Organizata Joqeveritare “Ec Ma ndryshe”, ka filluar sot aktivitetin sensibilizues për largimin e veturave nga trotuaret para shkollave në qytetin e Prizrenit.

Zyrtarja Fjolla Gashi, tha se ky aktivitet është rezultat i bashkëpunimit me shumë grupe të qytetarëve që kontaktohen nga OJQ “Ec Ma ndryshe”.“Përmes shpërndarjes së fletushkave po mundohemi që së pari të ngrisim vetëdijen e qytetarëve për këtë problem”.

“Kërkesa për zhbllokimin e trotuareve,do t’i dorëzohet edhe institucioneve përkatëse komunale”,tha ajo,transmeton TV Prizreni

Gashi shprehu besimin se një gjë e tillë do të përkrahet nga pushteti lokal i Prizrenit. Sipas saj, përmbyllja e aktivitetit do të bëhet përmes përpilimit të një kërkese bashkërisht me të rinjtë, e cila do të dërgohet tek drejtoritë komunale për marrjen e masave gjithëpërfshirëse në ndalimin e kësaj dukurie.

Ndërsa, qytetarët e mirëpresin këtë aktivitet. Ata thonë se ky aktivitet duhet të mbështetet edhe nga institucionet lokale.

Aktiviteti është duke u zhvilluar në kuadër të projektit “Qyteti gjithëpërfshirës– Planifikim me pjesëmarrje për zhvillim të qëndrueshëm urban në Prizren”, ku të rinjtë dhe nxënësit e shkollave të mesme shprehën gatishmërinë për të bashkëpunuar lidhur me zhbllokimin e trotuareve nga automjetet gjegjësisht nga vozitësit e pandërgjegjshëm.

Ky aktivitet do të vijojë me shpërndarjen e fletushkave vetëdijesuese nëpër makina, institucione komunale, polici, prokurori, shkolla të mesme dhe fillor./PrizrenPress.com/

Drejtori i Urbanizmit të Prizrenit, Sadik Paçarizi ka dëshmuar sot në seancën gjyqësore të “Rastit Muja”. Ai ka thënë se toka për ndërtimin e Fabrikës së Çokollatës “Kamila” dhe shkollës “ Mehmet Akif”, është dhënë për shfrytëzim për të rritur punësimin në Prizren.

“ Me këto vendime jemi munduar që ta zbutim papunësinë ,pasi që tek Fabrika e Çokolatës janë punësuar 100 persona”.

Kryetari i Prizrenit, Ramadan Muja dhe gjashtë drejtorë të tij, akuzohen për shpërdorim të detyrës zyrtare.

Paçarizi ka mohuar se me këto vendime është bërë shpërdorimi i detyrës. Ai tha se vendimi për dhënjën në shfrytëzim të tokës për Fabrikën e Çokollatës nuk është votuar në Asamblenë Komunale për shkak se nuk kanë dëshiruar që investitori të ikë nga Prizreni.

Procesi gjyqësor ndaj kryetarit të Prizrenit, Ramadan Muja dhe pesë bashkëpunëtorëve të tij, sipas avokatit mbrojtës të Mujës, Ruzhdi Berisha, pritet të përfundojë në këtë fundvit.

“Kjo është edhe dëshirë e kryetarit të trupit gjykues i cili nga sot do të intensifikojë seancat”./PrizrenPress.com/

Kryetari i Komunës së Klinës, Sokol Bashota ka thënë se po e pret reagimin e Kryetarit të PDK’së në lidhje me kërkesën e tij publike për t’i përjashtuar nga partia Fatmir Limajn e Jakup Krasniqin.

Ai ka thënë se pret edhe nga Kryesia e PDK’së dhe udhëheqja që t’ua tregojnë derën zyrtarëve të saj që punuar kundër PDK’së dhe ndikuan në humbjen e disa komunave.

“Duhet të ndahet shapi prej sheqerit. Ata të cilët nuk e dëshirojnë PDK’në nuk kemi nevojë t’i mbajmë me zor”, thotë Bashota, në një intervistë për Gazetën Express.

“Duhet të mblidhet Kryesia dhe me marrë një vendim dhe me u pozicionu karshi tyre”, ka shtuar ai.

Bashota një ditë më herët doli me një letër publike drejtuar Hashim Thaçit nga i cili kërkojë të merren masa ndaj Limajt e Krasniqit, të cilët dolën hapur kundër PDK’së në zgjedhjet lokale.

Limaj e Krasniqi kanë ndikuar në disa komuna që PDK përfundimisht të largohet nga pushteti. Direkt kanë ndikuar në Malishevë, ndërsa kanë përkrahur kundërshtarët e PDK’së edhe në Lipjan, Suharekë dhe qytete të tjera.

Pas gjithë këtyre veprimeve të Limjat e Krasniqit, sipas Bashotës, thirrje e Kuçit për kthimin e Limajt e Krasniqit në PDK ishte veprim diletant.

“Ajo thirrje për mendimin tim është një diletantizëm politik. Nuk bëhet thirrje edhe më tutje, kur nuk ka asnjë dritë në fund të tunelit për kthimin e tyre në PDK, pavarësisht dëshirave apo ambicieve të tyre në të ardhmen në raport me PDK’në”, ka thënë ai.

Bashota pret reagim të PDK’së ndaj të gjithë atyre që punuan kundër kolegëve partiak dhe jo nënshtrim ndaj tyre.

“PDK’ja është fituese e këtyre zgjedhjeve. Qëndron ende me më shumë votues si total. Puna e tyre ka reflektuar në disa komuna që ato sot mos t’i kemi. Unë mendoj se nuk janë vetëm këta të dy por ka edhe të tjerë me të cilët do të merremi më vonë. Mirëpo, duhet të theksojmë se ka edhe të tjerë që ndikuan në këtë rezultat”.

Bashota ka thënë se Limaj dhe Krasniqi edhe nëse dëshirojnë të kthehen në PDK s’duhet pranuar për shkak të dëmit që i kanë shkaktuar Partisë së Thaçit.

“Realisht, unë jam për të mos i pranuar më në PDK si rezultat i dëmit që ata i kanë bërë partisë. Për t’i fituar zgjedhjet e ardhshme nacionale nuk humbim asgjë nëse i tregojmë se njerëzit që janë destruktivë në parti nuk e kanë vendin në PDK”, ka shtuar ai.

Ministria e Punëve të Brendshme ka reaguar ndaj aktakuzës së ngritur nga një prokuror i EULEX’it kundër 11 pjesëtarëve të Njësisë Speciale të Policisë së Kosovës.

Në këtë reagim, MPB thotë se është njoftuar përmes medieve për ngritjen e kësaj aktakuze e cila lidhet me sjelljen e Policisë ndaj disa serbëve në janar të këtij viti.

MPB thotë se EULEX nuk a përfillur punën e Inspektoratit Policor të Kosovës, institucion i mandatar për të hetuar sjelljet e pjesëtarëve të Policisë së Kosovës.

“Pa dashur të interferohet në punën dhe pavarësinë e institucioneve të gjyqësorit, Ministria e Punëve të Brendshme vlerëson se përgjegjësia në rastin në fjalë është individuale në rast së ka fakte, por assesi përgjegjësia nuk mund t’i atribuohet tërë grupit që ka qenë në detyrë”.

“Pa vënë në pikëpyetje ekspertizën dhe profesionalizmin e hetuesve të EULEX’it, Ministria e Punëve të Brendshme vlerëson se mosbesimi i treguar ndaj Inspektoratit të Policisë së Kosovës dhe marrja e rastit nga EULEX-i, pa përfillur IPK-në si institucion i mandatuar për të hetuar të gjitha rastet ku dyshohet se pjesëtarët e PK-së janë të përfshirë në vepra penale, ka zbehur kredibilitetin e gjithë-përfshirjes institucionale të të gjithë mekanizmave të thirrur për hetimin e rasteve në situata të tilla si kjo e fundit”.

“Ministria e Punëve të Brendshme vlerëson se drejtësia duhet të jetë e pavarur, e paanshme dhe profesionale, dhe të mos ndikohet nga askush”.

“Ministria e Punëve të Brendshme si institucion përgjegjës për zbatim të ligjit mbështet përpjekjet e misionit të EULEX-it për të mbështetur në forcimin e rendit dhe ligjit në Kosovë, por në të njëjtën kohë do të kujdeset për ruajtjen e imazhit të Policisë së Kosovës si institucion me besimin më të lartë të qytetarëve të Kosovës dhe sidomos do të kujdeset për ngritjen dhe avancimin e mëtutjeshëm të Njësisë Special Operative si njësia me vitale në Policinë e Kosovës e cila ka dëshmuar profesionalizmin e saj përgjatë këtyre viteve duke menaxhuar shume situata sfiduese në mbrojtje të rendit dhe ligjit”, thuhet në reagim.

Ish-sekretari i Partisë Demokratike dhe Kosovës (PDK), Jakup Krasniqi nuk ka dashur t’i komentojë kërkesat e disa zyrtarëve të kësaj partie për përjashtimin e tij dhe të Fatmir Limajt nga PDK-ja.

“Nuk dua të merrem me kërkesa të tilla. Mendoj se demokracia është një sistem tjetër dhe secili njeri ka të drejtë ta ketë mendimin tij politik”, ka thënë Krasniqi, pas përfundimit të tryezës se mbajtur në Kuvendin e Kosovës me rastin e 70-vjetorit të Konferencës së Bujanit, citon Epoka e re.

Krasniqi nuk ka pohuar e as nuk e ka mohuar ndarjen e rrugëve me PDK-në. “Unë e kam thënë mendimin tim. Unë jam shumë i qartë, kush është i paqartë është punë tjetër”, ka deklaruar Krasniqi.

Sot, rreth orës 12:20 ekipet e ekspertëve nga Departamenti i Mjekësisë Ligjore dhe i atyre të EULEX-it, pas gërmimeve të bëra në lokacion ku dyshohet që mund të ketë trupa të viktimave të vrarë, në Rashkë të Serbisë, kanë gjetur rroba dhe eshtra të viktimave të vrarë nga lufta e fundit në Kosovë.

Udhëheqësi i eksperteve të Departamentit të Mjekësisë Ligjore, Arsim Gërxhaliu tha se pas punës së vazhdueshme të gërmimit, sot rreth orës 12:20, në afërsi të një objekti kemi gjetur eshtra dhe rroba të viktimave të vrarë nga lufta e fundit në Kosovë.

Sipas Gerxhaliut, gërmimet do të vazhdojnë ende në këtë lokacion, ndërkohë pritet që të rrëzohet edhe një objekt nën themelet e të cilit dyshohet që ka ende mbetje të trupa të viktimave.