Dusan Janjic thotë se zgjedhjet në Veri janë bërë apostafat për të fituar serbët. Kjo nuk i duket demokraci, por mendon se bëhet për arsye sigurie. Sa për Bashkësinë e Komunave Serbe, është i sigurt se ajo do të funksionojë në përputhje me Ligjet e Kosovës.

Përsëritja e zgjedhjeve në 3 qendra votimi në Veri të Mitrovicës, përveç që do të legjitimojnë udhëheqjen e 4 komunave me shumicë serbe, do të prodhojë edhe diçka tjetër.

Rivotimi do të krijojë një asociacion komunash që u jep lidhje speciale me Serbinë, falë marrëveshjes në mes Kryeministrave Thaçi-Dacic.

E ky asociacion mund të jetë gjithçka tjetër, por jo një ‘Republika Srpska’, thotë analisti beogradas Dusan Janjic, në një intervistë për lajmi.net.

Janjic tha të shtunën për lajmi.net se përsëritja e votimeve në Veri të Mitrovicës, do të përcillet me një atmosferë të qetë, pasi që, sipas tij, për një gjë të tillë janë angazhuar të gjitha strukturat e sigurisë.

“Zgjedhjet janë përsëritur për të pasur sukses. Për këtë ka edhe një pajtim të përbashkët politik në mes të Qeverisë së Serbisë, Grupit të Quint’it, dhe prezencës ndërkombëtare në teren, por po e shoh që as Prishtina nuk ka asgjë kundër. Kur them se do të kenë sukses, kam parasysh mobilizimin e KFOR’it dhe EULEX’it për të mos lejuar pengimin dhe dhunën”.

Sipas Janjic, këto zgjedhje janë të destinuara për të nxjerrë një kryetar serb në Mitrovicën e Veriut. Kjo, thotë ai, nuk ka të bëjë aspak me një proces demokratik, përveç që premton një ambient më të qetë atje.

“Sa u përket zgjedhjeve, mendoj se ato janë bërë apostafat që të fitojnë serbët, ndoshta edhe në raundin e parë. Mund të them se kjo nuk është demokraci, por me sa duket kjo po bëhet më shumë për arsye të sigurisë, sesa në favor të një procesi fer dhe demokratik”.

“Kjo është bërë për të mos pasur ndarje, pasi që dihet se këto janë zgjedhjet e para. Edhe faktori ndërkombëtar, por edhe Prishtina e Beogradi, kanë si synim që serbët të jenë pjesë e institucioneve të Kosovës, pasi që është më mirë që të rregullohet çështja tyre në mënyrë institucionale sesa përmes rrugës, duke krijuar barrikada dhe gjëra të ngjashme”.

Gjatë një vizite të bërë në kohën e fushatës parazgjedhore në Kosovë, Kryeministri i Serbisë Ivica Dacic pati thënë se Bashkësia e Komunave Serbe do të jetë një pjesë e Serbisë brenda Kosovës. Lidhur me këtë, Janjic shpreh brengën se në rast se Serbia dëshiron që përmes kësaj bashkësie të përzihet në politikat e Prishtinës, atëherë kjo mund të dërgojë deri te krijimi i një konflikti të ri.

“Ka interpretime të zyrtarëve serbë që pas krijimit të Bashkësisë së Komunave Serbe do të ketë legalizim të institucioneve paralele serbe, dhe nëse një gjë e tillë ndodh, atëherë kjo mund të konsiderohet si dështim i bashkësisë ndërkombëtare”.

“Por, unë mendoj se kjo është një propagandë politike. Unë mendoj se ky institucion do të funksionojë në përputhje me statutin dhe ligjet e Kosovës”.

“Në rast se nuk do të funksiononte si i tillë, atëherë do të kemi një konflikt të ri, ku Bashkimi Europian do të shfrytëzonte mekanizma të tjerë që të bëjë ndryshime në politikën e Beogradit”.

Janjic është i bindur që kjo bashkësi komunash do të funksionojë në përputhje me ligjet e Kosovës dhe se nuk do të lejohet krijimi i një Republika Srpska brenda Kosovës.

“Në rast se do të ketë konflikt, atëherë do të mund që në të, të përfshihen të gjitha komunat e kësaj bashkësie, përfshirë edhe ato në qendër të Kosovës. Por, mendoj se një gjë e tillë do të mund të evitohej përmes politikës dhe jo përmes krijimit të një Republika Srpska të re”.

“Nuk ka mundësi që të krijohet një Republika Srpska në Kosovë, pasi që bashkësia ndërkombëtare është duke u munduar që të krijojë institucione të përbashkëta, e dyta se Republika Srpska ka qenë si derivat i luftës dhe dëbimit etnik, dhe arsyeja e tretë është se pjesa veriore është e përbërë me rreth 30 për qind banorë shqiptarë, por ka edhe komuna që janë 50 me 50. Pra, ndarja është absolutisht e parealizueshme”.

“Mbi të gjitha, një shtet i cili ka rreth 2 milionë banorë nuk mund ta përballojë edhe një shtet të ri brenda vetes. As komuniteti serb nuk ka kapacitet që ta përballojë formimin e një shteti të ri”.

“Është e vështirë të thuhet se si do të funksionojë kjo bashkësi komunash serbe, pasi nuk ka një statut të dalë nga bisedimet. Por, unë mendoj se kjo do të jetë një autonomi funksionale, por jo autonomi regjionale. Në këtë bashkësi, mendoj se do të ketë autonomi në aspektin e arsimit, kulturës, rregullimit të ambientit, siç është mirëmbajtja e rrugëve rajonale”, thotë Dusan Janjic.

Në shtator 2011 Kosova dhe Serbia me ndihmën e ndërmjetësit të Bashkimit Evropian Robert Cooper kishin arritur marrëveshje për kthimin rreth 3000 regjistrave kadastral në Kosovë. Marrëveshja përfshinte që pranimin dhe verifikimin e këtyre regjistrave ta bënte Agjencia Kosovare e Pronës, e cila deri tash ka trajtuar kontestet pronësore gjatë viteve të luftës 1998 dhe 1999 në Kosovë.

Gjithashtu në këtë proces një rol domethënës ishte paraparë edhe për Zyrën e Përfaqësuesit të Bashkimit Evropian në Kosovës që do të ishte pjesë e ekipit verifikues. Megjithatë dy vjet pas kjo është marrëveshja e vetme nga e cila nuk është realizuar pothuajse asgjë.

Valbona Dhomi nga Agjencia e Pronës i ka thënë Radio Kosovës se projektligji që i jep kompetencë kësaj agjencie nuk është aprovuar ende nga Kuvendi dhe si rezultat kjo agjenci nuk ka ende mandat të merret me ketë çështje.

Elementi kyç i kësaj marrëveshje, ligji për Agjencinë për Krahasim dhe Verifikim të Pronës, sipas Jeton Oruçit, koordinator i Zyrës Ligjore në Kryeministri tashmë është dërguar në Kuvend.

“Ne kemi kryer punën tonë si Qeveri. Nuk mendoj që ka ndonjë problem tani ngase ligji është në procedurë në Kuvend”, ka thënë Oruçi, transmeton RTK.

Shefi i Agjencisë Kadastrave të Kosovës, Murat Meha thotë se kthimi i regjistrave kadastral do të ndihmoj qartësimin e shumë kontesteve pronësore, sidomos abuzimeve në vitet gjatë dhe pas luftës.

“Serbia e ka për obligim të na i dorëzoj librat kadastralë. Kthimi i regjistrave kadastral është shumë i rëndësishëm sepse do të zgjidh shumë probleme. Ato ngatërresa që i kanë krijuar, kushdoqoftë që i ka krijuar ato qëllimisht, do të dalin në shesh dhe sigurisht që nuk do të mundet askush t’i mbuloj”, ka thënë Meha.

Marrëveshja për regjistrat kadatsralë është njëra nga shtatë marrëveshjet e arritura në bisedimet e ashtuquajtura teknike midis Serbisë dhe Kosovës me ndërmjetësimin e Bashkimit Evropian.

Bashkimi Demokratik i Zafir Berishës, në balotazhin e 1 dhjetorit, do të mbështes edhe në Dragash, kanidatin e LDK-së, Fatmir Mehmetin.

Koalicioni mes këtyre dy subjekteve politike do të zyrtarozohet sot ne ora 14:00 në Hotel “Tharanda” në Prizren.

“Lidhja Demokratike e Kosoves, Dega në Dragash, për balotazhin e 1 dhjetorit nënshkruan marrëveshje për bashkëqeverisje me Bashkimin Demokratik”, njofton LDK-ja. /PrizrenPress.com/