Spektrit politik të Prizrenit i shtohet edhe një iniciativë qytetare, që grumbullon rreth vetes një numër të aktivistëve që për një kohë të gjatë kanë kontribuar në degën e LDK-së në këtë komunë.

Përfaqësues të kësaj nisme kanë konfirmuar aplikimin në KQZ për zgjedhjet komunale të 3 nëntorit. “Kemi aplikuar për certifikim në KQZ me nismën qytetare “Për Prizrenin”, ka thënë Fadil Kryeziu për Kohën Ditore, njëri nga udhëheqësit e kësaj nisme. Ai nuk ka pranuar t’i identifikojë aktivistët e kësaj nisme me partinë në të cilën ka vepruar për shumë vite, por ka theksuar se bëhet fjalë për një nismë të përbërë nga qytetar të pavarur. “Jemi grup i qytetarëve të pavarur, të interesuar për pjesëmarrje në zgjedhjet komunale të 3 nëntorit, si një alternativë jashtë spektrit aktual politik të Prizrenit, ka deklaruar Kryeziu.

Kryeziu ka qenë pjesë e strukturave të degës së LDK-së për një kohë të gjatë. Përplasjet me kreun e degës, Eqrem Kryeziu, kanë bërë që ai bashkë me një grup aktivistësh të largohen nga LDK-ja dhe në prag të zgjedhjeve nacionale të rreshtohen përkrah Listës “Ibrahim Rugova”.

Fadil Maloku është një prej dy anëtarëve të KQZ-së i cili ka votuar kundër heqjes së logos së Republikës së Kosovës nga fletëvotimet e zgjedhjeve të 3 nëntorit.

“Votova kundër për shkak se në marrëveshjen e 19 prillit, e cila parasheh mbajtjen e zgjedhjeve konform ligjeve të Kosovës, heqja e logos – së bashku me temën rreth rolit të OSBE-së – është në kundërshtim të plotë me këtë marrëveshje dhe si e tillë, meqë është antiligjore, antikushtetuese dhe antishtetërore, unë nuk e kam mbështetur. Mendoj se edhe opinionet e ekspertëve ligjor janë në këtë drejtim”, ka thënë Maloku për Bota Sot.

“Vendimi për t’u hequr logoja është shkuar në mënyrë të shpejt nga një përfaqësues i komunitetit serb, në gjuhën serbokroate, i papërkthyer. Ky vendim nuk ka kaluar nëpër procedurën e këshillit për procedura, për të ardhur pastaj ad hoc. Edhe medieve dje u është bërë një tradhti, për shkak se mbledhja ishte e paraparë të mbahej në orën 11, pastaj është shtyrë në 12 dhe pas kësaj drejtues të KQZ-së kanë thënë se nuk ka mbledhje. Pastaj na kanë ftuar urgjentisht në orën 13.15. Kjo ishte një çmenduri. Kjo është pasojë e gatishmërisë së kryesueses së KQZ-së për të shkuar në Bruksel, pasojat e të cilës po i shohim sot. Është bërë një atentat në Kushtetutën dhe Ligjet e Kosovës. Por, ky nuk është vendim i gjithë KQZ-së për logon. Vendosën katër minoritete dhe dy përfaqësues të një subjekti që është në Qeveri. Unë falënderoj abstenimin e përfaqësuesit të LDK-së dhe kryesueses, që dëshmon se nëse merremi me numra, i bije që mbi 60 për qind ishim kundër vendimit, ndërsa ishin minoritetet ata që vendosën për një atentat në KQZ”.

Sot është afati i fundit kur partitë politike mund të aplikojnë për certifikim në KQZ. Derisa në PDK kanë thënë se do të aplikojnë dje, AAK dhe Vetëvendosje do të aplikojnë sot. Kurse në LDK, nuk kanë dashur të flasin për këtë çështje. Edhe pse është dita e fundit, subjektet politike ende nuk kanë bërë publik emrat e disa kandidatëve për kryetar komunash.Derisa, KQZ-ja rregullisht ka bërë thirrje që të mos e lënë aplikimin në ditën e fundit, ngase u paraqet problem, në këtë institucion deri dje kanë aplikuar 38 subjekte, prej tyre 23 iniciativa, 8 kandidatë dhe shtatë parti politike, por jo edhe partitë e mëdha.

Përveç kësaj, partitë ende nuk i kanë emrat e të gjithë kandidatëve për kryetar komunash.

Partia Demokratike e Kosovës ende nuk ka kandidatë për disa komuna të mëdha siç janë Prizreni, Gjakova, Gjilan e të tjera.

LDK ende nuk ka emrin për Prishtinën, edhe pse flitet shumë që Isa Mustafa do rikandidohet. Ndërsa AAK-ja i ka përzgjedhur kandidatët e tyre.

Sa i përket kandidatëve Vetëvendosje thotë se nuk do të kenë në Komunat e Pakos së Ahtisarit, ndërsa në të tjerat deri sot do t’i përfundojnë. Pra, ndër komunat që nuk do të aplikojnë janë edhe Juniku dhe Hani i Elezit.

Kurse sa i përket partive serbe, deri tash dihet se Partia Demokratike e Serbisë (DSS) nuk do të marrë pjesë në zgjedhjet lokale të Kosovës, të parapara për 3 nëntor me arsyetimin se këto zgjedhje janë anti-kushtetuese dhe anti-shtetërore, si dhe shuajnë institucionet shtetërore të Serbisë në Kosovë.

Partitë që duan të marrin pjesë në një komunë duhet të paguajnë 200 euro për certifikim, ndërsa ato që duan të marrin pjesë në të gjitha komunat duhet të paguajnë 2 mijë euro.

Pjesë e zgjedhjeve është thënë se nuk mund të jenë ata që kanë pasur ndonjë gjobë të çfarë do lloji më parë dhe nuk e kanë paguar atë./Kosovapress/

Kërkesa e kryeministri të Serbisë Ivica Daçiq që në fletëvotimet e zgjedhjeve të 3 nëntorit të mos jetë stema Kosovës u realizua, por tash mbetet të shihet se a do të mund ai t’i bindë serbët e veriut që të marrin pjesë në këto zgjedhje.

Largimi i stemës së Republikës së Kosovës, nga fletëvotimet për zgjedhjet lokale të 3 nëntorit nga zyrtarët e partisë në pushtet shihet si një kontribut për pjesëmarrjen në zgjedhje i të gjitha komuniteteve që jetojnë në Kosovë.

Anëtari i Komisionit Qendror të zgjedhjeve Ilir Gashi nga Partia Demokratike e Kosovës tha për Radion Evropa e Lirë, se një veprimi i tillë është marrë nga KQZ-ja në mënyrë që Kosova kësaj radhe të mbajë zgjedhjet në gjithë territorin e saj.

“Qëllimi i vetëm është që Kosova kësaj radhe të mbajë zgjedhje në tërë territorin e saj, me pjesëmarrjen e të gjithë qytetareve të të gjitha etnive dhe të dëshmojë edhe një herë se territori i Republikës së Kosovës është unik dhe i pandarë”, tha Gashi.

Lideri i Aleancës për Ardhmërinë e Kosovës, Ramush Haradinaj deri sa është shprehur optimist se serbët e veriut të Kosovës do të marrin pjesë në zgjedhjet lokale, ka deklaruar se AAK-ja mbështet vendimet e Komisionin Qendror të Zgjedhjeve.

“Fletëvotimi në dukje ka simbolet e KQZ-së që është institucion i Republikës së Kosovës ku ka edhe hartën në logon e vet. Ne i përkrahim këto vendime të KQZ-së që qojnë në drejtim të mbajtjes së zgjedhjeve në gjithë vendin”, tha Haradinaj në një konferencë për media pas një takimi që ka pasur me kryetarin e Ulqinit, Nazif Cungu.

Komisioni Qendror i Zgjedhjeve një ditë më parë vendosi që në fletëvotimet për zgjedhjet lokale të 3 nëntorit të jetë vetëm logoja e KQZ-së dhe duke larguar stemën e Republikës së Kosovës.

Përfaqësuesi i Vetëvendosjes në KQZ, Adnan Rrustemi, ka thënë se vendimi i KQZ-së për të hequr stemën e Republikës së Kosovës nga fletëvotimet është në kundërshtim me Kushtetutën dhe ligjet e Kosovës.

“Fletëvotimi do të duket plotësisht ashtu siç është kërkuar dhe propozuar nga kryeministri i Serbisë Ivica Daçiq para disa ditësh. Ne do ta verifikojmë dhe do ta vlerësojmë me profesionalizëm këtë vendim të KQZ-së. Duke qenë të sigurt se ky vendim është i paligjshëm dhe antikushtetues, do ta adresojmë shumë shpejt në instancat gjyqësore, natyrisht duke mos përjashtuar edhe Gjykatën Kushtetuese për ta kundërshtuar një vendim të tillë”, ka thënë Rrustemi për Radion Evropa e Lirë.

Nga ana tjetër, njeri nga përfaqësuesit e serbëve të veriut Marko Jakshiq tha për Radion Evropa e Lirë se heqja e simboleve shtetërore nga fletëvotimet nuk është diçka tjetër veç një mashtrim, duke pasur parasysh, siç tha ai, se zgjedhjet e lokale janë shpallur nga presidentja e Kosovës, Atifete Jahjaga, jo nga Kuvendit i Serbisë.

“Kjo nuk do të ndryshojë mendimet tona. Ne mendojmë se ky është një mashtrim. Ne e dimë se këto zgjedhje janë shpallur jo nga Kuvendi i Serbisë por nga Atifete Jahjaga. Ne, nuk jemi naivë dhe të mos kuptojmë këtë situatë. Mendoj se shumica e qytetarëve nuk do të dalin në zgjedhje”, tha Jakshiq.

Ngjashëm shprehen edhe banorët serbë të veriut të Kosovës.

Ata thonë se nuk do të marrin pjesë në zgjedhjet që i organizojnë institucionet e Kosovës.

Aleksandër Mijatoviq është njëri nga qytetarët që është kundër daljes në zgjedhjet e 3 nëntorit.

“Nuk kemi besim në Institucionet e Kosovës, por as nuk ju besojmë politikanëve serbë të cilët bëjnë thirrje për dalje në zgjedhje. Eshtë e drejta ime qytetare dhe unë si qytetar kam vendosur mos të dal në zgjedhje”, tha Aleksander Mijatoviq.

Kurse, Jellena Nikoliq shprehet:

“Nuk do të dal në zgjedhje sepse nuk i shoh si legjitime dhe legale. Në të vetmet zgjedhje që dal për të votuar janë ato që shpallen nga Serbia”, u shpreh Nikoliq.

Vendimi i KQZ-së është mirëpritur nga Ambasada e Shteteve të Bashkuara të Amerikës në Prishtinë e po ashtu edhe presidentja Atifete Jahjaga ka inkurajuar Komisionin Qendror të Zgjedhjeve që, në përputhje me mandatin e tij, të gjejë zgjidhje ligjore që respekton kushtetutshmërinë dhe ligjshmërinë e Republikës së Kosovës dhe siguron pjesëmarrje gjithëpërfshirëse në zgjedhjet komunale të 3 nëntorit.

Por, qytetarët shqiptar kanë kundërshtuar largimin e stemës nga fletëvotimet për zgjedhjet lokale të 3 nëntorit.

Halil Fetahu kritikon KQZ-në për vendimin e fundit rreth çështjes së stemës.

“Absolutisht është e padrejtë dhe me çfarë të drejte është marrë një vendim i tillë. Pse të largohen simbolet tona vetëm për hatër të Serbisë”, tha Fetahu.

Kurse, Sadik Kurteshi thotë se jo vetëm shqiptarët duhet të bëjnë kompromise, sipas tij ata që duan të inkuadrohen në jetën institucionale në Kosovës duhet të bëjnë kompromise.

“Pikëpyetje e madhe është se sa shqiptar dalin tash në votime sherri i asaj, po kushtet janë jashtë normales dhe janë të jashtëzakonshme. Një pjesë e shtetit nuk kontrollohet. Sipas zotit Ramush Haradninaj, duhet me gëlltiti, me gëlltiti po por, çka nëse ajo që e ke gëlltiti të mbetet në fyt. Për të gëlltitur duhet të gëlltitin ata jo ne”, tha Kureshi.