Kryetari i Komunës së Malishevës, Ekrem Kastrati, priti sot në një takim pune Komandantin e KFOR-it për Rajonin e Perëndimit, kolonelin Francesco Errico, të cilit i uroi mirëseardhje dhe shprehu mirënjohje për mbështetjen e vazhdueshme ndaj komunës.
Gjatë takimit u diskutua për situatën e sigurisë në komunë, rëndësinë e bashkëpunimit ndërinstitucional si dhe për ruajtjen e paqes dhe stabilitetit në rajon. Të dy palët theksuan nevojën për vazhdimin e bashkëpunimit për të garantuar një ambient të sigurt dhe të qëndrueshëm për qytetarët e Malishevës.
Kryetari Kastrati falënderoi kolonelin Errico për angazhimin dhe kontributin në garantimin e sigurisë, ndërsa koloneli theksoi përkushtimin për të vazhduar bashkëpunimin e ngushtë me institucionet lokale dhe komunitetin në komunën e Malishevës.
Në fund të takimit, si shenjë vlerësimi për punën e qeverisjes lokale, koloneli Errico i dhuroi kryetarit Kastrati një pikturë nga vendlindja e tij.
Po sot, në Shkollën Fillore të Mesme të Ulët “Ismail Qemali” në Bellanicë, KFOR-i dhuroi 12 llaptopë dhe 12 projektorë për kabinetin e teknologjisë dhe informatikës. Në këtë ngjarje mori pjesë edhe Kryetari i Komunës, Ekrem Kastrati, i cili shprehu mirënjohjen për kontributin e dhënë dhe theksoi:
“Këto mjete mësimore do të ndikojnë drejtpërdrejt në përmirësimin e kushteve të të nxënit dhe zhvillimin e procesit mësimor, si për mësimdhënësit ashtu edhe për nxënësit.”
Donacioni u pranua nga drejtori i shkollës, Xhevdet Zogaj, i cili në fund i ndau një mirënjohje Komandantit të KFOR-it për Rajonin e Perëndimit, kolonelit Francesco Errico./PrizrenPress.com
