Minoritetet në Kuvendin e Kosovës nuk do të paraqesin pengesë në rrugëtimin e FSK-së drejt ndryshimit të misionit të saj. Këtë e kanë konfirmuar për “Epokën e re” ministri i FSK-së, Agim Çeku dhe ministri i Punës dhe Mirëqenies Sociale, Nenad Rashiq.

Pavarësisht vazhdimit apo jo të ulëseve të rezervuara për minoritetet, ministri i FSK-së, Agim Çeku, nuk pret të ketë kundërshtime të pakicave rreth kësaj çështjeje. Edhe ministri i Punës dhe Mirëqenies Sociale, Nenad Rashiq, ka deklaruar se nëse do të jenë pjesë e institucioneve të Kosovës minoritetet do të kenë qasje konstruktive ndaj kësaj çështje sikurse ka ndodhur deri më tash.

Ministri i FSK-së, Agim Çeku, ka deklaruar për “Epokën e re” se çështja e mandateve të rezervuara dhe ndryshimi i misionit të FSK-së janë të ndara, duke shtuar se kjo forcë ka në gjirin e saj pjesëtarë të të gjitha komuniteteve që jetojnë në Kosovë. “Mendoj se këto janë dy procese të ndara. Minoritetet nuk kanë asnjë arsye të veprojnë në mënyrë të tillë, sepse të gjitha komunitetet pakicë janë pjesë e FSK-së. Tanimë FSK-ja edhe me punën e vetë ka dëshmuar se është në shërbim të të gjithë qytetarëve të Kosovës dhe asnjë pakicë, përfshirë këtu edhe pakicën serbe, nuk ka arsye ta kundërshtojë çfarëdo zhvillimi që dërgon përpara FSK-në”, ka thënë Çeku. Ai ka treguar se deri më tani kjo forcë ka dëshmuar se është e të gjithë qytetarëve të Kosovës dhe e përbërë nga të gjitha minoritetet, andaj në rrugën e avancimit të saj nuk pret asnjë pengesë nga pjesëtarët e komuniteteve pakicë.

Çeku ka sqaruar se ngarkimi i FSK-së me detyra mbrojtëse për të gjithë territorin e Republikës së Kosovës është në interes të të gjithë qytetarëve të Kosovës dhe të paqes e stabilitetit në rajon. “Është në interes të të gjithë qytetarëve të Kosovës, por edhe në interesin e të gjitha vendeve të rajonit. Gjithashtu, është në interes të paqes dhe të stabilitetit në rajon dhe në interes të rritjes së sigurt të gjithë qytetarëve të Kosovës, pa marrë parasysh përkatësinë e tyre etnike. Nuk jemi duke ndërtuar forcë kundër dikujt. Ne jemi duke ndërtuar forcë për mbrojtjen e vendit, qytetarëve dhe mbrojtjen e interesave të Republikës së Kosovës”, është shprehur Çeku.

Ndër të tjera, ai ka treguar se tani është në dorën e kryeministrit Hashim Thaçi të vendosë për të ardhmen e kësaj force. “Rishikimi strategjik ka përfunduar. Tani jemi në fazën e formulimit të rekomandimeve. Pra, jemi duke i harmonizuar rekomandimet brenda qeverisë së bashku me partnerët tanë ndërkombëtarë. Kryeministri është ai i cili vendos nëse rekomandimet i plotësojnë kërkesat e qytetarëve dhe të qeverisë. Pra, kryeministri është vendimmarrës dhe krejt varet prej tij”, ka thënë Çeku.

Ndërsa ministri i Punës dhe Mirëqenies Sociale, Nenad Rashiq, ka bërë me dije për “Epokën e re” se nëse komunitetet nuk do t’i braktisin institucionet shtetërore për shkak të vazhdimit të mandateve të rezervuara nuk do të kenë qasje selektive ndaj çështjeve të caktuara. Ai ka treguar se do të jenë parimorë dhe konstruktivë për çdo çështje. “Në qoftë se eventualisht nuk do të marrin pjesë në seancën e Kuvendit deputetët e komuniteteve, kjo nuk ka asgjë të bëjë me ndonjë projekt apo institucion të veçantë. Nëse komunitetet nuk participojnë në punën e parlamentit kjo do të ndodhë për të gjitha ligjet eventuale. Pra, nuk do të ketë për qëllim ta pengojë ndonjë projektligj të caktuar apo ndonjë strategji për ndryshmin e strukturës apo ndryshimin e misionit të FSK-së”, ka thënë Rashiq.

Derisa nuk vendosin ndryshe, sipas tij, komunitetet çdo çështje do ta trajtojnë në mënyrë të barabartë. “Ne e kemi trajtuar në nivel të barabartë çdo çështje që ka ardhur qoftë në parlament, qoftë në ministri apo institucione të tjera. Pra, nuk do të kemi qasje selektive. Do të kemi veprim kolektiv për të gjitha çështjet”, ka thënë ai.

Rashiq ka deklaruar se kërkesa e tyre për vendet e rezervuara ka të bëjë me krijimin e hapësirës në Kuvendin e Kosovës. “Pra, të mos keqkuptohemi, iniciativa e komuniteteve ka qenë në radhë të parë për të krijuar hapësirë për përfaqësimin e tyre në Kuvendin e Kosovës, por kurrsesi kundër një ideje të posaçme. Do të participojmë në Kuvend derisa të vendosim ndryshe”, është shprehur Rashiq, duke shtuar se komuniteti serb, sikurse në institucionet e tjera, edhe në FSK i ka pjesëtarët e vet.

Protestuesit të cilët po kërkojnë largimin e rektorit Ibrahim Gashi, sot iu është bashkuar edhe drejtori i Institutit KIPRED, Ilir Deda, cili e ka vlerësuar lartë vendosmërinë e studentëve për t’ia kthyer dinjitetin Universitetit të Prishtinës.

Deda tha për Telegrafin se UP-ja në të kaluarën ka prodhuar kuadro të niveleve evropiane, e që sot, ky institucion sipas tij, është shndërruar në një ambient ku akomodohen njerëzit e pushtetit.

“Institucionet e zaptuara mbrohen në mënyrë arrogante nga zaptuesit e tyre. Është inspiruese t’i shohësh studentët të cilat e duan një universitet të Prishtinës i cili i respekton kriteret akademike bashkëkohore. Pyetja se a do të largohet rektori Ibrahim Gashi është e tejkaluar, por dilema është se kur do të largohet ai. Mendoj që njerëzit të cilët bëhen pjesë e stafit akademik të UP-së duhet të kenë profil të mirëfilltë akademik dhe shkencor”, tha Deda.

Sipas tij, fajtori kryesor në këtë tempull të dijes nuk është rektori Ibrahim Gashi. Ai tha se problem më i madh në këtë tempull të dijes është zhytja e profesorëve në korrupsion dhe keqpërdorim të detyrës së tyre. Universiteti duhet të pastrohet nga kuadri që ka hyrë në punë pa kurrfarë merite dhe kriteri.

“Policia e Kosovës i ka dosjet e rreth 70 ose 80 profesorëve dhe asistentëve të cilët kanë kryer vepra penale, dhe mendoj se do të ishte e udhës që Policia e Kosovës para se të merrej me studentët protestues t’i shkonte në fund këtyre aferave. Deri më tani nuk e kam vërejtur se në protesta janë përdorur për poenë politik, sepse protestës i janë bashkuar njerëz me bindje të ndryshme politike dhe nga të gjitha fushat jetësore”, ka thënë Deda.

(E plotësuar) Njoftimet për arrestimin e deputeti Ukë Rugova, djalit të presidentit të ndjerë Ibrahim Rugova, dhe një grupi me të cilët dyshohet se ka bërë shitblerje vizash, tashmë janë konfirmuar edhe nga burime brenda EULEX-it dhe Policisë së Kosovës.

Mirëpo, ende nuk është saktësuar numri i të arrestuarëve në këtë rast. Më herët, burime të ndryshme i kanë thënë “Koha.netit” edhe për shtatë të tjerë të arrestuar, pos Rugovës. Ndërkohë, raportohet për 5 sish.

Bajram Tmava, avokat i Rugovës, ka konfirmuar për KTV-në arrestimin e klientit të tij dhe masën e arrestit prej 48 orësh. Arrestimin e ka konfirmuar edhe EULEX-i. “Ukë Rugova është një nga të arrestuarit”, thuhet në një njoftim për media, ku shtohet se operacioni i bastisjes dhe arrestimeve po bëhet ndaj një grupi kriminali.

“Sot në mëngjes ka filluar një operacion bastisjeje dhe arrestimi ndaj një grupi të pandehurish, të cilët janë të dyshuar të jenë përfshirë në një grup kriminal që dyshohen për kryerjen e veprave penale të krimit të organizuar, mashtrimit dhe ushtrimit të ndikimit”, thuhet në komunikatë, në të cilën nuk përmenden emra e as hollësi të tjera.

Por, avokati i deputetit Ukë Rugova ka përmendur se klienti i tij po dyshohet edhe për veprën penale të keqpërdorimit të detyrës zyrtare. Ndërkohë, burime brenda Policisë së Kosovës thonë se bëhet fjalë për shitblerje vizash.

Pohohet se njëri nga të arrestuarit është zyrtar i Ambasadës italiane në Prishtinë, Florent Petani dhe Izet Beqiri nga Mitrovica.

Përveç Ukë Rugovës, edhe 7 të arrestuar

Burime brenda Policisë së Kosovës bëjnë të ditur se Policia e Euleksit përveç Ukë Rugovës, ka arrestuar edhe shtatë persona të tjerë, që lidhen me rastin krim i organizuar.

Policia e Kosovës, e cila thotë se tani s’ka qasje fare në këtë aksion, po ashtu thotë se bëhet fjalë për shitblerje vizash.

Pohohet se njëri nga të arrestuarit është zyrtar i Ambasadës italiane në Prishtinë, Florian Petani. I arrestuari tjetër është Izet Beqiri, nga Mitrovica, një shok i Ukës.

Izet Beqiri pati përballuar shpenzimet e vizitës së Ibrahim Rugovës në Itali në vitin 1999

I arrestuari, Florian Petani, është zyrtar kryesor për viza në Ambasadën italiane në Prishtinë. Është shtetas i Shqipërisë, por, pas martesës me një kosovare, ka marrë edhe shtetësinë e Kosovës. Ai jeton në Fushë-Kosovë.(Express).

Arrestohet Ukë Rugova, dyshohet për krim të organizuar

EULEX-i ka konfirmuar se në orët e mëngjesit ka filluar një operacion bastisje dhe arrestimi ndaj një grupi të pandehurish të cilët janë të dyshuar të jenë përfshirë në një grup kriminal që dyshohen për kryerjen e veprave penale të krimit të organizuar, mashtrimit dhe ushtrimit të ndikimit.

Të pandehurve janë duke ju bastisur shtëpitë. Operacioni është pjesë një hetimi të përbashkët të Policisë së Kosovës dhe EULEX-it, transmeton Telegrafi.

Telegrafi mëson se bëhet fjalë për djalin e ish presidentit Rugova, Ukë Rugova.

Sipas EULEX-it ka edhe të dyshuar tjerë lidhur me këtë rast.

Mediat raportojnë se për arrestimin e Ukë Rugovës, ndonëse ende ndodhet në ambientet e shtëpisë së tij, në Velani, lagje të Prishtinës.

Nënkryetari i degës së LDK-së në Prizren, Haziz Hodaj ka thënë se janë mbledhur 50 për qind e nënshkrimeve nga delegatët e Kuvendit dhe kryetarët e nëndegëve për votëbesim ndaj kryetarit Eqrem Kryeziu.

Unë jam nënshkrues i këtij peticioni , por nuk janë nismëtar i peticionit”, ka thënë Hodaj për Kosova Sot.

Edhe Njiazi Ademaj , që ishte kandidat për kryetar të Komunës në zgjedhjet e kaluar nga dega e LDK-së në Zhur mendon se është koha për ndryshime, duke aluduar në ndërrimin e kryetarit Kryeziut.

“Unë befasohem se pse duhet kaq gjatë të jesh në krye të detyrës për 24 vjet e të mos fitosh tri herë radhazi dhe të mbetesh në krye të partisë. Mendoj se nuk shkon”, ka thënë Ademaj.

Zëdhënësi i LDK-së,Nderim Gashi ka thënë ndërkaq se kërkesën për dorëheqje të Kryeziut e quan të pavend.

“Ai është zë i izoluar”, ka thënë Gashi./Prizrenpress.com/