Florin Krasniqi për herë të parë reflektoi publikisht pas epilogut të zgjedhjeve lokale të 3 nëntorit. Deputeti i Vetëvendosjes si mysafir në Info Magazine të Klan Kosovës nuk u shfaq i kënaqur me rezultatin që subjekti i tij politik e mori në këto zgjedhje.

“Nuk jam i kënaqur me numrin e votave”, deklaroi Krasniqi. Por kosovaro-amerikani tha se fitorja e Shpend Ahmetit në Prishtinë jep një shpresë të madhe për lëvizjen e Albin Kurtit. Ai nuk hezitoi t’ia atribuojë krejt meritat Ahmetit për këtë fitore të madhe.

“Shpend Ahmeti e fitoi betejën në dyluftim me Isa Mustafën. Dyluftimi ndonjëherë është mirë që në betejë të mos futen subjektet politike. Mendoj se fitorja e Shpendi i ka dhënë një sqarim gjithë relievit politik të se ardhmes”, theksoi Krasniqi, duke vlerësuar se Lëvizja Vetëvendosje duhet të fokusohet në ecurinë e saj si subjekt i qendrës së majtë.

“E ardhmja politike në Kosovë do të ndahet në dy taborre. Në qendrën e majtë e cila do të jetë Lëvizja Vetëvendosje dhe në qendrën e djathtë që është LDK-ja. Vetëm këto dy parti janë të profilizuara. Partitë tjera duhen me shku drejt zhdukjes sepse nuk ofrojnë program për qytetarët”, konstatoi Krasniqi.

Por Krasniqi me ngulm thotë se Vetëvendosje duhet të përcjell rrugën e partisë së qendrës së majtë. E për këtë tha se subjekti politik do të duhet të përballet me rreziqe.

“Partitë e qendrës së majtë rrezikohen prej elementit anarkist ose komunist. Mendoj se Vetëvendosje do të krijojë mbrojtje prej këtyre elemente. E më pas fitorja është e sigurt, sepse partitë e qendrës së majtë siç po e shohim janë në fuqi në Amerikë, në Britani e Gjermani”, përfundoi Krasniqi.

Drejtoria për Hetimin e Krimeve Ekonomike dhe Korrupsionit, ka arrestuar njëmbëdhjetë persona, me dyshimin se të njëjtit kanë kryer veprat penale “keqpërdorim i detyrës zyrtare, marrje e ryshfetit, raste të posaçme të falsifikimit të dokumenteve dhe legalizimi i përmbajtjes së pavërtetë”, njofton PK-ja.

Bazuar në hetimet policore, personat e dyshuar, gjatë periudhës kohore 2009 – 2012, me qëllim të përfitimit material, kanë pranuar shuma të ndryshme të parave (nga 4 mijë deri në 10 mijë euro) me qëllim të regjistrimit të studentëve në UP në Fakultetin e Mjekësisë, të Edukimit etj.

Policia nuk ka bërë të ditur identitetin e plotë të të arrestuarve, duke njoftuar vetëm për moshën dhe dhënë inicialet e tyre. Sipas Policisë të arrestuar janë: E. B. (1984), R. Z. (1984), K. G. (1986), A. J. (1985), L. B. (1987), A. H. (1988), G. M. (1984), M. B. (1984), A. H. (1984), K. M. (1988) dhe M. M. (1983).

Të njëjtit po gjatë kësaj periudhe, kanë përfituar shuma nga 100 deri në 500 euro, për kryerjen e provimeve nga lëndë të ndryshme mësimore, duke hyrë në provim në vend të studentëve tjerë, si dhe duke intervenuar tek profesorët për marrjen e notave kaluese.

Të gjitha veprimet dhe hetimet policore janë kryer nën autorizimin e prokurorit përkatës dhe me autorizimin e tij ndaj të dyshuarve është caktuar masa e ndalimit për 48 orë, për të vazhduar me procedurat e mëtejme hetimore, ku mund të ketë zgjerim të hetimeve edhe ndaj personave të tjerë.

Në kohën kur udhëheqësit e PDK’së po bëjnë thirrje për kthimin e Fatmir Limajt e Jakup Krasniqit në PDK, këta të dy po vazhdojnë të marrin anëtarë të PDK’së.

Burime të Express bëjnë të ditur se Limajt pritet t’i bashkohet edhe një Zëvendësministër i Qeverisë Thaçi II.

Ai është Emin Krasniqi, i cili është i pakënaqur udhëheqjen aktuale të PDK’së dhe ka mospajtime me udhëheqjen aktuale të PDK’së në Kamenicë.

Në zgjedhjet e fundit lokale, Krasniqi ishte përmendur si kandidat për Kryetar të Kamenicës, por në fund udhëheqja aktuale e PDK’së kishte vendosur ta kandidonte Begzat Sinanin.

“Krasniqi pritet të bëhet pjesë e nismës së Fatmir Limajt, i cili po e përgatit terrenin për të themeluar parti të re”, ka thënë një zyrtar PDK’së.

Burime të Express kanë bërë të ditur se edhe një asambleist i zgjedhur si kandidat i PDK’së në këtë komunë tashmë është rreshtuar me Limajn.

Express ka provuar të kontaktojë me Zëvendësministrin e Infrastrukturës Emin Krasniqi, por ai nuk është përgjigjur thirrjeve telefonike. Të kontaktuar zyrtarë e kabinetit të tij në Ministri kanë thënë se Krasniqi momentalisht nuk ndodhet në zyre.

Ndryshe, raportet e Limajt me Emin Krasniqin kanë qenë të mira prej kohës kur të dy kanë punuar në Ministrinë e Transportit dhe Post Telekomit.

Përveç Krasniqit, edhe Daut Xhemajli Zëvendësministër i Drejtësisë nuk e përkrahë PDK’në. Ai në zgjedhjet e fundit kishte dalë kundër kandidatit të PDK’së për Kryetar të Vitisë, Nexhmedin Arifi.

Kryeministri i Kosovës, Hashim Thaçi do të takohet nesër, në Bruksel me kryeministrin e Serbisë, Ivica Daçiq, në kuadër të dialogut për normalizim të marrëdhënieve në mes të dy shteteve.

“Kryeministri i Republikës së Kosovës, Hashim Thaçi, pritet që nesër të takohet në Bruksel me kryeministrin e Serbisë, Ivica Daçiq, në kuadër të procesit të dialogut dhe stabilizimit të marrëdhënieve midis shtetit të Kosovës dhe atij të Serbisë”, është thënë në një njoftim të lëshuar për medie nga Zyra për Informim e kryeministrit.

Adaptimi i ligjeve dhe nënligjeve që mund të sjell reformimin e Ligjit për zgjedhjet e përgjithshme në Kosovë, mund të ndikojë në organizimin e zgjedhjeve nacionale për vitin tjetër vlerësojnë në Institutin Demokratik të Kosovës.

Megjithë zotimin e zyrtarëve për përfundimin e reformës zgjedhore deri në fund të janarit të 2014, në zgjedhjet e ardhshme nacionale mund të jetë e vështirë të organizohen sipas ndryshimeve që sjell reforma për arsye të adaptimit të të gjitha akteve ligjore e nënligjore, vlerëson Driton Selmanaj nga Instituti Demokratik i Kosovës.

Sipas tij kjo reformë më shumë do të jetë apriori deformim i Ligjit për zgjedhje, sesa që mund të konsiderohet si reformë.

“Edhe nëse do të kemi një ndryshim aktual të ligjit për zgjedhje…, atëherë i bjen që para periudhës 6 mujore nuk është mirë që të organizohen zgjedhjet, sepse më pas do të mund të kishte edhe pasoja dhe të derivonin zgjedhje jo të rregullta dhe jo demokratike”, tha ai, transmeton RTK.

Ndërkohë që ish kryesuesi i Komisionit për Reformë Zgjedhore, Haki Demolli thotë se në esencë nuk do të ketë ndryshim të madh në Ligjin për zgjedhjet e përgjithshme. Sipas tij shkaktar i parregullsive në zgjedhjet e kaluara, kanë qenë edhe disa organizma të tjerë institucional të Kosovës.

“Nuk ka qenë ligji shkaktar i të gjitha parregullsive të zgjedhjeve të kaluara, por organizimi i tërësishëm i shoqërisë, përfshirë, KQZ-në, policinë, prokurorinë, si dhe vetë shoqërinë civile”, tha ai.

Ndryshe çështjet për të cilat duhet të arrihet pëlqimi politik, është se a do të jetë Kosova një zonë e vetme zgjedhore apo me më shumë zona, çështja e listave të hapura dhe çështja e votës preferenciale. Reforma zgjedhore mbetet edhe njëra prej kërkesave kryesore të Bashkimit Evropian

Forca e Sigurisë së Kosovës, zjarrfikësit dhe KFOR-i, janë institucionet më të besuara në Kosovë. Kjo u tha sot gjatë publikimit të edicionit të tretë të barometrit kosovarë të sigurisë publikuar nga Qendra Kosovare për Studime të Sigurisë.

Institucionet më të korruptuara sipas qytetarëve janë Qeveria, sistemi shëndetësor dhe ai gjyqësor.

Edicioni i tretë i barometrit kosovar të sigurisë ofron përmbledhje të perceptimeve publike për institucionet e sigurisë dhe drejtësisë.

Florjan Qehaja, drejtor i Qendrës Kosovare për Studime Juridike tha se për qytetarët e vendit FSK-ja, zjarrfikësit dhe KFOR-i mbeten institucionet më të besuara. Ndërkaq sa i përket Agjencisë së Inteligjencës së Kosovës qytetarët nuk kanë njohuri për punën e kësaj agjencie.

Qendra Kosovare për Studime të Sigurisë vlerëson se kërcënimi më i madh i sigurisë në vend është edhe korrupsioni. Sipas anketës, qytetarët mendojnë se qeveria është më e korruptuara, pastaj sistemi shëndetësor dhe ai gjyqësor, transmeton RK.

Sipas këtij barometri procesi i liberalizimit të vizave paraqet një ndër hapat më të rëndësishëm drejt integrimeve në BE. Derisa të anketuarit besojnë se korrupsioni paraqet sfidën kryesore për Kosovën dhe që pengon procesin e liberalizimit të vizave në Kosovë.