Ramush Haradinaj insiston që zgjedhjet parlamentare duhet mbajtur sa më parë në Kosovë, i bindur se Qeveria e Hashim Thaçit e ka humbur shumicën në Kuvend dhe bllokada institucionale nuk kapërcehet.

Në një intervistë për Top Channel, ai ka kërkuar dorëheqjen e Kryeministrit Thaçi, sepse nuk i ka numrat në Kuvend dhe rrjedhimisht vendimet e Qeverisë nuk janë legjitime më.

“Është normale të reflektosh mbi një gjendje të krijuar, është e arsyeshme, morale dhe kërkohet kur humb shumicën në Parlament.”

“Duhet ta pyesësh Parlamentin, nëse do vazhdosh më tutje. Kjo do të thotë, ose të japësh dorëheqje, ose t’i kërkosh Parlamentit se si do të vazhdojë më tej situata me qeverisjen, duke qenë se nuk e ke më shumicën.”

“Vendimet e Qeverisë së sotme nuk janë legjitime në vazhdim, sepse nuk ka shumicën politike të detyrueshme nga Kushtetuta e vendit.”

Haradinaj ka deklaruar për Top Channel që zgjedhjet parlamentare do të duhej të mbaheshin në muajin prill.

“Do të ishte mirë që të mbahen në prill të këtij viti. Pra, të vendoset brenda këtyre ditëve që brenda atij muaji të mbahen zgjedhjet, pasi kështu do të ishte mirë për Kosovën. Do të përfitonim kohë dhe, në një farë mënyrë, gjendjen që po shkon në përkeqësim e ndalim menjëherë me shpalljen e zgjedhjeve”.

Bashkimi Evropian dhe Kosova janë marrë vesh që është e rëndësisë parësore që Kuvendi të sigurojë emërimin sa më të hershëm të Komisionit të Pavarur për Media, përmes një procesi të hapur dhe transparent që garanton emërimin e njerëzve kompetentë e pa përkatësi politike. Ky emërim do të jetë i nevojshëm që KPM-ja të kryejë monitorimin e zgjedhjeve nëse Kosova futet në një proces të zgjedhjeve.

Përfaqësues të autoriteteve kosovare dhe të Bashkimit Evropian janë takuar në Prishtinë për të diskutuar zhvillimet gjatë vitit të fundit në fushën e komunikimeve elektronike, shoqërisë informative dhe politikave audiovizuele, punën dhe mirëqenien sociale, arsimin, shkencën dhe novacionin si dhe mbrojtjen dhe kultivimin e trashëgimisë kulturore.

Kryeministri Hashim Thaçi ka vizituar të premten strukturat drejtuese të FSK’së të cilët i ka njoftuar për vendimin e Qeverisë që kjo trupë të transforomohet në Forcat e Armatosura të Kosovës.

Thaçi gjatë vizitës së tij ka shfrytëzuar rastin për të ngrënë edhe drekë me pjesëtarët e FSK’së.

Aty kanë qenë të ftuar edhe ambasadorja e Shteteve të Bashkuara të Amerikës Tracey Ann Jacobson dhe ai britanik Ian Cliff, por nuk kanë marrë pjesë, transmeton Express.

Televizionet e vendit kanë transmetuar pamje të karrigeve të zbrazëta që ishin rezervuar për Jacobson dhe Cliff. Por nuk janë bërë të ditura arsyet e mospjesmarrjes së dy diplomatëve në këtë eveniment.

Kryetari i Kuvendit të Kosovës, Jakup Krasniqi, thotë se ende nuk ka ndonjë qëndrim zyrtar lidhur me dorëheqjen e pozitës së Kryeparlamentarit.

Në një prononcim për lajmi.net, Krasniqi ka përgënjeshtruar raportimet se do të japë dorëheqje nga pozita e të parit të legjislativit.

Sipas tij, vendimi për dorëheqje nga kjo pozitë do të bëhet konform interesit dhe rrethanave që janë të krijuara në vend, ndërsa siguron se asnjëherë nuk do ta vë interesin e tij para institucionit të cilin ai e udhëheq.

“Do ta shikojmë, dhe vendimin do ta marrim konform interesit dhe rrethanave që janë krijuar në Kosovë”.

“Akoma nuk e kam kumtuar qëndrimin tim, por besoj që nga fundi i javës tjetër, por tani nuk e kam.”

“Unë nuk kam thënë se do të jap dorëheqje”.

“Do të shikojmë, po them. Vendimin do ta marrim konform interesit dhe rrethanave që janë të krijuara, e jo konform interesit tim”.

Jakup Krasniqi thotë se do të shikojë edhe vullnetin PDK’së, nëse ata dëshirojnë ta mbajnë këtë pozitë.

“Duhet ta shikoj edhe vullnetin e subjektit politik që e ka të drejtën me Kushtetutë që ta ketë pozitën e Kryeparlamentarit”.

(E plotësuar) Këshilli Drejtues i PDK-së është duke vazhduar mbledhjen. Kryetari i PDK-së, Hashim Thaçi, ka thënë në KD të PDK-së se ‘duhet të mobilizohemi sot sikur sot pas 45 ditësh 90 ditësh ose 9 muajsh’.

“Ata që i kanë humbur zgjedhjet në komunat e tyre nuk mund ta sjellin disponimin negativ në Këshillin Drejtues. Unë i pari reflektoj se ndoshta është dashur ndryshe. Dobësia ndoshta ka qenë edhe e jona, se kemi shku në shabllon kur i kemi caktuar kryetarët e komunave Unë i pari reflektoj se ndoshta është dashur të shkohet pak më ndryshe, për shkak të ndonjë kandidati kryeneq” ka thënë Thaçi.

Ai ka elaboruar edhe më tej rezultatin zgjedhor të PDK’së duke thënë se dialogu me Serbinë nuk ka ndikuar që PDK mos të fitojë në Fushë Kosovë.

“Problematika qëndron ne kontekstin lokal” ka shtuar ai.

Godet Kadri Veseli: Kemi bërë gabime, dikush nga ne duhet të shkojë në shtëpi

Po vazhdon mbledhja e Këshillit Drejtues të PDK’së. Aktualisht aty po mbanë fjalim Zëvendëskryetari i Parë Kadri Veseli.

“PDK ka gabuar në disa raste dhe PDK nuk është konto e askujt. Ne jemi të vetmit që mund ta zhvillojmë vendin. Sigurisht që PDK ka bërë punë shumë të mëdha por edhe gabime. PDK duhet të fitojë zgjedhjet e ardhshme nacioanale” ka thënë Veseli.

“PDK nuk ka alternativë as politike as qytetareqeverisëse por edhe ne duhet të ndryshojmë shumë . Disa njerëz duhet me shku me pushu duhet të shkojnë në familjet e tyre disa të tjerë duhet të avancohen. Nominimet për deputetë duhet të bëhen në Këshill Drejtues. Rebelët janë të mirësaerdhur në partinë tonë” ka thënë Veseli, raporton Express.

Mblidhet Këshilli Drejtues i PDK-së

Këshilli Drejtues i Partisë Demokratike të Kosovës (PDK) është duke mbajtur mbledhje në ambientet e Hotel “Victory” në Prishtinë. Lajmin e ka konfirmuar për ‘Epokën e re’, sekretari i përgjithshëm i PDK-së, Basri Musmurati.

I pyetur se çfarë po diskutohet në këtë mbledhje, Musmurati ka thënë se Këshilli Drejtues i PDK-së do të diskutojë për një varg çështjesh që kanë të bëjnë me proceset politike në Kosovë dhe zhvillimet brenda PDK-së, duke përfshirë edhe përgatitjet për zgjedhjet parlamentare.

Banka shet pompën e benzinës që ishte lënë peng në hipotekë, pasi ish pronari, nuk kishte arritur të pagujë për rreth 1 vit këstin mujorë. Ish pronari dhe pronarët e pompës së benzinës përfshihen në konflikt, ku nga kjo, 4-tër persona janë lënduar, ndërsa janë arrestuar 9- të të tjerë në qytetin e Prizrenit.

Një rrahje masive në mes të anëtarëve të familjes Braha dhe pronarëve të një pompe të benzinës në dalje të qytetit të Prizrenit, ka mundur të përfundojë tragjikisht, por patrulla rajonale e policisë së Kosovës ka ndërhyrë shumë shpejt, duke çarmatosur, një të dyshuar që mbante në dorë një kallashnikov.

Nga kjo rrahje, kanë përfunduar në spital 4 persona, ndërsa janë shoqëruar për në stacionin e policisë 9-të të tjerë.

Siç tregon njëri nga anëtarët e familjes Braha, kjo ka ndodhur nga një mosmarrveshje që ka rrjedhur pas nxjerrjes në shitje të pompës së benzinës e cila ishte në hipotekë në një ndër bankat komerciale, pasi ish pronari për gati një vit , nuk ka arritur të paguajë këstin e kredisë, transmeton RTK.

Në vendin e ngjarjes ka dalë edhe prokurori i cështjes dhe po merret me rastin. Katër personat e plagosur janë goditur me shufra hekuri dhe sipas policisë janë jashtë rrezikut për jetë.

Kryetari i Komunës së Malishevës, Ragip Begaj, si çdo të premte, edhe sot ka hapur dyert për qytetarët, duke i dëgjuar hallet dhe problemet e përditshme që kanë banorët e Komunës, qoftë si individ, apo si komunitet, duke ju ofruar kështu ndihmën e institucionit të komunës dhe duke ju dhënë këshillat e nevojshme për çështjet e caktuara. Problemet kryesore të shfaqura nga qytetarët, ishin kryesisht ato socio-ekonomike, problemet me infrastrukturën e përgjithshme dhe një çështje shumë preokupuese ajo për punësim dhe nevojat tjera të ndryshme,

Begaj i ka premtuar qytetarët se do të angazhohet dhe do të mundohet t’i minimizoj problemet dhe brengat e tyre.

“Çdo shqetësim apo brengë e qytetarit të Malishevës është edhe shqetësim i imi i cili më prek jashtëzakonisht shumë, dhe do mundohem të ju siguroj një jetë më të mirë dhe të jem i barabartë me ju”, tha Begaj.

“Do të jem i hapur dhe i afërt me ju çdoherë, dhe së bashku do të ballafaqohemi me problemet”. /PrizrenPress.com/