Eksperti suedez ing. Hans Jonaker, ka prezantuar para Ekzekutivit të Rahovecit projektin e riciklimit të mbeturinave dhe përfitimit të energjisë elektrike nga ky proces.

“Menaxhimi i mbeturinave paraqet problem në botë, mirëpo me avancimin e teknologjisë, tashmë mund të themi se ky problem është tejkaluar”, tha Jonaker.

Ai tha se Kompania e tij, “Aktiv Plus Group”, posedon teknologji të mjaftueshme dhe moderne për riciklim të mbeturinave. “Varësisht nga sasia e mbeturinave do të arrihet të prodhohet prej 6 megavat energji elektrike deri në 200 megavat. Mirëpo, kjo varet nga kapacitetet e fabrikës, si dhe sasisë së mbeturinave që mund të riciklohen”, tha ai.

Sipas tij, ndër mundësitë që ofron ky proces mund të jetë edhe shfrytëzimi i avullit për nxehje qendrore të qytetit, si dhe shfrytëzimi i hirit për aditiv të çimentos. Inxhinieri Jonaker ka siguruar se teknologjia e kompanisë “APG” mundëson shfrytëzimin edhe të mbeturinave të groposura nëpër depozitë regjionale të mbeturinave në Kosovë, duke eliminuar rreziqet e përhapjes së materieve toksike në ambient.

Inxhinierët dhe ekspertët e mjedisit në kuadër të Administratës Komunale, kanë parashtruar shumë pyetje dhe janë interesuar për mundësinë e realizimit të këtij projekti në komunën e Rahovecit.

Kryetari i Komunës Smajl Latifi, ndërkaq ka ofruar mundësin që ky projekt të realizohet në komunën e Rahovecit. Ai ka ofruar hapësirën dhe infrastrukturën e nevojshme për këtë projekt me rëndësi për ambientin, ekonominë dhe rritjen e cilësisë së jetës së qytetarëve të komunës tonë. /PrizrenPress.com/

Fushata e korrje-shirjeve është duke shkuar sipas parashikimeve në Suharekë. Rreth 80 autokombajna janë angazhuar për të korrur rreth 3000 hektarë grurë.

Kryetari i Shtabit Komunal, Shaqir Kryeziu, ka bërë të ditur se për mbarëvajtje të kësaj fushate janë bërë të gjitha përgatitjet e duhura.

“Nëpër fshatra të kësaj komune janë zgjedhur edhe shtabet ndihmëse, të cilat do të shërbejnë për të ndihmuar punën e autokombajnerëve dhe të personelit tjetër ndihmës gjatë punës nëpër terren”, tha Kryeziu. /PrizrenPress.com/

Ministri i Jashtëm i Suedisë, Karl Bildt shprehu besimin e plotë për vendosmërinë e institucioneve të Kosovës për implementimin e marrëveshjes së arritur në Bruksel. Bildt ka theksuar se ende ka çështje të mëdha sa i përket zbatimit të marrëveshjes për normalizimin e marrëdhënieve Kosovë-Serbi. Ai këto komente i bëri pas takimit me kryeministrin Thaçi.

Bildt nisjen e negociatave me Kosovën në lidhje me Marrëveshjen e Stabilizim Asocimit e ka quajtur hap të madh drejt Bashkimit Evropian. Duke folur rreth liberalizimit të vizave, ai ka deklaruar se kjo çështje do të diskutohet në Komisionin Evropian në vjeshtë.

Ndërkaq, siç raporton RTK-ja, kryeministri Hashim Thaçi deklaroi se anëtarësimi i Kroacisë në BE, normalizimi i marrëdhënieve me Serbinë dhe zgjedhjet në Shqipëri janë mesazh i mirë për rajonin.

Sipas tij, takimi i ardhshëm në Bruksel do të mbahet më 8 korrik, ndërsa ka vlerësuar se mbajtja e zgjedhjeve lokale në vjeshtë do të ndikojë në integrimin e pakicës serbe.

Aleanca për Ardhmërinë e Kosovës (AAK) e kujton me respekt, në 23-vjetorin e saj, ngjarjen e madhe të historisë më të re të Kosovës, 2 Korrikun e vitit 1990, kur deputetët e Kuvendit të Kosovës shpallën Deklaratën me të cilën Kosovën e legjitimuan njësi të barabartë me të gjitha republikat tjera në ish-Jugosllavi.

Deklarata e 2 Korrikut ishte në vazhdën e zhvillimeve të atëherëshme të kohës, në përputhje me aspiratat e popullit të Kosovës për liri, pavarësi dhe dinjitet kombëtar e qytetar.

Në këtë ditë të shënuar, AAK i kujton me respekt të gjithë deputetët e përbërjes së atëherëshme të Kuvendit të Kosovës, e çmon guximin dhe sakrificën e tyre në një moment historik nëpër të cilin po kalonte vendi dhe populli ynë, derisa regjimi i atëhershëm vazhdonte fushatën e shtypjes dhe të suprimimit të çdo vlere dhe të drejte të popullit tonë.

2 Korriku i vitit 1990 ishte një ndër bazat e fuqishme të të gjitha përpjekjeve tona për liri dhe pavarësi, të cilat u sublimuan gjatë viteve ’90 me rezistencën paqësore dhe u rrumbullakësuan me projektin më të madh dhe më të suksesshëm të shqiptarëve në shekullin XX – Ushtrinë Çlirimtare të Kosovës.

Sot mbetet detyrë e të gjithë neve që sakrificën e këtyre gjeneratave dhe të projektit të lirisë dhe të pavarësisë, që buroi nga populli ynë, t’i sendërtojmë më tej, duke e bërë shtetin e Kosovës vend të vërtetë demokratik, të prosepruar dhe të zhvilluar ekonomikisht dhe pjesë të familjes dhe vlerave të shenjta të demokracisë euro-perëndimore. /PrizrenPress.com/

Me rastin e 2 Korrikut – Ditës së shpalljes së Deklaratës së Pavarësisë së Kosovës, Kryetari i Lidhjes Demokratike të Kosovës, Isa Mustafa ka përgëzuar qytetarët e vendit, si dhe deputetët e Kuvendit të atëhershëm, të cilët e shpallën këtë deklaratë.

“Më lejoni që në emër të gjithë anëtarësisë së Lidhjes Demokratike të Kosovës, si dhe në emrin tim, t’ju shpreh urimet më të përzemërta me rastin e 2 Korrikut – Ditës së Deklaratës së Pavarësisë.

Gjithashtu, dua t’ju shpreh urime të veçanta deputetëve të Kuvendit të atëhershëm të Kosovës, të cilët, duke e shpallur Deklaratën e 2 Korrikut, e institucionalizuan kërkesën e kahershme të popullit të Kosovë për liri dhe pavarësi.

Deklarata e 2 Korrikut dhe aktet që e pasuan atë, shenojnë kthesën historike në përpjekjet e Kosovës për liri, pavavësi dhe demokraci, të cilat u artikuluan fuqishëm në dekadën e fundit të shekullit XX sidomos nga Presidenti historik i Kosovës, dr. Ibrahim Rugova, i cili gjithmonë thoshte se 2 Korriku i vitit 1990 është njëra ndër datat më të rëndësishme të historisë moderne të Kosovës, e cila u parapriu akteve të tjera madhore, si Kushtetuta e Kaçanikut dhe Referendumi për pavarësi i vitit 1991.

Andaj, LDK-ja do të ketë kujdes të veçantë për nderimin e kësaj date, e cila do të kujtohet përherë si njëra ndër momentet vendimtare në udhën tonë të gjatë për liri, pavarësi dhe demokraci”, tha kryetari i LDK-së, Isa Mustafa.

Shpallja e Deklaratës Kushtetuese më 2 korrik 1990 është ndër ngjarjet më të rëndësishme juridike dhe politike pas shpërbërjes së sistemit njëpartiak në Kosovën e fillim viteve të nëntëdhjeta.

”Delegatët e Kuvendit të Kosovës ndërmorën një akt të rëndësishëm, ku shprehej vullneti i popullit të Kosovës për liri dhe mëvetësi politike dhe juridike nga pushtimi jugosllav dhe serb njëkohësisht”, thuhet në një mesazh të kryeministrit.

Sipas tij, Deklarata Kushtetuese ishte akt i guximit qytetar dhe patriotik për kohën kur Kosova realisht nuk pranonte degradimin kushtetues, ndrydhjen e lirive dhe të drejtave si dhe mënjanimin e shqiptarëve nga jeta institucionale.

”Prej kohës së shpalljes së Deklaratës Kushtetues deri në çlirimin përfundimtar Kosova ka kaluar nëpër ngjarje të rëndësishme historike, gjithnjë duke pasur vizion lirinë dhe pavarësinë. Vullneti i qytetarëve të Kosovës më në fund u kurorëzua me lirinë dhe pavarësinë e vendit tonë, dhe sot Kosova është shtet demokratik dhe sovran i njohur ndërkombëtarisht nga më shumë se 100 shtete të botës”, thotë ai.

Ndërkaq në emër të Qeverisë së Republikës së Kosovës dhe në emrin e tij, Thaçi të gjithë delegatëve të gjallë u shpreh falënderim dhe mirënjohje të thellë, ndërsa për ata që kanë ndërruar jetë shpreh konsideratën më të lartë për kontributin e tyre historik.