Analisti Halil Matoshi pret që fjalori politik të ashpërsohet në prag të zgjedhjeve nacionale. Përplasjet në mes partive i sheh si qëllim të krijimit të imazhit të forcës. Thotë se Vetëvendosje mund të bëjë koalicion vetëm me ndonjë parti ose lëvizje të re.

Muajt e ardhshëm pritet të karakterizohen me një fushatë edhe më të ashpër të partive politike.

Përplasjet e fundit në mes të Kryetarit të AAK`së, Ramush Haradinaj dhe Liderit të Lëvizjes Vetëvendosje, Albin Kurti, shihen vetëm si pikënisje e një përballje të ashpër që pritet të karakterizojë muajt e ardhshëm jo vetëm në mes të këtyre dy forcave politike por edhe ndërmjet të gjitha partive që konsiderohen rivale njëra me tjetrën.

Analisti Halil Matoshi përplasjet e tilla i sheh si qëllim të krijimit të një imazhi të forcës.

Në një intervistë për lajmi.net, Matoshi ka thënë se Lëvizja Vetëvendosje është e vetmja parti që e ka një ideologji të caktuar, ndërsa partive tjera, sipas tij, kjo gjë u mungon.

“Natyrisht se tani para zgjedhjeve nacionale që sigurisht do të jenë sivjet, partitë politike për të krijuar një imazh të forcës së tyre përplasen me rivalët e tyre”.

“Sa i përket Vetëvendosjes dhe partisë së Ramush Haradinaj kjo ka ndodhur në mënyrë goxha të ashpër edhe gjatë zgjedhjeve lokale, ku praktikisht z. Kurti ka bërë më dije se ai do të qeverisë me vendin dhe se do t`i hapë arkivat e korrupsionit dhe të gjitha të këqijat që kanë ndodhur gjatë qeverisjes, sidomos në ato Komuna ku partia e Haradinajt ka qenë në pushtet”.

“Kështu që, në këtë kontekst, mendoj se partia e z. Kurti, Lëvizja Vetëvendosje, e ka një diskurs goxha negativ ndaj të gjitha subjekteve politike, jo vetëm ndaj AAK’së.”

“Ç’është e vërteta, Lëvizja Vetëvendosje është e vetmja që e ka një diskurs goxha të fortë retorik dhe ka një ideologji të caktuar, gjë që partitë tjera nuk e kanë, sepse janë mësuar që të qeverisin me komoditet, me një lehtësi të padurueshme”.

“Prandaj, në këtë vazhdë vijnë edhe akuzat aktuale ndaj AAK`së”.

Matoshi pret që niveli i gjuhës së ashpër të rritet edhe më shumë në prag të zgjedhjeve nacionale.

“Është e vërtetë se gjatë zgjedhjeve lokale më 3 nëntor dhe gjatë balotazhit gjuha e urrejtjes pati marrë përmasa goxha shqetësuese, sepse objektivisht tashmë 15 vjet pas çlirimit, njerëzit, qoftë nga pakënaqësia karshi pushteteve të cilat kanë qeverisur me Kosovën, qoftë edhe nga njëfarë animoziteti që është krijuar në mes tyre, mendoj se goxha shumë e kanë ashpërsuar diskursin politik, rivalitetin, dhe unë pres që edhe në zgjedhjet nacionale kjo gjuhë të shkojë duke u ashpërsuar”.

Mundësia e një koalicioni mes Vetëvendosjes dhe ndonjërës nga partitë aktuale, sipas Matoshit, është vështirë e realizueshme.

“Lëvizja Vetëvendosje do ta mbajë tashmë kursin e saj kundër të gjitha partive tjera, përpos nëse në ndërkohë krijohet ndonjë lëvizje ose parti e re me të cilën ndoshta edhe mund të ketë ndonjë lidhje ose ndonjë bashkëpunim”.

“Ndërkaq sa i përket këtyre partive kryesore të vendit LDK, AAK dhe PDK, Vetëvendosje nuk do të ndryshojë qasje ndaj tyre, sepse mendësia politike e tyre vërtet në një mënyrë ose tjetrën është dëshmuar e dëmshme për vendin”.

Aleanca për Ardhmërinë e Kosovës ka reaguar ndaj deklaratave të Liderit të VV’së Albin Kurtit, i cili ka thënë se Ramush Haradinaj nuk ka parime dhe se ai shikon vetëm se si të bëhet Kryeministër.

Por AAK ka thënë se VV po përdorë metodat e jogurt revolucionit (përdorim i demonstratave për ardhje në pushtet e aplikuar nga njerëz të Slobodan Milosevicit më 1988 në Vojvodinë), në politikat e saj.

“Lideri i VV-së, duhet të dijë se Aleanca për Ardhmërinë e Kosovës, ka parime dhe udhëhiqet nga parimet. AAK, nuk e përdorë dogmën, shpifjet e as metodat e “jogurt” revolucionit për ardhje në pushtet. Vazhdojmë t’i ofrojmë qytetarit të Kosovës opsionin tonë për Qeverisje si opsion i vetëm që vendosë Kosovën në binarë të duhur” thuhet në reagim, shkruan Express.

“Aleanca për Ardhmërinë e Kosovës, që nga krijimi i saj gjithmonë është prirë nga parimet e lirisë, interesave nacionale dhe shtetndërtimit. Në rrugëtimin e njerëzve që kanë prirë me këtë subjekt politik asnjëherë nuk ka qenë oportunizmi dhe kalkulimi me vota përcaktues i qëndrimeve politike. Për shkak të urrejtjes personale ndaj kujtdo nuk i sakrifikojmë interesat nacionale asnjëherë e as atëherë kur mund të na kushtojë me votë”, thekson AAK.

Albin Kurtit ka thënë se AAK dhe Lideri i saj po bëjnë yrysh pas secilës parti që ua mundëson ardhjen në krye të Qeverisë.

Madje, Kurti tha se AAK dhe Ramush Haradinaj s’kanë parime as ekip, por vetëm ambicie.

Gjatë vitit 2013 Kuvendi i Kosovës ka mbajtur gjithsej 54 seanca, prej të cilave 41 ishin seanca të punës, ndërsa ka miratuar 61 ligje. Kishte vetëm 3 interpelanca dhe 18 debate parlamentare. Sidoqoftë, kjo punë, nuk është e mjaftueshme për institucionin më të lartë të vendit. Vetë ligjvënësit thonë se përveç në nxjerrjen e ligjeve, Kuvendi në funksionet tjera, siç është kontrolli parlamentar i Qeverisë dhe mbikëqyrja e zbatimit të ligjeve, nuk ka qenë në nivelin e duhur gjatë vitit 2013.

Një vit jo shumë për t’u lëvduar ishte viti 2013 për Kuvendin e Republikës së Kosovës. Këtë e thonë edhe vetë përfaqësuesit e institucionit më të lartë në vend, të cilët madje këtë legjislaturë e vlerësojnë si më të dobëtën në historinë e Kuvendit të Kosovës që nga paslufta. Deputeti i PDK-së Arsim Bajrami pret që pas reformës zgjedhore të ketë një legjislaturë më të mirë.

“Mendoj se kjo legjislaturë ka vazhduar të jetë një prej legjislaturave me performancë apo me imazh më të dobët nga periudha e pasluftës. dhe unë pres që viti i ardhshëm të përmbyll pak a shumë këtë legjislaturë dhe pres që të bëhet reforma zgjedhore e cila do të ndikojë shumë në ngritjen e performancës së Kuvendit dhe ngritjen e besimit tek qytetarët për punën e Kuvendit”, tha Bajrami, transmeton RTK.

Ndaj shumicës parlamentare kritika ka deputeti opozitar nga Lëvizja Vetëvendosje, Rexhep Selimi, duke thënë se nuk e ka përfaqësuar vullnetin e qytetarëve.

“Mazhoranca nuk e ka përfaqësuar këtë vullnet, përkundrazi ka shkuar në kundërvajtje të këtij vullneti sidomos në çështjet më të ndejshme dhe më jetike për qytetarët e Kosovës, pra saktësisht kur bëhet fjalë për bisedimet me Serbinë.

Ndërsa deputeti i LDK-së, Sadri Ferati dëshiron më shumë pavarësi të deputetëve nga ndikimi i grupit parlamentar.

“Unë mendoj se ka pasur përkushtim dhe ka pasur momente të mira në Kuvend, por ajo çka do ta kisha dëshiruar që gjatë debateve për pika përmbajtësore mundësisht do të dëshiroja që deputetët të jenë më të lirë nga ndikimet e grupeve parlamentare për të reflektuar edhe mendimet për çështje të caktuara, sidomos nëpër komisione.

Sidoqoftë, duke pasur parasysh faktin se 2013-a ishte vit zgjedhor, Kuvendi i Kosovës, nga deputetët vlerësohet se ka arritur t’i nxjerrë një sërë ligjesh të nevojshme, mes të cilëve vlerësohet kompletimi i pakos kundër korrupsionit dhe strategjisë kundër korrupsionit dhe kompletimi i legjislacionit që ka të bëjë me reformën e sistemit gjyqësor.

Kryeministri kosovar, Hashim Thaçi pas ngërçit ndërpartiak të reformës zgjedhore në vend, që ai e quan të panevojshëm, me qëllim të daljes nga kjo situatë mendon se është e nevojshme të thirret në ndihmë Komisionin e Venedikut

“Ky sistem duhet t’ju përshtatet kushteve dhe rrethanave në Kosovë. Komisioni i Venedikut ka pasur një rol të rëndësishëm në të gjitha vendet e Evropës Juglindore gjatë procesit të tranzicionit demokratik. Prandaj, Kosova si shtet i ri me demokraci në zhvillim për Komisionin e Venedikut!”, arsyeton Kryeministri Thaçi përmes rrjetit social Facebook./PrizrenPress.com/

Fillimi i vitit 2014, solli  një lajm të mirë dhe pak më ndryshe se herave të tjera për Prizrenin. Në listën e vendeve më të mrekullueshme të botës të shpallur nga MSN-i për vitin 2013, qyteti i Prizrenit gjendet në vendin e 9-të ndër vendet më të bukura në botë.

“Lumi Lumbardhi rrjedh nën urën 500-vjeçare të gurit në qytetin e Prizrenit në Kosovë”, kështu e përshkruan MSN, qytetin e Prizrenit.

Organizata Joqeveritare “Ec Ma Ndryshe”, vlerëson lartë rënditjen e qytetit të Prizrenit nga MSN, në mesin e qyteteve më të mira në botë.
Elmmedina Baxhaku thotë se hyrja e qytetit të Prizrenit, në mesin e vendeve më të mira në botë,ishte një lajm i mirë jo vetëm për qytetarët e këtij qyteti, por për gjithë Kosovën.

“Ishte një lajm i mirë për të gjithë”.

Baxhaku thotë se sfida kryesore e vitit 2014, për të gjitha institucionet lokale dhe qendërore mbetet ruajtja e trashëgimisë kulturore të Prizrenit.

”Institucionet lokale, por edhe ato qendrore duhet të angazhohen që trashigimia kulturore e Prizrenit të ruhet dhe të mos lejohet të degradohet”.
Sipas saj, fatkeqësisht shumë objekte të trashigimisë kulturore për shkak moskujdesit të institucioneve janë shkatërruar.

“Organizata ‘EC MA Ndryshe’ gjatë vitit të kaluar ka mbledhur nënshkrimet e qytetarëve kundër degradimit të qytetit. Ky peticion shumë shpejt do t’i dorëzohet kryetarit të Komunës së Prizrenit”.

Ajo premton se “Ec Ma Ndryshe” edhe gjatë këtij viti, do të angazhohen për të mbrojtur vlerat të cilat qytetin e Prizrenit e kanë rënditur në mesin e vendeve më të mira në botë./PrizrenPress.com/