Me një manifestim kulturor në shtëpinë e kulturës “Xhemajli Berisha” në Prizren, sot është shënuar 55 vjetori i shkollës së mesme të lartë teknike “11 Marsi”.
Pjesë e këtij manifestimi ishin nxënës, prindër, mësimdhënës, si dhe përfaqësues të institucioneve në Prizren dhe mysafirë të huaj.
Para të pranishmëve, në emër të këtij institucioni arsimor ka folur mësimdhënësja me e moshuar, Merdije Krasniqi, e cila tha se përkundër sfidave të ndryshme vizioni ynë për edukim, arsimim dhe aftësim të nxënësve po shënon suksese të vazhdueshme.
Për një fjalë rast, para të pranishmëve u paraqit edhe drejtori i Agjencisë për Arsim dhe Aftësim Profesional që funksionon në kuadër të MASHT-it, Ragip Gjoshi, i cili tha se aftësimi profesional hap perspektivë për punësim dhe vetëpunësim të gjeneratave të reja, si dhe pati fjalë miradije për punën në shkollën “11 Marsi”.
Ndërkaq, drejtori komunal për arsim në Prizren, Nexhat Çoçaj, kërkoi nga drejtuesit e shkollave të ciklit fillor të mesëm që të punojnë më tepër që nxënësit të orientohen në të ardhmen në numër më të madh në shkolla profesionale, siç është “11 marsi“ në Prizren.
Për të gjithë të pranishmit u shfaq një program i pasur artistik nga nxënësit e shkollës së muzikës muzikës “Lorenc Antoni” dhe SHMTL “11 Marsi”, si dhe një film dokumentar për punën në këtë institucioni, ndërsa gjatë ditës, në ambientet e shkollës ka qenë e hapur edhe një ekspozitë. /TV Prizreni/