Shfaqja “Krejona” do të jetë në skenë sonte në Teatrin e Qytetit “Bekim Fehmiu” në Prizren, duke nisur në ora 20:00.
E shkruar dhe drejtuar nga Kaltrim Balaj, kjo shfaqje është rezultat i një procesi intensiv krijues që ka zgjatur më shumë se tre muaj, duke u zhvilluar si pjesë e një teatri laborator. Kjo shfaqje trajton lirinë e shprehjes dhe fuqinë e emrit si medium proteste, revolte dhe mënyrë e të shprehurit në shoqërinë shqiptare të Kosovës gjatë viteve ’80 dhe ’90. Në një periudhë të mbushur me tensione politike dhe shoqërore, emri bëhet një simbol identiteti, qëndrese dhe sfide ndaj shtypjes. Përmes një qasjeje eksperimentale dhe një gjuhe artistike të fuqishme, Krejona sjell në skenë historitë, ndjenjat dhe betejat e një populli për të ruajtur të drejtën për të folur, për të protestuar dhe për të ekzistuar.
Aktorët Alban Krasniqi, Edona Sopaj, Alban Morina dhe Alban Çela, do të interpretojnë rolet kryesore, ndërsa Lulzim Lushtaku do të luajë në piano dhe kontrabas./PrizrenPress.com
