Pritje të gjata dhe anulime të fluturimeve ka edhe sot në Aeroportin e Prishtinës. Shkak i anulimit të fluturimeve të avionëve është bërë mjegulla e dendur, e cila ka mbuluar qytetin e Prishtinës me ç’rast shumë qytetarëve nuk u është mundësuar fluturimi.
Fluturimi për në Zurich i cili ishte paraparë për orën 09:00 është shtyer për orën 11:15 mësojnë burime të Indeksonline, si dhe shumë fluturime të tjera janë anuluar.
Mero Baze
Mbledhja e parë e përbashkët e dy qeverive shqiptare në Prizren është mbështjellë nga një jonosferë të ekzaltuarish dhe të mërziturish, të cilët edhe pse i kanë arsyet tërësisht politike, përpiqen t’i drejtohen patriotizmit dhe historisë. Mbledhja, e cila shpresoj të konsolidojë një normalitet të komunikimit mes dy qeverive, ishte historike sa i përket kronologjisë, pasi ndodhte për herë të parë, por nuk ka pretendimin të hyjë në histori. E vetmja gjë që duhet të stabilizohet në historinë tonë, është normaliteti i bashkëpunimit të fortë dhe dialogut të hapur mes dy qeverive për të formuar një treg efiçent shqiptar dhe për t’i zhdukur barrierat e komunikimit ekonomik, kulturor dhe politik.
Të ekzaltuarit nga mbledhja, që e cilësojnë historike pasi po bashkon qeveritë e dy vendeve, përfshi dhe simbolika e Shtëpisë së Lidhjes së Prizrenit, janë një teprim i panevojshëm. Komunikimi mes Tiranës dhe Prishtinës në nivel qeverish ka pasur defekte të vetat nga interferencat politike, por dhe nga përpjekja e Tiranës për paternalizëm ndaj Prishtinës. Mbledhja e përbashkët dhe komunikimi i mirë politik mes Thaçit dhe Ramës sjellin një shans për të konsoliduar një traditë, që në të ardhmen duhet të tejkalojë dhe nuancat politike të ndryshme, nëse ekzistojnë. Pra, qeveritë e Tiranës dhe Prishtinës duhet të sillen si të barabarta me njëra- tjetrën dhe efiçente duke komunikuar direkt. Kjo do të ishte një pasuri për qeverisjen dhe një përgjegjësi reale për dy shoqëritë. Për 15 vjet, qysh nga viti 1999 kur Kosova fitoi lirinë, komunikimi Tiranë- Prishtinë ka qenë herë i dominuar nga klientelizmi dhe herë nga paternalizmi si kulturë politike e Tiranës. Arritja reale është normaliteti i takimit mes dy qeverive. Përtej kësaj, nuk ka asgjë historike apo patriotike në këtë histori. Nga aftësia që do të dëshmojnë për të ruajtur këtë komunikim normal, do të matet nëse ka diçka historike në këtë traditë. Ndrysh mund të ngelet thjesht një uikend në Prizren.
Por më të çuditshëm janë të mërziturit nga kjo nisëm, të cilët më së shumti gjejnë arsye tek shuma e vogël e ofruar për Preshevën apo mungesa e së njëjtës vëmendje për Maqedoninë apo Malin e Zi.
Kapja me shumën është fyese pasi qeveria e Shqipërisë dhe Kosovës nuk kanë ndërmend të jenë dhe qeveri e Preshevës. Ata kanë bërë një gjest humanitar dhe kanë mbajtur një premtim, por ndihma e vërtetë do të jetë presioni mbi qeverinë serbe për të drejtat e Luginës dhe jo ndonjë “Plan Marshall” i qeverive shqiptare për Luginën.
Pakënaqësia për shumën më kujton ish- socialistët shqiptarë të vitit 1991, që e sulmonin vizitën e Bejkerit në Tiranë duke pretenduar se ai na solli 6 milionë dollarë për 3 milionë shqiptarë. Në të vërtetë ai na solli SHBA në Tiranë, i cili vazhdon të jetë aleati më i madh i Shqipërisë deri më sot. Edhe mbledhja e përbashkët e dy qeverive nuk do shpëtojë dot as financiarisht dhe politikisht Preshevën, por është një garanci e vëmendjes së qeverive shqiptare ndaj shqiptarëve të mbetur nën Serbi, që janë të vetmit shqiptarë të papërfillur politikisht në rajon. Mbledhja në një farë mënyre u çoi banorëve të Luginës, prezencën e dy qeverive shqiptare, e cila vlen më shumë se 100 mijë euro.
E vetmja vërejtje që të shkakton humor ishte ajo e Sali Berishës, i cili me sa duket ndjehet keq që për herë të parë komunikimi normal mes dy qeverive po vendoset pasi doli ai në pension. Duke qenë i pafuqishëm ta kundërshtojë këtë zhvillim, ai kishte gjetur si problem datën. Është nga të paktët ish- komunistë që vazhdon ta kujtojë 11 Janarin si festë të Republikës Popullore, dhe kishte gjetur të mërzitej pikërisht për këtë shkak. Mendo sikur të kishte ndodhur që mbledhjen ta kishte hapur dhe ministri i Jashtëm i Kosovës, që për koincidencë e ka emrin Enver Hoxha. Do të ishte e vetmja gjë që mund ta kishte bërë të lumtur në një ditë që duket sa hipokrit ka qenë me Kosovën.
Studentët, banorë të konvikteve në Qendrën e Studentëve në Prishtinë, ankohen për kushte jo të mira.
Edhe pse drejtori i Qendrës thotë se kanë përfunduar disa projekte me të cilat janë përmirësuar dukshëm kushtet e banimit, shumica e studentëve ankohen për mungesë të ujit të ngrohtë dhe ngrohjes në dhoma.
Drejtori i Qendrës së Studentëve, Fatmir Sfishta, ka thënë për Kosovapress, se deri më tani, ka arritur që ta përmirësoj dukshëm çështjen e furnizimit me energji elektrike, pasi, sipas tij, në të shumtën e rasteve, rryma nuk ndalet, pasi kjo Qendër është ndër furnizuesit e veçantë të KEDS-i. Kurse për ujë, ai thotë se është duke u bërë furnizimi më i mirë i mundshëm, duke e pasur parasysh gjendjen e përgjithshme të furnizimit në qytet.
Sfishta, thotë se studentët nuk kanë të drejtë të ankohen për ngrohje, edhe pse nuk e mohon se studentët, ndonjëherë, përdorin edhe ngrohëse me rrymë në dhomat e tyre.
“Nuk mund të them që s’ka, por në masën më të madhe mund të them që studentët edhe nuk kanë nevojë që të kenë ngrohje alternative me rrymë. Në rast se ne e vërejmë se ka ngrohje alternative ne ua konfiskojmë ato ngrohje, sepse nuk kanë nevojë. Në rastet kur e shohim se nuk funksionon, ne jemi të vetëdijshëm që studenti nuk bënë ta ketë ftohtë, i lejojmë, mirëpo, në shumicën e rasteve, tash edhe nuk po ndodh që studentët të kenë probleme me ngrohje”, është shprehur Sfishta.
Megjithë hapësirën e kufizuar, banimi ilegal i një numri të studentëve, e bënë Qendrën edhe më të ngarkuar.
“Sa i përket ilegalëve, ne nga ana njerëzore e dimë që ka ilegal, ka pas ilegalë, ne me vetëdije thuajse i kemi lejuar që në ndonjë dhomë ta mbajë ndonjë ilegal për strehim, por, sa i përket anës humanitare. Mirëpo, e kam vërejtur një dukuri që studentët e kanë marrë një ilegal për ta përgjysmuar pagesën, ta ndajnë pagesën që i bëjnë Qendrës së Studentëve dhe nga aspekti humanitar është kthyer në aspektin material dhe, gjatë këtij viti, e kam ndaluar që të mos ketë më ilegal në Qendrën e Studentëve, sepse, edhe problemet që ndodhshin, ndodhshin kryesisht në ato dhoma, në ato korridore, ku numri i ilegalëve është më i madhë”, është shprehur Sfishta.
Mirëpo, njëjtë nuk thonë edhe ata që banojnë dhe i përjetojnë vet kushtet e banimit në këto konvikte.
Driton Beqiraj, student i vitit të tretë në Fakultetin Ekonomik dhe banues në konviktin numër 2 në Qendrën e Studentëve, tregon për Kosovapress, se kushtet e banimit nuk janë aq të mira sa flitet.
“Kushtet e banimit nuk janë edhe aq të mira ashtu si thonë që janë. Uji i ngrohtë, shembull, nuk vjen, nuk janë disa kushte tjera, domethënë, nuk i plotësojnë bash mirë ato kushte që ata thonë. Ujë të nxehtë nuk ka, ngrohtorja e qytetit nuk punon, tash a është këtu problemi a në qytet nuk e dimë… vetëm me nxehëse ilegale se kështu nuk ka shansë m’u ngrohë”, thotë ai.
Beqiraj thotë se nuk është i kënaqur as me ushqimin që u servohet në mensë. Siç tregon ai, servohet ushqim i pashijshëm dhe i pakonsumueshëm.
E, ajo që më së paku mungon në konvikte, sipas Beqirajt, është zhurma dhe jodiciplina e studentëve.
“Ka probleme shembull në 2 apo 3 të natës. Nuk i flihet dikujt, zgjohet, duke bërtitur, askujt s’i pengon nëse na zgjon neve një kat, apo krejt një konvikt, nuk është problem për të. Recepsionisti vetëm rri aty, nuk ka kurrfarë efekti që me thënë diçka, hiq nuk u bëhet vonë për atë punë”, tregon Driton Beqiraj.
Mirëpo, ndryshe nga Dritoni mendon një bashkëbanuese në këtë Qendër.
Miradije Buliqi, studente e vitit të parë në Fakultetin Filozofik dhe banore e konviktit numër 3, thotë se është e kënaqur me kushtet që i ofrohen në këtë Qendër.
“Kushtet në Qendrën Studentore, pra në konviktet studentore, janë mjaft të mira, si nga drejtoria e Qendrës Studentore të gjitha kushtet i përmbush, për shembull, me energji elektrike 24 orë, me ngrohje qendrore, edhe pse ka pak mangësi në ngrohje qendrore, me ujë mirë, me higjienë shumë mirë, dhe kushtet në përgjithësi janë shumë të mira”.
Ajo thotë se nuk i pengojnë banorët ilegal. Për të është normale që një studentë të strehojë dikë në dhomën e tij ose saj.
Qendra e Studentëve në Prishtinë i ka 7 konvikte me rreth 3600 vende, ndërsa në vitin e ardhshëm pritet të fillojë edhe ndërtimi i konviktit numër 8.
Kurse, në mensën e studentëve, aktualisht janë të abonuar rreth 4500 studentë, pasi në mensë kanë të drejtë të abonohen edhe studentë, të cilët nuk janë banorë të Qendrës.
Çmimi për banim në konvikt, për një muaj, kushton 40 euro, ndërsa në mensë 30 euro. /Kosovapress/
Jonuz Musliu thotë se Kosova e Shqipëria duhet të mendojnë për bashkim të trojeve shqiptare. Ai ka ftuar Kryeministrat Thaçi e Rama të marrin pjesë në inaugurimin e objektit të maternitetit në Preshevë, për të cilin ata ndanë fondin prej 100 mijë eurosh.
Përfaqësues politikë të Luginës së Preshevës kërkojnë bashkim fizik të trojeve shqiptare dhe jo mbledhje të përbashkëta.
Vendimin e Qeverive të Kosovës dhe Shqipërisë për krijimin e një fondi për ndërtimin e një objekti të maternitetit në Preshevë, e quajnë të duhur, por jo të mjaftueshëm.
Kryetari i Kuvendit Komunal të Bujanocit, Jonuz Musliu, në një prononcim për lajmi.net, thotë se takimi në Prizren i Qeverive të Kosovës dhe të Shqipërisë është një hap të rëndësishëm për unifikimin e kombit shqiptar.
Mirëpo, sipas tij, mbledhja e Prizrenit do të duhej të shërbejë që dy Qeveritë të mendojnë për bashkimin fizik të territoreve shqiptare.
“Ne kërkojmë që të mos ketë këso lloj takime sa për sy e faqe në mes të dy Qeverive, por të jenë të ftuar edhe përfaqësues e kuvendarë të të gjitha trojeve shqiptare, për të ecur drejt unifikimit të popullit shqiptar”.
“Nëse shqiptarët nuk do të jenë të bashkuar, edhe Europa do të bëjë sehir ndaj nesh”.
“Është koha që shqiptarët të bashkohen. Nuk ka nevojë për dy Qeveri, por për një Qeveri, një Kuvend, një Shtet. Kjo do të thotë edhe bashkim fizik të të gjitha trojeve shqiptare”.
Në mbledhjen e përbashkët të Qeverisë së Kosovës dhe Shqipërisë, ku u nënshkruan disa marrëveshje bilaterale, u mor vendim edhe për krijimin e një fondi për ndërtimin e një objekti spitalor për maternitet në Preshevë.
Musliu thotë se fondi për ndërtimin e këtij materniteti ka qenë kërkesë e mëhershme e përfaqësuesve të Luginës së Preshevës.
“Ndërtimi i maternitetit në Komunë e Preshevës është iniciuar edhe më herët. Gjatë vizitës Kryetarit të Partisë Socialiste të Shqipërisë, tash Kryeministrit Edi Rama, të bërë para 2 vjetësh në Preshevë, ne i kemi bërë një kërkesë për ndërtimin e këtij materniteti.”
“Mirëpo, unë mendoj se nuk duhet lënë vetëm me ndërtimin e një materniteti, por duhet të ndahet një fond i veçantë për shqiptarët e Luginës së Preshevës. Jo fond humanitar, pasi që ne nuk jemi lypsarë, por duhet të krijohet një fond i përbashkët nga dy Qeveritë, sikurse ai për serbët e Veriut të Kosovës”.
Ai i ka bërë ftesë që tani Kryeministrave Thaçi e Rama që të marrin pjesë në inaugurimin e objektit të maternitetit.
“Ne do t’i ftojmë Kryeministrat e Kosovës dhe Shqipërisë që të marrin pjesë në përurimin e objektit të maternitetit në Preshevë, por varet nga vullneti i tyre”.
Sipas tij, shqiptarët e Luginës kanë nevojë për një fond të ngjashëm me atë të serbëve të Veriut të Kosovës.
“Nëse Veriu i Kosovës ka një fond prej 45 milionë euro, pse mos të kemi edhe një të ngjashëm, në mënyrë që të shpëtohen shqiptarët e Luginës”.
“Ne kërkojmë që dy Kryeministrat Thaçi dhe Rama të vijnë e ta vizitojnë Preshevën, Bujanocin dhe Medvegjen”.
Kosova e ka të garantuar furnizimin me energji elektrike edhe për 1 mijë e 200 vite, nëse vazhdohet me këtë intensitet të prodhimit të energjisë elektrike nga djegia e qymyrit. Rezervat shtetërore të linjitit/qymyrit janë rreth 12 miliardë e 442 milionë tonë, të shtrira në tri basenet qymyrmbajtëse.
Nëse kjo shifër pjesëtohet me 10 milionë tonë linjit sa digjen aktualisht brenda një viti nga KEK-u për prodhim të energjisë, del që rezervat tona do të zgjasin edhe për 1 mijë e 200 vite, shkruan Koha Ditore.
Përveç linjitit, toka e Kosovës është e pasur edhe me shumë minerale të tjera. Nëntoka e Kosovës është ndër më të pasurat në Evropë me minerale, porse nuk ka një studim që do të tregonte për nivelin e pranisë së mineraleve.
Vetëm në Trepçë janë rreth 70 minerale, përveç plumbit, zinkut, arit e argjendtit. Në Strategjinë Minerale të Kosovës për vitin 2012-2020 ka të dhëna për disa nga mineralet si: ari, argjendi, plumbi, zinku, kromi, magneziti, nikeli, miringelëz. Urani e minerale të tjera ndërtimore si dhe linjiti, të cilat janë në nëntokën e Kosovës.
Madje, në mungesë të studimeve konkrete në strategjinë minerare të Kosovës, thuhet se në pjesën e Dukagjinit ka mundësi të ketë edhe pasuri të naftës dhe gazit, porse nuk ka asnjë të dhënë. Me gjithë këtë pasuri nëntokësore, qytetarët e Kosovës janë populli më i varfër në Evropë./Koha Ditore/
Me rastin e mbledhjes së përbashkët mes dy qeverive Shqipëri-Kosovë, ministrja e Kulturës, Mirela Kumbaro u takua me ministrin Memli Krasniqi.
Sipas njoftimit për shtyp të MK, ata diskutuan për vijimësinë e platformës së përbashkët të kalendarit artistik dhe detyrave të takimit të datës 21 nëntor 2013 në Tiranë.
Bashkëpunimi rajonal në fushën e kulturës theksohet si një nga prioritetet e Ministrisë së Kulturës por edhe e vetë Qeverisës së re të Shqipërisë.
Synimi në këtë pjesë do të nënkuptojë krijimin e një hapësire kulturore mbarëshqiptare, e mbështetur në formë institucionale, ku hapësira kulturore e dy vendeve të trajtohet si një, por me më shumë qendra.
Në këto qendra Tirana, Prishtina, por edhe të tjera do të duhet të komunikojnë lirshëm veprat artistike dhe kultura. Nuk i duhet lënë më spontanitetit, qarkullimi i veprave artistike dhe kulturës.
ANGAZHIMET E PARA TË DY MINISTRIVE TË KULTURËS:
– Promovimi i veprës së plotë të Ali Podrimjes në bashkëpunim me Akademinë e shkencave të Kosovës.
– Kontakte me Akademinë e Shkencave të Kosovës për aktivitete të tjera të përbashkëta.
– Masa për prezantim të veçantë të botimeve nga Kosova në panairin e librit në Tiranë
– Ekspozita në Galerinë e Kombëtare e Rexhep Ferrit
– Prezantimi në Tiranë i shfaqjes “Shembja e kullës së Ajfelit”
– Promovime të disa librave me autor nga Kosova në sallën e Ministrisë së Kulturës
– Përfshirja e disa artistëve nga Kosova në konkursin e artit modern “Onufri” pranë Galerisë Kombëtare
– Fillimi i procesit të përafrimit të ligjeve për art kulturë, takim në nivel ekspertësh
– Fillimi i procesit për përpilimin e kalendarit të përbashkët – Takim në nivel Ministrash
– Pasqyrimi i jetës kulturore në Kosovë në faqen zyrtare të Facebookut të Ministrisë së Kulturës së Shqipërisë
Shumë shpejt pas mbledhjes së Qeverive:
– Përgatitje për një takim të madh mes drejtuesve të institucioneve artistike Kosovë – Shqipëri për konkretizimin e kalendarit të përbashkët kulturor
– Fillimi i analizave për kujdes dhe veprim të përbashkët për trashëgiminë kulturore
– Debate kulturore të përbashkëta
Bashkëpunimi me rajonin dhe sidomos Kosovën në fushën e kulturës u evidentua qartë që në fillim të punës të titullarëve të rinj të Ministrisë së Kulturës, ku për herë të parë në strukturat e saj është përfshirë edhe posti i këshilltarit për rajonin. Një vendim ky që tregon për rëndësinë që kanë politikat kulturore dhe jo vetëm të qeverisë së re, në raport me Kosovën por edhe gjithë rajonin.
Një person ka ofenduar Kryeministrin Rama gjatë qëndrimit të tij në Prizren, për mbledhjen e përbashkët mes dy qeverive. Ai është ndaluar nga policia, pasi ka thirrur: “Poshtë Rama”.
Ngjarja ka ndodhur jashtë hotelit ku po zhvillohej mbledhja e përbashkët mes dy vendeve, në cilën gjendeshin edhe kryeministrat Rama dhe Thaçi.
A1 Report ka fokusuar momentin e shoqërimit në polici të personit që ofendoi. Policia kosovare e ka shoqëruar për thyerje të rendit e sigurisë.
ZëvendësKryeministrja Edita Tahiri thotë se ende nuk ka rezultate nga negociatat që ka zhvilluar Bashkimi Europian me përfaqësuesit e Veriut, gjatë ditës së sotme në Bruksel, për konstituimin e katër Komunave.
Në një prononcim për lajmi.net, në orët e mbrëmjes, Tahiri është shprehur se ka pak gjasa që të arrihet ndonjë ujdi mes palëve rreth mënyrës së konstituimit të katër Komunave në Veri të Kosovës.
Sipas saj, nëse nuk ndodh një gjë e tillë në afatet e përcaktuara me Ligjin për Vetëqeverisje Lokale, atëherë Qeveria e Kosovës do të shpallë zgjedhje të parakohshme.
“Situata nuk ka ndryshuar. Gjatë ditës së sotme takimet kanë vazhduar vetëm midis Bashkimit Europian dhe Përfaqësuesve të Komunave dhe nuk ka pasur rezultate”.
“Deri më tani kemi marrë njoftime nga Bashkimi Europian se nuk ka pasur rezultate”.
“Në qoftë se nuk ndodh – dhe gjasat janë reale se nuk do të ndodhë – meqenëse nuk ka pasur dakordim mes BE`së dhe këtyre përfaqësuesve, atëherë ne si Qeveri e Republikës së Kosovës jemi të obliguar të veprojmë sipas ligjeve të cilat vlejnë për situata të tilla”.
“Në këto momente, BE nuk është duke zhvilluar takime. Më vonë nuk e di se çfarë mund të ndodhë”.
“Edhe në këto dy ditë në Bruksel Bashkimi Europian ka negociuar drejtpërdrejt me përfaqësuesit e Komunave në Veri”.
Ndërsa Emir Azemi, Këshilltar Komunal i PDK`së për Veriun e Mitrovicës, njofton për lajmi.net e nuk ka marrë asnjë përgjigje rreth mundësisë të mbajtjes së ceremonisë inauguruese deri në fund të ditës së sotme.
“Është vonë tani. Deri më tani kemi pritur një përgjigje dhe nuk e kemi marrë përgjigjen zyrtare. Tani jemi shpërndarë nëpër shtëpitë tona. Sonte nuk besoj se mund të ndodhë ndonjë gjë”, ka thënë Azemi.
Mjegulla e dendur që ka kapluar pjesën ku gjendet aeroporti ndërkombëtarë “Adem Jashari”, ka bërë që nga 26 fluturimet që është dashur të realizohen sot, 13 prej tyre të anulohen. Ndërkohë 13 fluturimet tjera, 5 janë direktuar në aeroportin e Tiranës, 1 në Selanik dhe 7 të tjera janë realizuar.
Lajmin e ka konfirmuar zëdhënësja e aeroportit, Valentina Gara.
“Po, është e vërtet që janë anuluar një numër i fluturimeve për shkak të mjegullës së dendur që po mbretëron këtu. Nga 26 fluturimet që kanë pasur të realizohen sot, 13 prej tyre janë anuluar. 5 i kermi direktuar në aeroportin e Tiranës, 1 në Selanik dhe 6 të tjera janë realizuar”, ka thënë Gara, raporton Zëri.
Ndërkohë janë edhe 6 fluturime të tjera të cilat pritet të anulohen pas orës 18:00. Megjithatë për këto të fundit nuk ka ende vendim zyrtarë.
Shkruan: Luan SALLAUKA
Takimi i përbashkët ndërmjet dy qeverive shqiptare është një nismë e qartë kombëtare për ti faktorizuar të gjitha problemet që janë reflektim i Konferencës së Londrës më 1913. Kjo nismë do të jetë një rrugëtim i gjatë dhe i mundimshëm që për qëllim do të ketë shërimin e plagëve që i ka shkaktuar shqiptarëve kjo konferencë ndërkombëtare. Për më shumë, ndërkombëtarët vet janë përballë një realiteti të ri, e ofruar si mundësi për ti rirregulluar gabimet e të parëve të tyre politik. Më mirë vonë, se kurrë!
Ky takim i përbashkët ka qenë formal dhe për qëllim ka patur reflektimin e një rrugeje të përbashkët në të ardhmen. Nëse këtij takimi i çasemi në kuptimin politik, kjo nënkupton një lartësim politikash ndër shqiptarësh, drejtë arritjes të qëllimeve të tyre kombëtare. Ndërkaq, këtij takimi mund t’i çasemi në mënyra të ndryshme për ti dhënë ngjyra sa të bardha e aq të zeza.
Qe 15 vjet asnjë qeveri nga të dyja anët as simbolikisht nuk ka ndërmarrë ndonjë veprim të këtillë. Sigurisht, nesë flasim në aspektin e konsumit të brendshëm, secili nga politikanët apo partitë politike do të donin të ishin në vendin e dy Kryeministrave sot, ose për të fituar vota e ose për të ngritë kredibilitetin e tyre politik e kombëtarë. Mirëpo, kjo që ka ndodhur sot, i tejkalon këto epitete, ngase këtu kemi të bëjmë me guxim, atdhetarizëm dhe plane afatgjata kombëtare.
Sigurisht, kundërshtarët e dy Kryeministrave do të mund të paragjykojnë se njëri është analfabet e tjetri jo kombëtarë, se që të dy nuk premtojnë politika të përbashkëta integruese. Por, pse këta kundërshtarë kaq epik e lirik në fjalet e tyre të ndërtuara artistikisht, nuk vepruan në stilet e tyre qeverisëse në diçka të ngjajshme? Nuk ditën? Nuk mundën? I ndali dikush? Sigurisht, Nuk guxuan sepse ishin frikacak dhe atdhedashuria e tyre lidhej veç me dashurinë për pushtetin.
Nëse edhe do të ndaheshin 100 milion euro, të gjithë ne e dijmë se në sa e në çfarë vështirësish do të hasim në Luginë për t’i implementuar ato projekte. Të gjithë ne, nuk do të donim që si të fundit ta zgjedhnim këtë mënyrë të përkrahjes ndaj shqiptarëve në Luginë, do të ishim të kënaqur dhe të plotësuar nëse ajo të ishte pjesë e përbashkët territoriale me Kosovën dhe Shqipërinë. Si të ngjajshme për 1 Shekull edhe Shqipëria ka patur këtë ndjesi ndaj Kosovës, dhe sot vjenë në shprehje ky realitet që na kënaqi shpirtnisht të gjithëve, natyrisht pas tërë asaj lufte të tmerrshme me Serbinë, pas tërë atyre vrasjeve mizore, pas tërë asaj lufte të pastër çlirimtare dhe rënies të të gjithë atyre dëshmorëve.
Natyrisht më shumë se kaq. Dosido kjo nuk duam të nënkuptoj edhe për Luginën, sepse nuk duam të vritet asnjë shqiptarë atje dhe të kenë fatin e shqiptarëve në Kosovë deri në vitin 1999-të. Por, duke patur për bazë se shqiptarët e Luginës me kë kanë punë, shumë vështirë që bashkimi i saj me Kosovën dhe Shqipërinë të bëhet në mënyrë paqësore. Përkundrejt kësaj, në cilëndo mënyrë, ky bashkim do të ndodhë, e neve na bjen veç të lutemi që më e keqja të jetë sa më e vogël.
Ndryshe nga kjo, takimi i sotëm nuk i ka harruar shqiptarët e Maqedonisë, ata të Malit të Zi apo edhe ata në Çamëri. Ky është veç fillimi i jetësimit të idesë për bashkëpunim ndër shqiptarësh nga të gjitha trevat ku ata jetojnë. Parimisht, ne jemi dëshmitarë të një gjendjeje të brishtë tek të dyja shtetet shqiptare, për shkak të armiqëve që kanë përreth vetes. Dhe, sot këta armiq janë më të bashkuar se kurrë për ti ndaluar të gjitha proceset që mund ti integrojnë shqiptarët në Bashkimin Evropian. Por, ne mund të bëjmë pyetjet: Kush është më i rrezikuar sot sesa Lugina? Cilat treva shqiptare janë më të okupuara se Lugina? Ndoshta Çamëria! Nëse PO, problemi i saj mund të zgjidhet veç me ndërhyrje të gjithanshme ndërkombëtare. Anipse ne do të donim vet ta çlironim atë.
Gjithsesi, e ardhmja do të jetë një tregues i qartë se edhe shqiptarët e trevave që sot nuk morën pjesë në këtë takim të përbashkët në Prizren, sigurisht do të takohen një ditë në Vlorë, Durrës, Elbasan apo edhe në Tiranë përfundimisht.
Prandaj e tërë kjo çka ka ndodhur sot, është një rifaktorizim i çështjes së shqiptarëve kudo që jetojnë jashtë këtyre dy shteteve me shqiptarë. Natyrisht është një orientim se ku dhe ka do të shkohet, dhe gjithsesi edhe një tërheqje e vëmendjes ndërkombëtare se tanimë ka ardhur koha për ta rirregulluar çështjen shqiptare në përgjithësi duke filluar me Luginën, Maqedoninë, Malin e Zi dhe në fund Çamërinë.