Agjencia Kosovare e Inteligjencës do të mbikëqyrët nga njerëz, të cilët me gjasë nuk do t’i nënshtrohen verifikimit nga ky institucion.
Megjithëse kishin planifikuar të kalonin më lehtë në mbledhjen e parë të këtij komisioni, temë diskutimi është bërë çështja e verifikimit të anëtarëve të tij.
Si mbledhje e parë konstituive, e nisën duke e prezantuar vetën, por Aida Dërguti nga Vetëvendosje ishte më e interesuar të flitej për verifikimin. Ajo këtë e vlerësoi si të domosdoshme, marrë parasysh profilin e punës të Agjencisë Kosovare të Inteligjencës.
Por, anëtarët e tjerë të Komisionit nuk e vlerësuan verifikimin si të nevojshëm.
Kryetari i komisionit, Haxhi Shala, ka theksuar se si deputetë të Kuvendit të Kosovës, verifikimi është i panevojshëm, megjithëse ka lënë mundësinë e hapur që kjo temë të hidhet në votim. Shala, për në mbledhjen e ardhshme të komisionit, ka paralajmëruar se do të ftohen edhe drejtuesit e Agjencisë Kosovare të Inteligjencës, për t’u njoftuar me anëtarët e rinj të komisionit.
Në përbërjen e kaluar të këtij komisioni, Florin Krasniqi i Vetëvendosjes, që ishte kryetar i tij, kishte kërkuar shumë herë verifikimin e anëtarëve, por një gjë e tillë nuk kishte ndodhur.