Këtyre muajve të verës Prizreni mund të thuhet lirshëm se është shndërruar në një qytet me kaos në trafik. Shtimi i veturave të shumta, sidomos atyre të mërgimtarëve ka bërë që rrugët përbrenda qytetit të behën të pa kalueshme. Vozitësit e automjeteve e sidomos ata të taksive thonë se kjo gjendje po u sjell bezdi, ndërsa policia zotohet për kryerjen e detyrave me përpikëri.

Shaban Mazreku punon si taksist në Prizren. Për të ditët e verës janë bërë shumë të mërzitshme, pasi që punon dhjetë orë të plota. Kolona të shumta nga automjetet presin në radhë, ndërsa kjo vërehet në masë të madhe tek unaza e qytetit. Aty ndodhet edhe Shabani i cili bënte bartjen e pasagjerëve të tij. Thotë se po e bezdis pritja këtyre ditëve kur në dritaren e tij rrezaton dielli bukur shumë.

Për ta bërë një gjiro përreth unazës së qytetit një shoferi i nevojitet hiq më pak se gjysmë ore, pasi që duhet të vozis me një shpejtësi shumë të ngadalësuar e shpesh herë madje të ndalojë veturën për të pritur në radhë. Ky kaos në komunikacion ka filluar të jetë i pranishëm që nga fillim i muajit korrik kur në Kosovë kanë ardhur mërgimtarëve për pushime. Sikurse Shabani ka edhe shumë vozitës të tjerë të cilët janë mërzit nga kjo tollovi që po i shoqëron në rrugë.

Në rrugët më frekentuese të qytetit vërehen kohë pas kohe patrulla policore të cilat përcjellin gjendjen. Ndonëse me një plan operativ të marrë për sezonin veror policia thotë se nuk mund t’i eliminojë tollovitë pasi që shumica e rrugëve të Prizrenit janë të ngushta.

Zëdhënësi Hazir Berisha i tha Radio Kosovës se është angazhuar i tërë personeli, përderisa u zotua në kryerjen e detyrave.

Drejtuesit e automjeteve shpresojnë që gjendja në komunikacionin e Prizrenit të përmirësohet në këtë fund muaj pas largimit të mërgimtarëve, ndërkohë policia bën apel tek shoferët që t”i respektojnë rregullat në komunikacion dhe të bashkëpunojnë me organet e rendit në mënyrë që t’u iket aksidenteve.

Në pikë-kalimet kufitare të Kosovës – Shqipëri, vazhdojnë të krijohen kolona të gjata të veturave.

Në pikën kufitare sot në orët e para të mëngjesit ka pasur kolona deri në 1 kilometër.

Kjo po ndodh për shkak të fluksit të madh të bashkatdhetarëve të cilët po kthehen nga pushimet të cilat i kanë kaluar në Kosovë, por edhe nga pushuesit që ja kishin mësyrë bregdetit shqiptar,transmeton KosovaPress.

Kolona të gjata ka pasur edhe në pikat kufitare me Serbinë, por në këto pika nuk janë pranuar dokumentet e Kosovës, duke ua kërkuar vetëm certifikatën e lindjes, madje duke mos ua pranuar as ekstraktin e lindjes.

Nëntëmbëdhjetë pjesëtarë të Policisë së Kosovës dyshohet me bazë se gjatë këtij viti kanë marrë ryshfet nga qytetarët. Nëntë prej tyre po përballen me drejtësinë, përderisa dhjetë të tjerë ende po hetohen nga Inspektorati Policor i Kosovës (IPK). Arbër Beka, zëdhënës në IPK, ka thënë për “IP Magazinë” se, sa i përket veprës penale “marrje e ryshfetit”, në total janë raportuar në këtë gjashtëmujor 19 raste, prej tyre dhjetë janë akoma në proces në Departamentin e Hetimeve të Inspektoratit Policor të Kosovës, për pesë raste është ushtruar kallëzim penal në prokuroritë kompetente, kurse katër raste të tjera janë dorëzuar në prokurori me raport të veçantë.

“Inspektorati Policor i Kosovës ka për qëllim parësor, t’a ndihmojë Policinë e Kosovës që t’a përmbush misionin e saj ligjor, në harmoni me ligjet në fuqi dhe standardet e kërkuara, dhe t’ju ofrojë qytetarëve një polici të përgjegjshme, profesionale dhe efektive. Lufta kundër korrupsionit në radhët e policisë do të jetë prioriteti ynë i përhershëm dhe kryesor duke u kujdesur që askush në Policinë e Kosovës të mos jetë imun ndaj shkeljeve të mundshme ligjore”, ka deklaruar Beka.

IPK falënderon të gjithë qytetarët për bashkëpunimin e mirëfilltë dhe kontributin e tyre në luftimin e përbashkët të dukurive negative duke ndikuar në këtë mënyrë në ngritjen e nivelit të përformances tek policia e vendit.
Punë për IPK-në

Sipas Bekës, sukseset e treguara nga IPK-ja në luftimin e korrupsionit janë si rezultat edhe i përgatitjes profesionale edhe nge trajnimet e shumta që janë organizuar për zyrtarët e IPK-së nga ICITAP-i amerikan, e të cilat trajnime kanë qenë shumë përmbajtjesore dhe specifike për punën dhe detyrat dhe përgjegjësitë që ka personeli operativ i IPK-së (hetuesit dhe inspektorët) për të arritur rezultate sa më efektive në zbatimin e mandateve të tyre ligjore në ballafaqim me elementet kriminale dhe destruktive të cilat mund të infektojnë shërbimin e policisë ndaj qytetarëve të vendit.

IPK-ja fton të gjithë qytetarët e Republikës së Kosovës që mund të kenë informacione lidhur me rastet me elemente korruptive ku dyshohet të jenë përfshirë zyrtarët e Policisë së Kosovës t’i denoncojnë sa më parë ato.
Në anën tjetër, zyrtarë të policisë nga zyra për Marrëdhënie me Publikun, thonë se, rastet e marrjes së ryshfetit nga policët janë në rënie e sipër.
“Në gjashtëmujorin e parë të këtij viti janë regjistruar nëntë raste të marrjes së ryshfetit, përderisa në periudhën e njëjtë të vitit të kaluar (2012) janë shënuar 24 raste të tilla”, thuhet në përgjigjen e zyrës për informim në Polici.
Kurse raste të raportuara për dhënie të ryshfetit në gjashtëmujorin e parë të këtij viti janë raportuar 15 raste, kurse në periudhën e njëjtë të vitit të kaluar ka pasur 29 raste.

Policët arrestohen si të dyshuar

Sipas policisë, kryesisht rastet e tilla janë me kryes të njohur që do të thotë ata arrestohen si të dyshuar për ketë vepër penale.

“Raportet e PK-së dhe IPK-së janë të përcaktuara me ligjin e Policisë dhe ligjin e Inspektoratit dhe bashkëpunimi është në nivel të duhur për parandalimin dhe luftimin e kësaj dukurie”, thonë zyrtarët policor.

Eksperti i çështjeve të sigurisë, Avni Islami, në një prononcim për “IP Magazinë” ka thënë se, çështja e ryshfetit në Policinë e Kosovës nuk është e pa njohur për publikun.

“Tashmë ka shumë raste që janë lajmëruar e shumë të tjera që nuk lajmërohen. Marrja e ryshfetit nga policia kufitare dhe ajo e trafikut, përbën një rrezik serioz për shoqërinë dhe vendin tonë”, ka thënë Islami.

Sipas tij, marrja e ryshfetit nga pjesëtarë të një institucioni i cili është gjithmonë i pari që ndeshet në luftën kundër drogës, prostitucionit, transportimit të materieve të rrezikshme etj, kjo përbënë rrezik serioz për sigurinë nacionale të vendit,transmeton Indeksonline

“Shtrohet pyetja çka fshihet pas një shume simbolike të shqiptimit të një tikete në komunikacion dhe polici ndihet i kënaqur me atë shumë, e në anën tjetër i dyshuari bartë drogë?, kjo pyetje do sqarim nga krerët e Policisë së Kosovës që nuk po e eliminojnë këtë dukuri të rrezikshme, e që janë përgjegjës për hierarkinë në një institucion siç është policia”, thotë Islami.
Kodi penal parasheh dënime

Në Kodin Penal të Kosovës, marrja e ryshfetit dhe dhënia e ryshfetit janë të klasifikuara si vepra penale dhe të dënueshme nga 6 muaj deri në 5 vjet, varësisht prej rastit.

Në nenin që flet për marrje të ryshfetit thuhet se, personi zyrtar i cili në mënyrë të drejtpërdrejtë apo të tërthortë, kërkon ose pranon ndonjë dhuratë apo përfitim tjetër për vete apo personin tjetër, ose që pranon ofertën apo premtimin për dhuratë apo përfitim të tillë, në mënyrë që personi zyrtar të veprojë ose të mos veprojë në pajtim me detyrën e tij zyrtare, dënohet me gjobë dhe me burgim prej gjashtë (6) muaj deri në pesë (5) vjet.

Kurse, në nenin që i përket dhënies së ryshfetit ndër të tjera thuhet se, kushdo që në mënyrë të drejtpërdrejtë apo të tërthortë, i premton, ofron ose i jep ndonjë dhuratë apo përfitim tjetër personit zyrtar, në mënyrë që ai person të veprojë ose të mos veprojë në pajtim me detyrën e tij zyrtare, dënohet me gjobë ose me burgim deri në tre (3) vjet.