Prokuroria Themelore në Prizren ka ngritur aktakuzë ndaj tre të pandehurve nën dyshimin se kanë kryer veprën penale të falsifikimit të parasë duke lëshuar në treg rreth 800 euro, nëpërmjet monedhave metalike të dy eurove.
Sipas aktakuzës, A.Th. më 11 qershor të vitit të shkuar në mëngjes kishte pranuar 284 monedha nga dy euro duke e ditur se janë false dhe pas kontrollit nga Policia iu gjetën në firmën në njërin prej tregjeve të Prizrenit. Aktakuza thekson se ai kishte në plan t’i lëshonte në treg monedhat false.
Ndërkaq, i akuzuari i dytë, B.M., në të njëjtën kohë kishte pranuar që t’i vinte në treg 63 monedha nga dy euro. Gjatë bastisjes atij iu gjetën 126 euro të falsifikuara.
Edhe te i akuzuari i tretë, L.K., ishin gjetur 50 monedha metalike false nga dy euro.
Në të tria rastet është vërtetuar përmes raportit të ekspertimit nga Agjencioni i Kosovës për Forenzikë se paratë janë falsifikim i plotë.