Dega e Lidhjes Demokratike të Kosvës (LDK) në Zhur, ka marrë vendim që të përkrah kandidatin për kryetar të Prizrenit, Eqrem Kryeziun. Kryetari i LDK-së në Zhur, Shukri Vezaj tha se nuk do të kundërshtojnë vendimin e Kryesisë në Prishtinë. “Po do ta përkrahim, nuk kemi çka të bëjmë tjetër”, tha Vezaj për “PrizrenPress”.

LDK-ja në Prizren, ka dërguar dy emra për kryetar, atë të Eqrem Kryeziut dhe Hanifi Muharremit. Lidhja Demokratike e Kosovës(LDK) Dega në Zhur, ndërkaq ka propozuar Nijazi Ademajn për kandidat për kryetar të Prizrenit. Emri i Ademajt është dërguar edhe në Kryesi të LDK-së në Prishtinë. Dega e LDK-së në Prizren dhe ajo në Zhur, nuk kanë arritur të gjejnë gjuhën e përbashkët në përzgjedhjen e kandidatit për kryetar të Prizrenit.

Këto dy degë të LDK-së, në mungesë të gjetjes së një kandidati të përbashkët, veç e veç, i kanë dërguar propozimet e tyre në Prishtinë për kryetar të Prizrenit.

Kryesia e LDK-së në Prishtinë ka marrë sot vendim për emrimin e Eqrem Kryeziut për kryetar të Prizrenit. Vendimi ëhstë marrë në mënyrë unanime.

Kryetari i Degës së LDK-së në Zhur, Shukri Vezaj tha ndërkaq se pavarësisht pakënaqësive do të përkrah Kryeziun për kryetar të Prizrenit. “Dobësia e krejt kësaj është që nuk na kanë konsultuar, por ne do ta përkrahim pavarësisht veprimeve të tyre jo të drejta në raport me kërkesat e LDK-së në Zhur”, tha Vezaj. /PrizrenPress.com/

Eqrem Kryeziu do të jetë kandidat i LDK-së për kryetar të Komunës së Prizrenit.

“Në mbledhjen e mbajtur sot, Kryesia e Lidhjes Demokratike të Kosovës ka vijuar diskutimet për nominimet e kandidatëve për kryetarë komunash dhe për listat e kandidatëve për asambletë komunale. Pas diskutimeve të zhvilluara në terren, si dhe në bazë të propozimit të degës, Kryesia e LDK-së, në mënyrë unanime, vendosi që prof. dr. Eqrem Kryeziu të jetë kandidat i Lidhjes Demokratike të Kosovës për kryetar të Komunës së Prizrenit”, thuhet në njoftimin e LDK-së.

Kryesia e LDK-së po ashtu ka formuar ekipet punuese, të cilat do të bashkëpunojnë me degët për të identifikuar edhe kandidatët e tjerë për kryetarë komunash në degët e tjera.

Lëvizja Vetëvendosje ka reaguar ndaj letrës së Forumit të të Rinjve Myslimanë, e cila sërish ka pasur një përmbajtje fyese ndaj deputetes Alma Lama.

Vetëvendosje konsideron se pa marrë parasyshë dorëheqjes së Lamës nga Vetëvendosje, “mesazhet që cenojnë dinjitetin e Lamës por edhe të kombit shqiptar janë të papranueshme”.

Mesazhi i plotë i Vetëvendosjes:

Lëvizja VETËVENDOSJE! e dënon fuqishëm letrën e dytë të të ashtuquajturit “Forumi i të Rinjve Myslimanë” dërguar medieve, në të cilën përsëri me shprehje përçarëse dhe kërcënuese ofendohet deputetja Alma Lama dhe provohet të kapitalizohet dalja e saj nga Lëvizja VETËVENDOSJE!. Mesazhet që cenojnë dinjitetin e zonjës Lama, por edhe atë të kombit shqiptar janë të papranueshme.

Duam të vëmë theksin se Lëvizja VETËVENDOSJE! nuk ka nevojë për mbështetjen e atyre që diskriminojnë dhe fyejnë dinjitetin e qytetarit mbi baza të prejardhjes apo identiteteve gjinore e kulturore, e as për mbështetjen e atyre që s’e respektojnë kombin. Kufiri midis Kosovës dhe Shqipërisë nuk është as kufi yni e as i vendosur aty paqësisht. Pranimi dhe afirmimi, normalizimi dhe natyralizimi i atij kufiri është i padrejtë dhe i dëmshëm.

Qëndrimet tona për secilën çështje janë të qarta e parimore, dhe janë vendime të marra në mënyrë demokratike, nga organet legjitime të Lëvizjes.
Thirrjet që Alma Lama të kthehet në Shqipëri, sepse nuk e ka vendin këtu, janë thirrje injorante, seksiste dhe antikombëtare.

Deputetja Lama ka dhënë dorëheqjen nga Lëvizja VETËVENDOSJE!, megjithatë ne jemi vendosmërisht kundër çfarëdolloj cenimi ndaj saj apo të cilitdo qytetar, dhe do t’i kundërshtojmë ofendimet, përbuzjet apo kërcënimet e tilla.

Kryetari i Kuvendit të Kosovës, Jakup Krasniqi ka bërë të ditur se Projektligji për amnisti pritet të shqyrtohet prapë të enjten në Kuvendin e Kosovës, kur do të duhet që prapë të votohet me dy të tretat. Krasniqi ka thënë se nuk është me rëndësi mendimi i tij rreth këtij Projektligji, por që me kohë do ta bëjë publik qëndrimin e tij.

“Por, duhet që të thuhet saktë, përse po bëhet Projektligji për amnisti dhe kush mund t’i nënshtrohet më tepër ky ligj”, ka thënë Krasniqi, të hënën pas mbledhjes së Kryesisë së Kuvendit.

“Unë mendoj që këtu ka dallime rreth Projektligjit për amnisti, megjithatë janë seancat e Kuvendit që vendosin për të shkuar më tej ose për të kërkuar plotësime ose rishikime të reja të projektligjit”, ka pohuar Krasniqi, shkruan Kosova Sot.

Sipas tij, opinioni e di qëndrimin e tij rreth marrëveshjes ndërmjet Prishtinës dhe Beogradit. “Unë kam qenë që marrëveshja të ishte më transparente dhe t’i thuhej opinionit se çfarë përmban ajo”, ka deklaruar Krasniqi.

Lidhja Demokratike e Kosovës(LDK) në Prizren, ka uruar të gjithë qytetarëve islam Muajin e Ramazanit. “Muaj i Ramazanit është muaji i një stine të mëshirës hyjnore që i pajis besimtarët me pjekuri dhe virtyte, muaj të cilin e dalloi me zbritjen e Kur’anit, librin e përkryer dhe plot dritë, udhëzues i qartë për të gjitha krijesat”, thuhet në urimin e LDK-së.

Sipas LDK-së virtytet dhe cilësitë e larta morale njeriun e shtyjnë të bëjë gjithmonë vepra të mira dhe t’u shmanget punëve të këqija. “Lutemi që pa dallim secili prej nesh të jemi njëri prej tyre. Kjo na bën që ne të jemi fitimtarë në këtë botë dhe të shpëtuar nga Zoti . Agjërimi bënë të njihet vlera e mirëfilltë e veprave të mira. Ai zgjon ndjenjën e falënderimit, krijon vetëdijen për ta kuptuar hallin e të vuajturve, ndarjen e dhimbjes dhe vuajtjes me ata duke zgjatur dorën e dashurisë dhe ndihmës drejt nevojtarëve që sot nuk janë të pakët. Në këtë mënyrë edhe njerëzit e vetmuar e të varfër bëhen të lumtur “.

Dega e Lidhjes Demokratike të Kosovës në Prizren, me të gjitha strukturat e saj, ka kënaqësinë që të gjithë besimtareve islam të Ju urojë Muajin e Shenjtë të Ramazanit. Duke ju dëshiruar në rend të parë shëndet dhe harmoni familjare, lutemi që agjërimi Juaj të jetë i lehtë dhe i pranuar tek Zoti. Ne shprehim dëshirën që mëshira dhe mirësia e Zotit të largojë të keqën që na ka rrethuar.Lutemi që e mira le të dominoj në shtëpitë tona, në qytetin tonë në shtetin tonë”, thuhet në urimin e LDK-së në prizren, të nënshkura nga Abdullah Thaçi./PrizrenPress.com/