Të paktën 129 persona kanë humbur jetën si pasojë e përmbytjeve të shiut të rrëmbyeshëm në Ruandë.
Numri i të vdekurve vazhdon të rritet pasi përmbytjet dhe rrëshqitjet e dheut u shkaktuan nga shiu i madh që filloi javën e kaluar, tha Agjencia e Transmetimeve të Ruandës, shkruan Skynews, transmeton Klankosova.tv.
Kërkimi për viktima të tjera është duke u zhvilluar pas motit më ekstrem gjatë natës.
“Ky mund të jetë numri më i lartë i vdekjeve të shkaktuara nga fatkeqësitë që do të regjistrohet në vend në periudhën më të shkurtër, sipas të dhënave të disponueshme nga vitet e fundit”, thuhet në një deklaratë nga një media e mbështetur nga qeveria në Ruandë.
Sipas Agjencisë së Meteorologjisë së Ruandës priten edhe më shumë reshje shiu.
Nga janari deri në prill 60 njerëz u vranë në fatkeqësitë e lidhura me motin dhe rreth 1,205 shtëpi dhe 5,000 hektarë tokë në të gjithë vendin u shkatërruan.
Në të kaluarën, qeveria u ka kërkuar banorëve në zonat ligatinore të evakuohen.