Lidhja Demokratik e Kosovës (LDK) dhe Lëvizja Vetëvendosje! në Prizren, vlerësojnë se lejimi i shpalljes të një numri të tenderëve nga Ekzekutivi i Komunës, është bërë me qëllim elektoral dhe për nevoja të financimit të fushatës parazgjedhore të PDK-së. Zëdhënësi i LDK-së, Nderim Gashi tha se tenderët e fundit të qeverisë lokale në Prizren, më shumë kanë efekte elektorale.

“Këto akrobacione të pushtetit lokal në Prizren,janë të fundit, sepse qytetarët e Prizrenit e kanë vendosur me i ndëshkuar me votë të lirë këtë qeveri të korruptuar”, tha Gashi.

Ekzekutivi i Prizrenit, ka marrë vendim që të lejojë shpalljen e tenderëve për ndërtimin e kanalizimit në rrugën “Raguza”,“Hajdar Shala” dhe “Skender Latifi” në Prizren, ndërtimin e rrugës në fshatin Nashec-Lagjja Gutaj, ndërtimin e rrugës lokale në fshatin Jabllanicë, ndërtimin e rrugës “Salajdin Berisha 3,4”, rruga “Beamir Memaj”, ”Emin Abazi-1”,”Elbasani-1”, ndërtimin e rrugës në lagjen Badallaj të Prizrenit, ndërtimin e rrugës në lagjen Badallaj të Prizrenit si dhe rrugët lokale në fshatrat “Gjonaj dhe Kushnin-Has”.

Zëdhënësi i LDK-së, Gashi, tha ndërkaq se jo shumë kohë më parë në rishikimin e buxhetit për vitin 2013 janë anuluar shumë projekte. “Anulimi i këtyre projekteve është bërë me të vetmin motiv për t’i ndëshkuar qytetarët që nuk e votojnë partinë në pushtet”, tha Gashi. Sipas tij, LDK-ja do t’i monitorojë procedurat e tenderëve të fundit të Komunës së Prizrenit.

Kryetarui i Lëvizjes Vetëvendosje! në Prizren, Arbër Rexhaj, tha ndërkaq VV-ja nuk është kundër asnjë investimi që pushteti lokal i Prizrenit mund ta bëjë në dobi të qytetarit. “Vetëvendosje! është kundër korrupsionit dhe keqpërdorimeve që bëhen në emër te investimeve”, tha Rexhaj. Sipas tij, pushteti lokal sa herë hapë tenderë me shuma të mëdha në prag të zgjedhjeve.

“Sa herë që jemi në prag të zgjedhjeve, hapen tenderë me shuma të mëdha, ku mundësia për përfitim të kundërligjshëm është e madhe. Si shembull mund ta marrim rastin e rrugës “Tahir Sinani”, ku projekti përveçse është devijuar teknikisht ashtu edhe në aspektin e cilësisë nga mbikëqyrësit e projektit. Dyshojmë se aty kanë ndodhur keqpërdorime të mëdha për qëllime të përfitimit të parave të cilat më pas janë përdorur për fushatën e PDK-së”, tha Rexhaj.

Sipas tij, ngjashëm ka ndodhur edhe me ndërtimin e rrugës “Tirana” në zgjedhjet e vitit 2010. “Njëjtë mendoj se do te ndodh edhe me ndërtimin e rrugës “Transiti i vjetër”, projekt i cili kap vlerën e mbi 3 milion e dyqind mijë euro. Prandaj, ne jemi të bindur se qëllimi dhe logjika e pushtetit aktual është që përmes hapjes së tenderëve në këtë kohë, përkatësisht ekzekutimit të projekteve me vlera të mëdha, krahas qëllimit elektoral qëndron edhe nevoja e financimit të fushatës parazgjedhore të PDK-së përmes keqpërdorimeve”, tha Rexhaj. /PrizrenPress.com/

Tre të dyshuar janë liruar pas arrestimit nga Policia lidhur me një vjedhje të rëndë në fshatin Gelancë të Suharekës.

Siç transmeton RTK-ja, ata dyshohen se në shtëpinë e viktimës kanë vjedhur disa makina motorike (dy gjenerator, dy pompa uji, një elektromotor,një vibratorë dhe një pushkë gjuetie Laurona me 10 fishkë të cal. 12 mm),

Gjësendet e vjedhura janë gjetur dhe konfiskuar nga të njëjtit. ndërsa në konsultim me prokurorin pas intervistimit të dyshuarit janë liruar.

Drejtuesit e lartë të Qeverisë së Serbisë duhet që sa më shpejt të shkelin në këmbë pjesën veriore të Kosovës për t’ua shpjeguar edhe një herë në hollësi pozicionin e Beogradit karshi zhvillimeve që po e përcjellin marrëveshjen e arritur në Bruksel, ka vlerësuar Oliver Ivanoviq, ish-sekretar shtetëror për Kosovën në Qeverinë e Serbisë.

Ai ka deklaruar se u bë një kohë prej se rajonin e ka vizituar zëvendëskryeministri i Serbisë, Aleksandar Vuçiq, ndërsa sipas Ivanoviqit, mungesa e informatave të dorës së parë stimulon veprime të ngjashme me krijimin e “Kuvendit të Kosovës dhe të Metohisë”.

“Ata kanë pretenduar që të krijojnë Kuvendin që do të përfaqësojë serbët në të gjithë territorin e Kosovës. Por, problemi është se kuvendi nuk mund të krijohet me anë të marrëveshjeve, por vetëm me anë të zgjedhjeve, të cilat nuk ndodhen. Meqë nuk konsideroj se është e vlefshme, konsideroj se kjo do të jetë joproduktive”, ka thënë Ivanoviq, për Telegrafin.

Ivanoviq ka thënë se partia që ai drejton nuk ka pranuar të marrë pjesë në këtë organizim që se njeh Qeveria e Serbisë.

Ndërkohë, besohet se mbështetës kryesor të “Kuvendit të Kosovës dhe Metohisë” janë partitë e Vojisllav Koshtunicës dhe të Sheshelit.

“Atyre po ju duhen ndoshta organizime të tilla, por neve nuk na duhet që të konfrontohemi me Qeverinë e Serbisë. Por, derisa Qeveria nuk është e qartë për pozicionin e saj, janë të mundshme lloj-lloj perceptimesh’, ka thënë Ivanoviq.

Duke folur për amnistinë e pritur, Oliver Ivanoviq nuk beson se do të amnistohen bartësit e kontrabandës dhe të kriminalitetit që mund të jetë bërë në veri të Kosovës.

“Këtu pritet të përfshihen vetëm ata që kanë punuar në institucionet e Serbisë e të cilat Prishtina i konsideron si institucione paralele”, ka thënë Ivanoviq.

Deputetja Alma Lama ka vendosur që përfundimisht të largohet nga Lëvizja Vetëvendosje.

Burime të sigurta të Tribunës kanë konfirmuar se deputetja Lama të premten (sot) do të bëjë publike largimin zyrtar nga Vetëvendosje.

Qe një kohë të gjatë, Lama dhe kreu i Vetëvendosjes nuk pajtoheshin për koncepte dhe politika të kësaj lëvizjeje pas hyrjes në institucione.

Burimi i gazetës ka treguar se Alma Lama do të vazhdojë të qëndrojë në Kuvend si deputete e pavarur.

Ajo nuk ka vendosur ende nëse do t’i bashkohet ndonjë grupi Parlamentar në Kuvend dhe nuk ka diskutuar me asnjë parti për ndonjë transfero të mundur siç ka ndodhur deri tani brenda Kuvendit.