Raportohet se një person nga Rahoveci, gjatë një ahengu familjar nën ndikimin e alkoolit ka goditur një xham të dritares duke i prerë venat e dorës.
Ngjarja ka ndodhur mbrëmë pas mesnate në rrugën “Afërdita Ukshini” në Rahovec.
Sipas policisë, viktima ka pësuar lëndime të rënda dhe është dërguar për tretman mjekësor në Qendrën Klinike Universitare të Kosovës në Prishtinë.
Fondacioni i Besimit Tony Blair Faith Foundation dhe Ministria e Punëve të Jashtme e Republikës së Kosovës, në bashkëpunim me Balkan Institute dhe Universitetin e Prishtinës sot nisin një program veror dy-javor mbi “Fenë dhe politikën e jashtme: Shqyrtimi i rolit të fesë në transformimin konfliktuoz dhe post-konfliktuoz”, prej 5-17 gusht.
Programi mirëpret 26 pjesëmarrës nga 15 shtete, duke përfshirë edhe vendet e largëta si Maroku, Kina dhe Ukraina.
Ekspertë të njohur do të ligjërojnë në kuadër të një programi të larmishëm që mbulon tema si feja në kontekstin e rindërtimit post-konfliktuoz dhe rolin e fesë, kulturës dhe identitetit në Ballkan. Në mesin e ligjëruesve do të jenë profesor Miroslav Volf nga Universiteti Yale, profesor Ivo Vanac nga Universiteti Yale dhe nga Zagrebi, ambasadori Zamir Akram, ish-ambasador i Pakistanit pranë Kombeve të Bashkuara dhe ligjërues në Geneva School of Diplomacy, dhe Obrad Saviq nga Universiteti Singidunum. Programi do të përfshijë një udhëtim fundjave për në Prizren për të vizituar trashëgiminë kulturore të qytetit të xhamive dhe kishave të cilat qëndrojnë krah për krah.
Charlotte Keenan, kryeshefe ekzekutive pranë Tony Blair Faith Foundation, tha:
“Këtë verë po bashkëpunojmë me Ministrinë e Punëve të Jashtme të Kosovës, Universitetin e Prishtinës dhe Balkan Institute, përmes organizimit të një programi intensive veror mbi ndërveprimin mes fesë dhe politikës së jashtme. Programi bashkon studentët me profesionistë, diplomatë, si dhe me udhëheqës rajonalë dhe ndërkombëtarë. Programi do të pajisë pjesëmarrësit me njohuritë dhe aftësitë e domosdoshme për të kuptuar dhe analizuar rolin e fesë në kontekst të situatave konfliktuoze dhe post-konfliktuoze. Shpresojmë se ky program do të bëjë që ta shohim fenë si pjesë të zgjidhjes, si dhe shpeshherë si pjesë të problemit. Nuk ka vend më të mirë sesa Kosova për zhvillimin e një kursi të tillë”, tha Charlotte Keenan.
“Programi veror është edhe një hap përpara në përkushtimin tonë të vazhdueshëm për nxitjen e dialogut ndërfetar në Kosovë. Kjo nismë është pjesë e programit tonë shumëdimensional të diplomacisë publike dhe është vazhdimësi e konferencës së suksesshme ndërkombëtare ndërfetare e cila mblodhi prijës fetarë dhe ekspertë botërorë në Pejë, në maj të këtij viti. Jemi të lumtur për bashkëpunimin tonë me Tony Blair Faith Foundation me të cilin fondacion do të organizojmë programin dhe do të jemi nikoqirë të ekspertëve të njohur botërorë këtu në Kosovë, ku do të vazhdojmë t’i trajtojmë këto çështje të rëndësishme me pjesëmarrës nga 14 shtete”, tha zëvendësministri i Punëve të Jashtme të Republikës së Kosovës, Petrit Selimi. /PrizrenPress.com/
Nënkryetari për komunitete i Komunës së Prizrenit, Orhan Lopar, pas katër vjetësh të bashkëqeverisjes në nivel lokal me Partinë Demokratike të Kosovës është shprehur i zhgënjyer me partnerët politikë për shkak të mospërmbushjes së pikave të marrëveshjes së koalicionit.
Ai thotë se me premtimin për dhënien e letërnjoftimeve dhe dokumenteve të regjistrimit civil në gjuhën turke PDK-ja i ka mashtruar njëherë turqit e Prizrenit dhe se të njejtën gjë nuk do të mund ta bëjë në të ardhmen.
“Pika e parë e marrëveshjes së koalicionit PDK-KDTP ka qenë dhënia e letërnjoftimeve dhe ekstrakteve të lindjes në gjuhën turke. Për fat të keq kjo pikë e marrëveshjes nuk është realizuar. Ndërkohë dy vjet më parë ne kemi realizuar një peticion, kemi grumbulluar nënshkrime, i kemi dorëzuar ato te institucionet, por kjo kërkesë nuk është marrë parasysh. Nëse kjo ka qenë lojë për të marrë votat e turqve në Prizren, atëherë i bie se PDK-ja keq na ka mashtruar”, ka thënë Lopar, shkruan Koha Ditore.
Ai ka theksuar se në kohën e nënshkrimit të marrëveshjes ka qenë i ri në politikë dhe e pranon se gjatë katër viteve të kaluara ka marrë mësime të shumta.
“ Nuk do të mund të na mashtrojnë përsëri” ka deklaruar Lopar. Ai ka fajësuar edhe turqit të cilët sipas tij, nuk kanë bërë sa duhet për të mbrojtur të drejtat e tyre.
Në Klinikën Infektive të QKUK-së, nga ethet hemorragjike të quajtura “krime kongo”, e të cilat shkaktohen nga pickimi i rriqrave vazhdojnë të jenë të shtruar pesë pacientë.
Mjeku Salih Ahmeti, ka potencuar për Kosovapress se gjendja e tyre për momentin është nën kontroll dhe se nuk janë në rrezik për jetën.
Krahasuar me ditët e kaluara Ahmeti pohon se tashmë ka filluar të normalizohet gjendja. Sipas tij, po që se nuk ndodh diçka e papritur, fundi i gushtit do të jetë edhe fundi i këtij sezoni sa i përket kësaj sëmundjeje.
Ndërkaq, edhe zyrtarë nga Instituti Kombëtar i Shëndetit Publik, kanë bërë të ditur se gjatë muajit gusht kanë angazhuar të gjitha mekanizmat, duke filluar nga Ministria Shëndetësisë, ajo e bujqësisë dhe kompanitë që merren me dezinfektimin e hapësirave, në mënyrë që ky muaj të kalojë pa viktima eventuale.
Ata apelojnë tek qytetarët që të shtojnë masat preventive, në mnëyrë që t’i ikin kontaktit me rriqrat, duke mbuluar pjesët e trupit gjatë punës nëpër fusha.
Marrë në përgjithësi vitet e pasluftës, ky vit ka qenë më fatali sa i përket vdekjeve nga ethet hemorragjike “krime kongo”, me gjithsej nëntë jetë të humbura. Vitin e kaluar nga po kjo sëmundje humbën jetën dy persona.
Të dhënat e para për sëmundjen e etheve hemorragjike apo “krime kongo”, në Kosovë, datojnë që nga vitit 1954, vit kur janë konfirmuar tri raste të vdekjeve. Nga viti 1954 deri më 1989 nuk ka të dhëna për këtë sëmundje. Ndërsa, nga viti 1889 është shfaqur në mënyrë permanente me shpërthime epidemike të herëpashershme, sidomos në vitin 1991, 1995, 2001 dhe 2005, kanë deklaruar infektologët kosovarë.
Sekretari i Përgjithshëm i PDK-së, Basri Musmurati ka thënë se PDK, përveçse do t’i ruajë komunat ku aktualisht qeveris, do të fitojë edhe komuna të tjera në zgjedhjet lokale të 3 nëntorit.
“Në të gjitha këto komuna ku deri më tash kemi qeverisur nuk e kemi problem fitoren. Përveç tyre, i kemi edhe disa komuna të tjera në të cilat kemi potencial për të fituar”, ka thënë Musmurati në këtë intervistë për “Epokën e re”.
Musmurati është shprehur i bindur në fitoren e PDK-së edhe në kryeqytet. “Për të fituar këtë komunë PDK-ja i ka gjasat shumë reale. Jam i bindur se do të fitojmë për arsye se kryetari i Komunës së Prishtinës, Isa Mustafa, nuk ka qeverisur mirë”, ka thënë Musmurati, duke shtuar se fitorja në Prishtinë do të arrihet pa koalicion me ndonjë parti tjetër. Ai ka bërë me dije se deri në mes të këtij muaji PDK-ja do t’i zyrtarizojë kandidatët për kryetarë komunash. Musmurati ka treguar se PDK-ja do t’i rikandidojë shumicën e kryetarëve aktualë edhe për një mandat qeverisës. Në këtë kontekst, Musmurati ka thënë se PDK-ja do të tregohet e kujdesshme me ata kryetarë të cilët janë nën hetime. Duke i komentuar deklaratat e zyrtarëve të Lëvizjes Vetëvendosje! kundër koalicionit me PDK-në, Musmurati ka thënë se PDK-ja nuk mërzitet pasi është parti e fortë. “Në asnjë mënyrë nuk na shqetëson ky fakt. PDK-ja nuk mërzitet për këtë. Edhe do të tjerë kanë thënë kështu, por pastaj kanë hyrë në koalicion me PDK-në”, ka deklaruar Musmurati.
Fituesit e konkursit për dramën shqipe “Katarina Josipi” për këtë vit do të ndahen më 9 nëntor të këtij viti, në ditëlindjen e “Katarina Josipit”. Janë 44 tekste të autorëve të ndryshëm që deri më tani janë dërguar në Teatrin Kombëtar të Kosovës. Së shpejti, ministri i Kulturës së Kosovës do të nënshkruajë rregulloren për ndarjen e çmimeve, gjë që do ti hapë rrugën për themelimin e jurisë, e cila do të vlerësojë tekstet konkurruese.
Drejtori Artistik i TKK-së, Emin Emini, në një prononcim për mediat e Kosovës ka thënë se çmimet do të ndahen më 9 nëntor, në ditëlindjen e Katarinës. “Këtë vit në garë për tri çmimet e para të këtij konkursi janë 44 tekste dramatike, të cilat do të vlerësohen nga një juri prej 5 vetash që po punojnë për ti verifikuar tekstet që garojnë, nëse janë apo jo pajtim me kriteret e konkursit”, ka thënë Emini, raporton Koha. Konkursi i dramës shqipe “Katarina Josipi” është i hapur për të gjithë krijuesit shqiptarë që shkruajnë dramë.
Disa nga rregullat bazë të këtij konkursi janë: dramat në këtë konkurs duhet të jenë jo më të shkurtra se 50 minuta; do të merren në shqyrtim dramat e të gjitha zhanreve; dramat e papërfunduara apo sinopsiset nuk do të merren fare në shqyrtim; dramat duhet të jenë origjinale, të shkruara mbas vitit 2000, të mos jenë vënë në skenë ndonjëherë të mos jenë botuar. Dramat dorëzohen në tri kopje.
Faqja e parë duhet të përmbajë: emrin dhe mbiemrin e autorit, adresën e autorit dhe mënyrën e kontaktimit me të, të dhëna për dramën: kur është shkruar, një sinopsis dhe mbishkrimin “Konkursi për Dramë Kombëtare “Katarina Josipi 2013”. Duhet të dërgohen në adresë të Teatrit Kombëtar të Kosovës (Teatri Kombëtar i Kosovës, Sheshi Nëna Terezë, nr.21, 10000 – Prishtinë, Kosovë). Tri dramat më të mira vlerësohen me tri çmime.
Drama që fiton vendin e parë, konsiderohet si dramë potenciale për t’u inskenuar në njërin nga sezonet e ardhshëm në TKK. Tri dramat fituese botohen në një edicion special. Konkursi i dramës kombëtare që organizon Teatri Kombëtar i Kosovës mban emrin e një aktoreje të shquar, Katarina Josipi (1923- 1969).
Është një nga themelueset e dramës dhe teatrit shqip në Kosovë, përkrah Antoneta Karahasanit, Matej Serreqit, Shemsi Zherkës, Shaban Gashit e shumë amatorëve të tjerë. Në vitin 1948, ajo bëhet pjesë e Teatrit të Prishtinës, femra e parë shqiptare në Teatrin Popullor Krahinor të Prishtinës. Në këtë skenë ajo aktroi për 21 vjet, personazhe nga repertori kombëtar dhe botëror i teatrit.
U hidhërua Pshtriku plak
u mrrol sa papritur
mblodhi re dhe iu fryu
shkrepi dritë e hedhur
dritë e tjerrur deri te ne
në thellësi Drini treti
prap shkëlqeu në gjeti
u kthye e mblodhi prap re
re të tjera në endje pa cak
sa mirë iu ra shuplakë
me krahët e thatë i afroi
tej deri te Përroi i Thive
ti më thuaj pse u frike
sa me të shpejt më ike
atyre thellësive të errëta
moj e bukura e Pshtrike
Skender Berisha
5 gusht 2013,Prizren
Sot në Prishtinë mbahet konferenca “Sukseset dhe sfidat e autorëve shqiptarë në mërgatë”. Në këtë konferencë të shkrimtarëve dhe poetëve nga diaspora pritet të marrin pjesë drejtues e përfaqësues të Lidhjes së shkrimtarëve, artistëve dhe krijuesve shqiptarë në Gjermani, Lidhjes së shkrimtarëve dhe krijuesve shqiptarë “Aleksandër Moisiu” në Austri, Shoqatës së shkrimtarëve, artistëve dhe krijuesve shqiptarë “Papa Klementi XI” në Suedi, Shoqatës së shkrimtarëve shqiptarë në Zvicër, Lidhjes së shkrimtarëve, artistëve dhe krijuesve shqiptarë në Norvegji, si edhe krijues letrarë nga mërgata kosovarë në vendet tjera.
Konferenca me autorët shqiptarë nga diaspora ka për qëllim themelimin e një asociacioni të përbashkët, me emrin Unioni i Krijuesve nga Diaspora, transmeton Koha.
Aktivitetet e autorët nga diaspora vazhdojnë me aktivitete tjera letrare. Në Orën 13, në Bibliotekën Kombëtare dhe Universitare të Kosovës do të hapet panairi I librit dhe do të bëhen promovime librash të autorëve nga diaspora, ndërsa në orën 17, në Novobërdë, do të mbahet Ora e madhe letrare.
Punëtorëve të arsimit që kanë punuar nga viti 1990 e deri në vitin 1999, do t’u njihet stazhi i punës, përmes një projektligji që është duke u përgatitur nga Ministria e Arsimit Shkencës dhe Teknologjisë (MASHT) Xhavit Dakaj, sekretar i përhershëm në këtë ministri, thotë se përmes projektligjit do t’u njihet statusi juridik punëtorëve të arsimit, atyre që nuk kanë pasur as sigurim, nuk kanë paguar tatim, nuk u është njohur stazhi i përvojës së punës.
Pra, sipas tij, këto do të rregullohen me ligj. “Edhe pse është folur që këta t’i kenë këto të drejta faktikisht, juridikisht nuk i kanë, këto të drejta tashmë do të legjitimohen.
Një prej tyre është njohja e 10 viteve si stazh pune dhe në bazë të buxhetit të bëhet ndonjë kompensim, pastaj qeveria do të vendosë se kah më tutje sepse ky tani është vetëm një draft”, tha ai, shkruan Zëri.
Dakaj tha se projektligji është në fazën përgatitore, ku është në diskutim të brendshëm. Ai tha se akterët e brendshëm, shkollat dhe institucionet e ndryshme kanë të drejtë t’i japin komentet e tyre. Ai më tej tha se më pas projektligji do të dalë në diskutim të jashtëm publik deri në fund të këtij muaji, pas këtij diskutimi do të dërgohet në qeveri, ndërsa në shtatorë të dërgohet në Kuvend për aprovim.
Alush Istogu, drejtor i administratës së arsimit para universitar, thotë se për këtë çështje janë formuar grupet punuese, kanë incizuar gjendjen nëpër të gjitha institucionet arsimore në të gjitha komunat.
Sipas tij, çdo shkollë ka pasur për obligim që ta paraqesë regjistrin e punëtorëve që kanë punuar në vitet 90-99, nëse janë djegur dokumentacionet, janë formuar komisione të veçanta për verifikimin e atyre punëtorëve që kanë punuar.
Pasi nëntë persona humbën jetën si pasojë e etheve hemoragjike, që nxiten nga pickimi i rriqrave, Ministria e Shëndetësisë lansoi një reklamë që udhëzon qytetarët se si te mbrohen nga këto insekte. Deputetja, mjeke me profesion, Aurora Bakalli thotë se spoti i Ministrisë së Ferid Aganit është i vonuar. Ajo tha se Kosova ka probleme serioze me rriqrat dhe se është koha që ekzekutivi t’i hapë sytë dhe te marra masa parandaluese ndaj tyre.
Pikërisht në ditën kur humbi jetën edhe viktima e nëntë nga ethet hemoragjike, si pasojë e pickimit të rriqrave, Ministri i Shëndetësisë Ferid Agani në një tryezë me shoqërinë civile foli për arritjet e ekzekutivit për sigurimin e medikamentit që ndihmon pacientët e infektuar.
Derisa pohoi se është në dijeni se Kosova ka probleme me rriqrat.
Në anën tjetër një ndër ndihmat e pakëta që ka ofruar Ministria e tij këtë vit për qytetarët e Kosovës, që rrezikohen nga sëmundjet që bartin ato insekte është edhe një fushatë vetëdijësuese e cila po lansohet në televizonet nacionale.
Krejt kjo për Aurora Bakallin, mjeke dhe Deputete e Kuvendit të Kosovës është një hap i vonuar i ekzekutivit.,
“Ministria ka qenë e vonuar dhe është marrë me pasojat e jo me parandalimin”, tha ajo.
Bakalli në një bisedë për Express kritikoi Ministrin Agani dhe mosveprimet e tij lidhur me problemet të cilat tashmë dihen që Kosova i ka me rriqrat.
“Pikë së pari reklama mendoj që është e vonuar sepse vetëdijësimi i qytetarëve për sëmundjet që vijnë nga ethet hemoragjike, si pasojë e pickimit të rriqrave, është tejet i rëndësishëm, është dashur të fillojë qysh para sezonës duke e ditur që ka vende në Kosovë që e kanë probleme të mëdha”, tha Bakalli.
Por, edhe vetë reklama e vonuar sipas saj, nuk është zgjidhja adekuate e problemit që mori nëntë jetë muajt e fundit.
“Tash kjo reklamë që është hapi i vetëm i ndërmarrë, të cilën po shohim, ka ardhur vetëm pasi kanë pësuar disa viktima nga ethet hemoragjike. Popullata është dashur të vetëdijësohet se si të veprohet para se të ndodhë më e keqja”, shprehet Bakalli.
I vonshëm sipas saj është edhe sigurimi i medikamentit të quajtur “Ribavarin”, e që ndihmon pacientet e infektuar, nga ana e MSH’së.
Bakalli thekson se Qeveria është dashur qysh në sezonin pranveror të sigurojë këtë ilaç.
“Vetëm pasi kemi nëntë vdekje ministri Agani del dhe thotë përmes mediave që ky medikamnet është siguruar. Ky medikament është dashur të sigurohet prej fillimit duke e ditur që vendi jonë ka disa zona të prekura nga rriqrat që sjellin ethet hemoragjike”, tha ajo.
Bakalli ndër tjera pohoi se situata me rriqrat në Kosovë mbetet më tutje problematike dhe se për këtë gjë Ministria duhet të angazhohet që të paktën vitin e ardhshëm të mos ketë pasoja tragjike, duke lënë të kuptohet se këtë vit çdo veprim i ekzekutivit ka qenë i vonuar.
“Nuk duhet me qenë specialist i mjekësisë apo deputet me dit këtë. Vetë fakti që janë nëntë të vdekur flet mjaft. Ne kemi probleme me rriqëra., Por duhet që për vitin e ardhshëm të jemi më sycelë dhe më të gatshëm të parandalojmë tragjedi si këto që i kemi pasur këtë vit”, tha Bakalli për Express.
Ndryshe nga pickimi i rriqrave kanë vdekur vetëm për dy muajt e fundit nëntë persona të moshave të ndryshme. Zonat më të prekura edhe këtë vit si çdoherë tjetër janë Malisheva dhe fshatrat përreth Gjakovës.