Kongresi i ri Shteteve të Bashkuara të Amerikës, i 114 me radhë, është mbledhur dje në Washington me ç’rast ka zgjedhur edhe lidershipin.
Është zgjedhur kryetari i Dhomës së Përfaqësuesve, John Boehner si dhe udhëheqësi i ri shumicës në Senat, senatorin Mitch McConnell.
Kongresi i ri Amerikan, pas tetë vjetësh, ka hyrë i dominuar nga republikanët konservatorë. Në Dhomën e Përfaqësuesve republikanët kanë 246 vende nga gjithsej 435, ndërkaq në Senat kanë 55 nga 100 anëtarë.
Udhëheqësi i Dhomës së Përfaqësuesve, kongresisti John Boehner do të jetë sërish figura e dytë me fuqi politike në pushtetin amerikan, raporton RTK.
Dy vjet më parë, në një takim me ish kryeparlamentarin e Kosovës, Jakup Krasniqi në Washington, Bohner deklaronte se ‘mbështetja amerikane për Kosovën që nga vendosja e ushtarëve deri tek ajo politike e diplomatike ka qenë dhe mbetet dypartiake’.
Udhëheqësi i Senatit në anën tjetër, Mitch McConnell ishte ligjdhënësi më këmbëngulës në Kongres për armatosjen e Ushtrisë Çlirimtare të Kosovës, një kërkesë që ai i drejtonte më 1999 qeverisë amerikane duke sponsorizuar për këtë edhe një rezolutë.
Kongresi amerikan me të drejt është quajtur djep i demokracisë i një vendi që ka ndryshuar botën. Pikërisht në Kongresin Amerikan tash e 25 vjet më parë filluan përpjekjet për ndryshimin e politikave të Departamentit të Shtetit për jetësimin e aspiratave politike dhe njohjen e së drejtës të Kosovës për vetëvendosje.
Përmes rezolutave të shumta, kongresistë, senatorë nga të dy dhomat ngrisnin vetëdijen e publikut dhe të Shtëpisë së Bardhë për përpjekjet e Kosovës për liri, për ta shndërruar më vonë politikën amerikane në flamurtar të ndryshimeve që sollën përfundimisht lirinë dhe njohjen ndërkombëtare.