Partia Demokratike e Kosovës (PDK) në Has është shprehur e revoltuar me qëndrimin e LDK-së, rreth formimit të komunave në Has.

Kryetari i Degës së PDK-së në Rogovë, Ramadan Hoti tha se populli i Hasit e në veçanti anëtarët dhe simpatizantët e Partisë Demokratike të Kosovës, janë të indinjuar me sjelljen dhe deklarimin e Shefit të Grupit Parlamentar të LDK-së në Parlamentin e Republikës së Kosovës Ismet Beqiri, i cili në seancën e fundit “në mënyrë më poshtëruese për popullin e Hasit” u deklaruara kundër vullnetit të popullit në lidhje me miratimin e Ligjit për formimin e dy komunave atë në Rogovë dhe në Gjonaj të Hasit.

“E shohim të udhës, që për opinionin e gjerë ta bëjmë publike kërkesën tonë të vazhdueshme për komunën e Hasit, për të cilën kërkesë vazhdimisht na është premtuar nga të gjitha subjektet politike pa përjashtim, dhe asnjëherë në të kaluarën ata të cilët sot po e kundërshtojnë një vendim të tillë nuk e panë të udhës që ta bëjnë realitet dëshirën dhe vullnetin e popullit të Hasit. Këtë kërkesë e bëri realitet Kryeministri i Republikës së Kosovës z. Hashim Thaçi, ndërkaq partitë tjera që na premtuan jo vetëm se nuk e përkrahën, por me cinizëm të pa shoq dhe me “kuti” antipopull e denoncuan vendimin e Qeverisë së Kosovës në Gjykatën Kushtetuese. A thua pse? Sepse nuk pati guxim LDK-ja ta pranojë një realitet historik, apo pse ajo vet nuk e bëri këtë veprim, pas aq shumë premtimeve që i dha popullit të Hasit përmes ish -kryetarit të Prizrenit Eqrem Kryeziut e shumë të tjerëve”, tha Hoti.

“I nderuari Shef i Grupit Parlamentar të LDK-së, Beqiri me bashkëpunëtorët tuaj, me çfarë të drejtë do të kërkoni votën e hasjanëve, kur ju dilni haptazi kundër vullnetit dhe kërkesës sublime të tyre?”, pyet Hoti.

Sipas tij, Hasi në të kaluarën ka dhënë burrështetas që e nderuan kombin në të gjitha sferat e jetës. ”Hasi ka dhën kontribut në fushën e luftës dhe të traditës së shtetformimit është figura madhe e kombit nga Hasi i madhi Skënderbe, themelues i gjuhës Pjetër Bogdani, dhe së fundi Hasi ishte porta e lirisë së Kosovës, andaj nuk e kemi merituar ne si hasjanë një përbuzje dhe një pengim të zhvillimit të kësaj treve”, tha Hoti.

“Qëllimin e pengesës mund ta imagjinojmë se i keni bërë llogaritë me gjuhën e votave, por populli i Hasit më në fund do ta kuptojë dhe pamëshirshëm do t’i ndëshkojë të gjithë ata që u përpoqën ta ndalojnë bërjen realitet të funksionimit të komunave në Has”, tha Hoti.

Sipas tij, Hasi ka qenë dhe do të mbetet djep i kulturës kombëtare. “Andaj të gjitha ata që e ngrenë gishtin kundër këtij vendi të mendojnë se janë duke e ngritur gishtin kundër vetvetes”, tha Hoti. /PrizrenPress.com/

Përfaqësuesja e Lartë e Bashkimit Evropian (BE), Catherine Ashton, në kuadër të vizitës në Kosovë, përveç takimeve me presidenten Atifete Jahjaga dhe kryeministrin Hashim Thaçi, në agjendën e saj është edhe takimi me partitë opozitare, me përjashtim të Lëvizjes Vetëvendosje (VV).

Derisa takimet me Ashton janë konfirmuar nga LDK-ja e AAK-ja, Erzen Vraniqi ka deklaruar për Telegrafin se Lëvizja Vetëvendosje nuk ka pasur ftesë nga Baronesha Catherine Ashton për takim me të.

“Nëse do të na ftonin ne si Vetëvendosje, gjithsesi se do ta kishim marrë në konsideratë”, tha Vraniqi.

Si pasojë i aksidenteve në trafik gjatë 24 orëve të fundit, kanë pësuar lëndime të rënda trupore dy persona. Dy nga të lënduarit janë shtruar në QKUK për shërim të mëtutjeshëm, ku njëri nga ta sipas mjekëve është në gjendje kome, pasi që duke ngasur veturën e tij në mënyrë të pakujdesshme, ka dal jashtë rrugës dhe ka goditur një shtyllë elektrike ku dhe kishte ndaluar. Aksidenti në fjalë ka ndodhur në Rahovec.

Ndërsa edhe në fshatin Ratkoc të Rahovecit mbrëmë është raportuar një aksident trafiku ku një fëmijë është goditur nga një veturë, të cilit i ka shkaktuar lëndime trupore. Siç bën të ditur rtk-ja, i lënduari është dërguar në QKUK për tretman mjekësor. Kurse, i dyshuari është arrestuar dhe me urdhër të prokurorit është dërguar në mbajtje.

Deputeti i Partisë Demokratike (PDK), Nait Hasani në një prononcim për Telegrafin ka deklaruar se nëse nominohet kandidat për kryetar të Prizrenit në zgjedhjet e ardhshme lokale, ai do ta fitojë këtë komunë pa shumë vështirësi.

Ai ka folur edhe për nominimin e Eqrem Kryeziut si kandidat për kryetar të Prizrenit, nga ana e Lidhjes Demokratike të Kosovës (LDK), duke e cilësuar si ‘kafshatë të lehtë’.

“Në rast se unë do të jem kandidat i PDK-së, për kryetar të Prizrenit, fitorja do të arrihet pa shumë vështirësi, mirëpo në rast se PDK-ja do ta kandidoj tjetërkënd për kryetar, mendoj fitorja mund të jetë relative”, tha Hasani.

Ndryshe, Kryesia e LDK-së, të hënën e ka nominuar zyrtarisht dhe në mënyrë unanime, Eqrem Kryeziun si kandidatë të kësaj partie në komunën e Prizrenit.

Shefja e diplomacisë evropiane, Catherine Ashton deklaroi se ka ende shumë punë për të bërë për normalizimin e marrëdhënieve ndërmjet Kosovës dhe Serbisë, mirëpo tha se është e kënaqur me atë që është bërë deri më tani. Këto komente, Ashton i bëri në një konferencë të përbashkët për media me kryeministrin e Kosovës, Hashim Thaçi, të cilin e ka përgëzuar për guximin e treguar në negociatat e zhvilluara në Bruksel. Ajo i cilësoi këto negociata si mjaft të vështira.

Ashton tha se pavarësisht ngecjeve, janë marrë hapat e nevojshëm për zbatimin e marrëveshjes për normalizimin e marrëdhënieve, sipas afateve kohore.

“Mendoj se janë ndërmarrë hapat e nevojshëm për zbatimin e kësaj marrëveshje. Marrëveshja politike është përkthyer në veprime konkrete që duhet të zhvillohen. Unë tregoj respektin për shumë grupe punuese që kanë kaluar shumë ditë duke punuar se bashku që ta kthejnë atë marrëveshje në veprime konkrete. Duhet të dihet se çka duhet të ndodhë dhe kur duhet të ndodhë. Unë jam shumë e kënaqur. Është pak e komplikuar kohë pas kohe, por jam e kënaqur sepse ekziston vullnet. Ka edhe shumë për të bërë por jam shumë e kënaqur me atë që është bërë deri më tani”, tha ajo, transmeton RTK.

Ashton theksoi se procesi për normalizimin e marrëdhënieve duhet të vazhdojë me përkushtim, ndërsa tha se gjatë verës do të ketë edhe takime të tjera ndërmjet kryeministrave Thaçi e Daçiq.

Ndërsa sa i përket Ligjit për amnisti, Ashton tha se është çështje e Qeverisë dhe institucioneve të Kosovës dhe nuk dëshiron të përfshihet në këtë çështje.

“Unë jam e interesuar që të sigurohem se ajo për çka është arritur marrëveshja të zbatohet dhe shpresoj se zbatimi i ligjit do të jetë demonstrim jo vetëm nga ana e parlamentit por edhe nga Qeveria”, tha ajo.

Kryeministri Hashim Thaçi nga ana e tij theksoi nevojën për miratimin e Projektligjit për amnisti.

“Duhet të kemi parasysh rrethanat politike dhe aspektet legale. E gjitha çka është përfshirë është përfshirë në kuadër të kushtetutës dhe ligjeve dhe është me interes që e gjithë skena politike është unike në procesin e normalizimit të marrëdhënieve. Ftoj të gjithë të dalin mbi interesat politike në interes të shtetit të normalizimit të gjendjes në veri. Zëri i arsyes fton të aprovohet ligji për amnisti nesër”, tha ai.

Kryeministri Thaçi shprehu zotimin se Kosova do t’i kryej obligimet e veta duke përfshirë edhe Ligjin për amnisti. Me këtë rast ai falënderoi baroneshën Ashton për vendimin e Këshillit të BE-së për fillimin e negociimit të MSA për Kosovën, duke thënë se ky vendim do të jetë një inkurajim i ri për institucionet e Kosovës.

Ndërsa baronesha Ashton tha se të gjitha shtetet anëtare të BE-së janë mirënjohëse për procesin e normalizimit të marrëdhënieve ndërmjet Kosovës dhe Serbisë dhe se për këtë edhe e kanë marrë vendimin për fillimin e negociatave për MSA-në.

Partisë më të madhe në vend nuk i ka ecur mirë me shumë kryetar komunash. Tash kur zgjedhjet lokale po ofrohen, një pjesë e kryetarëve të komunave nga radhët e PDK-së kanë probleme me ligjin.

Afër 7 kryetar të komunave nga PDK-ja janë duke u hetuar nga drejtësia. Disa prej tyre edhe janë dënuar, si Xhabir Zhakru ish- kryetar i Kaçanikut, por që i ka ikur drejtësisë.

Mirëpo PDK-ja ka arritur që t’i zëvendësojë mirë emrat e vjetër me të rinj, duke korrur prapë sukses vlerëson analisti politikë Ardian Arifaj në një prononcim për standardi.

Sipas, Arifajt PDK-ja ka arritur të distancohet mirë nga ata emra që i ka pasur në parti dhe janë dënuar.

“Krejt varet se si e menaxhon PDK-ja situatën. Sa ka me ditë që PDK-ja të distancohet. Mirëpo, mos të ngutemi, deri më tash PDK-ja është gjendur mirë dhe e kemi Kaçanikun dhe Ferizajn që i ka fituar prapë me emrat tjerë, madje në Kaçanik pa balotazh”, tha Arifaj.

Ndërsa sekretari i PDK-së Basri Musmurati tha për standardi se asnjë kandidat nuk do të rikandidohet prapë nëse vërtetohet që ka pasur probleme me drejtësinë.

“Nëse kanë probleme me ligjin nuk do t’i kandidojmë”, tha Musmurati.

Ai tha se ende nuk është diskutuar në parti se si do të vendoset për emrat që janë duke u hetuar nëpër komuna dhe që i takojnë PDK-së.

“Ende nuk jemi marr me këtë çështje, javën tjetër do të diskutojmë në parti”, tha Musmurati,trasmeton Tribuna

Ai vlerëson se do t’i përmbahen ligjit për të gjitha veprimet. “Do ta konsultojmë ligjin, ashtu si ligji e interpreton ne do të veprojmë”.

Ndërsa Juristi dhe njohësi i mirë i ligjeve të Kosovës, Korab Sejdiu tha për standardi.info se në aspektin juridik gjithmonë nga parimi je i pafajshëm përderisa dëshmohet e kundërta.

“Nëse krahasomi me shtetet funksionale atëherë do të ishte obligim moral dhe ndoshta ligjor që nëse një njeri po hetohet dhe po ngritët një aktakuzë ndaj tij, atëherë ai person të mos jetë më udhëheqës, të mos jetë më as zyrtarë. Nuk mundesh me menaxhuar me financa nëse je i akuzuar që i ke keqpërdor ato”, tha Sejdiu.