Kanë kaluar 25 vite që nga ngjarja e madhe për faljen e gjaqeve, nga tubimet e mëdha në të cilat dikush fali gjakun e babait, dikush të birit e dikush të vëllait, duke ndërprerë hasmërinë mes shqiptarëve.
Më 2 shkurt të vitit 1990 në fshatin Lumbardh të Komunës së Deçanit, disa studentë të rajonit të Dukagjinit, ish-të burgosur politik, filluan aksionin për pajtimin e familjeve shqiptare në hasmëri, aksion ky që u shndërrua në një lëvizje për pajtimin e gjaqeve.
Në saje të angazhimit të shumë veprimtarëve në krye me Anton Çettën kjo lëvizje gjithëpopullore arriti të pajtoj mbi 1 mijë gjaqe e ngatërresa ndërshqiptare.
Nisma të tilla janë organizuar edhe më parë nëpër treva të ndryshme shqiptare, por organizimi i viteve 1990 kishte para vetes edhe një “mision të madh”: mobilizimin e shqiptarëve për rezistencë çlirimtare.
Më 1 maj të vitit 1990 te vendi i quajtur Varret e Llukes, në Komunën e Deçanit, u grumbulluan rreth gjysmë milioni shqiptarë, në përkrahje të kësaj lëvizjeje.
Ndonëse shkurti dhe maji që merren si pikënisje e aksionit, respektivisht lëvizjes për pajtimin e gjaqeve, kanë kaluar nën përkujdesjen e presidentes së Kosovës, Atifete Jahjaga, sot do të organizohet një akademi solemne në shënim të 25-vjetorit të pajtimit të gjaqeve. Akademia do të mbahet në ambientet e Hotelit Sirus në Prishtinë, duke filluar nga ora 11:00.
Më poshtë mund ta ndiqni një dokumentar që ka të bëjë me pajtimin e gjaqeve./KosovaLive/