10:00, nuk do të zgjasë shumë. Dy pika të rendit të ditës do t’i ketë në agjendë.

E para ka të bëje me votimin e Projektligjit për ratifikimin e Marrëveshjes ndërkombëtare mbi Misionin e Bashkimit Evropian për sundimin e ligjit në Kosovë, dhe e dyta me votimin e Projektligjit për ndryshimin dhe plotësimin e ligjeve që ndërlidhen me mandatin e këtij misioni.

Të dyja projektligjet përmbajnë dispozita për themelimin e Gjykatës që do të trajtojë aktakuzat e mundshme që dalin nga një hetim i bazuar në raportin e senatorit Dick Marty, në të cilin, midis tjerash, flitet edhe për trafikim organesh të pengjeve të luftës.

Sipas burimit të gazetës, deputetëve, midis të cilëve një numër i madh që kanë qenë pjesë e UÇK-së, nuk do t’u jepet rasti të shprehin pikëpamjet për këtë gjykatë.

/Koha Ditore

Presidenti i AKR-së dhe zv/kryeministri i Kosovës, Behgjet Pacolli, thotë se nesër Kuvendi i Kosovës pritet të miratojë themelimin e një Gjykate Speciale që ngrihet mbi bazën e pretendimeve të një raporti të Këshillit të Evropës dhe gjetjeve të prokurorit amerikan Williamson. Sipas tij, kjo nuk është një ngjarje e zakonshme që ndodh çdo ditë.

“Ajo nuk është produkt i politikës sonë ditore. Për këtë vendim janë investuar nivelet më të larta të Bashkimit Evropian, të SHBA-ve, pra miqve tanë ndërkombëtarë. Ky vendim me pasojat që do të prodhojë, është një ngjarje me rëndësi ndërkombëtare. Ky vendim nuk është thjesht ngjarje me rëndësi kosovare, pra brenda kufijve tanë. Si e tillë, kjo ngjarje nuk mund të shihet si ngjarjet e përditshmërisë sonë, së fshatit tonë, të katundit tonë, të komunës sonë”, ka shkruar Pacolli në një tekst autorial të publikuar në Facebook.

Ai thotë se rreth kësaj ngjarjeje, ashtu si dhe shumë të tjerave kur kemi përfshirje ndërkombëtare, në politikën kosovare ka tre qasje kryesore. “Njëra që vazhdon t’i shohë si ngjarje me rëndësi vendore. Kjo është qasje miope. Një qasje tjetër i kundërvihet ndërkombëtarëve, gjegjësisht aleatëve tanë duke përjashtuar çdo veprim apo përfshirje të tyre në jetën tonë politike dhe institucionale. Kjo qasje është irrealiste dhe mosmirënjohëse. AKR-ja ka një qasje tjetër : përfshirëse, pajtuese të interesave tona me ato të miqve tanë ndërkombëtarë”.

“Mjerisht qasja miope, irrealiste, mosmirënjohëse ka dominuar shpesh politikën kosovare në raport me ngjarje që kanë rëndësi ndërkombëtare. Ne kemi parë në mënyrë miope ose irrealiste dhe raportin famëkeq të Dik Martit kur u prezantua në Këshillin e Europës. Përballë atyre që e panë me këtë qasje të ngushtë, ne si AKR, unë personalisht e pamë ndryshe. E pashë si ngjarje me pasoja të rënda ndërkombëtare dhe kërkova reagim të fortë kombëtar. Kërkova tryezë mbarëkombëtare partish të udhëhequr nga kryeministri i Shqipërisë, Sali Berisha, tryezë që të formulonte qëndrim unik ndaj akuzave që prekin jo thjesht Kosovën, Shqipërinë, por dhe Perëndimin, aleatët tanë. Kërkova që Shqipëria, shqiptarët të harmonizonin qëndrimin tonë me atë të perëndimit duke ia bërë të qartë unitetin e pozicionit tonë kombëtar. Nuk mora përgjigje. Kërkova prej të përmendurve në raport, drejtues qeveritarë ose jo, që të më jepnin mandat për të ndjekur penalisht në Zvicër për shpifje autorin dhe frymëzuesen e raportit, gjegjësisht Dik Marti dhe Karla Del Ponte. Nuk ma dhanë një prokurë dhe kështu mbeta në nivelin e denoncimeve në mediat ndërkombëtare”, ka shkruar Pacolli.

Pacolli thotë se “gjatë 15 vjetëve të lirisë sonë ne nuk jemi marrë seriozisht me dokumentimin ndërkombëtar të krimeve të kryera ndaj nesh, ndaj jetës së 12 mijë qytetarëve të vrarë, dhunimeve të grave, shkatërrimit të xhamive, dhe objekteve tona të kultit, shkatërrimit të shtëpive, dhe ekonomisë sonë, zhdukjes së mijëra qytetarëve”.

“Ne jemi mjaftuar me konferenca vendore, me akademira solemne, me ndeja pa kurrfarë jehone ndërkombëtare. Serbia nuk ka bërë kështu, ajo nuk ka ndenjur duarkryq. Ajo është përpjekur ta rëndojë peshoren e drejtësisë nga ana e kriminelit. Ashtu si në një lojë sportive, nëse ti nuk sulmon atëherë të sulmon tjetri, dhe do të duhet të mbrohesh. Kështu kemi mbërritur në ditën kur Kuvendi do të marrë vendimin për themelimin e kësaj gjykate speciale. Nëse atëherë dhe sot do të mendonim ndërkombëtarisht, do të kishim vizion, me gjasë nuk do arrinim në ditën e sotme”, ka shkruar Pacollii.