Kryeministri i Kosovës, Hashim Thaçi me rastin e Ditës së drejtësisë deklaroi se qeveria dhe institucionet e Kosovës janë të përkushtuara maksimalisht që të ketë më tepër rend dhe ligj në Kosovë, që të ketë betejë më të suksesshme kundër korrupsionit, krimit të organizuar dhe të gjitha fenomeneve tjera negative.
Ai tha se asnjë çështje tjetër nuk është më thelbësore për Qeverinë e Republikës së Kosovës se sa garantimi i barazisë para ligjit dhe sundimi i ligjit.

“Të gjithëve ju kujtohet 22 korriku 2010, kur me padurim prisnim kur Gjykata Ndërkombëtare e Drejtësisë, të prezanton edhe publikisht opinionin për shpalljen e Kosovës së pavarur dhe sovrane. Ne, në Kosovë nuk e kemi pasur as edhe një dilemë më të voglën, sa i përket opinionit, sepse vendimi për shpalljen e Kosovës së pavarur dhe sovrane ishte vendim i përfaqësuesve legjitim të popullit të Kosovës, ishte respektim i plotë i vullnetit të qytetarëve të Kosovës për statusin e tyre politik, ishte një vendim që erdhi edhe si rezultat i bashkëpunimit të ngushtë dhe të koordinuar me bashkësinë ndërkombëtare. Tri vite më parë definitivisht dhe botërisht, opinioni i Gjykatës Ndërkombëtare e Drejtësisë tregoi, se shpallja e pavarësisë së Kosovës ishte plotësisht në përputhshmëri me të drejtën ndërkombëtare”, u shpreh Thaçi,transmeton Telegrafi

Ai deklaroi se shikuar nga aspekti historik përpjekjet tona të përhershme për drejtësi i shërbyen vendit tonë si udhërrëfyes për liri, barazi dhe paqe, kurse shikuar në kohën e sotme drejtësia i shërben Republikës së Kosovës për fuqizimin e sundimit të rendit dhe ligjit si dhe kontribuon në proceset integruese.

“Qeveria e Republikës së Kosovës më përkushtim të thellë, udhëheq proceset për arritjen e këtyre qëllimeve, ku njëri nga prioritetet që zë vendin më me peshë në këtë proces është sundimi i rendit dhe i ligjit që njëherësh paraqet prioritetin thelbësor të Qeverisë së Republikës së Kosovës”, tha ndër të tjera, kreu i ekzekutivit të Kosovës.

Në repartin e Ortopedisë, është shtruar edhe kryetari i Komunës së Skenderajt, Sami Lushtaku.

“Me rekomandim të specialistit të Ortopedisë, Z. Lushtaku është ndaluar për trajtim të mëtutjeshëm në kuadër të Klinikës së Ortopedisë”, ka konfirmuar zëdhënësi i QKUK-së, Shpend Fazliu për “Zërin”.

Ambasadori Selimi dhe kryetari Lushtaku, së bashku me pjesën tjetër të “Grupit të Drenicës”, vazhdojnë të mbahen në paraburgim.

Një femër e vitlindjes 1949, e ka informuar policinë në Prizren për siç thotë ajo, grabitjen e një zinxhiri të artë nga qafa nga ana e një të dyshuari të panjohur.
Ngjarja thuhet të ketë ndodhur në rrugën “De Rada” në Prizren diku rreth orës 13:15 min të datës 20 korrik.

Në atë kohë viktima kishte qenë duke lëvizur në drejtim të shtëpisë së saj, sakaq, befas, i dyshuari e godet nga mbrapa viktimën dhe me forcë ia rrëmben zinxhirin nga qafa që thuhet se vlente rreth 350 euro e më pas ik në drejtim të panjohur.
Sipas viktimës, i dyshuari ishte një djalë i moshës së re, përafërsisht rreth 16-17 vjeç

Policia e Kosovës njoftoi se dy të dyshuar janë arrestuar pasi kanë sulmuar një person si pasojë e një mosmarrëveshje që kishin pasur rreth një prone të përbashkët.

Ngjarja ka ndodhur në fshatin Semetishtë të Suharekës të dielën në ora 23:50.

Viktima ka pësuar lëndime trupore dhe ka marrë tretman mjekësor në Spitalin e Prizrenit. Dy të dyshuarit janë arrestuar dhe me urdhër të prokurorit janë dërguar në mbajtje.

Kryetari i Bashkimit Demokratik, Zafir Berisha ka konfirmuar se është takuar me kryeparlamentarin e Kosovës, Jakup Krasniqin. Ai tha se takimi me Krasniqin ka qenë miqësor. “Eshtë e vërtet se kam pirë kafe me Jakup Krasniqin. Takimi ka qenë miqësor “, tha Berisha për “PrizrenPress”.

Berisha, ditë më parë, përveç me kryeparlamentarin Krasniqi, është takuar edhe me deputetët e Vetëvendosjes Rexhep Selimin dhe Afrim Hotin. Burimet e “PrizrenPress-it” bëjnë të ditur se Berisha nga kryeparlamentari Krasniqi ka marrë përkrahje për zgjedhjet e nëntorit, ndërkaq me debutetët e VV-së ka diskutuar për një kualicion të përbashkët.

Kadidati i BD-së Zafir Berisha, ndërkaq i kontaktuar nga “PrizrenPress” nuk ka dhënë detaje rreth bisedës që ka zhvilluar me Krasniqin dhe debutetët e Vetëvendosjes, Selimin dhe Hotin. Ai tha se edhe takimi me Selimin dhe Hotin ka qenë miqësor. “ Unë kamë pirë kafe me miqtë e mi të vjetër . Pra, takimi ka qenë miqësor dhe i zakonshëm”, tha Berisha. /PrizrenPress.com/

Këshilltari i LDK-së, Ridvan Hoxha ka akuzuar Komunën e Prizrenit për një varg abuzimesh. Ai tha se keqqeverisja e Ramadan Mujës nuk ka të ndalur. “ Në kohën kur janë shpallë zgjedhjet dhe ku institucionet komunale janë në fund të mandatit të tyre qeverisës, keqqeverisja në komunën e Prizrenit nuk ka të ndalur. Kjo qeveri lokale me abuzimet e veta ,çdo ditë e më tepër e dëshmon se është e papërmirësueshme dhe në emër të pushtetit mbështetet në “ligjet” e ish -Jugosllavisë dhe në mënyrë institucionale grabitë qytetarët”, tha Hoxha.

Sipas tij, Administrata e Komunës së udhëhequr nga Ramadan Muja po i shfrytëzon të gjitha mjetet për të abuzuar me interesat jetike të qytetarëve. “ Drejtoria për Urbanizëm dhe Planifikim Hapësinor, duke u thirrur në emër të Ligjit mbi ndërtimin e objekteve investive sipas fletës zyrtare të Kosovës, nr. 5/1986”, i josh në mënyrë të paligjshme anëtarët e komisionit për pranimin teknik të objekteve, duke i detyruar qytetarët dhe subjektet tjera juridike,që në emër të pranimit teknik në xhirollogaritë private të anëtarëve të komisioneve të paguajnë një shumë të konsiderueshme të mjeteve “, tha Hoxha.

Sipas tij, qytetarët të cilët bëjnë legalizimin e objekteve të banimit, përpos taksave komunale, projektit arkitektural, paguajnë edhe nga 300 euro në xhirollogaritë bankare private të anëtarëve të këtyre komisioneve , të cilët anëtarë njëkohësisht janë në marrëdhënie pune në Drejtorinë Komunale të Urbanizmit dhe Planifikimit Hapësinor. “Dhe, më e keqja është së kjo pagesë bazën ligjore e gjen në ligjet e ish- Jugosllavisë të vitit 1986”, tha Hoxha.

“Tani më kur Kosova është shtet i pavarur, dhe kur Parlamenti i Republikës së Kosovës ka nxjerrë ligje të mjaftueshme bazuar ne praktikat dhe standardet evropiane, bile edhe për rastin konkret është aprovuar Ligji Nr. 03/L-048 i cili e ndalon kompensim shtesë sipas nenit 80: “nëse një punonjës, shërbyes civil ose zyrtar i një autoriteti publik ose organizatë buxhetore, sipas një akti të Qeverisë, kërkohet që të shërbejë në një komision, bord ose organ apo autoritet tjetër publik, ky punonjës, shërbyes civil ose zyrtar nuk ka të drejtë të pranojë, dhe nuk do të pranojë, kurrfarë kompensimi shtesë për këtë shërbim. Shërbimi konsiderohet pjesë e detyrave të obligueshme te postit te cilin e mbanë punonjësi, shërbyesi civil ose zyrtari i sipër cekur”.

Me qëllim të respektimit të ligjshmërisë, Hoxha ftoi publikisht për ndërhyrje ministritë përkatëse dhe organet e drejtësisë në nivel të shtetit që zyrtarët abuzues të japin përgjegjësi dhe me këtë të parandalohet grabitjen e më tejshme e qytetarëve.

“E them këtë, nga se, nga të gjitha identifikimet abuzive të cilat i kam bërë publike, kryetari në detyrë së bashku me vartësit e ti nuk kanë shpreh vullnet për tu ballafaqua me të vërtetën por përkundrazi kanë vazhdua të përdorin justifikimet e tyre të zakonshme tani më të njohura për qytetarin e Prizrenit. Me këtë, kjo qeveri lokale edhe një herë dëshmon se është e kapur keq nga krimi”, tha Hoxha./PrizrenPress.com/

Me rastin e tre vjetorit të opinionit këshillëdhënës të Gjykatës Ndërkombëtare të Drejtësisë, ministri i Punëve të Jashtme Enver Hoxhaj, iu ka dërguar nga një letër falënderimi të gjitha shteteve të cilat e kanë mbështetur Kosovën, në këtë proces.

Në telegram, ministri Hoxhaj ka shprehur mirënjohjen e popullit dhe Qeverisë së Republikës së Kosovës për qeveritë respektive, për përkrahjen që i kanë dhënë pavarësisë dhe shtetësisë së Kosovës në GJND, duke shprehur pozicionin e tyre në favor të pyetjes se “a është deklarata e pavarësisë së Kosovës në pajtim me të Drejtën Ndërkombëtare?”.

Hoxhaj thekson se vendimi afirmativ i GJND-së është një argument mbështetës shumë i rëndësishëm për të drejtën e Kosovës për shtetësi dhe sovranitet, i cili ka shërbyer si një përshpejtues i objektivit të Kosovës për kompletimin e njohjeve dhe anëtarësimin në organizmat ndërkombëtare.

“Vendimi i GJND-së është një argument mbështetës shumë i rëndësishëm për të drejtën e Kosovës për vetëvendosje dhe shtetësi, i cili është pasuar nga veprime të suksesshme të shtetndërtimit dhe konsolidimit që kanë luajtur një rol vendimtar në justifikimin e subjektivitetit ndërkombëtar të Kosovës. Në shtator 2012 përfundoi suksesshëm pavarësia e mbikëqyrur e Kosovës, e cila nënkupton gatishmërinë e Kosovës për t’iu bashkuar komunitetit ndërkombëtar, duke pranuar njohjen e plotë të pavarësisë dhe sovranitetit të saj, e po ashtu edhe duke u bërë pjesë e Kombeve të Bashkuara dhe organizatave të tjera të rëndësishme ndërkombëtare dhe rajonale”, shprehet Hoxhaj, në letër.

Ministri i Jashtëm i Kosovës thekson se vendimi pozitiv i GJND-së, gjithashtu ka hapur rrugën për dialog me Serbinë, me ndërmjetësim të Bashkimit Evropian.

“Më 19 prill 2013, është arritur marrëveshja e parë historike ndërmjet Republikës së Kosovës dhe Serbisë, e ndërmjetësuar nga BE, duke nënvizuar parimet që çojnë drejt normalizimit të marrëdhënieve ndërshtetërore. Përmes kësaj marrëveshjeje Serbia “de fakto” ka pranuar ekzistencën politike të Kosovës, ka pranuar sovranitetin dhe integritetin territorial të Kosovës, dhe po ashtu ka pranuar Kushtetutën dhe ligjet e Kosovës ”, shkruan ai.

Ministri Hoxhaj po ashtu vlerëson se ky zinxhir ngjarjesh së fundmi ka rezultuar me fillimin e negociatave për nënshkrimin e Marrëveshjes së Stabilizim Asociimit ndërmjet BE-së dhe Kosovës, e cila mundëson vendosjen e marrëdhënieve kontraktuale ndërmjet Kosovës dhe BE-së, “si parakusht për t’i përmbushur kushtet e nevojshme që të mund ta bëj kërkesën për anëtarësim në BE më kredibile”.

“Vendimi i GJND-së dhe angazhimi pasues i zhvilluar nga Qeveria e Kosovës me mbështetjen e komunitetit ndërkombëtar, ka siguruar argumente të mjaftueshme se Kosova është një rast unik, i pakrahasueshëm dhe i paprecedentë, që ka arritur të përmirësojë qeverisjen demokratike brenda vendit, të kontribuojë për paqen dhe stabilitetin rajonal, dhe nuk ka shkaktuar ndërkombëtarisht ndonjë efekt negativ zinxhir”, thotë Hoxhaj, në telegramin dërguar shteteve mike, duke shprehur mirënjohjen më të sinqertë për mbështetjen e vazhdueshme në konsolidimin e shtetësisë, njohjes ndërkombëtare dhe anëtarësimin e Kosovës në organizmat ndërkombëtare.

Ministri i Punëve të Jashtme i Kosovës, Enver Hoxhaj, me rastin e tre vjetorit të opinionit këshillëdhënës të GJND-së, sipas të cilit, pavarësia e Kosovës është në përputhje të plotë me të drejtën ndërkombëtare, i ka ridërguar nga një letër edhe shteteve anëtare të OKB-së, të cilat ende nuk e kanë njohur Republikën e Kosovës.

Në këtë letër, ministri Hoxhaj ka prezantuar argumentet e fuqishme dhe ka kërkuar që këto shtete të njohin shtetin e pavarur dhe sovran të Kosovës, ashtu siç kanë vepruar tashmë më shumë se gjysma e shteteve anëtare të OKB-së, thuhet në njoftim.