Kryetari i LDK-së Isa Mustafa ka mohuar se ka arritur marrëveshje për bashkëqeverisje me kryetarin e PDK-së, Hashim Thaçin.
“LDK-ja nuk ka arritur asnjë marrëveshje për koalicion me asnjë subjekt politik”, tha Mustafa në Prizren.

Thaçi e Mustafa është raportuar sot nga mediat se janë pajtuar në parim se mund të bashkëqeverisin në mandatin e ardhshëm. Kanë folur edhe për poste. Në kalkulim, kanë futur edhe postin e presidentit.
“Është arritur një pajtueshmëri me kreun e PDK-së për mbajtjen e zgjedhjeve nacionale në qershor,por zyrtarisht ende nuk është marrë vendim”, tha Mustafa./PrizrenPress.com/

Qeveria “Muja III” në Prizren nuk do të formohet para përmbylljes së procesit gjyqësor të kryetarit Ramadan Muja dhe pesë bashkëpunëtorëve të tij. Partitë në koalicion me PDK-në kanë kërkuar që bisedimet për formimin e qeverisë së re të fillojnë,pas përfundimit të procesit gjyqësor të Mujës.

Burimet e PrizrenPress-it bëjnë të ditur se procesi gjyqësor ndaj Mujës ka bllokuar deri më tash formimin e qeverisë së re në Prizren.

“Ka ekzistuar një hezitim nga partitë në koalicion që të formohet qeveria e re para përmbylljes së procesit gjyqësor të Mujës”,tregon burimi brenda PDK-së.

Procesi gjyqësor ndaj kryetarit të Prizrenit, Ramadan Muja pritet të përfundojë me 27 shkurt të javës së ardhshme. Sipas burimeve brenda PDK-së fati i formimit të Qeverisë “Muja III”, do të varet nga verdikti përfundimtar i gjykimit të Mujës.

“Partitë e minoriteteve kanë qenë ato që kanë hezituar të formohet qeveria e re para përfundimit të procesit gjyqësore të Mujës. Por,ka pasur edhe brenda PDK-së që kanë kërkuar të pritet përfundimi i procesit gjyqësor ndaj Mujës”.

Sipas të njëjtit burim nëse Muja shpallet i pafajshëm,menjëherë do të formohet edhe qeveria e re.”Nëse shpallet i pafajshëm menjëherë do të formohet qeveria e re,por nëse ndodhë e kundërta atëherë sigurisht që duhet të shkojmë në zgjedhje”.

Dega e PDK-së në Prizren ditë më parë ka propozuar emrat për drejtorë të Ekzekutivit. Për shtatë drejtori janë propozuar mbi 20 kandidatë./PrizrePress.com/

Një prej figurave më me ndikim të politikës në dekadën e fundit, i cili që nga paslufta është përballur me së paku katër procese gjyqësore, i mbrojtur nga avokatë vendorë e ndërkombëtarë, synon ta bëhet vetë në të ardhmën.

Fatmir Limaj, ka kaluar pjesën me shkrim të provimit të jurispundencës, që ia mundëson atij të drejtën të ushtrojë profesionin e avokatit.

Lista me emrat e kandidatëve që kanë kaluar provimin e parë me shkrim është publikuar më 21 shkurt në faqen zyrtare të Ministrisë së Drejtësisë.

Deputeti Limaj është renditur si i gjashti në këtë listë ku shënon “Fatmir Limaj nga Malisheva” dhe ka kod identifikues numër 77.

Limaj mund të licensohet në Odën e Avokatëve dhe të përfaqësojë palë në gjykatë nëse e kalon edhe provimim me gojë i cili do të organizohet më 1 mars.

Lista e kandidatëve që kanë kaluar provimin e jurispundencës me shkrim është e nënshkruar nga kryetari i Gjykatës Supreme Fejzullah Hasani që njëkohësisht është edhe kryetar i komisionit për provimin e jurispundencës.

Gazeta Jeta në Kosovë ka kontaktuar deputetin Fatmir Limaj, për të mësuar se cilat janë arsyet e tij, që synon të bëhet avokat, por ai ende nuk ka dhënë përgjigje.

Endrit Shala personi kontaktues për media i ish-ministrit të transportit, i pyetur nga gazeta rreth kësaj çështjeje ka thënë shkurt se “kjo është një çështje shumë private dhe personale e z. Limaj”.

Limaj ka përfunduar studimet në fakultetin jurudik në Prishtinë, është deputet në Kuvendin e Kosovës dhe është i përfshirë në dy aktakuza për korrupsion gjatë kohës sa ishte Ministiër i Telekomunikacionit dhe në një rast gjyqësor për krime lufte. Limaj vazhdimisht ka mohuar të gjitha akuzat. /Gazeta Jeta ne Kosove/

Përfaqësuesit e institucioneve të Kosovës, kanë paralajmëruar që në 7-vjetorin e pavarësisë, në vitin 2015, Kosova do ta ketë Forcën e Armatosur me kapacitete mbrojtëse. Këtë njoftim qytetarët e Kosovës e kanë mirëpritur dhe thonë se edhe Kosova, sikurse çdo shtet tjetër, duhet ta ketë ushtrinë e vet.

Kryeministri i Kosovës, Hashim Thaçi, me rastin e 6-vjetorit të shpalljes së pavarësisë, deklaroi se forca e re e Kosovës, do t’i ketë kapacitetet e mbrojtjes dhe do të ketë një mandat të ri, madhësi dhe strukturë të re.

Këtë njoftim qytetarët e Kosovës e kanë mirëpritur dhe thonë se edhe Kosova, sikurse çdo shtet tjetër, duhet ta ketë ushtrinë e vet.

Kurse, të rinjtë në rubrikën e përjavshme ”VOX”, të Radios Evropa e Lirë shprehen optimistë se në të ardhmen, Kosova nuk do të ketë nevojë për forca të huaja, si KFOR-i, pasi shteti do ta ketë ushtrinë e vet.

Nazim Fazliu, një kadet i Forcës së Sigurisë së Kosovës, mendon se deri te shndërrimi i FSK-së në ushtri të Kosovës, do të ketë shumë sfida.

“FSK-ja tashmë pritet të jetë ushtri dhe t’i ketë kapacitetet e plota. Standardet për të qenë ushtar apo një gradë më e lartë, kanë për të qenë shumë më të lartë, sepse do të jenë standarde evropiane, të SHBA-së, ose ushtrive të tjera të NATO-s. Nuk mendoj se është e vështirë jeta ushtarake. Ky profesion ka disiplinë shumë të madhe dhe unë ua preferoj të gjithë të rinjve ta provojnë jetën ushtarake”, thotë Nazim Fazliu.

Edhe kadeti tjetër, Bardhyl Dugolli është optimist se Kosova shumë shpejt do ta ketë ushtrinë e vet.

“Po presim tash, po dëgjojmë që do të kemi Forca të Armatosura të Kosovës. Jam optimist se do të bëhet më mirë. Po shpresojmë, të parët tanë dhe më vonë të tjerët që kanë derdhur gjak, e kanë bërë për këtë ushtri që shpresojmë se do të bëhet. Shpresojmë që gjeneratat tonë që po shkollohen do të thotë kadetët po shkollohen në mënyrë profesionale dhe ushtria do të jetë më perfeksionuar”, pohon Bardhyli.

Kurse, Ardit Zogaj, nxënës i shkollës së mesme, shpreh dëshirën që në të ardhmen të jetë pjesëtar i ushtrisë së Kosovës, në mënyrë që, siç shprehet ai, ta mbrojë atdheun.

“Më pëlqen jeta ushtarake dhe kam dëshirë që në të ardhmen të jem një ushtar profesionist i Kosovës”, shprehet Arditi.

Edhe studenti Granit Ademi, i cili studion në Fakultetin Ekonomik, mendon ngjashëm:

“Po, kjo është e rëndësishëm, pra që ushtria të formohet dhe ta mbrojë shtetin. Gjithmonë kam pasur dëshirë të jem pjesë e ushtrisë së Kosovës, për ta mbrojtur vendin”.

Kurse, Egzon Berisha, po ashtu student, thotë se është krenari e madhe që në të ardhmen, të rinjtë të kenë mundësi të jenë ushtarë të Republikës së Kosovës.

“Formimi i ushtrisë është diçka shumë e mirë. Çdo shtet duhet ta ketë dhe e ka ushtrinë e vet. Gjithkush, ka dëshirë të jetë ushtar i shtetit dhe jeta ushtarake është e mirë dhe pak edhe e vështirë”, thekson Egzon Berisha.

Por, Fitim Gashi për dallim nga të rinjtë e tjerë shprehet krejt ndryshe lidhur me këtë:

“Nuk më pëlqen, as jeta në Kosovë, e as jeta ushtarake. Nuk ia vlen sepse ka pasur shumë persona që kanë qenë ushtarë të Kosovës, kanë humbur jetën dhe asgjë nuk ka ndryshuar, asgjë. Kosova është e njëjtë, për atë nuk më pëlqen”.

Kryeministri i Kosovës, Hashim Thaçi, ka deklaruar se themelimi i Forcave të Armatosura të Kosovës, përbën rrumbullakimin e ndërtimit të shtetit të Kosovës.

Ndërsa, ekspertët e çështjeve ushtarake dhe të sigurisë, parashohin se Forcat e Armatosura të Kosovës do të zhvillohen gradualisht brenda një periudhe prej 5 deri në 10 vjetët e ardhshëm.

Me rritjen e tyre graduale, këto forca do ta zëvendësojnë KFOR-in në momentin kur NATO të vendosë për largimin e trupave paqeruajtëse nga Kosova. /REL/

Deputeti Arben Gashi, pjesëmarrës në takimin e fundit të zhvilluar mes Kryeministrit Hashim Thaçi dhe Kryetarit të LDK’së, Isa Mustafa, mohon pajtimin e këtyre dy liderëve për një bashkëqeverisje të mundshme pas zgjedhjeve të përgjithshme.

Gashi ka shkruar në llogarinë e tij në Facebook se gjatë këtij takimi është biseduar vetëm për reformën zgjedhore dhe kohën e mbajtjes së zgjedhjeve.

“Unë isha pjesëmarrës në takimin Isa Mustafa – LDK dhe Hashim Thaçi- PDK dhe deklaroj se nuk ka marrëveshje për bashkëqeverisje LDK me PDK”.

“Mediat të ndalin spekulimet e pabaze lidhur me takimin e Mustafës me Thaçin lidhur me datën e zgjedhjeve dhe reformën zgjedhore”.

“Nuk ka kurrfarë marrëveshje me Thaçin për bashkëqeverisje. Biseda ka qene për të dakorduar hapat për reformë zgjedhore dhe afatin e zgjedhjeve, asgjë tjetër”.

“A mendoni se Thaçi do ishte takuar me opozitën nëse do ishte i sigurt se nuk do të shkarkohet me mocionin e votëbesimit?”, pyet deputeti Gashi ndërsa thekson nevojën e shkuarjes në zgjedhje sa më të përgatitur.

“Është në interesin e Kosovës që zgjedhjet të jenë të përgatitura mirë, sepse LDK dëshiron të ofrojë qeveri kredibile të pakontestuar për mandat të plotë. Prandaj duhen bërë përgatitjet e duhura dhe me kohë, përfshirë vëzhguesit ndërkombëtarë në çdo qendëvotimi”.