Drejtori i Kompanisë së Ujësjellësit “Hidroregjioni- Jugor” në Prizren,Besim Baraliu, ka vlerësuar se sulmi ndaj punëtorëve të kësaj ndërmarrje që ka ndodhur dje në lagjen “Kurillë”, ka qenë një turp për qytetin e Prizrenit.“Incidenti i mbrëmshëm ka qenë sulm në institucionet dhe në punëtorët e kompanisë”.Sipas tij, punëtorët janë sulmuar në detyrë nga konsumatorët të cilët I kanë shumë borxhe.

Baraliu mohoi edhe akuzat e banorëve të lagjes “Kurilla” se punëtorët e kompanisë kanë qenë shkaktar të incidentit.. “ Nga përleshja ka pësuar më së shumti një punëtor i cili është goditur me thikë”

Baraliu tregoi se 1200 konsumatorë të kësaj lagje “Hidroregjionit- Jugor” i kanë borxh rreth 566 mijë euro./PrizrenPress.com/

Përfaqësuesit e tri partive opozitare janë shprehur të pakënaqur me dinamikën e diplomacisë së Kosovës dhe numrin e njohjeve të arritura gjatë këtij viti.

Ata e kanë vlerësuar të pamjaftueshëm numrin e njohjeve në këtë periudhë, duke thënë se ende është e paqartë nëse shtetin e Kosovës në vitin 2013 e kanë njohur gjashtë apo tetë shtete.

Anëtari i Komisionit Parlamentar për Punë të Jashtme nga Lidhja Demokratike e Kosovës (LDK), Skënder Hyseni, të hënën është shprehur i pakënaqur me numrin e njohjeve të arritura gjatë vitit 2013. Në këtë kontekst, ai ka thënë se ka një paqartësi nëse Kosovën gjatë këtij viti e kanë njohur tetë apo gjashtë shtete. “Natyrisht se nuk jam i kënaqur sepse nuk mund të jemi të kënaqur me numrin e njohjeve përderisa Kosova nuk e siguron një masë të rëndësishme, 2/3 e vendeve anëtare të OKB-së. Por, jam i vetëdijshëm se procesi i njohjeve nuk është i lehtë dhe për këtë mund të kem mirëkuptim për të gjithë ata që janë të kyçur në këtë proces. Mirëpo s’kam mirëkuptim për përfaqësuesit e MPJ-së që nuk janë në gjendje ta thonë saktë numrin e njohjeve. Sa shtete e kanë njohur Kosovën: 102, 104 apo 106. Janë 8 njohje këtë vit apo janë 6 njohje? Në këtë drejtim ka një mjegulli dhe paqartësi, e cila është krejtësisht e panevojshme”, ka thënë Hyseni për “Epokën e re”.

Ai është shprehur se numrin e saktë të njohjeve nuk e di as ministri i Punëve të Jashtme, Enver Hoxhaj. “Thuhet se janë 8 njohje që kanë ndodhur brenda këtij viti, por disa nga këto njohje janë ende pezull, pra të pakonfirmuara. Kështu që, numrin e saktë të njohjeve nuk po e di askush. Fatkeqësisht, nuk po e di as ministri i Punëve të Jashtme, Enver Hoxhaj, nuk e di as uebsajti i MPJ-së. Kështu që, është për keqardhje kjo mungesë e transparencës dhe e seriozitetit, sepse është absurde që MPJ të mos jetë në gjendje ta thotë troç dhe qartë numrin e saktë të njohjeve”, ka deklaruar Hyseni
.
Ndërsa anëtarja tjetër e Komisionit për Punë të Jashtme nga radhët e Aleancës për Ardhmërinë e Kosovës (AAK), Donika Kadaj-Bujupi, e ka kritikuar punën e diplomacisë së Kosovës, duke thënë se ka pasur mundësi të bëhet më shumë. “Pjesërisht jemi të kënaqur. Po sikur të kishte angazhim më profesional mund të bëhej shumë më shumë sikur. Konsiderojmë se sikur të kishte koordinim më të madh ndërmjet Qeverisë dhe institucioneve të tjera rezultatet do të ishin më të mëdha”, ka thënë Kadaj-Bujupi për “Epokën e re”. Në këtë kontekst, ajo ka thënë se viti 2013 është përshkuar me mungesë të koordinimit ndërmjet njerëzve të përfshirë në politikën e jashtme të Kosovës. “Ajo çka kemi parë në këtë vit ka qenë një mungesë e koordinimit të veprimeve, një mungesë e një agjende të përbashkët ndërinstitucionale me qëllim të harmonizimit të veprimeve të individëve, të cilët shumë shpesh, duke pasur vullnet të mirë, kanë shkaktuar dëm në proceset lobuese”, ka deklaruar Kadaj-Bujupi.

Kurse zyrtari i Lëvizjes Vetëvendosje (VV), Erzen Vraniqi, ka thënë se numri i njohjeve të arritura gjatë kësaj periudhe është i pamjaftueshëm për shtetin e Kosovës. “Numri i njohjeve nuk është i mjaftueshëm, mirëpo është vështirë të priten njohje më shumë derisa kreu i Qeverisë bën negociata gjatë tërë vitit me Serbinë në Bruksel dhe bën koncesione në dëm të sovranitetit të vendit. Pavarësia duhet të dëshmohet edhe në politikën e brendshme, në ushtrimin e sovranitetit të plotë e jo vetëm me hapje të përfaqësive diplomatike”, ka thënë Vraniqi për “Epokën e re”.

Një ditë më herët, në një intervistë për “Epokën e re”, ministri i Punëve të Jashtme, Enver Hoxhaj, ka thënë se 2013 ishte i suksesshëm për Republikën e Kosovës për sa i përket politikës së jashtme. “Mendoj se ka qenë një vit i suksesshëm për Kosovën sa i takon politikës së jashtme. Nëse e kemi parasysh procesin e forcimit ndërkombëtar të Kosovës nëpërmjet njohjeve, e dini se në javën e parë të janarit kam qëndruar në Egjipt dhe Libi, vende të cilat kanë njohur Republikën e Kosovës. Gjatë këtij viti kemi pasur njohje të tjera, është njohja e Tajlandës, e cila ka një peshë të madhe në Azinë Juglindore. Përveç njohjeve, kemi pasur suksese konkrete sa i takon angazhimit tonë në organizata të ndryshme rajonale dhe evropiane. Jemi anëtarësuar në Këshillin për Bashkëpunim Rajonal në Sarajevë, që është një organizatë e fuqishme në Evropën Juglindore, si dhe jemi anëtarësuar në Bankën Zhvillimore të Këshillit të Evropës”, ka thënë Hoxhaj.

Njohësit e proceseve zgjedhore e shohin me shqetësim faktin që për të arritur një pajtueshmëri për reformën zgjedhore, duhet të ndërhyjnë institucionet ndërkombëtare që janë në Kosovë për t’i ulur në tavolinë liderët politikë të Kosovës.

Kritika për këtë qasje të liderëve politikë, ka njohësi i proceseve zgjedhore Adnan Merovci.

“Ajo që nuk po më pëlqen është që domosdoshmërisht po duhet të huajt të ndërhyjnë edhe për takime konsultative. Unë mendoj që takime të tilla do duhej të thirreshin nga presidenti, për të mos thënë nga kryeministri”, tha Merovci për Radio Kosovën.

Një ditë më parë, liderët politikë patën një takim në ambasadën e Mbretërisë së Bashkuar në Prishtinë, ku u dakorduan për disa pika të reformës zgjedhore. Për Driton Selmanajn nga KDI-ja, kjo ka të bëjë pak me reformën zgjedhore për të cilën edhe Kuvendi ka nxjerrë rezolutë në vitin 2011.

“Deri tash kjo qasje e subjekteve politike nuk flet për një reformë, flet për një plotësim ndryshim të legjislacionit aktual, assesi për një reformë të mirëfilltë që ne mendojmë se është e nevojshme dhe e domosdoshme për këtë fazë nëpër të cilën po kalon Kosova”, tha ai.

Fakti që Kosova të mbetet edhe më tutje me një zonë zgjedhore, për njohësin e zgjedhjeve, Adnan Merovci, nuk është për t’u kritikuar.

“I ka të mirat e veta ndarja e zonave, por për mënyrën se si jemi aktualisht me një zonë zgjedhore, edhe për një palë zgjedhje do të ishte kaluese”, tha Merovci.

Edhe Driton Selmanajt nga Instituti Demokratik i Kosovës, nuk i pëlqen qasja e subjekteve politike në Kosovë karshi reformës zgjedhore. Ai thotë se është shqetësues fakti që duhet dikush nga ndërkombëtare t’i mbledh liderët politikë dhe t’ua tregojë obligimet kushtetuese.

“Domethënë lidershipi ynë pret që dikush nga jashtë të vijë dhe të na tregojë që e kemi lënë në gjysmë një punë që e kemi filluar në prill të vitit 2011. E kjo për neve është shqetësuese”, tha Selmanaj për Radio Kosovën.

Ndryshe, në takimin e fundit të liderëve në Ambasadën britanike në Prishtinë, u arrit pajtueshmëria që Kosova të mbetet një zonë zgjedhore, pragu për koalicione të jetë 7.5 për qind, për partitë politike 5 dhe për kandidatët e pavarur 2.5. Subjektet politike janë dakorduar që fushata të zgjazë 14 ditë. Ndërsa çështje ende të hapura mbeten eliminimi i votave me kusht, e drejta për të pasur dy pozita, në legjistativ ose ekzekutiv, përbërja e KQZ-së si dhe çështja e ulëseve të rezervuara për një apo dy mandatet e ardhshme, për të cilat duhen ndryshime kushtetuese.

Sipas politikanëve dhe njohëse të integrimeve evropiane, është i arsyeshëm skepticizmi në mesin e qytetarëve të Kosovës se as në vitin 2014 ata nuk do të lëvizin lirshëm nëpër vendet e Bashkimit Evropian (BE). Ata kanë theksuar për Telegrafin se mungesa e vullnetit politik ka ndikuar që këtij procesi të mos i dihet fundi.

Deputetja e Kuvendit të Kosovës nga radhët e Lidhjes Demokratike të Kosovës (LDK), Vjosa Osmani, theksoi se ka shumë arsye se pse qytetarët janë skeptikë. Sipas saj, për dështimin e Qeverisë së Kosovës në procesin e liberalizimit të vizave, nuk dihet deri kur qytetarët e Kosovës do të mbesin të “getoizuar” në mesin e Evropës.

“Është dëshmuar se pa vullnet politik nuk të plotësohen as parakushtet teknike që kërkohen për liberalizimin e vizave”, tha Osmani për Telegrafin.

Njohësi i integrimeve evropiane, Shenoll Muharremi, theksoi se gabimi kryesor që kanë bërë institucionet e Kosovës rreth liberalizimit të vizave, ka qenë vendosja e afateve artificiale se kur do të përfundojë ky proces.

Sipas tij, kjo ka ndikuar në shpërqendrimin ndaj fokusit për zbatimin e kushteve dhe reformave që janë përcaktuar nga udhërrëfyesi për liberalizimin e vizave.

“Premtimet e Qeverisë kanë ndikuar që të rriten pritjet e qytetarëve që liberalizimi të ndodh shpejt, ndërsa mosrealizimi i këtyre premtimeve dhe shtyrja e vazhdueshme e afateve ka krijuar pakënaqësi të mëdha tek kosovarët”, ka theksuar ai për Telegrafin.

Muharremi sqaron se Kosova ka filluar dialogun për liberalizimin e vizave me BE-në para 23 muajsh. Sipas tij, nuk është bërë mjaft në këtë drejtim.

“Moldavia p.sh. i ka plotësuar kushtet e vëna nga BE-ja dhe në ditët në vijim qytetarët e këtij shteti do të lëvizin lirshëm nëpër vendet e BE-së. Viti 2014 asnjëherë nuk ka qenë vit i garantuar që Kosova do të hyjë në listë të bardhë. Nëse gjërat ecin si duhet, semestri i parë evropian i vitit 2015 mund të jetë koha kur do të bëhet liberalizimi i vizave për Kosovën. Por, kjo nuk do të thotë që BE-ja nuk mundet të vendosë që kosovarët të lëvizin lirshëm në fund të vitit 2014”, ka shtuar ai.

Integrimi i qëndrueshëm i personave të riatdhesuar, lëshimi i dokumenteve të gjendjes civile me kod të sigurisë, lidhja elektronike e databazës së Agjencisë së Regjistrimit Civil me databazën e Ministrisë së Punëve të Brendshme, si dhe trajnimi i Policisë Kufitare, janë disa nga rekomandimet e Misionit faktmbledhës të Komisionit Evropian për institucionet e vendit, për përmbushjen e kritereve të dala nga udhërrëfyesi për liberalizim të vizave.